Ijkuak toTajtsin Dios otlanauatiaya, kuali okatka nochi tlen okichijchi uan ika yolseuilistli.

¿Tleka moneki ma technauati iTekiuajkayo toTajtsin Dios?

Akin otechchijchi itoka Jehová uan san ye otlanauatiaya ika tlasojtlalistli. Ik non, otechchijchiuili se kualtsin xochitlali tlen okitokayoti Edén. Ompa tichantiskiaj uan tikpiaskiaj tlen tikkuaskej. Noijki kualtsin titekipanoskiaj (Génesis 1:28, 29; 2:8, 15). Tikpiaskiaj yolseuilistli tla tikkauiliskiaj ma technauati toTajtsin Dios.

Adán kikitskijtok tlakilotl tlen okimakak Eva. — Adán uan Eva amo okinekej ma kinnauati toTajtsin Dios.

Biblia kijtoua se ángel tlen moixmati ken Satanás okixnamik toTajtsin Dios ijkuak okijto amo kuali tlanauatia. Okijto okachi kuali tiyetoskiaj tla amo technauatis toTajtsin Dios. Teyolkoko porque Adán uan Eva okineltokilijkej Satanás uan okixnamikej toTajtsin Dios (Génesis 3:1-6; Apocalipsis 12:9).

Adán uan Eva amo okinekej ma kinnauati toTajtsin Dios. Ik non, ayakmo ochantikej itech xochitlali uan omikej (Génesis 3:17-19). Tlen okichijkej okinmijtlako inmixuiuan. Biblia kijtoua Adán otlajtlakolchi, ik non, “tlajtlákoli okalak itech nin tlaltíkpaktli iwa okualík mikílistli” (Romanos 5:12). Pero noijki titlajyouiaj porque “nochtin san nochipa motlajyouiltiaj ijkuak san yejuan monauatiaj” (Eclesiastés 8:9). Tinochtin titlajyouiaj porque tlanauatiaj tekiuajkej.

OPEJKI TLANAUATIAJ TEKIUAJKEJ

Nemrod omoueyinekiaya uan miakej kichijchijtokej se torre. — Nemrod okixnamik Jehová.

Biblia kijtoua Nemrod ye achto okatka tekiua uan okixnamik Jehová. Ijkuakon opejki tetlajyouiltiaj tekiuajkej. Ik non, yikipia kanaj tres mil xiuitl Salomón okijto: “Onikitak ochokayaj akinmej okintlajyouiltiayaj uan amikaj okinyolseuiaya. Otlanauatiayaj akinmej otetlajyouiltiayaj” (Eclesiastés 4:1).

Axkan ok ijkon panotok. Itech 2009 akinmej pouij itech Naciones Unidas okijkuilojkej: “Miakej kijtouaj titlajyouiaj porque amo kuali tlanauatiaj tekiuajkej”.

MONEKI ITLAJ TIKCHIUASKEJ

Tinochtin moneki ikaj kuali ma technauati. Pero akin otechchijchi yokijto akin kuali technauatis.

Fotos kanin mota ken tlajyouiaj porque tlanauatiaj tekiuajkej: (1) Se siuatl tlen chanti Asia euatok uan kinapalojtok ichokotsin; (2) se kojkoltsin mokokoua; (3) soldados temiktiaj; (4) miakej kualantokej porque itlaj kinekij; (5) se siuatl uan itakotsin kitaj okintlapanilijkej se ventana; (6) fábricas kijtlakouaj tlaltikpak. — Nion se tekiua ueli kiyektlalia ouijkayotl tlen tikixnamikij.

ToTajtsin Dios yokitlali iTekiuajkayo uan ye kinpatkayotis tekiuajkej uan san “ye nochipa yetos” (Daniel 2:44). Non Tekiuajkayotl miakej kitlajtlanij ma uiki ijkuak kijtouaj padrenuestro (Mateo 6:9, 10, TNM). Pero amo ye toTajtsin Dios kiyekanas nin Tekiuajkayotl. Ye yokipejpenki akin tlanauatis uan nin ikaj tlen yokatka nikan tlaltikpak. ¿Akin kiyekana nin Tekiuajkayotl?