¿Tleka iTlaixpantijkauan Jehová amo kitokayotiaj iglesia kanin monechikouaj?

Tlajtoli griego tlen omotekitilti itech Biblia tlen axkan kijtouaj “iglesia”, kijtosneki se tlanechikol, sekimej tlen monechikouaj, amo se kali kanin monechikouaj.

Se neskayotl, ijkuak apóstol Pablo okintlajkuilili akinmej okichiuayaj ken Cristo ompa Roma, okijto makintlajpalokan Áquila uan Priscila, okijto: “Noijki xiktlajpalokan iglesia tlen monechikouaj inkalijtik” (Romanos 16:5, Nueva Versión Internacional). Pablo okijto makintlajpalokan akinmej monechikouaj, tlanechikol tlen omonechikouaya itech non kalijtik.a

Ikinon amo tikiluiaj iglesia kanin timonechikouaj, tikiluiaj Kali kanin monechikouaj iTlaixpantijkauan Jehová.

¿Uan tleka kitokayotiaj Kali kanin monechikouaj iTlaixpantijkauan Jehová?

Matikitakan tleka ijkon tiktokayotiaj:

• Itech nin kali timonechikouaj.

• Ompa tikueyichiuaj Jehová, toTajtsin Dios tlen Biblia itech tlajtoua uan para titetlapouiskej (Salmo 83:18; Isaías 43:12).

• Noijki timonechikouaj para okachi timomachtiskej itech iTekiuajkayo toTajtsin Dios tlen Jesús otetlapoui miak (Mateo 6:9, 10; 24:14; Lucas 4:43).

Timitsyoleuaj xio itech Kali kanin timonechikouaj ik kanin tichanti uan tikitas ken tikinchiuaj tonechikoluan.