¿Noijki ijkon mitspanoua? Otikijto tiktlajtoltis pero xamo amo otiktlajtolti. Miakej amo kineki kitlajtoltiskej. Pero, ¿tla mitsiluiskia nin mitspaleuis xiyolpaki uan kuali xiyeto? Uan ¿Tla tikmatis kajki itlaj tlen uelis mitspaleuis xiktlajtolti Biblia? ¿Tiktlajtoltiskiaj?

Xikita tlen kijtoua akinmej opejki kitlajtoltia Biblia uan ken yokinpaleui.

Ezekiel kipiaj kanaj 20 xiuitl kijtoua: “Achto onikatka ken akinmej yauij itech ojtli amo kimati kanin yaskej, pero ijkuak opejki niktlajtoltia Biblia opejki nechpaleuia. Nochipa nechpaleuiaj itlanauatiluan”.

Se ichpochtli tlen itoka Frieda kijtoua: “Ne sapanoua onikualaniaya, pero nechpaleuia niktlajtoltis Biblia para ayakmo okachi ma nikualani. Nin yonechpaleui uan axkan nikinpia miakej noyolikniuan”.

Se siuatl itoka Eunice uan kipiaj kanaj 50 xiuitl, ye kijtoua: “Nechpaleuia ma nikchiua tlen kuali uan ma nikpatla ken nimokuayejyekoua”.

Okachi tiyolpakis tla tiktlajtoltis Biblia ijkon ken okinpanok akinmej okitlajtoltijkej (Isaías 48:17, 18). Noijki mitspaleuis kuali xikpejpena tlen tikchiuas, kuali tikintemos moyolikniuan, amo okachi timotekipachos uan noijki tikixmatis toTajtsin Dios. Tlen kajki itech Biblia itlajtol toTajtsin Dios, ik non, amo timotlapololtiskej tla tikchiuaj tlen ompa kijtoua. Porque ye kineki kuali ma tiyetokan.

Moneki tiktlajtoltis Biblia. Itech okseki tlamachtilmej tikitaskej ken uelis tiyolpakis ijkuak tiktlajtoltis.

¿Ken uelis tiyolpakis tiktlajtoltis Biblia uan tikchiuas tlen kijtoua? Ma tikitakan makuili tlamantli tlen miakej yokinpaleui.

Xitlatemo kanin uelis timomachtis. Kanin amikaj mitskuejsos, kuali tlamota uan kuali timomachilia, ijkon amo timotlapololtis ijkuak tiktlajtoltis Biblia.

Ximochijchikaua amo timotekipachos ijkuak tiktlajtoltis Biblia. Nin se tetliokolil tlen techmaka toTajtsin Dios. Mitspaleuis tlen tiktlajtoltis tla timokuayejyekoua ken se chokotsin tlen kineki kixmatis itajtsin. Ijkuak tiktlajtoltijtos ximochijchikaua tikilkauas tlen mitspanotok noso tlen mitstekipachoua uan xikkauili toTajtsin Dios ma mitsmachti (Salmo 25:4).

Ximotlatlaujti. Itech Biblia ijkuilitok tlen mokuayejyekoua toTajtsin Dios, ik non, moneki tikiluiskej ma techpaleui ma tikajsikamatikan. ToTajtsin Dios kijtoua techmakas iespíritu santo tla tiktlajtlanilia (Lucas 11:13). Espíritu santo techpaleuis ma tikajsikamatikan ken mokuayejyekoua toTajtsin Dios, ik non, tla timochijchikaua satepan tikmatis “tlan Totajtsi Dios kiyolpixtok” (1 Corintios 2:10).

Xiktlajtolti. Amo san moneki tiktlajtoltis, ximokuayejyeko tlen tiktlajtoltijtok. Ximotlajtlani: “¿Tlen nechmachtia tlen oniktlajtolti? ¿Ken uelis nikchiuas tlen onimomachti?”.

Tleka tiktlajtoltia. Ijkuak tiktlajtoltis Biblia, ximochijchikaua tiktemos tlen mitspaleuis itech monemilis. Mitspaleuis okachi xikixmati toTajtsin Dios, xikchiua tlen kuali uan xiyeto yolkuali iuan monamik. Para uelis ijkon tikchiuas xiktemo itech Biblia kanin kijtoua non tlamantli.a

Ninmej makuili tlamantli mitspaleuiskej xiktlajtolti Biblia. Pero, ¿tlen okachi mitspaleuis xiyolpaki ijkuak tiktlajtoltis Biblia? Itech okse tlamachtil tikitaskej.

Moneki timochijchikauas tla tikneki tiyolpakis ijkuak tiktlajtoltis Biblia. Ma tikitakan tlen mitspaleuis tiktlajtoltis Biblia.

Xiktemo se Biblia tlen uelis tikajsikamatis. Tla tiktlajtoltis itlaj tlen kiualika tlajtolmej tlen amo tikajsikamati noso tlajtolmej tlen yiuejkika okijtouaya amo mitsyolpaktis tlen tiktlajtoltis. Ik non, xiktemo se Biblia tlen san niman tikajsikamatis ijkuak tiktlajtoltis, ijkon ajsis itech moyolo. Noijki xiktemo se traducción tlen ma kijto tlen melauak para uelis tikneltokas.a

Xiktekitilti tlen okachi yankuik kisa itech Internet. Axkan Biblia amo san kajki ika amatl, noijki kajki itech Internet uelis ompa tiktlajtoltis noso uelis tiktemouis itech mocomputadora, motableta uan itech moteléfono. Kiualika seki tlamantli tlen uelis mitspaleuis, ijkuak tiktlajtoltis se texto uelis tikitas okseki textos tlen noijki kijtoua tlen tiktlajtoltijtok. Pero noijki uelis tikkakis, tla amo tikneki tiktlajtoltis. Miakej kinpaktia kikakiskej, ijkuak yauij kanin tekipanouaj, itech carro, ijkuak tlapakaj noso kichiuaj okseki tlamantli. ¿Tlen mitspaktiskia tikchiuas, tiktlajtoltis noso san tikkakis?

Xiktemo tlen okachi mitspaleuis. Tla okachi titlatemos mitspaleuis xikajsikamati tlen tiktlajtoltijtok. Mapa tlen kiualika Biblia mitspaleuis tikmatis kanin opanok seki tlamantli. Noijki tlen kiualika nin amatlajkuilol uan kanin kijtoua “Biblia tlamachtia” tlen kajki itech Internet jw.org mitspaleuiskej xikajsikamati tlen kijtoua Biblia.

Xikpapatlati ken tiktlajtoltis Biblia. Tla tiktlajtoltis Biblia tikita oui achto xipeua kanin okachi mitspaktia uan tla tikneki tikmatis tlen okichi ikaj uelis non tiktlajtoltis. Recuadro “Xiktlajtolti Biblia uan tikajsikamatis tlen okichijkej sekimej” nin mitspaleuis tla tikneki tikixmatis ikaj tlen okitekichiuili toTajtsin Dios. Uelis tiktlajtoltis tlen tikneki tikmatis noso ken opanok seki tlamantli. ¿Tleka amo ijkon tiktlajtoltia?

Amo onka okse amochtli ken Biblia. Ompa kijtoua ken mokuayejyekoua toTajtsin Dios (2 Timoteo 3:16). Tlen kijtoua Biblia uelis mitspaleuis. Biblia kijtoua: “Itlajtol Dios yolitok iwa kipia weletílistli” (Hebreos 4:12). Nin amochtli uelis mitspaleuis, se: Tikmatis tlen uelis tikchiuas uan ome: Mitspaleuis xikixmati toTajtsin Dios uan noijki tikmatis tlen kichiuas satepan (1 Timoteo 4:8; Santiago 4:8).

Techiluia tlen uelis tikchiaskej. Biblia techpaleuia ma tikmatikan tlen tikchiuaskej para tiyolpakiskej.

• Ken timouikaj iuan oksekimej (Efesios 4:31, 32; 5:22, 25, 28, 33).

• Ken timomaluis para kuali tiyetos (Salmo 37:8; Proverbios 17:22).

• Tlen techpaleuia ma timoyekanakan (1 Corintios 6:9, 10).

• Ken moneki tikitaskej tekitl (Proverbios 10:4; 28:19; Efesios 4:28).a

Se tlakatl uan isiua tlen chantij Asia uan yikin omonamiktijkej kijtouaj yokinpaleuij Biblia. Ijkon ken akinmej yikin monamiktiaj, kimachiliaj oui motlapouiskej uan kuali mouikaskej. Pero opejkej kichiuaj tlen okitlajtoltiayaj itech Biblia. ¿Ken okinpaleui? Vicent okijto: “Tlen oniktlajtolti itech Biblia onechpaleui ma nikxiko tlen otikixnamikej ijkuak yikin otimonamiktijkej uan amo san niman ma nikualani. Nin otechpaleuij para ma tiyolpakikan”. Isiua tlen itoka Annalou okijto: “Timomachtiskej Biblia techpaleuia. Niyolpaki iuan nonamik uan san sekan tiknekij tikchiuaskej miak tlamantli”.

Mitspaleuis xikixmati toTajtsin Dios. Vicent noijki okijto: “Sapanoua techpaleuia tlen kijtoua Biblia, axkan okachi nimouika iuan Jehová”. Tlen okijto Vicent techpaleuia ma tikajsikamatikan se tlamantli tlen melauak kuali: Biblia mitspaleuis kuali xikixmati toTajtsin Dios. Amo san mitspaleuis kuali xiyeto, noijki mitspaleuis ximouika iuan toTajtsin Dios. Noijki itech iTlajtol techiluia satepan kuali tiyetoskej uan nochipa tiyoltoskej (1 Timoteo 6:19). Amo onka okse amochtli tlen ijkon mitspaleuis.

Tla nochipa tiktlajtoltia Biblia mitspaleuis xiyolpaki uan noijki okachi tikixmatis toTajtsin Dios. Xamo ijkuak tiktlajtoltis seki tlamantli amo tikajsikamatis. Tla ijkon mitspanoua, xikilnamiki tlen okipanok se tlakatl tlen ochantiaya Etiopía. Nin tlakatl amo okajsikamatiaya nochi tlen okitlajtoltiaya. Felipe okitlajtlani kox okajsikamatiaya tlen okitlajtoltijtoka, ye okinankili: “¿Kenomi nikajsikamatis, tla amaka nechajsikamatiltia?”.b Ik non, okilui Felipe ma kipaleui (Hechos 8:30, 31, 34). Tla tikneki tikmatis tlen okachi kijtoua Biblia uelis titlatemos itech Internet jw.org noso ompa xiktemiti se amatl uan se iTlaixpantijka Jehová mitsnotsas para nanmokauaskej keman uan tlen hora nanmomachtiskej. Melauak mitspaleuis tla tiktemos se Biblia uan tiktlajtoltis.