-
¿Tlen kijtosneki iTekiuajkayo toTajtsin Dios?¡Uelis nochipa tiyoltos uan tiyolpakis! Ximomachti tlen kijtoua Biblia
-
-
TLAMACHTIL 31
¿Tlen kijtosneki iTekiuajkayo toTajtsin Dios?
Biblia okachi techtlapouia tlen kichiuas iTekiuajkayo toTajtsin Dios. Ika iTekiuajkayo, Jehová kichiuas tlen ye kineki. ¿Tlen kijtosneki iTekiuajkayo toTajtsin Dios? ¿Ken tikmatij yitlanauatijtok? ¿Tlen yokichi uan tlen kichiuas? Ninmej tlajtlanilmej tikinnankiliskej itech nin tlamachtil uan itech tlamachtil 32 uan 33.
1. ¿Tlen kijtosneki iTekiuajkayo toTajtsin Dios uan akin kinauatia?
Jehová okitlali iTekiuajkayo. Kajki ompa iluikak uan kinauatijtok Jesucristo (Mateo 4:17; Juan 18:36). Biblia kijtoua ye nochipa tlanauatijtos (Lucas 1:32, 33). Ye techualnauatis porque Jehová okitlali matlanauati.
2. ¿Akinmej tlanauatiskej iuan Jesús?
Jesús amo tlanauatis iselti. Noijki akinmej “tlatlamantli intlajtol, tlatlamantli inmialtepe uan nouian chantij [...] tlanauatiskej” (Apocalipsis 5:9, 10). ¿Keski tlanauatiskej iuan Jesús? Ijkuak Jesús okatka nikan tlaltikpak, miakej opejkej kichiuaj ken ye. Pero san 144,000 iuan tlanauatiskej ompa iluikak (xiktlajtolti Apocalipsis 14:1-4). Oksekimej itekipanojkauan toTajtsin Dios chantiskej nikan tlaltikpak (Salmo 37:29).
3. ¿Tleka iTekiuajkayo toTajtsin Dios okachi kuali tlanauatis amo ken tekiuajkej tlen axkan katej?
Maski sekimej tekiuajkej kinekij tlapaleuiskej, amo ueli kichiuaj uan satepan kinpatkayotiaj oksekimej tekiuajkej tlen amo kinekij tlapaleuiskej. Pero Jesús amikaj kipatkayotis. ToTajtsin Dios okitlali “se tekiuajkayotl tlen amo keman kitlajtlamiskej” (Daniel 2:44). Jesús tinochtin techualnauatis uan amikaj kichikoitas. Ye yolkuali, tetlasojtla, kichiua tlen moneki uan techmachtis tinochtin ijkon matikchiuakan (xiktlajtolti Isaías 11:9).
MATIMOMACHTIKAN
Matikitakan tleka san iTekiuajkayo toTajtsin Dios kuali technauatis.
4. ITekiuajkayo toTajtsin Dios nochtin kinualnauatis
San Jesús kipia chikaualistli uan kuali tlanauatia. Xiktlajtoltikan Mateo 28:18 uan satepan xikitakan tlen namechmachtia.
¿Tleka Jesús okachi kuali tlanauatia amo ken tekiuajkej tlen axkan katej?
Tekiuajkej tlen axkan katej amo tlanauatiaj itech nochi tlaltikpak uan kinpatkayotiaj. ¿Noijki kipatkayotiskej iTekiuajkayo toTajtsin Dios? Xiktlajtoltikan Daniel 7:14 uan satepan xikitakan tlen namechmachtia.
¿Ken techpaleuis iTekiuajkayo toTajtsin Dios porque amo keman kipojpoloskej?
¿Ken techpaleuis porque tlanauatis itech nochi tlaltikpak?
5. Moneki makinpatkayotikan tekiuajkej tlen axkan katej
¿Tleka iTekiuajkayo toTajtsin Dios moneki kinpatkayotis tekiuajkej? Xikitakan VIDEO uan satepan xikitakan tlen namechmachtia.
¿Tlen yokichijkej tekiuajkej?
Xiktlajtoltikan Eclesiastés 8:9 uan satepan xikitakan tlen namechmachtia.
¿Tikneki iTekiuajkayo toTajtsin Dios makinpatkayoti tekiuajkej? ¿Tleka ijkon tikijtoua?
6. Akinmej tlanauatiskej itech iTekiuajkayo toTajtsin Dios techajsikamatiskej
Toueyi Tekiua Jesús, okatka se tlakatl ikinon “kajsikamati tlen techpanoua” (Hebreos 4:15). Jehová yokinpejpenki 144,000 tlakamej uan siuamej para tlanauatiskej iuan Jesús. Yejuan “tlatlamantli infamilia, tlatlamantli intlajtol, tlatlamantli inmialtepe uan nouian chantij” (Apocalipsis 5:9).
¿Mitsyolchikaua tikmatis Jesús techajsikamati uan noijki akinmej iuan tlanauatiskej? ¿Tleka ijkon tikijtoua?
Jehová okinpejpenki tlatlamantli tlakamej uan siuamej para matlanauatikan iuan Jesús.
7. Tlen technauatia iTekiuajkayo toTajtsin Dios okachi kuali amo ken intlanauatiluan tekiuajkej
Tekiuajkej kintlaliaj tlanauatilmej para kuali mayetokan akinmej kinnauatiaj. ITekiuajkayo toTajtsin Dios noijki techmaka tlanauatilmej tlen moneki tikintlakamatiskej. Xiktlajtoltikan 1 Corintios 6:9-11 uan satepan xikitakan tlen namechmachtia.
¿Ken timokuayejyekoua tiyetoskej ijkuak tinochtin tiktlakamatiskej tlen toTajtsin Dios technauatia?a
¿Timokuayejyekoua oui tlen toTajtsin Dios techiluia matikchiuakan? ¿Tleka ijkon tikijtoua?
¿Ken tikmatij uelis moyolkopaskej akinmej axkan amo kitlakamatij toTajtsin Dios? (Xikitakan versículo 11).
Tekiuajkej kintlaliaj tlanauatilmej para kinpaleuiskej akinmej kinnauatiaj. Katej seki tlanauatilmej tlen moneki tiktlakamatiskej tla tiknekij matechnauati iTekiuajkayo toTajtsin Dios. Tla ijkon tikchiuaskej, tiyolpakiskej.
SEKIMEJ KIJTOUAJ: “ITekiuajkayo toTajtsin Dios kijtosneki tikchiuaskej tlen kuali uan tikchiuaskej tlen kineki”.
¿Tlen tikijtoskia tla ikaj ijkon mitsiluis?
XIKILNAMIKTO
ITekiuajkayo toTajtsin Dios kajki iluikak uan nochtin kinualnauatis.
Matikojpauikan
¿Akinmej tlanauatiskej itech iTekiuajkayo toTajtsin Dios?
¿Tleka san iTekiuajkayo toTajtsin Dios kuali technauatis?
¿Tlen moneki kichiuaskej akinmej kinnauatis iTekiuajkayo toTajtsin Dios?
NIN NOIJKI MITSPAKTIS
Xikita kanin okijto Jesús yetoskia iTekiuajkayo toTajtsin Dios.
“¿Tikpiaj itech toyolo iTekiuajkayo toTajtsin Dios?” (Nin tlamachtil kajki itech jw.org/ncx)
¿Tleka itekipanojkauan toTajtsin Dios okachi kipatioitaj kitlakamatiskej iTekiuajkayo uan amo tlen kijtouaj tekiuajkej?
Xikita tlen kijtoua Biblia itech 144,000 tlen tlanauatiskej iuan Jesús.
“¿Akinmej yaskej iluikak?” (Nin tlamachtil kajki itech jw.org/ncx)
Xikita tlen okipaleui se siuatl makajsikamati san iTekiuajkayo toTajtsin Dios techpaleuis.
“Onikmatki ken kuali tiyetoskej” (¡Ma titlachixtokan!, noviembre 2011)
-
-
ITekiuajkayo toTajtsin Dios yitlanauatijtok¡Uelis nochipa tiyoltos uan tiyolpakis! Ximomachti tlen kijtoua Biblia
-
-
TLAMACHTIL 32
ITekiuajkayo toTajtsin Dios yitlanauatijtok
ITekiuajkayo toTajtsin Dios opejki tlanauatia iluikak itech xiuitl 1914. Desde non xiuitl ayakmo miak poliui para kinpatkayotiskej tekiuajkej. ¿Ken tikmatij? Matikitakan tlen okijto Biblia panoskia uan tlen kichiuaskiaj miakej desde 1914.
1. ¿Tlen okijto Biblia panoskia?
Amochtli Daniel yokijtouaya iTekiuajkayo toTajtsin Dios peuaskia tlanauatis ijkuak panoskia “chikome tiempos” (Daniel 4:16, 17). Satepan Jesús okijto iTekiuajkayo toTajtsin Dios peuas tlanauatiskia ijkuak ayakmo tlanauatijtoskej tekiuajkej uan ye okijto nin ayamo mochiua (Lucas 21:24). Itech nin tlamachtil timomachtiskej chikome tiempos otlankej itech xiuitl 1914.
2. ¿Tlen yopanok desde 1914 uan tlen kichiuaj miakej?
Imachtijkauan Jesús okinekiayaj kimatiskej keman peuaskia tlanauatis iTekiuajkayo toTajtsin Dios uan noijki keman peuaskia itlamian tonalmej. Yejuan okitlajtlanijkej: “¿Keman ijkon panos uan tlen kiteititis yinikan tika uan yitlamis tlen axkan onka?” (Mateo 24:3). Jesús okinmilui panoskia miak tlamantli ijkuak yipeuaskia tlanauatis itech iTekiuajkayo toTajtsin Dios ompa iluikak. Ye okijto yetoskia guerras, apistli uan chikauak tlaloliniskia (xiktlajtolti Mateo 24:7). Biblia okijto itech “itlamian tonalmej yetos oui” porque miakej kichiuaskiaj tlen amo kuali (2 Timoteo 3:1-5). Ijkon panotok desde 1914.
3. ¿Tleka okachi opejki momiaktilia tlen amo kuali ijkuak opejki tlanauatia iTekiuajkayo toTajtsin Dios?
Ijkuak Jesús opejki tlanauatia, omochi se guerra ompa iluikak, ye omoteui iuan Satanás uan amo kuali ejekamej. Jesús otlatlanki ikinon Biblia kijtoua Satanás “uan iángeles okinualtlamotlakej ipan tlaltikpak” (Apocalipsis 12:9, 10, 12). Satanás sapanoua kualantok porque yikimati amo miak poliui para kixpoloskej uan sapanoua tetlajyouiltijtok nikan tlaltikpak. Ikinon, panoua miak tlamantli tlen amo kuali. Pero iTekiuajkayo toTajtsin Dios kitlajtlamis nochi tlen techtlajyouiltia.
MATIMOMACHTIKAN
Matikitakan tlen kiteititia iTekiuajkayo toTajtsin Dios opejki tlanauatia xiuitl 1914 uan tikitaskej tlen moneki tikchiuaskej.
4. Biblia kijtoua iTekiuajkayo toTajtsin Dios opejki tlanauatia itech xiuitl 1914
ToTajtsin Dios okichi Nabucodonosor akin otlanauatiaya Babilonia makitemiki itlaj tlen panoskia satepan. Daniel okijto tlen okitemik okijtosnekiaya itekiuajkayo Nabucodonosor uan iTekiuajkayo toTajtsin Dios (xiktlajtoltikan Daniel 4:17).a
Xiktlajtoltikan Daniel 4:20-26. Satepan para nankinnankiliskej tlajtlanilmej, xikitakan kanin kijtoua “¿Tlen kijtosneki tlen okitemik Nabucodonosor?”.
(A) ¿Tlen okitemik Nabucodonosor? (Xikitakan versículos 20 uan 21).
(B) ¿Tlen kipanoskia kuauitl? (Xikitakan versículo 23).
(C) ¿Tlen panoskia ijkuak tlamiskia “chikome tiempos”? (Xikitakan versículo 26).
¿Tlen kijtosneki tlen okitemik Nabucodonosor?
PROFECÍA (Daniel 4:20-36)
Ijkuak otlanauatiaya Nabucodonosor
(A) Se kuauitl uejkapantik
Ayakmo otlanauati
(B) “Xiktekikan kuauitl” uan “mapanokan chikome tiempos”
Oksepa opejki tlanauatia
(C) “Oksepa titlanauatis”
¿Ken opejki mochiua?
(D) ¿Akin kineskayotia kuauitl? (Xikitakan versículo 22).
(E) ¿Keman ayakmo otlanauati? (Xiktlajtoltikan Daniel 4:29-33).
(F) ¿Tlen okipanok Nabucodonosor ijkuak otlankej “chikome tiempos”? (Xiktlajtoltikan Daniel 4:34-36).
¿KEN OPEJKI MOCHIUA?
Ijkuak otlanauatiaya Nabucodonosor
(D) Nabucodonosor akin otlanauatiaya Babilonia
Ayakmo otlanauati
(E) Kanaj itech xiuitl 606 a.i.x. 1,b Nabucodonosor okuatlapolo uan ayakmo otlanauati chikome xiuitl
Oksepa opejki tlanauatia
(F) Nabucodonosor oksepa otlalnamik uan oksepa opejki tlanauatia
¿Keman oksepa ijkon opanok?
(G) ¿Akinmej kinneskayotia kuauitl? (Xiktlajtoltikan 1 Crónicas 29:23).
(H) ¿Keman ayakmo otlanauatijkej? ¿Ken tikmatij amo otlanauatijtokaj ijkuak Jesús okatka nikan tlaltikpak? (Xiktlajtoltikan Lucas 21:24).
(I) ¿Kanin uan keman oksepa opejki tlanauatia nin tekiuajkayotl?
¿KEMAN OKSEPA IJKON OPANOK?
Ijkuak otlanauatiaya Nabucodonosor
(G) Tekiuajkej israelitas tlen okineskayotijkej iTekiuajkayo toTajtsin Dios
Ayakmo otlanauati
(H) Okipojpolojkej Jerusalén itech xiuitl 607 a.i.x. 1. 2,520 xiuitl ayakmo otlanauatijkej tekiuajkej israelitas
Oksepa opejki tlanauatia
(I) Jesús opejki tlanauatia itech iTekiuajkayo toTajtsin Dios itech xiuitl 1914
¿Keski xiuitl kijtosneki chikome tiempos?
Seki textos techpaleuiaj matikajsikamatikan tlen kijtoua Biblia. Itech Apocalipsis kijtoua eyi tiempos uan tlajko uejkaua 1,260 tonalmej (Apocalipsis 12:6, 14). Ikinon chikome tiempos kijtosneki 2,520 tonalmej. Ualeua ijkuak Biblia kijtoua se tonal, kijtosneki se xiuitl (Ezequiel 4:6). Ikinon ijkuak Daniel okijkuilo chikome tiempos kijtosneki 2,520 xiuitl.
5. Itech xiuitl 1914 opejki tlamochiua miak tlamantli
Jesús okijto tlen panoskia ijkuak peuaskia tlanauatis. Xiktlajtoltikan Lucas 21:9-11 uan satepan xikitakan tlen namechmachtia.
¿Tikijtoskia mochijtok ijkon ken nikan kijtoua?
Pablo okijto tlen kichiuaskiaj sekimej ijkuak tekiuajkej yitlamis tlanauatiskiaj. Xiktlajtoltikan 2 Timoteo 3:1-5 uan satepan xikitakan tlen namechmachtia.
¿Kichijtokej ken kijtouaj ninmej versículos?
6. Ken iTekiuajkayo toTajtsin Dios yitlanauatijtok moneki itlaj tikchiuaskej
Xiktlajtoltikan Mateo 24:3, 14 uan satepan xikitakan tlen namechmachtia.
¿Tlen tekitl tlen axkan mochijtok kiteititia iTekiuajkayo toTajtsin Dios yitlanauatijtok?
¿Ken uelis titlapaleuis?
ITekiuajkayo toTajtsin Dios yitlanauatijtok uan ayakmo miak poliui ualtlanauatis nikan tlaltikpak. Xiktlajtoltikan Hebreos 10:24, 25 uan satepan xikitakan tlen namechmachtia.
¿Tlen moneki tikchiuaskej porque tikmatij “yiajsiki itonal toTajtsin Dios”?
Tla timomachtiskia itlaj tlen uelis kinpaleuis uan kinmakixtis oksekimej, ¿tlen tikchiuaskia?
SEKIMEJ KIJTOUAJ: “¿Tleka iTlaixpantijkauan Jehová kijtouaj xiuitl 1914 miak ipati?”.
¿Tlen tikijtoskia?
XIKILNAMIKTO
Tlen okijto Biblia panoskia uan tlen axkan panotok, techpaleuia matikajsikamatikan iTekiuajkayo toTajtsin Dios yitlanauatijtok. Tikteititiaj tikneltokaj yitlanauatijtok ijkuak titetlapouiaj uan timonechikouaj.
Matikojpauikan
¿Tlen opanok ijkuak otlankej chikome tiempos tlen okijkuilo Daniel?
¿Tleka tikneltoka iTekiuajkayo toTajtsin Dios opejki tlanauatia itech xiuitl 1914?
¿Ken uelis tikteititis tikneltoka iTekiuajkayo toTajtsin Dios yitlanauatijtok?
NIN NOIJKI MITSPAKTIS
Xikita tlen kijtouaj sekimej ixtlamatkej panotiuits desde itech xiuitl 1914.
“Miakej opejki kichiuaj tlen kinekij” (¡Ma titlachixtokan!, abril 2007)
Xikita ken se tlakatl okipatlak inemilis ijkuak okimatki tlen kijtoua Mateo 24:14.
“Sapanoua onechpaktiaya nimauiltis béisbol” (Akin Tetlapouijtok, núm. 3 2017)
¿Ken tikmatij tlen kijtoua Daniel capítulo 4 tlajtoua itech iTekiuajkayo toTajtsin Dios?
“¿Keman opejki tlanauatia iTekiuajkayo toTajtsin Dios? (Parte 1)” (Akin Tetlapouijtok)
¿Ken tikmatij chikome tiempos tlen kijtoua Daniel capítulo 4 otlanki itech xiuitl 1914?
“¿Keman opejki tlanauatia iTekiuajkayo toTajtsin Dios? (Parte 2)” (Akin Tetlapouijtok)
a Xiktlajtolti saiktlami ome tlamachtilmej tlen katej kanin kijtoua “Nin noijki mitspaktis” itech nin tlamachtil.
b A.i.x. 1 kijtosneki achto itech xiuitl 1 uan satepan itech xiuitl se, san tikijtouaj xiuitl.
-
-
¿Tlen kichiuas iTekiuajkayo toTajtsin Dios?¡Uelis nochipa tiyoltos uan tiyolpakis! Ximomachti tlen kijtoua Biblia
-
-
TLAMACHTIL 33
¿Tlen kichiuas iTekiuajkayo toTajtsin Dios?
ITekiuajkayo toTajtsin Dios yitlanauatijtok uan kichiuas miak tlamantli nikan tlaltikpak. Matikitakan tlen kichiuas uan ken techpaleuis.
1. ¿Ken kichiuas iTekiuajkayo toTajtsin Dios kuali matiyetokan uan ayakmo mapano tlen amo kuali?
Jesús akin tlanauatijtok itech iTekiuajkayo toTajtsin Dios kinmixpolos akinmej amo yolkualmej uan noijki akinmej axkan tlanauatiaj ijkuak panos Armagedón (Apocalipsis 16:14, 16). Ijkuakon mochiuas tlen Biblia kijtoua: “San tepitsin poliui uan akinmej amo yolkualmej ayakmo yetoskej” (Salmo 37:10). Ika iTekiuajkayo toTajtsin Dios, Jesús kichiuas kuali matiyetokan (xiktlajtolti Isaías 11:4).
2. ¿Ken tiyetoskej ijkuak mochiuas tlen toTajtsin Dios kineki nikan tlaltikpak?
Ijkuak Jesús tlanauatis “yolmelauakej yetoskej tlaltikpak uan nochipa itech chantiskej” (Salmo 37:29). Sapanoua tiyolpakiskej ijkuak yetoskej san akinmej yolkualmej, kitlasojtlaskej Jehová uan noijki oksekimej. ¿Mitspaktiskia ompa tiyetos? Ayakmo ikaj mokokos nion ixpoliuis.
3. ¿Tlen kichiuas iTekiuajkayo toTajtsin Dios ijkuak kinmixpolos akinmej amo yolkualmej?
Satepan ijkuak Jesús kinmixpolos akinmej amo yolkualmej, tlanauatis 1,000 xiuitl. Ijkuakon ye uan 144,000 tlen iuan tlanauatiskej, kinpaleuiskej akinmej nikan chantiskej para ayakmo matlajtlakolchiuakan. Ijkuak panos 1,000 xiuitl tlaltikpak mokopas se xochitlali, nochtin kitlakamatiskej Jehová uan melauak yolpakiskej. Ijkuak tlamis 1,000 xiuitl Jesús ayakmo tlanauatis uan tlanauatis Jehová. Ijkuakon kitlakaitaskej itoka Jehová (Mateo 6:9, 10). Kitaskej Jehová tetlasojtla uan san ye kinamiki tlanauatis. Satepan Jehová kixpolos Satanás uan amo kuali ejekamej, noijki akinmej amo kinekiskej kitlakamatiskej (Apocalipsis 20:7-10). Tlen kichiuas Jesús nochipa techpaleuis.
MATIMOMACHTIKAN
Matikitakan tleka uelis tikneltokaskej toTajtsin Dios techteochiuas ika iTekiuajkayo.
4. ITekiuajkayo toTajtsin Dios kinmixpolos tekiuajkej
“Nochtin san nochipa motlajyouiltiaj ijkuak san yejuan monauatiaj” (Eclesiastés 8:9). Ika iTekiuajkayo toTajtsin Dios kinmixpolos akinmej techtlajyouiltiaj.
Xiktlajtoltikan Daniel 2:44 uan 2 Tesalonicenses 1:6-8 uan satepan xikitakan tlen namechmachtia.
¿Tlen kinchiuilis Jehová uan Jesús tekiuajkej uan akinmej kinpaleuiaj?
Ken yitikmati tlen kichiuaj Jehová uan Jesús, ¿ken mitspaleuia non xikneltoka nochipa kichiuaskej tlen kuali?
5. San Jesús kuali tlanauatis
Ijkuak Jesús ualtlanauatis, nochtin kinpaleuis. Xikitakan VIDEO para tikitas ken Jesús okiteititi kineki techpaleuis uan ken toTajtsin Dios okimakak chikaualistli para ijkon kichiuas.
Nochi tlen Jesús okichi ijkuak okatka nikan, okiteititi tlen kichiuas ijkuak ualtlanauatis. Jesús kichiuas miak tlamantli. ¿Tlen okachi mitspaktiskia tikitas? Xikintlajtoltikan textos kanin kijtoua tlen panos satepan.
IJKUAK JESÚS OKATKA TLALTIKPAK...
IJKUAK JESÚS UALTLANAUATIS...
... okitlakaualti ejekakiauitl (Marcos 4:36-41)
... kipojpolos nochi tlen kijtlakoua tlaltikpak (Isaías 35:1, 2)
... miakej okintlamakak (Mateo 14:17-21)
... nochtin kipiaskej tlen kikuaskej (Salmo 72:16)
... miakej okinpajti (Lucas 18:35-43)
... ayakmo ikaj mokokos (Isaías 33:24)
... sekimej okinyoliti (Lucas 8:49-55)
... ayakmo ikaj ixpoliuis (Apocalipsis 21:3, 4)
6. ITekiuajkayo toTajtsin Dios techpaleuis matiyolpakikan
ITekiuajkayo toTajtsin Dios kichiuas matiyolpakikan ijkon ken Ye kineki ma tiyetokan. Tiyoltoskej nochipa itech xochitlali. Xikitakan VIDEO kanin mota Jesús kichijtok tlen Jehová kineki.
Xiktlajtoltikan Salmo 145:16 uan satepan xikitakan tlen namechmachtia.
¿Ken timomachilia ijkuak tikmati Jehová techmakas nochi tlen tiknekij?
SEKIMEJ KIJTOUAJ: “Tla timochijchikauaskej, uelis san tejuan tikyektlaliskej tlen techtlajyouiltijtok”.
¿Tlen kiyektlalis iTekiuajkayo toTajtsin Dios?
XIKILNAMIKTO
Mochiuas tlen kineki toTajtsin Dios ika iTekiuajkayo. Tlaltikpak yetos se xochitlali uan san chantiskej akinmej kiueyichiuaj Jehová.
Matikojpauikan
¿Ken kichiuas iTekiuajkayo toTajtsin Dios mamoteititi san ye kinamiki tlanauatis?
¿Tleka tikneltokaj iTekiuajkayo toTajtsin Dios kichiuas nochi tlen kijtoua Biblia?
¿Tlen okachi mitspaktiskia tikitas ijkuak technauatis iTekiuajkayo toTajtsin Dios?
NIN NOIJKI MITSPAKTIS
Xikita tlen kijtosneki Armagedón.
“¿Tlen kijtosneki Armagedón?” (Nin tlamachtil kajki itech jw.org/ncx)
Xikita tlen panos ijkuak mochiuas “ueyi tlajyouilistli” tlen Jesús okijto (Mateo 24:21).
“¿Tlen kijtosneki ueyi tlajyouilistli?” (Nin tlamachtil kajki itech jw.org/ncx)
Xikita ken se familia mokuayejyekoua yikatej itech xochitlali.
Xiktlajtolti tlamachtil “Oniknekiaya nikmatis miak tlamantli”. Ompa tikitas se tlakatl okimatki san toTajtsin Dios tlayektlalis.
“Biblia okinpatili innemilis” (Akin Tetlapouijtok, 1 de enero 2012)
-