¿Akinmej yaskej iluikak?
Biblia kijtoua
ToTajtsin Dios yokinpejpenki sekimej yaskej iluikak uan ompa chantiskej ijkuak kinyolitiskej (1 Pedro 1:3, 4). Maski yokinpejpenki toTajtsin Dios ok moneki tlaneltokaskej uan kichiuaskej tlen ye kipaktia, tla amo ijkon kichiuaj, ayakmo yaskej iluikak (Efesios 5:5; Filipenses 3:12-14).
¿Tlen kichiuaskej iluikak?
Itech mil xiuitl yejuan yetoskej tekiuajkej uan teopixkej iuan Jesús (Apocalipsis 5:9, 10; 20:6). Yejuan tlanauatiskej itech tekiuajkayotl (Biblia kijtoua kijtosneki “yankuik ilwikak”) kinnauatiskej nochtin tlakamej (noso “yankuik tlali”). Nin tekiuajkayotl tlapaleuis para nochtin ma kichiuakan tlen kuali ijkon ken toTajtsin Dios okinekiaya (Isaías 65:17; 2 Pedro 3:13).
¿Keski yaskej iluikak?
Biblia kijtoua 144,000 kinyolitiskej uan yaskej iluikak (Apocalipsis 7:4). Apóstol Juan okitak “Ichkatsi (Jesús) omoketoka ipan Siontepetl. Ompa íwa okatkah se siento iwa ome póali iwa n nawi mil (144,000) tlakah” (Apocalipsis 14:1-3; Juan 1:29; 1 Pedro 1:19). Tepetl Sión, kineskayotia toTajtsin Dios kinkauilia Jesús uan 144,000 tlapejpenalmej, ma tlanauatikan itech iTekiuajkayo (Salmo 2:6; Hebreos 12:22).
Biblia kijtoua amo miakej yaskej iluikak, Jesús okintokayoti amo miakej ichkamej (Apocalipsis 17:14; Lucas 12:32). Nin kijtosneki maski miakej kichiuaj ken Cristo amo nochtin yaskej iluikak (Juan 10:16).
¿Tlen kineltokaj sekimej?
Tlen sekimej kineltokaj: Nochtin akinmej kichiuaj tlen kuali yaskej iluikak.
Tlen melauak: Itech Biblia toTajtsin Dios kijtoua akinmej yolkualmej chantiskej ipan tlaltikpak (Salmo 37:11, 29, 34).
Jesús okijto: “Amaka tlejkotika ilwikak” (Juan 3:13). Itech nin texto Jesús okinekiaya kijtos akinmej oixpolikej achto ualaskia nikan tlaltikpak, ken Abrahán, Moisés, Job uan David, amo oyajkej iluikak (Hechos 2:29, 34). Yejuan kinyolitiskej nikan ipan tlaltikpak (Job 14:13-15).
Akinmej yaskej iluikak yejuan “achto moyolitiskeh” (Apocalipsis 20:6). Satepan kinyolitiskej akinmej chantiskej ipan tlaltikpak.
Biblia kijtoua itech iTekiuajkayo toTajtsin Dios “ayakmó yetos mikílistli” (Apocalipsis 21:3, 4). Itech iluikak amikaj ixpoliui, ik non, tlen kijtoua itech nin texto mochiuas nikan tlaltikpak.
Tlen sekimej kineltokaj: Tejuan tikpejpenaskej kox tiaskej iluikak noso timokauaskej itech tlaltikpak.
Tlen melauak: ToTajtsin Dios kinmita itekipanojkauan yolmelajkej uan ye kimati akinmej kinpejpenas para tlanauatiskej iluikak (Filipenses 3:14). Akinmej kichiuaj ken Cristo, amo san yejuan kijtoskej tla yaskej iluikak (Mateo 20:20-23).
Tlen sekimej kineltokaj: Chantiskej itech tlaltikpak san akinmej amo kinnamiki yaskej iluikak.
Tlen melauak: Chantiskej itech tlaltikpak akinmej toTajtsin Dios kinnotsa “noaltepe”, “notekipanojkauan” uan “yejuan yetoskej ikoneuan Jehová tlen kinteochiuas” (Isaías 65:21-23). Yejuan ayakmo kipiaskej tlajtlakoli uan nochipa yoltoskej itech se xochitlali nikan tlaltikpak, ijkon ken okinekiaya toTajtsin Dios (Génesis 1:28; Salmo 115:16; Isaías 45:18).
Tlen sekimej kineltokaj: Apocalipsis kijtoua 144,000 pero xamo nin número kijtosneki okse tlamantli.
Tlen melauak: Itech Apocalipsis, sekimej números itlaj kineskayotiaj uan sekimej amo. Ijkon ken “oijkuilitokah intokah n májtlakteh iwa ome iapóstoles n Ichkatsi” (Apocalipsis 21:14). Pero ma tikitakan tleka 144,000 kema kijtoua keski yaskej iluikak.
Apocalipsis 7:4 kijtoua “144,000 non okinmixkuaneskayotijkeh” kijtosneki yejuan yaskej iluikak. Satepan kijtoua “ijkuak yotlanki onikitak nochi ni, onikinmitak senmiaktikeh tlaltikpaktlakah non ayakmaka oweletia okimpoaya”. Ninmej “senmiaktikeh tlaltikpaktlakah” noijki momakixtiaj (Apocalipsis 7:9, 10). Tla amo san 144,000 yaskej iluikak amo kijtoskija “senmiaktikeh tlaltikpaktlakah” noijki kinmakixtiskej uan amo monekiskia kijtos katej ome grupos.a
Noijki Biblia kijtoua 144,000 “okinkojkeh itech nochteh n tlaltikpaktlakah para mayetokah non achto tlamana” (Apocalipsis 14:4). Tlajtoli “achto tlamana” kijtosneki tlapejpenalmej. Ik non, kinnamiki ijkon ma kinnotsakan akinmej ualtlanauatiskej iuan Jesús nikan tlaltikpak, porque san sekimej kichiuaskej non tekitl (Apocalipsis 5:10).
a Ixtlamatki Robert Thomas okijkuilo tlen kijtoua Apocalipsis 7:4: “Non número techyekiluia keski, pero itech Apocalipsis 7:9 amo techiluia keski. Tla tikijtoskej número 144,000 san itlaj kineskayotia, okseki números tlen ijkuilitokej itech Apocalipsis noijki amitlaj kijtosneki, pero amo ijkon” (Revelation 1-7: An Exegetical Commentary [Comentario exegético de Apocalipsis 1-7], página 474).