Ken tikajsiskej tlaneltokalistli tlen melauak

Tla tiknekij timochiuaskej tiiyolikniuan toTajtsin Dios, moneki tikchiuaskej ken tlamachtia tlaneltokalistli tlen kiselia toTajtsin Dios. Jesús okijto “in tlakaj kiueyikixtiskej ika nochi inyolo” toTajtsin Dios uan kichiuaskej ika tlen “melajka” (Juan 4:23, 24). Moneki tikueyichiuaskej toTajtsin Dios ken ye kineki (Efesios 4:4-6). Tlaneltokalistli tlen melauak teuika itech nemilistli tlen amo keman tlamis, uan tlaneltokalistli tlen amo melauak teuika itech mikilistli (Mateo 7:13, 14).

Pampa tikmatiskej katli tlaneltokalistli melauak moneki tikinmitaskej akinmej kichiuaj. Ken Jehová yolkuali, akinmej kiueyichiuaj ken ye kineki, noijki moneki yetoskej yolkualmej. Ijkon ken se kuali kuajtsapotl kitemaka kuali tsapotl, tlaneltokalistli tlen melauak kichiua tlaltikpaktlakamej ma mochiuakan yolkualmej (Mateo 7:15-20).

Iyolikniuan toTajtsin Dios sapanoa kitlakaitaj Biblia. Kimatij ke Biblia itlajtol toTajtsin Dios. Ik non, kimokauiliaj ma kinyekana itech innemilis, ma kinpaleui itech intlajyouilis uan kuali ma kixmatikan toTajtsin Dios (2 Timoteo 3:16). Noijki mochijchikauaj pampa kichiuaskej tlen tetlapouiaj.

Iyolikniuan Jehová motlasojtlaj se iuan okse. Jesús okiteititi ke okintlasojtlaya tlaltikpaktlakamej ijkuak okintlapouiaya itech toTajtsin Dios uan ijkuak okinpajtiaya akinmej omokokoayaj. Akinmej kipiaj tlaneltokalistli tlen melauak noijki kintlasojtlaj oksekimej. Ijkon ken Jesús, amo kinchikoitaj akinmej amo kipiaj tomin, akinmej tlajtoaj okse tlajtoli uan akinmej ixchipajkej. Jesús okijto ke tlaltikpaktlakamej kimatiskiaj akinmej imachtijkauan pampa motlasojtlaskiaj se iuan okse (Juan 13:35).

Iyolikniuan toTajtsin Dios kitlakaitaj Itoka: Jehová. Tla akaj amo kineki technotsas ika totokayo, ¿uelis tikijtoskej toyolikni? ¡Amo! Ijkuak tikpiaj se toyolikni tiknotsaj ika itoka uan kuali titlajtoaj itech. Ik non, akinmej kinekij mochiuaskej iyolikniuan toTajtsin Dios moneki kinotsaskej ika Itoka uan kintlapouiskej oksekimej tlaltikpaktlakamej itech ye. Jehová ijkon kineki ma tikchiuakan (Mateo 6:9; Romanos 10:13, 14, NM).

Ken Jesús, iyolikniuan toTajtsin Dios kinmachtiaj tlaltikpaktlakamej itech iTekiuajkayo toTajtsin Dios. ITekiuajkayo toTajtsin Dios ye se tekiuajkayotl tlen kajki iluikak uan tlen kikuepas Tlaltikpak se xochitlal. Iyolikniuan toTajtsin Dios kinmatiltiaj oksekimej tlaltikpaktlakamej itech nin kuali tlajtolmej itech Itekiuajkayo toTajtsin Dios (Marcos 13:10).

ITlaixpantijkauan Jehová mochijchikauaj pampa mochiuaskej iyolikniuan toTajtsin Dios. Kitlakaitaj Biblia uan motlasojtlaj se iuan okse. Noijki kitekitiltiaj uan kitlakaitaj itoka Jehová uan kinmachtiaj oksekimej tlaltikpaktlakamej itech iTekiuajkayo toTajtsin Dios. Axan, ipan nochi Tlaltikpak iTlaixpantijkauan Jehová kipiaj tlaneltokalistli tlen melauak uan kichiuaj tlen toTajtsin Dios kineki.