TLAMACHTIL 49
¿Ken uelis tiyolpakis iuan mofamilia? (Parte 1)
Akinmej yomonamiktijkej kinekij nochipa yolpakiskej uan uelis ijkon kichiuaskej tla kitlakamatij tlen kijtoua Biblia. Akinmej yiuejkika omonamiktijkej kuali kimatij non yokinpaleui.
1. ¿Tlen kijtoua Biblia moneki kichiuas tlakatl?
Jehová kinauatia tlakatl makiyekana ifamilia (xiktlajtolti Efesios 5:23). Moneki kipejpenas tlen kipaleuis ifamilia. Biblia kinnauatia tlakamej ‘makitlasojtlakan insiua’ (Efesios 5:25). ¿Ken uelis kichiuaskej? Akin kitlasojtla isiua nochipa kitlakaita, kimaluia, kimaka tlen moneki uan kiyolchikaua (1 Timoteo 5:8). Noijki kipaleuia kuali mamouika iuan Jehová (Mateo 4:4). Ikinon san sekan motlatlaujtiaj uan kitlajtoltiaj Biblia. Tlakatl tlen kitlasojtla isiua kiteititia kuali mouika iuan Jehová (xiktlajtolti 1 Pedro 3:7).
2. ¿Tlen kijtoua Biblia moneki kichiuas siuatl?
Biblia kijtoua siuatl moneki ‘kitlakaitas inamik’ (Efesios 5:33). ¿Ken uelis kichiuas? Moneki kipatioitas ken mochijchikaua inamik para kichiuas tlen kuali uan ken kimaluia ifamilia. Kiteititia kitlakaita inamik ijkuak kipaleuia ika tlen kipejpena kichiuas. Noijki kualtsin kitlapouia uan amo kiteneua maski amo momachtia Biblia.
3. ¿Ken uelis okachi kuali mouikaskej akinmej yomonamiktijkej?
Biblia kijtoua akinmej yomonamiktijkej “mochiuaskej san se” (Mateo 19:5). Ikinon moneki mochijchikauaskej para nochipa kuali mouikaskej. Mochijchikauaj san sekan yetoskej uan motlakaitaj ijkuak kijtouaj tlen mokuayejyekouaj. Yejuan kimatokej san moneki kitlasojtlaskej Jehová uan innamik. Ikinon momaluiaj para amo peuas kitlasojtlaskej okse.
MATIMOMACHTIKAN
Matikitakan ken uelis kinpaleuis tlen kijtoua Biblia akinmej yomonamiktijkej.
4. Tlakatl, xiktlasojtla uan xikmalui mosiua
Biblia kijtoua “tlakamej moneki makintlasojtlakan insiuauan ijkon ken yejuan motlasojtlaj” (Efesios 5:28, 29). ¿Tlen kijtosneki? Xikitakan VIDEO uan satepan xikitakan tlen namechmachtia.
¿Ken uelis kiteititis tlakatl kitlasojtla isiua uan kitlakaita?
Xiktlajtoltikan Colosenses 3:12 uan satepan xikitakan tlen namechmachtia.
¿Tlen uelis kichiuas tlakatl ijkon ken kijtoua texto?
5. Siuatl, xiktlasojtla uan xiktlakaita monamik
Biblia kijtoua siuatl moneki kitlakaitas inamik maski amo kitekichiuilia Jehová. Xiktlajtoltikan 1 Pedro 3:1, 2 uan satepan xikitakan tlen namechmachtia.
Tla monamik amo kitekichiuilia Jehová, xamo tikneki makitekichiuili. ¿Tlen kiyolinis ijkon makichiua? ¿Kipaleuis tla san tikiluijtos tlen kijtoua Biblia noso tla kita ken yomitspaleui tlen timomachtia?
Tla mopaleuiaj tlakatl uan siuatl, kuali kipejpenaskej tlen kichiuaskej. Xamo siuatl ualeua kinekis kichiuas okse tlamantli. Tla ijkon kineki, uelis kiluis inamik pero ijkuak ijkon kichiuas moneki kiteititis kitlakaita. Noijki moneki kilnamiktos Jehová okitlali tlakatl para makipejpena tlen kipaleuis ifamilia. Ikinon moneki kipaleuis uan ijkon nochtin yolpakiskej. Xiktlajtoltikan 1 Pedro 3:3-5 uan satepan xikitakan tlen namechmachtia.
¿Ken momachilia Jehová ijkuak kita siuatl kitlakaita inamik?
6. Tlen kinpaleuis akinmej yomonamiktijkej san sekan mayetokan
Akinmej yomonamiktijkej ualeua motlapololtiaj. Ikinon moneki mopaleuiskej. Xikitakan VIDEO uan satepan xikitakan tlen namechmachtia.
Ken otikitakej itech video, ¿ken tikmatij ayakmo kuali omouikayaj?
¿Tlen okichijkej uan ijkon oksepa kuali omouikakej?
Xiktlajtoltikan 1 Corintios 10:24 uan Colosenses 3:13. Ijkuak yonankitlajtoltijkej xikitakan tlen namechmachtia.
¿Ken uelis kinpaleuis akinmej yomonamiktijkej tlen kijtouaj ninmej textos?
Biblia kijtoua moneki tinochtin matimotlakaitakan. Ikinon akinmej yomonamiktijkej moneki motlasojtlaskej uan motlakaitaskej. Xiktlajtoltikan Romanos 12:10 uan satepan xikitakan tlen namechmachtia.
¿Moneki san tikchixtos mamitstlakaitakan? ¿Tleka ijkon tikijtoua?
SEKIMEJ KIJTOUAJ: “Ayakmo timotlasojtlaj”.
Tla ikaj ijkon mitsiluis, ¿ken tikiluiskia Biblia uelis kinpaleuis?
XIKILNAMIKTO
Akinmej yomonamiktijkej uelis yolpakiskej tla motlasojtlaj, motlakaitaj uan kichiuaj tlen kijtoua Biblia.
Matikojpauikan
¿Tlen uelis kichiuas tlakatl uan ijkon yolpakis iuan isiua?
¿Tlen uelis kichiuas siuatl uan ijkon yolpakis iuan inamik?
Tla tejuatsin yotimonamikti, ¿tlen textos uelis mitspaleuiskej xiyolpaki iuan monamik?
NIN NOIJKI MITSPAKTIS
Xikita tlen uelis mitspaleuis xiyolpaki iuan mofamilia.
Xikita se video tlen kiteititia ken uelis tiyolpakis iuan monamik tla tikchiua tlen kijtoua Biblia.
Xikita tlen kijtosneki se siuatl kitlakaitas inamik.
“¿Tleka siuatl moneki kitlakamatis inamik?” (Akin Tetlapouijtok, 15 de mayo 2010)
Xikita tlen okinpaleui se tlakatl uan isiua oksepa kuali mayetokan, maski achto omokajkajkej.