¿Ken uelis yolpakiskej kalchanejkej?

1. ¿Tleka moneki ma monamiktikan ixpan tekiuajkej?

Jehová, akin techmaka kuali tlajtolmej, kineki kalchanejkej ma yolpakikan (1 Timoteo 1:11). Jehová ye okichi ma monamiktikan tlakatl uan siuatl. Tla monamiktiskej ixpan tekiuajkej, okachi kuali yetoskej yejuan uan noijki uelis kuali kinmiskaltiskej inkoneuan uan okachi yolpakiskej nochtin. Akinmej kichiuaj ken Cristo moneki monamiktiskej ijkon ken tlanauatiaj tekiuajkej. Xiktlajtolti Lucas 2:1, 4, 5.

¿Tlen kinmilia toTajtsin Dios akinmej yomonamiktijkej? ToTajtsin Dios kinmilia amo keman ma moxelokan. Jehová kineki akinmej yomonamiktijkej amo keman ma mokajkayauakan (Hebreos 13:4). Ye amo kineki ma moxelokan (Malaquías 2:16). Maski ijkon, kijtoa kema uelis ikaj moxelos tla inamik okikajkaya ika okse.​—Xiktlajtolti Mateo 19:3-6, 9.

2. ¿Ken moneki mouikas tlakatl iuan isiua?

Jehová okinchijchi tlakatl uan siuatl pampa ma mopaleuikan ijkuak monamiktiskej (Génesis 2:18). Tlakatl tlayekana itech ikalijtik, ik non, moneki kinmakas ichanejkauan nochi tlen kinpoloa uan noijki moneki kinmachtis itech toTajtsin Dios. Noijki pampa tlakatl kitlasojtla isiua ayakmo kichiuas oksekimej tlamantli tlen achto okichiuaya. Akinmej yomonamiktijkej moneki motlasojtlaskej uan motlakaitaskej. Uan ken yejuan ome tlajtlakolejkej moneki motlapojpoluiskej pampa uelis yolpakiskej.​—Xiktlajtolti Efesios 4:31, 32; 5:22-25, 33, uan 1 Pedro 3:7.

3. ¿Moneki ma moxelokan san pampa amo yolpakij itech namiktilistli?

Tla akinmej yomonamiktijkej kemantika kipiaj ouijkayotl, yejuan ome moneki mochijchikauaskej pampa motlasojtlaskej (1 Corintios13:4, 5). ITlajtol toTajtsin Dios amo kijtoa ma moxelokan san pampa kipiaj ouijkayotl itech namiktilistli.​—Xiktlajtolti 1 Corintios 7:10-13.

4. ¿Ken kineki toTajtsin Dios ma yetokan konemej?

Jehová kineki ma yolpakikan konemej. Ik non, kinmachtia tlen uelis kichiuaskej pampa yolpakiskej ijkuak telpochtiskej. Noijki kineki ma kichiuakan ijkon ken kuali kinmachtia intatajuan, pampa intatajuan ixtlamatkej uan kimatij miak tlamantli (Colosenses 3:20). Noijki kineki ma yolpakikan pampa kitekichiuiliaj toTajtsin Dios uan iKone.​—Xiktlajtolti Eclesiastés 11:9–12:1; Mateo 19:13-15, uan 21:15, 16.

5. ¿Ken uelis tetajmej kinpaleuiskej inkoneuan pampa ma yolpakikan?

Tetajmej moneki mochijchikauaskej pampa kinmakaskej tlakuali, intlaken uan kanin chantiskej ichanejkauan (1 Timoteo 5:8). Maski amo san non moneki kichiuaskej. Noijki moneki kinmachtiskej pampa yejuan noijki ma kitlasojtlakan toTajtsin Dios uan ma kichiuakan ken ye (Efesios 6:4). Tla konemej kitaj intatajuan kitlasojtlaj Jehová, non kichiuas yejuan noijki ma kitlasojtlakan Jehová. Ijkuak kuali kinmachtiaj ken kijtoa iTlajtol toTajtsin Dios non uelis kinpaleuis pampa kuali ma mokuayejyekokan.​—Xiktlajtolti Deuteronomio 6:4-7 uan Proverbios 22:6.

Ijkuak konemej kichiuaj tlen kuali moneki intatajuan ma kinyolchikauakan uan ma kinmilikan kuali tlen yejuan kichiuaj. Kemantika moneki ma kintlapouikan chikauak uan ma kinyektlalikan, pampa amo kichiuaskej itlaj tlen uelis kintlajyouiltis (Proverbios 22:15). Maski ijkon, amo san ma kinmajuatokan nion chikauak ma kinuitekikan.​—Xiktlajtolti Colosenses 3:21.

Itlaixpantijkauan Jehová yokinchijchijkej miakej amatlajkuilolmej pampa tetajmej uan konemej. Nochtin ninmej amatlajkuilolmej kisaj itech tlen kijtoa Biblia.​—Xiktlajtolti Salmo 19:7, 11.