TLAMACHTIL 42
Biblia kijtoua uelis yolpakiskej akinmej katej inselti uan akinmej yomonamiktijkej
Itech seki altepemej kijtouaj tla tiknekij tiyolpakiskej, moneki timonamiktiskej. Pero amo uelis tikijtoskej san yolpakij akinmej yomonamiktijkej uan akinmej katej inselti san moyolkokojtokej. Biblia kijtoua uelis yolpakiskej akinmej katej inselti uan akinmej yomonamiktijkej.
1. ¿Ken techpaleuia tiyetoskej toselti?
Biblia kijtoua: “Kuali yetos akin monamiktis pero okachi kuali yetos akin amo monamiktis” (xiktlajtolti 1 Corintios 7:32, 33, 38). ¿Tlen kijtosneki akinmej amo monamiktiaj okachi kuali katej? Akinmej ayamo monamiktiaj amo kintekipachoua innamik, ikinon okachi majxiliaj kichiuaskej okseki tlamantli. Oksekimej okachi kitekichiuiliaj Jehová uan oksekan tetlapouiaj uan noijki okachi majxiliaj momachtiskej iTlajtol toTajtsin Dios uan ijkon okachi kuali iuan mouikaj.
2. ¿Ken kinpaleuia ijkuak monamiktiaj inmixpan tekiuajkej?
Akinmej monamiktiaj noijki yolpakij ijkon ken akinmej katej inselti. Biblia kijtoua “okachi kuali ome uan amo san se” (Eclesiastés 4:9). Okachi yolpakij akinmej yomonamiktijkej ijkuak kichiuaj tlen kijtoua Biblia. Akinmej monamiktiaj inmixpan tekiuajkej kijtouaj motlasojtlaskej, motlakaitaskej uan momaluiskej. Ikinon kichiuaj tlen kijtouaj uan inkoneuan kuali momachiliaj.
3. ¿Tlen kinnauatia Jehová akinmej yomonamiktijkej?
Ijkuak Jehová okinnamikti Adán uan Eva okinmilui: “Tlakatl kikauas itajtsin uan inantsin uan mosetilis iuan isiua” (Génesis 2:24). Jehová kineki akinmej yomonamiktijkej mamotlasojtlakan uan amo keman mamoxelokan. San uelis mokajkauaskej inmixpan tekiuajkej tla ikaj momekatia. Jehová kikauilia akin okikajkayajkej makipejpena kox mokajkauaskej inmixpan tekiuajkej (Mateo 19:9).a Akinmej tikchiuaj ken Cristo, Jehová technauatia san se tonamik matikpiakan (1 Timoteo 3:2).
MATIMOMACHTIKAN
Matikitakan tlen mitspaleuis xiyolpaki uan noijki xikyolpakti Jehová maski moselti noso yotimonamikti.
4. Uelis tikchiuas miak tlamantli tla ayamo timonamiktia
Jesús okijto akin kajki iselti yetoskia ken kipia se tetliokolil (Mateo 19:11, 12). Xiktlajtoltikan Mateo 4:23 uan satepan xikitakan tlen namechmachtia.
Jesús okatka iselti, ¿ken okipaleui para okachi makitekichiuili Jehová uan kinpaleuis oksekimej?
Akinmej ayamo monamiktiaj uan kichiuaj ken Jesús uelis yolpakiskej. Xikitakan VIDEO uan satepan xikitakan tlen namechmachtia.
¿Tlen uelis kichiuaskej akinmej katej inselti?
¿Otikmatiaya?
Biblia amo kijtoua keski xiuitl moneki tikpiaskej para uelis timonamiktiskej. Pero kijtoua matimochiakan hasta ijkuak ayakmo matimokuayejyekojtokan ikaj iuan timotekaskej (1 Corintios 7:36).
5. Kuali xikpejpena akin iuan timonamiktis
Miak ipati kuali tikpejpenas akin iuan timonamiktis. Xiktlajtoltikan Mateo 19:4-6, 9 uan satepan xikitakan tlen namechmachtia.
¿Tleka akin kichiua ken Cristo moneki kuali mokuayejyekos tla kineki monamiktis?
Tlen kijtoua Biblia uelis mitspaleuis kuali xikpejpena akin iuan timonamiktis. Xiktemo akin noijki makitlasojtla Jehová.b Xiktlajtoltikan 1 Corintios 7:39 uan 2 Corintios 6:14 uan satepan xikitakan tlen namechmachtia.
Tla akin kichiua ken Cristo kineki monamiktis, ¿tleka moneki monamiktis iuan akin noijki kitlasojtla Jehová?
Tla monamiktis iuan akin amo kitlasojtla Jehová, ¿ken momachilis Jehová?
Tla kintekipanoltiaj ome tlatlamantli yolkamej, san tlajyouiskej. Noijki ijkon tlajyouia akin kichiua ken Cristo tla monamiktia iuan akin amo kitlasojtla Jehová.
6. Xiktlakaita monamik ijkon ken kijtoua Jehová
Yiuejkika itech altepetl Israel sekimej akinmej omonamiktiayaj san niman omokajkauayaj. Xiktlajtoltikan Malaquías 2:13, 14, 16 uan satepan xikitakan tlen namechmachtia.
¿Tleka Jehová amo kipaktia ijkuak mokajkauaj inmixpan tekiuajkej tla amikaj omomekati?
Ijkuak ikaj momekatia noso mokajkaua inmixpan tekiuajkej tlajyouia inamik uan noijki inkoneuan.
Xikitakan VIDEO uan satepan xikitakan tlen namechmachtia.
Tla otimonamikti iuan akin amo kitekichiuilia Jehová, ¿tlen uelis tikchiuas para nanyolpakiskej?
7. Xikchiua tlen Jehová kinnauatia akinmej yomonamiktijkej
Sekimej tlen yomonamiktijkej kitaj oui kichiuaskej tlen Jehová kinnauatia.c Pero Jehová kinteochiua akinmej mochijchikauaj kitlakamatiskej. Xikitakan VIDEO.
Xiktlajtoltikan Hebreos 13:4 uan satepan xikitakan tlen namechmachtia.
¿Timokuayejyekoua tlen kijtoua Jehová kinpaleuis akinmej yomonamiktijkej? ¿Tleka ijkon tikijtoua?
Jehová kineki akinmej monamiktiaj noso akinmej mokajkauaj makichiuakan inmixpan tekiuajkej porque yejuan ijkon tlanauatiaj. Xiktlajtoltikan Tito 3:1 uan satepan xikitakan tlen namechmachtia.
Tla yotimonamikti, ¿otikchi inmixpan tekiuajkej?
SEKIMEJ KIJTOUAJ: “Amo moneki timonamiktiskej inmixpan tekiuajkej”.
Tla ikaj ijkon mitsiluis, ¿tlen tikiluiskia?
XIKILNAMIKTO
Jehová techkauilia matikpejpenakan kox timonamiktiskej noso tiyetoskej toselti. Uelis tiyolpakiskej tla tiktlakamatij Jehová maski tikatej toselti noso yotimonamiktijkej.
Matikojpauikan
¿Tlen uelis kichiuaskej akinmej katej inselti?
¿Tleka Biblia kijtoua tla ikaj kineki monamiktis moneki kichiuas iuan akin noijki kitlasojtla Jehová?
Ijkon ken kijtoua Biblia, ¿tleka uelis mokajkauaskej inmixpan tekiuajkej?
NIN NOIJKI MITSPAKTIS
¿Tlen kijtosneki timonamiktis iuan akin ‘kichiua ken Totekoʼ?
“Sekimej techtlajtlaniaj” (Akin Tetlapouijtok, 1 de julio 2004)
Xikita tlen okichijkej sekimej ijkuak omoixmatkej uan satepan omonamiktijkej. Mitspaleuis tla tikneki timonamiktis.
Xikita tleka se tokni kijtoua Jehová okachi okimakak uan amo ken tlen okika.
Tla akin kichiua ken Cristo kineki mokajkauas inmixpan tekiuajkej, ¿tlen moneki achto mokuayejyekos?
“Ma tiktlakaitakan ‘tlen toTajtsin Dios yokiseitili’” (Akin Tetlapouijtok, diciembre 2018)
b Itech seki altepemej tetajmej kipejpenaj akin iuan monamiktis intelpoch noso inmichpoch. Ikinon akin kipejpenaskej moneki kitlasojtlas Jehová. Tetajmej moneki okachi kipatioitaskej makitekichiuili Jehová uan amo kox kipia miak tomin.
c Tla ikaj iuan yitika, moneki tikpejpenas kox iuan timonamiktis noso tikkauas.