NOCHTIN akinmej kipiaj inreligión motlatlaujtiaj. Maski san kanin katej, itech teopan, sinagogas, mezquitas, pagodas, santuarios uan sekimej kitekitiltiaj rosarios, nochtin motlatlaujtiaj maski katej inselti noso amo.

Maski onka miak tlamantli tlen yoltok ipan tlaltikpak, san tlakamej uan siuamej ueli timotlatlaujtiaj. Ijkon ken yolkamej tejuan titlakuaj, tikonij atl uan timijyotiaj. Noijki tinesij, timoskaltiaj uan tiixpoliuij (Eclesiastés 3:19). Pero san tejuan timotlatlaujtiaj. ¿Tleka?

Porque ijkuak timotlatlaujtiaj techpaleuia kuali ma timouikakan iuan toTajtsin Dios. Biblia kijtoua toTajtsin Dios ijkon otechchijchi (Eclesiastés 3:11). Jesús okijto: “Ma yolpakikan akinmej kimatij moneki kitemoskej toTajtsin Dios” (Mateo 5:3, TNM).

Axkan tikmatij tleka onka miak templos uan okseki tlamantli tlen ika motlatlaujtiaj uan tleka uejkauaj ijkuak ijkon kichiuaj. Sekimej hasta kitemouaj ikaj ma kinpaleui para amo momachiliskej inselti. Pero, ¿melauak yolpakij ijkuak ijkon kichiuaj? Tejuan amo tichikauakej, san niman tiixpoliuij uan amo nochi tikajsikamatij. San akin amo keman ixpoliui, ixtlamatki uan kipia chikaualistli uelis techpaleuis. Pero ¿tleka timotlatlaujtiaj?

¿Se tonal yomitspanok seki tlamantli amo kuali uan amikaj omitspaleui noso omitsilui tlen uelis tikchiuas? Xamo akin otiktlasojtlaya oixpoliuik, otikchi itlaj amo kuali noso itlaj omonekiaya tikpejpenas, ¿otikmachili amikaj omitsyolseui, amikaj omitstlapojpolui noso amikaj omitsilui tlen uelis tikchiuaskia?

Biblia techiluia ijkuak timotlatlaujtiaj techpaleuia kuali ma tiyetokan. Noijki kijtoua miakej tlakamej uan siuamej okitlatlaujtijkej toTajtsin Dios para ma kinyolseui, ma kintlapojpolui uan ma kinyekana uan okinkak ijkuak itlaj okitlajtlanijkej (Salmo 23:3; 71:21; Daniel 9:4, 5, 19; Habacuc 1:3).

Nochtin akinmej omotlatlaujtiayaj itlaj okimatiayaj. Yejuan okimatiayaj akin kitlatlaujtiskej para ma kinkaki pero axkan miakej amo kimatij akin kitlatlaujtiskej.

AXKAN miakej kijtouaj amo moneki ikaj ma tiktlatlaujtikan porque nochi tlen timotlatlaujtiaj kikaki toTajtsin Dios. Akinmej kinpaleuiaj nochi religiones ijkon mokuayejyekouaj. Pero ¿non melauak?

Biblia kijtoua miakej amo kitlatlaujtiaj toTajtsin Dios. Yiuejkika ijkuak okijkuilojkej Biblia miakej okintlatlaujtiayaj teotsitsintin. Pero toTajtsin Dios okilui ialtepe amo ijkon ma kichiuakan. Itech  Salmo 115:​4-6 kijtoua teotsitsintin “kinpiaj inakasuan pero amo tlakakij”. Ik non, ¿melauak techpaleuia tla tiktlatlaujtiaj se teotsin akin amo techkaki?

Para tikajsikamatiskej, ma tikitakan tlen okinmilui profeta Elías nochtin teopixkej tlen okitekichiuiliayaj Baal. Elías kitlatlaujtiskia iDios uan yejuan kitlatlaujtiskiaj Baal uan akin kinnankiliskia kiteititiskia ye Dios akin melauak kajki. Teopixkej tlen okitekichiuiliayaj Baal san niman opejkej motlatlaujtiaj. Opanok miak horas pero amikaj okinnankili uan amikaj okinkak (1 Reyes 18:29). ¿Ijkon okipanok Elías?

Amo, porque ijkuak otlanki omotlatlaujti, toTajtsin Dios san niman okiualtitlanki tlitl uan okitlati tlen Elías okimanili. ¿Tleka san Elías okinnankilijkej? Itech 1 Reyes 18:​36, 37 kijtoua ken omotlatlaujti Elías. Ijkuak omotlatlaujti ika tlajtoli hebreo kanaj eyi uelta okinotski toTajtsin Dios ika itoka: Jehová.

¿Tleka ijkon opanok? Ma tikitakan se tlamantli, Baal kijtosneki “toteko” ijkon okinotsaya iDios cananeos uan ijkon okinmiluiayaj oksekimej teotsitsintin. Pero toTajtsin Dios san ye itoka Jehová. Ye ijkon okijto: “Ne niJehová. Ijkon notoka uan amikaj okse nikmakas noueyilis nion noueyichiualis” (Isaías 42:8).

Ik non, ¿san se Dios akin okitlatlaujtijkej Elías uan teopixkej akinmej okiueyichiuaya Baal? Amo. Ijkuak okiueyichiuayaj Baal otemiktiayaj, oauilnemiayaj uan okintlajyouiltiayaj oksekimej. Pero ijkuak okiueyichiuayaj Jehová okatka chipauak porque ye amo okichiualtiaya ialtepe ma kichiua tlen pitsotik. Ik non, tlen okitlatlaujtiayaj Jehová amo okikakiaya Baal. Ma tikijtokan tiktitlaniliaj se carta se toyolikni ¿tiknekiskiaj ma kiseli akin amo yolkuali? Amo tiknekiskiaj ijkon ma pano.

Akinmej kitlatlaujtiaj Jehová, kitlatlaujtijtokej akin nochi okichijchi, ye toTajtsin.a Ijkuak profeta Isaías omotlatlaujti okijto: “Te Jehová, titoTajtsin” (Isaías 63:16). Jesús okinmilui imachtijkauan: “Nitlejkos íwa Notajtsi, Akin noiwa Nomotata, íwa Nodios, akin noiwa Nomodios” (Juan 20:17). Ik non, iTajtsin Jesús ye Jehová, noijki ye iDios uan imachtijkauan noijki omonekiaya kitlatlaujtiskej (Mateo 6:9).

Pero ¿Biblia kijtoua ma tiktlatlaujtikan Jesús, María, teotsitsintin noso ángeles? Amo, san moneki tiktlatlaujtiskej Jehová. Ma tikitakan ome tlamantli. Achto, porque ijkuak timotlatlaujtiaj tikteititiaj tikueyichiuaj toTajtsin Dios uan Biblia kijtoua san Jehová moneki tikueyichiuaskej (Éxodo 20:5). Ome, porque ye kinkaki akinmej kitlatlaujtiaj (Salmo 65:2). Jehová kinkauilia oksekimej ma kipaleuikan pero san ye techkaki ijkuak timotlatlaujtiaj.

Tla tiknekij ma techkaki Jehová ijkuak timotlatlaujtiaj, moneki san ye ma tiknotsakan. Biblia kijtoua: “Nochi akin kijtos itoka Jehová momakixtis” (Hechos 2:21). ¿Kijtosneki toTajtsin Dios nochtin kinkaki ijkuak motlatlaujtiaj porque kinotsaj ika itoka? Noso ¿ ok moneki itlaj kichiuaskej?

MIAKEJ itech inreligión kinmachtiaj moneki motlankuaketsaskej uan kijtoskej miak tlamantli ijkuak motlatlaujtiaj, pero Biblia amo ijkon tlamachtia. Ompa kijtoua ken uelis timotlatlaujtiskej.

Biblia kijtoua sekimej itekipanojkauan Jehová omotlatlaujtijkej maski san kanin okatkaj. Sekimej chikauak okitlatlaujtijkej toTajtsin Dios uan sekimej san itech inyolo. Noijki Biblia kijtoua miakej omoketokaj, omotlankuaketskej uan sekimej omotlalijkej pero amo okintekitiltijkej imágenes, rosarios noso okse tlamantli, yejuan omotlatlaujtijkej ika nochi inyolo. ¿Tleka toTajtsin Dios okiyolpakti ken omotlatlaujtiayaj?

Achto, okitlatlaujtijkej Jehová. 1 Juan 5:14 kijtoua: “Titlaneltokah inawak Dios, porke tikmatih Ye techkaki tla itla tiktlajtlaniliah non Ye kipaktia”. Ik non, ijkuak timotlatlaujtiaj moneki tikchiuaskej ken Jehová kineki. ¿Tlen kijtosneki?

Moneki tikmatiskej tlen kipaktia toTajtsin Dios. Ik non, moneki ma timomachtikan iTlajtol. Ye amo techiluia ma tikilnamiktokan nochi tlen kijtoua Biblia. Pero kema kineki ma tikajsikamatikan ken mokuayejyekoua uan ijkon ma tikchiuakan tlen ye kipaktia (Mateo 7:​21-23). Ijkuak timotlatlaujtiaj moneki tikteititiskej melauak timomachtiaj Biblia.

Ijkuak okachi timomachtiaj tlen kipaktia Jehová, okachi titlaneltokaj. Sapanoua ipati ma titlaneltokakan, ijkon toTajtsin Dios techkakis ijkuak timotlatlaujtiskej, Jesús okijto: “Iwa nochi tlan nonkitlajtlaniliskeh itech nomotiotsajtsilis, nonkiseliskeh tla nonkineltokah ijkó mochiwas” (Mateo 21:22). Titlaneltokaskej kijtosneki tikneltokaskej seki tlamantli maski amo tikitaj pero non amo kijtosneki nochi tikneltokaskej. Tlen Jesús okijto kiteititia ma tikneltokakan tlen melauak panos (Hebreos 11:1). Amo ueli tikitaj Jehová pero Biblia kiteititia melauak kajki, uelis tikneltokaskej uan ye kinmaluia akinmej kineltokaj. Ijkuak tikiluiaj Jehová ma techpaleui okachi ma titlaneltokakan, amo kualani, ye kipaktia ijkon ma tikiluikan (Lucas 17:5; Santiago 1:17).

Moneki tikmatiskej okse tlamantli tlen miak ipati para toTajtsin Dios ma techkaki. Jesús okijto: “Sanwel akin nechtlakita weletis [motokis iuan] Notajtsi” (Juan 14:6). Nin kijtosneki, san Jesús uelis techpaleuis ma timotokikan inauak Jehová. ¡Ik non, Jesús okinmilui imachtijkauan ma motlatlaujtikan ika itoka! (Juan 14:13; 15:16). Ijkuak timotlatlaujtiskej ika itoka Jesús amo kijtosneki ye tiktlatlaujtiskej. Tla ijkon tikchiuaj, tikteititiaj tikajsikamatij san Jesús techpaleuia ma tiktlapouikan iuan toTajtsin Dios akin santo.

Se tonal, se imachtijka Jesús okilui: “Tejwatsi, techmachti kenijki timotiotsajtsiliskeh” (Lucas 11:1). ¿Tlen okinekiaya kijtos? Imachtijkauan Jesús yokimatiayaj ken motlatlaujtiskej. Pero okinekiayaj kimatiskej tlen uelis kitlajtlaniskej ijkuak motlatlaujtiskiaj.

MIAKEJ okachi motlatlaujtiaj padrenuestro porque non Jesús otlamachti. Pero amo nochtin kajsikamatij tlen kijtosneki ijkuak ijkon motlatlaujtiaj. Miak uelta kijtoua padrenuestro pero amo kichiuaj tlen ompa kijtoua pero Jesús amo okinekiaya ijkon ma kichiuakan. ¿Tleka ijkon tikneltokaj?

Porque ijkuak otlamachti, ye okijto: “Iwa ijkuak nonmotiotsajtsiliskeh, amo san ompa xikojpatilijtokah nomotlajtol” (Mateo 6:7). Ik non, ijkuak Jesús okijto padrenuestro amo okijto nochipa ma kijtojtokan ijkuak motlatlaujtiaj. Jesús otlamachti ken omonekiaya motlatlaujtiskej uan tlen uelis kitlajtlaniskiaj. Ik non, ma tikitakan tlen techmachtia ijkuak Jesús omotlatlaujti, kajki itech Mateo 6:9-13.

“Totajtsi Dios non timoitstika ilwikak, nochipa makiyektenewakah motoka”.

Achto, Jesús okinmilui imachtijkauan san omonekiaya kitlatlaujtiskej iTajtsin. Pero ¿tleka okijto moneki mochipauas itoka?

Porque yiuejkika miakej san kiteneuaj itoka toTajtsin Dios. Satanás sapanoua kikokolia Jehová, ye kijtoua toTajtsin Dios san tlakajkayaua, amo kinamiki tlanauatis uan amo kineki kuali ma tiyetokan (Génesis 3:1-6). Akinmej kichiuaj ken Satanás tlamachtiaj tlen amo melauak uan kijtouaj toTajtsin Dios amo kitekipachoua tlen techpanoua, techtlajyouiltia, momakopa uan noijki kijtouaj amo otlachijchi. Sekimej ayakmo okitlalijkej itoka toTajtsin Dios itech Biblia uan ayakmo kinekij ma kinotsakan ika itoka.

Biblia kijtoua toTajtsin Dios san niman kipojpolos nochi tlen amo kuali (Ezequiel 39:7). Noijki tlayektlalis itech tlaltikpak uan kinteochiuas akinmej nikan chantiskej. ¿Ken kichiuas? Jesús okijto ken mochiuas.

“Xiwalmuika xitlanawatiki”.

Axkan akinmej tlayekanaj itech religiones, amo kijtouaj tlen melauak kijtosneki iTekiuajkayo toTajtsin Dios. Ijkuak Jesús okatka nikan tlaltikpak amo ijkon opanouaya. Judíos okimatiayaj tlen okijtouayaj profecías itech Mesías, okimatiayaj toTajtsin Dios okipejpenki para kiyekanaskia se Tekiuajkayotl uan ijkon tlayektlalis nikan tlaltikpak (Isaías 9:​6, 7; Daniel 2:44). Nin Tekiuajkayotl tlen yokitlali toTajtsin Dios, kichipauas itoka, kiteititis Satanás tlakajkayaua, kitlanilis uan kipojpolos tlen okichi. Noijki kipojpolos guerras, kokolistli, apistli uan mikilistli (Salmo 46:9; 72:​12-16; Isaías 25:8; 33:24). Ik non, ijkuak tiktlajtlaujtiaj toTajtsin Dios ma uiki iTekiuajkayo, tikiluiaj ma mochiua tlen ye yokijto.

“Mamochiwa tlan Tejwatsi tikmonekiltia itech nin tlaltíkpaktli, ijkó kemi mochiwa kan ilwikak”.

Nonmej tlajtolmej techititia toTajtsin Dios kichiuas nikan tlaltikpak tlen kineki, ijkon ken yomochi ompa iluikak ijkuak Jesús okintlanili Satanás uan amo kuali ejekamej okinualtlamotlakej (Apocalipsis 12:​9-12). Ijkuak ijkon tiktlatlaujtiaj techilnamiktia sapanoua ipati ma tikchiuakan tlen kineki Jehová uan amo tlen tejuan tiknekij. Tinochtin techpaleuis ijkuak toTajtsin Dios kichiuas nikan tlaltikpak tlen kineki. Maski Jesús amo okatka tlajtlakole, okijto: “Pero amo mamochiwa kemi Ne nikneki, yej kemi Tejwatsi tikmonekiltia” (Lucas 22:42).

“Techmaka nochi tonati tlan tikmomajsewiskeh”.

Jesús okijto ijkuak timotlatlaujtiskej ma tikiluikan Jehová nochi tlen techtekipachoua. Ken tikitaj, uelis tikiluiskej Jehová ma techmaka tlen ika timopanoltiskej. Ijkuak ijkon tiktlatlaujtiaj tikteititiaj san Jehová ye akin “kichiwa matiyolitokah, iwa techmaka toijyotilis, iwa nochi tlan onka wits de Ye” (Hechos 17:25). Biblia kijtoua, Jehová ken se teta tlen sapanoua tetlasojtla uan kinmaka ikoneuan tlen kinpoloua. Pero amo kinmakas itlaj tlen uelis kichiuas ayakmo kuali ma yetokan, maski sapanoua kitlajtlaniliskej.

“Techintlapojpolwili totlajtlakolwah”.

¿Tlen tikuikiliaj Jehová? ¿Uan tleka tiknekij ma techtlapojpolui? Maski miakej kijtouaj amo titlajtlakolejkej Biblia kema kijtoua titlajtlakolejkej, ik non, titlajyouiaj uan tiixpoliuij. Ijkuak tinesij yititlajtlakolejkej, ik non, tinochtin tikchiuaj tlen amo kuali uan tikyolkokouaj Jehová. Ik non, tla tiknekij nochipa tiyoltoskej, moneki tiktlajtlaniliskej toTajtsin Dios ma techtlapojpolui (Romanos 3:23; 5:12; 6:23). Pero Biblia noijki techiluia Jehová sapanoua yolkuali uan kineki techtlapojpoluis (Salmo 86:5).

“Techmakixti imak n amokualitlakatl”.

Tinochtin tiknekij san niman ma techpaleui toTajtsin Dios. Xamo miakej mokuayejyekouaj amo melauak kajki Satanás. Pero Jesús okimatiaya kema kajki, ik non, okijto ye “akin kinawatia nin tlaltíkpaktli” (Juan 12:31; 16:11). Diablo kiyekantok uan kinauatijtok nin tlaltikpak, noijki kineki techkajkayauas para ayakmo ma timouikakan iuan toTajtsin Dios (1 Pedro 5:8). Pero tejuan amo moneki timomojtiskej porque toTajtsin Dios sapanoua chikauak uan ye kineki kinpaleuis akinmej kitlasojtlaj.

Noijki onka miak tlamantli tlen uelis tikiluiskej Jehová ijkuak tiktlatlaujtiaj. Itech 1 Juan 5:14 kijtoua: “Ye techkaki tla itla tiktlajtlaniliah non Ye kipaktia”. Nin kijtosneki uelis tikiluiskej nochi tlen techtekipachoua uan tikmatij ye sapanoua kipatioita ijkuak ijkon tiktlatlaujtiaj (1 Pedro 5:7).

¿Kanin uan keman moneki timotlatlaujtiskej? ¿Tlen kijtoua Biblia? Itech okse tlamachtil, non tiknankiliskej.

ITECH nochi tlaltikpak miakej tlen kipiaj inreligión kijtouaj kanin uan tlen hora moneki motlatlaujtiskej. Pero, ¿Biblia ijkon kijtoua?

Kema, ompa kijtoua moneki tikitaskej keman uan kanin uelis timotlatlaujtiskej. Jesús achto okitlasojkamatiliaya Jehová uan satepan otlakuaya (Lucas 22:17). Imachtijkauan omotlatlaujtiayaj ijkuak san sekan omonechikouayaj para kiueyichiuaskej Jehová. Yiuejkika ijkon okichiuayaj, kanin omonechikouayaj judíos uan itech templo ompa Jerusalén. ToTajtsin Dios okijto: “Nocha kinotsaskeh [kitokayotiskej] kali kan motiotsajtsiliskeh nochteh n tlaltikpaktlakah” (Marcos 11:17).

ToTajtsin Dios kipaktia ma monechikokan itekipanojkauan uan san sekan ma motlatlaujtikan ijkon ken kijtoua Biblia. Noijki san sekan moyolchikauaj para kichiuaskej tlen tlamachtia Biblia (Hebreos 13:18, 19). Ik non, iTlaixpantijkauan Jehová motlatlaujtiaj ijkuak monechikouaj. Tla tikneki tikinkakis ken motlatlaujtiaj, uelis inmiuan timonechikos ik ompa kanin tichanti.

Pero Biblia amo kijtoua san ma timotlatlaujtikan kanin timonechikouaj noso san seki horas. Ompa kiteititia sekimej itekipanojkauan toTajtsin Dios san kanin omotlatlaujtiayaj uan san tlen hora. Jesús okijto: “Ijkuak timotiotsajtsilis, xikchiwa moselti. Xikalaki mocha, ximokaltsakua iwa ompa ximotlapowi san ichtaka iwa n Dios Motajtsi, iwa Ye mitsmakas tlan tiktlajtlanilis san ichtaka” (Mateo 6:6).

¿Mitstlajtlachialtia tikmatis toTajtsin Dios mitskaki ijkuak timotlatlaujtia maski san kanin tiyetos noso san tlen hora tiknotsas? Nin kiteititia tleka Jesús iselti okitlatlaujtiaya iTajtsin. Se tonal, Jesús itlaj kipejpenaskia, ik non, omotlatlaujti nochi se youak (Lucas 6:​12, 13).

Noijki sekimej tlakamej uan siuamej okitlatlaujtijkej Jehová para ma kinpaleui kuali ma kipejpenakan tlen kichiuaskiaj noso ma kinpaleui ijkuak okinpanotoka tlen amo kuali. Xamo sekimej chikauak omotlatlaujtijkej noso san ichtaka pero nochipa okiluijkej Jehová ma kinpaleui. Jehová techiluia: “Ixmostla ximotiotsajtsilijtokah” (1 Tesalonicenses 5:17). ¿Ken tikita tlen Jehová techiluia ma tikchiakan? Ye kijtoua nochipa kineki kinkakis itekipanojkauan ijkuak motlatlaujtiaj.

Pero miakej motlajtlaniaj kox melauak techpaleuia ijkuak timotlatlaujtiaj. Xamo tejuatsin noijki ijkon yotimotlajtlani.

MIAKEJ mokuayejyekouaj amo techpaleuia ijkuak timotlatlaujtiaj. Pero Biblia amo ijkon kijtoua (Lucas 22:40; Santiago 5:13). Ijkuak timotlatlaujtiaj amo san techpaleuia kuali ma timouikakan iuan toTajtsin Dios, noijki techpaleuia kuali ma timokuayejyekokan uan kuali ma timomachilikan. ¿Tleka ijkon tikijtoua?

Ma timokuayejyekokan: ijkuak konemej itlaj kintliokoliaj, ¿tlen kinmiluiaj intatajuan ma kichiuakan? Yejuan kinmititiaj amo san moneki yolpakiskej, noijki moneki motlasojkamatiskej porque itlaj okintliokolijkej. Uan ijkuak timotlasojkamatij, okachi tiyolpakij uan kuali timouikaj. Noijki, ijkon panoua ijkuak tiktlatlaujtiaj toTajtsin Dios. Ma tikitakan ken techpaleuis tlen tikijtoskej ijkuak timotlatlaujtiskej.

Ma timotlatlaujtikan para timotlasojkamatiskej. Tiktlasojkamatiliaj toTajtsin Dios porque tikitaj ken yotechteochi. Ik non, okachi timotlasojkamatij, tiyolpakij uan timokuayejyekouaj nochi kuali yetos (Filipenses 4:6).

Ijkuak Jesús omotlatlaujti okitlasojkamatili iTajtsin porque okikak (Juan 11:41).

Ma timotlatlaujtikan para ma techtlapojpolui. Tla otitlajtlakolchijkej, ma tiktlatlaujtikan toTajtsin Dios ma techtlapojpolui, ijkon ayakmo timoyolkokoskej. Non noijki techpaleuis ma titlalnamikikan porque tikajsikamatiskej otitlajtlakolchijkej uan noijki tiknekiskej timoyolkopaskej.

David omoyolkopki, ik non, omotlatlaujti (Salmo 51).

Ma tiktlatlaujtikan ma techyekana uan ma techmaka ixtlamatilistli. Non techpaleuis ma tiyetokan tiyolyamankej porque techilnamiktis tlen uelis tikchiuaskej uan tlen amo, noijki techpaleuis ma tikneltokakan toTajtsin Dios uan amo tlen tejuan timokuayejyekouaj (Proverbios 3:​5, 6).

Salomón okitlatlaujti Jehová ma kiyekana uan ma kimaka ixtlamatilis para uelis tlanauatiskia itech altepetl Israel (1 Reyes 3:​5-12).

Ma timotlatlaujtikan ijkuak titlajyouiaj. Ijkuak itlaj techtekipachos, sapanoua techpaleuis timotlatlaujtiskej ika nochi toyolo uan tikiluiskej Jehová ken timomachiliaj. Ijkon, tikkauiliskej san ye ma techpaleui (Salmo 62:8).

Tekiua Asá okitlatlaujti Jehová ijkuak moteuiskia iuan akinmej okikokoliayaj (2 Crónicas 14:11).

Ma tiktlatlaujtikan ma kinpaleui oksekimej. Ijkon tikteititiskej amo titenexikolitaj uan timochijchikauaskej titeiknomatiskej uan titeajsikamatiskej.

Jesús okitlatlaujti toTajtsin Dios ma kinpaleui imachtijkauan (Juan 17:​9-17).

Ma timotlatlaujtikan para tikueyichiuaskej Jehová. Ijkuak tikitaj ken iyelis uan ken otlachijchi, okachi tiktlakaitaskej uan tiktlasojtlaskej. Noijki ijkuak ijkon tiktlatlaujtiskej okachi kuali iuan timouikaskej.

David okiueyichi Jehová ijkuak okitlatlaujti porque kualtsin otlachijchi (Salmo 8).

Pero amo san non techpaleuia ijkuak timotlatlaujtiaj, noijki tikpiaj “Iyolsewilis Dios, non amaka weleti kajsikamati” (Filipenses 4:7). Sapanoua tiyolpakij uan tikpatioitaj porque kuali timomachiliaj uan amo okachi timotekipachouaj. ¡Non techpaleuia amo okachi ma timokokokan! (Proverbios 14:30.) Pero ¿ken uelis tikpiaskej yolseuilistli? ¿San moneki timochijchikauaskej noso itlaj moneki tikchiuaskej?

MIAKEJ kinekij kimatiskej tlen tlanankilia Biblia. Yotikitakej toTajtsin Dios amo nochipa kikaki ijkuak tiktlatlaujtiaj. Xamo timotlajtlaniaj, ¿techkaki toTajtsin Dios ijkuak tiktlatlaujtiaj? Kema. Tla tiktlajtlaniliaj tlen ye kineki.

Jesús okijto amo kuali okichiuayaj fariseos porque ijkuak omotlatlaujtiayaj okijtouayaj otlaneltokayaj pero amo ijkon okiteititiayaj, san okinekiayaj kintlajtlachialtiskej oksekimej uan ma kinmitakan yejuan otlaneltokayaj. Jesús okijto yejuan yokipiayaj intetliokolil uan amo okinekiayaj toTajtsin Dios ma kinkaki, yejuan san okinekiayaj oksekimej ma kintlakaitakan (Mateo 6:5). Axkan noijki ijkon panoua. Miakej ijkuak motlatlaujtiaj san mokuayejyekouaj tlen yejuan kinekij uan amo tlen kineki toTajtsin Dios. Amo kichiuaj ken kijtouaj principios bíblicos, ik non, amo kinnankiliaj.

¿Uan tejuan tlen moneki tikchiuaskej? Amo moneki tipouiskej itech se altepetl noso tikpiaskej miak tomin para ma technankili Jehová ijkuak tiktlatlaujtiaj. Biblia kijtoua “Dios amo kintlasojtla san sikimeh, iwa oksikimeh amó”. Noijki kijtoua “itech nochi nin tlaltíkpaktli, Dios kinselia akimeh kitlakitah iwa kichiwah tlan kuali” (Hechos 10:​34, 35). Ik non, akinmej kitlakaitaj toTajtsin Dios, sapanoua kitlasojtlaj uan amo kichiuaj tlen amo kipaktia. Akin kichiua tlen kuali, mochijchikaua kichiuas tlen Jehová kineki uan amo tlen ye kineki noso tlen oksekimej kinekij. Tla tiknekij toTajtsin Dios ma techkaki ijkuak tiktlatlaujtiaj, moneki tikchiuaskej ken kijtoua iTlajtol.a

Pero, miakej kinekij toTajtsin Dios san niman ma kinnankili ika se milagro. Yiuejkika, amo nochtin okinnankili ika se milagro. Ijkuak tiktlajtoltiaj Biblia tikitaj opanouaya miak xiuitl ijkuak oksepa okinnankiliaya ika se milagro. Biblia noijki kiteititia ijkuak ixpoliuiskiaj apóstoles ayakmo yetoskiaj milagros (1 Corintios 13:​8-10). Non amo kijtosneki toTajtsin Dios amo technankilia ijkuak tiktlatlaujtiaj. Ma tikitakan ken technankilia Jehová.

Techpaleuia ma tiyetokan ixtlamatkej. ToTajtsin Dios, ye sapanoua ixtlamatki uan kipaleuiaj ma yetokan ixtlamatkej akinmej kitlajtlaniliaj uan mochijchikauaj nochipa kitlakamatiskej (Santiago 1:5).

Techmaka espíritu santo. Amikaj uelis kichiuas ken espíritu santo porque ichikaualis toTajtsin Dios tlen ika techpaleuia. Espíritu santo techpaleuia ma titlaxikokan ijkuak titlajyouiaj, techyolseuia ijkuak timotekipachouaj uan techpaleuiaj ma tikchiuakan tlen kuali (Gálatas 5:​22, 23). Noijki Jesús okijto, toTajtsin Dios techmakas iespíritu santo ijkuak tiknekiskej (Lucas 11:13).

Kinmachtiaj tlen melauak akinmej kitemouaj. Hechos 17:​26, 27, kijtoua itech nochi tlaltikpak miakej kitemouaj toTajtsin Dios. Kinekij kimatiskej tlen itoka, tlen kichiuas satepan uan ken uelis inauak motokiskej (Santiago 4:8). ITlaixpantijkauan Jehová inmiuan motlapouiaj akinmej kinekij okachi kimatiskej uan yolpakij kinpaleuiskej ma kajsikamatikan tlen tlamachtiaj Biblia.

¿Non omitspaleui ijkuak otikseli nin revista? ¿Tejuatsin noijki tikneki tikixmatis toTajtsin Dios? Xamo ye yomitsnankili.