ToTajtsin Dios yokijto tlen kichiuas
Axkan motetlapouijtok kuali tlajtolmej itech Tekiuajkayotl itech nochi tlaltikpak ijkon ken okijto Jesús (Mateo 24:14, TNM). Se amochtli tlen poui itech Biblia itoka Daniel kiyekijtoa nin Tekiuajkayotl okitlali toTajtsin Dios. Itech capítulo 2 okijto tlen kinpanoskia tekiuajkayomej tlen opejki ijkuak okatka Babilonia hasta axkan. Uan versículo 44 techiluia tlen panos satepan:
“Uan ijkuak tlanauatijtoskej nonmej uejueyij tekiuajkej toTajtsin Dios tlen kajki iluikak kitlalis se tekiuajkayotl tlen amo keman kitlajtlamiskej. Uan nin tekiuajkayotl amo kiuikaskej itech okse altepetl. Kintlajtlamis uan kinmachiuas nochi ninmej tekiuajkayomej uan ye nochipa yetos”.
Noijki okseki profecías kijtoaj iTekiuajkayo toTajtsin Dios kinpatkayotis tekiuajkej, nochi tlayektlalis uan kuali yetos tlaltikpak. ¿Ken technauatis nin Tekiuajkayotl? Ma tikitakan seki tlamantli tlen sapanoa kuajkualtsin yetos.
AYAKMO YETOS GUERRAS
Salmo 46:9. ToTajtsin Dios “kintlajtlamia guerras itech nochi tlaltikpak. Kiposteki arco uan kiposteki lanza; carruajes kintlatia ijtik tlitl”.
Ximokuayejyeko ken kuali tiyetoskej tla nochi tomin tlen kitekitiltiaj para kinchijchiuaj teposmej tlen ika moteuiaj kitekitiltiskiaj para ika tlapaleuiskiaj. ITekiuajkayo toTajtsin Dios kinmachiuas guerras.
AYAKMO IKAJ MOKOKOS
Isaías 33:24. “Nion se tlaltikpaktlakatl kijtos: ‘Nimokokoa’”.
Ximokuayejyeko ayakmo ikaj mokokos, ayakmo ikaj kikokos iyolo, ayakmo ikaj kipias cáncer nion diabetes. Ayakmo monekiskej hospitales nion pajtli. Ayakmo ikaj mokokos porque nochtin kuali yetoskej.
AYAKMO IKA APISMIKIS
Salmo 72:16. “Yetos miak xinachtli ipan tlaltikpak; ipan tepemej sapanoa tlamochiuas”.
Itech tlaltikpak sapanoa tlamochiuas uan nochtin kipiaskej tlen kikuaskej uan yolpakiskej. Ayakmo ikaj apismikis.
AYAKMO IKAJ TLAJYOUIS NION IKAJ MIKIS
Apocalipsis 21:4. “Ye kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli, porke nochi tlan yowejka okatka, nochi yotlatlajtlanki”.
Ayakmo ikaj kipias tlajtlakoli, nochipa yoltoskej uan tlaltikpak kikuepaskej se xochitlali. Ijkon yotechilui toTajtsin Dios akin sapanoa techtlasojtla.
TOTAJTSIN DIOS KICHIUAS TLEN YOKIJTO
¿Tikneltoka melauak mochiuas nochi tlen yotikijtojkej? Maski miakej kinpaktia tlen kijtoa Biblia, sekimej amo ueli kajsikamatij tlen kijtosneki nochipa tiyoltoskej. Uan tikinmajsikamatij porque tinochtin timikij.
Yiuejkika titlajtlakolejkej uan timikij, ik non, miakej mokuayejyekoaj moneki titlajyouiskej. Pero toTajtsin Dios amo ijkon okinekiaya ma tiyetokan.
Para tikneltokaskej tlen toTajtsin Dios kijtoa kichiuas, ye techiluia: “Ijkon yetos notlajtol tlen kisa nokamak. Amo nouan mokuepas tla amo mochiua, pero melauak mochiuas tlen nechyolpaktia uan kuali kisas ijkon ken oniktitlanki” (Isaías 55:11).
Biblia techiluia toTajtsin Dios “amo tlakajkayawa” (Tito 1:2). Ye yotechilui tlen kichiuas sapanoa kuajkualtsin, ik non, ma timotlajtlanikan: “¿Melauak nochipa tichantiskej itech xochitlali? ¿Tlen tikchiuaskej para tikseliskej tlen toTajtsin Dios okijto kichiuas?”. Okseki tlamachtilmej kinnankiliskej ninmej tlajtlanilmej.