¿Uelis chantiskej san sekan se tlakatl uan se siuatl tla ayamo monamiktiaj?

Biblia kijtoua

Biblia kijtoua toTajtsin Dios amo kineki matiauilnemikan (1 Tesalonicenses 4:3). Biblia kijtoua ‘auilnemilistli’ kijtosneki ijkuak ikaj momekatia, mosiuakopa noso motlakakopa uan akinmej san sekan motekaj uan ayamo monamiktiaj.

• ¿Tleka toTajtsin Dios kijtoua mamonamiktikan se tlakatl uan se siuatl?

• ¿Tlajtlakoli tla san sekan chantiskej para kitaskej kox yolpakiskej?

• ¿Tlen kinpaleuis mayolpakikan akinmej yomonamiktijkej?

¿Tleka toTajtsin Dios kijtoua mamonamiktikan se tlakatl uan se siuatl?

• ToTajtsin Dios okichi namiktilistli. Okinnamikti Adán uan Eva ijkuak okinsetili para san sekan mayetokan (Génesis 2:22-24). Amo okinekiaya san sekan machantikan se tlakatl uan se siuatl tla ayamo monamiktiaj.

• ToTajtsin Dios kimati tlen techpaleuis matiyolpakikan. Ye okinekiaya nochipa san sekan mayetokan se tlakatl uan se siuatl uan ijkon kuali yetoskej. Ximokuayejyeko, para tikyektlaliskej se mueble moneki tikchiuaskej ijkon ken kijtoua akin okichijchi. Noijki ijkon, tla tiknekij tiyolpakiskej iuan tofamilia, moneki tikchiuaskej tlen toTajtsin Dios technauatia. Tla nochipa tiktlakamatij, kuali tiyetoskej (Isaías 48:17, 18).

  

• Tlajyouiaj akinmej san sekan motekaj uan ayamo monamiktiaj. Kinpiaj inkoneuan maski amo okinekiayaj, kinmajsi itlaj kokolistli uan ayakmo kuali momachiliaj.

• ToTajtsin Dios otechmakak se tlatliokolil: matikinpiakan tokoneuan. Sapanoua miak ipati uelis tikinpiaskej tokoneuan. ToTajtsin Dios kipatioita nemilistli, ik non, kineki matiktlakaitakan non tetliokolil uan matimotekakan san iuan tonamik. Ijkon tikteititiskej tikpatioitaj namiktilistli (Hebreos 13:4).

¿Tlajtlakoli tla san sekan chantiskej para kitaskej kox yolpakiskej?

Amo moneki san sekan chantiskej para kitaskej kox uelis yolpakiskej uan moxeloskej ijkuak yejuan kinekiskej. Akinmej motlasojtlaj uan san sekan mochijchikauaj kiyektlaliskej itlaj tlen kixnamikij, kinpaleuia amo makinekikan moxeloskeja (Mateo 19:6).

¿Tlen kinpaleuis mayolpakikan akinmej yomonamiktijkej?

Maski tinochtin titlajtlakolejkej uelis yolpakiskej akinmej yomonamiktijkej tla kichiuaj tlen kijtoua Biblia. Matikitakan seki textos:

• Xikita tlen kipoloua monamik (1 Corintios 7:3-5; Filipenses 2:3, 4).

• Ximochijchikauakan nanmotlasojtlaskej uan nanmotlakaitaskej (Efesios 5:25, 33).

• Achto ximokuayejyeko tlen tikneki tikijtos (Proverbios 12:18).

• San niman ximotlapojpoluikan uan xikmatikan nanmochiaskej (Colosenses 3:13, 14).