Amo ximomojti ijkuak tikitas okachi panos tlen amo kuali

Amo miak poliui uan Jehová kitlamis nochi tlen amo kuali. Ijkuakon, religiones tlen tlakajkayauaj kinpojpoloskej uan nochtin tekiuajkej mosetiliskej uan kinekiskej kinteuiskej akinmej kitekichiuiliaj toTajtsin Dios. Pero Jehová kinmixpolos nochtin akinmej amo yolkualmej itech Armagedón. Tinochtin tiknekij ijkon mamochiua.

Amo tikmatij nochi tlen panos itech ueyi tlajyouilistli nion keman peuas. Noijki amo tikmatij tleka tekiuajkej kinpojpoloskej religiones tlen tlakajkayauaj. ¿Ken kinmixnamikiskej akinmej kitekichiuiliaj toTajtsin Dios uan kox uejkauas ijkon kichiuaskej? ¿Ken kinmixpolos Jehová akinmej amo yolkualmej itech Armagedón? Amo tikmatij.

Amo matimomojtikan ijkuak tikitaskej tlen panos satepan, Biblia kijtoua tlen moneki tikchiuaskej para timoyolseuijtoskej. Axkan yitikmatij tikatej itech itlamian tonalmej (2 Tim. 3:1). Noijki tikmatij ijkuak kinpojpoloskej religiones tlen tlakajkayauaj, toTajtsin Dios “kintsikitsintilis” tonalmej para amo makipojpolokan religión tlen melauak (Mat. 24:22). Yitikmatij Jehová kipaleuis ialtepe (2 Ped. 2:9). Ye yokipejpenki akin sapanoua chikauak, kichiuas tlen kuali, kinmixpolos akinmej amo yolkualmej uan kinmakixtis itech Armagedón akinmej tetlakamatij (Apoc. 19:11, 15, 16).

Ijkuak ijkon panos, miakej sapanoua momojtiskej (Luc. 21:26). Pero tejuan amo ijkon techpanos. Tla timomachtiaj uan timokuayejyekouaj ken Jehová yiuejkika okimakixti ialtepe uan tlen yotechilui kichiuas satepan, techpaleuis para tikchiuaskej tlen kijtoua Lucas 21:28: “Ximoyolchikawakah iwa xiajkotlachiakah porke san nima nomechmakixtikih”.