¿Otikmatiaya?

¿Ken otlatlatiayaj yiuejkika akinmej uejka oyayaj?

BIBLIA kijtoa itech amochtli Génesis, toTajtsin Dios okinauati Abrahán uejka ma uia uan ompa kitemakaskia se tlamanali. Biblia kijtoa: “Abrahán okonanki kuauitl pampa kitlatiskia tlamanali uan okimamalti ikone, tlen omotokayotiaya Isaac. Uan okonanki tlitl uan cuchillo uan yejuan ome san sekan oyajkej” (Génesis 22:6).

Biblia amo kijtoa ken otlatlatiayaj yiuejkika. Tla ijkon, ¿yokiuikaya Abrahán uan Isaac tlitl tlen ika kitlatiskiaj tlamanali? Se ixtlamatki itech Biblia okijto uelis seuiskia tlitl pampa uejka yaskiaj. Noijki okijto Abrahán uan Isaac okiuikayaj tlen ika tlatlatiskiaj.

Pero oksekimej ixtlamatkej kijtoaj ijkuakon oui otlatlatiayaj. Ik non, ualeua tlaltikpaktlakamej yokipiayaj tlixochtli uan ika non oksekan otlatlatiayaj. Noso okintlaneuiliayaj tlixochtli tlen ik ompa ochantiayaj. Miakej ixtlamatkej kijtoaj Abrahán yokiuikaya tlixochtli. Kijtoaj okiuikaya itech se xoktsin tlen okipilojtiaya ika se cadena (Isaías 30:14). Ik non, Abrahán uelis okitekitilti tlixochtli uan kuauitl uan ijkon otlatlatiaya.