Akinmej yikin onanmonamiktijkej okachi xiktekichiuilikan Jehová

1, 2. (1) ¿Tleka akinmej yikin monamiktiaj moneki kikauiliskej Jehová ma kinyekana? (Salmo 37:3, 4) (2) ¿Tlen timomachtiskej?

¿YOTIMONAMIKTI noso yitimonamiktis? Tla ijkon, tikneki tiyolpakis iuan monamik porque sapanoua tiktlasojtla. Pero ma tikilnamikikan akinmej monamiktiaj uelis kinpanos seki tlamantli tlen kintekipachos uan noijki ijkuak yikin monamiktiaj moneki kipejpenaskej seki tlamantli miak ipati. Tla nankipejpenaj tlen namechpaleuis, nochipa nanyolpakiskej. Tla nankikauiliaj Jehová ma namechyekana, okachi kuali nanmouikaskej uan okachi nanyolpakiskej. Tla amo nankichiuaj tlen Jehová kijtoua, ayakmo kuali nanmouikaskej uan amo nanyolpakiskej (xiktlajtolti Salmo 37:3, 4).

² Tikitaskej seki tlamantli tlen kinpaleuis akinmej yikin omonamiktijkej pero noijki kinpaleuis akinmej yiuejkika omonamiktijkej. Tikitaskej tlen okichijkej tlakamej uan siuamej tlen ijkuilitok itech Biblia uan tikitaskej ken techpaleuia tlen yejuan okichijkej. Noijki tikitaskej ken uelis tikchiuaskej ken akinmej yomonamiktijkej.

¿TLEN UELIS KINPANOS AKINMEJ YIKIN OMONAMIKTIJKEJ?

3, 4. ¿Tlen uelis kinpanos akinmej yikin monamiktiaj?

³ Itech seki altepemej akinmej yikin monamiktiaj kinmiluiaj ma kichiuakan ken oksekimej. Xamo intatajuan noso oksekimej infamiliares kinmiluiaj san niman ma kinpiakan inkoneuan. Xamo sekimej akinmej inmiuan mouikaj uan infamiliares kinmiluiaj ma kikouakan se kali uan ma kikouakan miak tlamantli.

⁴ Tla akinmej yikin monamiktiaj amo momaluiaj, uelis kiteuikiliskej miak tomin. Uan sapanoua tekipanoskej. Ayakmo majxiliskej momachtiskej iselti, san sekan kiueyichiuaskej Jehová nion tetlapouiskej. Xamo okachi tekipanoskej para kipiaskej tomin uan para amo kipoloskej inteki, ik non, ayakmo majxiliskej monechikoskej. Uan non kichiuas ayakmo okachi ma kitekichiuilikan Jehová.

5. ¿Tlen mitsmachtia tlen okichijkej Klaus uan Marisa?

⁵ Yotikitakej miakej akinmej yikin omonamiktijkej kitemouaj miak tlamantli pero amo yolpakij. Ijkon okinpanok Klaus uan Marisa.b Sapanoua otekipanouayaj para kipiaskiaj tlen okinpaktiaya pero amo oyolpakiayaj. Klaus okijto: “Otikpiayaj miak tlamantli tlen otechpaktiaya pero amo otimokuayejyekouayaj ken okachi tiktekichiuiliskiaj Jehová”. Xamo tejuatsin noijki yotikitak maski tikpia miak tlamantli amo tiyolpaki. Pero amo ximosotlaua, tlen okichijkej oksekimej uelis mitspaleuis. Achto ma tikitakan ken uelis kichiuaskej ken tekiua Jehosafat, tlakamej tlen yomonamiktijkej.

XITLANELTOKAKAN IJKON KEN JEHOSAFAT

6. Ijkon ken kijtoua Proverbios 3:5, 6, ¿tlen okichi Jehosafat ijkuak okinekiayaj kiteuiskej ifamilia uan ialtepe?

⁶ Tlakamej tlen yonanmonamiktijkej, ¿ualeua nanmotekipachouaj porque nankipiaj miak tekitl? Uelis namechpaleuis tlen okichi tekiua Jehosafat. Ye omonekiaya kitas kuali ma yetokan akinmej ochantiayaj ialtepe, ik non, okipiaya miak tekitl uan okichi seki tlamantli. Ompa Judá okichijchi kanin uelis mopaleuiskiaj uan okinmololo 1,160,000 (un millón ciento sesenta mil) soldados (2 Crón. 17:12-19). Satepan soldados tlen ochantiayaj Ammón, Moab uan tepetl Seír okinekiayaj kinteuiskej Jehosafat, ifamilia iuan nochtin akinmej ochantiayaj ialtepe (2 Crón. 20:1, 2). ¿Tlen okichi Jehosafat? Okilui ma kiyolchikaua Jehová ijkon ken kijtoua Proverbios 3:5, 6 (xiktlajtolti). Itech 2 Crónicas 20:5-12 kijtoua ken omotlatlaujti uan tlen ye okijto okineltokaya Jehová kipaleuiskia. ¿Ken okinankili Jehová?

7. ¿Tlen okichi Jehová ijkuak Jehosafat okitlatlaujti?

⁷ Se levita tlen omotokayotiaya Jahaziel okilui Jehosafat tlen Jehová okilui. Ye okijto: “Ximoyekketokan, san ximokajtokan uan xikitakan ken namechmakixtis Jehová” (2 Crón. 20:13-17). Jehová okinmilui tlen omonekiaya kichiuaskiaj uan amo se tlakatl. Jehosafat okichi tlen Jehová okilui porque okimatiaya ye kipaleuiskia. Ijkuak oyajkej kanin moteuiskiaj tlaixpan okintlali akinmej amo okipiayaj tlen ika moteuiskiaj uan otlakuikatiajkej. Otlatlankej ijkon ken Jehová okilui Jehosafat (2 Crón. 20:18-23).

8. ¿Ken uelis kichiuaskej ken Jehosafat tlakamej tlen yomonamiktijkej?

⁸ ¿Ken uelis kichiuaskej ken Jehosafat tlakamej tlen yomonamiktijkej? Namejuan moneki nankipaleuiskej namofamilia, ik non, nanmochijchikauaj nankinmaluiskej uan xamo uelis nanmokuayejyekoskej namoselti uelis nankiyektlaliskej tlen namechpanotok. Pero amo ijkon ximokuayejyekokan, xikiluikan Jehová ma namechpaleui uan noijki ximotlatlaujtikan iuan namosiua. Xikkauilikan Jehová ma namechyekana, ximomachtikan Biblia, amatlajkuilolmej tlen techmaka ialtepe uan xikchiuakan tlen nanmomachtiaj. Xamo oksekimej amo kinpaktis ijkon xikchiuakan uan xamo namechiluiskej amo nanmokuayejyekouaj ken moneki. Xamo namechiluiskej okachi kuali nanyetoskej tla nankipiaj miak tomin uan okseki tlamantli. Xikilnamikikan tlen okichi Jehosafat, ye okineltokak uan okiteititi Jehová kipaleuiskia. Jehová nochipa okipaleui uan namejuan nochipa namechpaleuis (Sal. 37:28; Heb. 13:5). ¿Tlen uelis kichiuaskej ma yolpakikan akinmej yomonamiktijkej?

XIKTEKICHIUILIKAN JEHOVÁ IJKON KEN OKICHI ISAÍAS UAN ISIUA

9. ¿Tlen okichijkej Isaías uan isiua?

⁹ Isaías uan isiua okitakej ken okachi kitekichiuiliskej Jehová. Isaías okatka profeta uan xamo isiua noijki porque itech Biblia ijkuilitok ye okatka profetisa (Is. 8:1-4). Yejuan okachi okipatioitayaj kiueyichiuaskej Jehová. Akinmej yomonamiktijkej uelis kichiuaskej ken okichijkej Isaías uan isiua.

10. ¿Tleka akinmej yomonamiktijkej moneki ma momachtikan profecías tlen katej itech Biblia?

¹⁰ Akinmej yomonamiktijkej, ¿ken uelis kichiuaskej ken Isaías uan isiua? Moneki kitaskej ken okachi kitekichiuiliskej Jehová. Para okachi mouikaskej iuan Jehová, ma momachtikan profecías uan ma kitakan ken mochijtok tlen ompa kijtoua (Tito 1:2).c Uelis mokuayejyekoskej ken noijki uelis tlapaleuiskej para ma mochijtokan seki profecías. Jesús okijto tetlapouiskiaj itech nochi tlaltikpak ijkuak yitlamiskia tlen amo kuali (Mat. 24:14, TNM). Ijkuak kitaskej akinmej yomonamiktijkej ken mochijtok profecías tlen katej itech Biblia, okachi kinekiskej kitekichiuiliskej Jehová.

IJKON KEN PRISCILA UAN ÁQUILA OKACHI XIKPATIOITAKAN NANKITEKICHIUILISKEJ JEHOVÁ

11. ¿Tlen okichijkej Priscila uan Áquila uan tleka?

¹¹ Telpokamej uan ichpokamej tlen yikin omonamiktijkej, uelis kichiuaskej ken sekimej judíos tlen omotokayotiayaj Priscila uan Áquila. Yejuan ochantiayaj Roma, okintlapouijkej tlen Jesús okichi uan opejkej kichiuaj tlen ye otlamachti. Xamo oyolpakiayaj pero satepan tekiua Claudio tlen otlanauatiaya ompa Roma okinkixti judíos tlen ompa ochantiayaj. Xamo Áquila uan Priscila okitakej oui porque okitemojkej kanin chantiskiaj uan kanin kinchijchiuaskiaj mantajkalmej tlen okinnemakayaj. ¿Ayakmo okitekichiuilijkej Jehová? Amo. Okinpaleuitoj tokniuan tlen ochantiayaj Corinto uan okinyolchikajkej ijkon ken Pablo okichiuaya. Pero satepan otetlapouitoj itech okseki altepemej kanin amo okixmatiayaj Jehová (Hech. 18:18-21; Rom. 16:3-5). ¡Maski okipiayaj miak tekitl sapanoua oyolpakiayaj!

12. ¿Tleka akinmej yomonamiktijkej moneki kitaskej ken okachi kitekichiuiliskej Jehová?

¹² Tokniuan tlen yomonamiktijkej uelis okachi kitekichiuiliskej Jehová, ijkon ken okichijkej Priscila uan Áquila. Ijkuak yinovios uelis motlapouiskej ken kinekij kitekichiuiliskej. Kitaj ken kichiuaskej, mochijchikauaj uan okachi kitaj iespíritu santo Jehová kinpaleuia (Ecl. 4:9, 12). Ma tikitakan tlen okipanok Russell uan Elizabeth. Russell okijto: “Ijkuak otikatkaj tinovios otimotlapouiayaj ken okachi tiktekichiuiliskiaj Jehová”. Elizabeth okijto: “Non otimotlapouijkej para tikchiuaskiaj tlen achto otikpejpenkej”. Yejuan ochantitoj uan otetlapouitoj altepetl Micronesia.

13. Ijkon ken kijtoua Salmo 28:7, ¿tlen panos tla akinmej monamiktiaj okachi kitekichiuiliaj Jehová?

¹³ Miakej tokniuan kichiuaj ijkon ken Russell uan Elizabeth, amo kitemouaj miak tlamantli uan ijkon okachi tetlapouiaj. Tla akinmej monamiktiaj kinekij okachi kitekichiuiliskej Jehová uan ijkon kichiuaj, ye kinteochiuas. Kitaskej ken Jehová kinmaluia uan okachi kineltokaskej tlen ye kijtoua uan yolpakiskej (xiktlajtolti Salmo 28:7).

¿KEN OKITEITITIJKEJ OKINELTOKAYAJ APÓSTOL PEDRO UAN ISIUA JEHOVÁ KINPALEUISKIA?

14. ¿Ken okiteititijkej apóstol Pedro uan isiua okineltokayaj tlen kijtoua Mateo 6:25, 31-34?

¹⁴ Noijki tlen okichijkej Pedro uan isiua uelis kinpaleuis akinmej yomonamiktijkej. Ijkuak Pedro okixmatki Jesús opanok kanaj se xiuitl ijkuak okipejpenki se tlamantli miak ipati. Pedro omichkitskiaya ijkuak Jesús okiyole iuan ma tetlapouiti, omonekiaya mokuayejyekos ken kimakaskia ifamilia tlen ika mopanoltiskia (Luc. 5:1-11). Pedro okipejpenki tetlapouiti iuan Jesús. ¡Kuali tlen ye okipejpenki uan isiua okipaleui! Biblia kijtoua satepan ijkuak Jesús omoyoliti, Pedro okiuikatinemiaya isiua ijkuak otetlapouiaya (1 Cor. 9:5). Ijkon uelis kinmiluiskia oksekimej tokniuan akinmej omonamiktijkej tlen omonekiaya kichiuaskej (1 Ped. 3:1-7). Pedro uan isiua okineltokayaj Jehová kinmakaskia tlen omonekiaya tla okachi kipatioitaskiaj kitekichiuiliskiaj (xiktlajtolti Mateo 6:25, 31-34).

15. ¿Tlen mitsmachtia tlen okinpanok Tiago uan Esther?

¹⁵ Tla namejuan yinankipiaj miak xiuitl onanmonamiktijkej, ¿tlen uelis nankichiuaskej para okachi nankitekichiuiliskej Jehová? Xikitakan oksekimej tokniuan tlen yomonamiktijkej. Uelis nankitlajtoltiskej revista Akin Tetlapouijtok, tlamachtilmej tlen intoka: “Ika nochi inyolo otetlapouitoj”. Ijkon non okinpaleui Tiago uan Esther porque satepan otetlapouitoj kanin okachi omonekiaya, yejuan ochantiayaj Brasil. Tiago okijto: “Otikitakej Jehová kinpaleuia itekipanojkauan uan non okichi ma tiknekikan ma techyekana uan ma techmalui”. Satepan yejuan ochantitoj Paraguay uan desde 2014 kinpaleuijtokej akinmej tlajtouaj portugués. Ester okijto: “Techpaktia tlen kijtoua Efesios 3:20. Miak uelta yotikitakej Jehová kichiua tlen ompa kijtoua”. Itech carta tlen Pablo okinmijkuilili tokniuan tlen ochantiayaj Éfeso kijtoua Jehová techmakas okachi miak uan amo san tlen tiktlajtlaniliaj uan nochipa ijkon yotikitakej.

16. ¿Akinmej uelis kinpaleuiskej telpokamej uan ichpokamej tlen yikin omonamiktijkej?

¹⁶ Telpokamej uan ichpokamej tlen yonanmonamiktijkej uelis nankichiuaskej ken oksekimej tokniuan tlen yokiteititijkej kineltokaj Jehová nochipa techmaluia. Sekimej tokniuan yimiak xiuitl kitekichiuilijtokej Jehová. Xikinmiluikan tlen nankinekij nankichiuaskej para okachi nankitekichiuiliskej Jehová uan yejuan namechiluiskej tlen namechpaleuis para ijkon nankichiuaskej (Prov. 22:17, 19). Tlayekankej noijki uelis namechpaleuiskej.

17. ¿Tlen okipanok Klaus uan Marisa uan tlen techmachtia tlen okichijkej?

¹⁷ Ijkuak tikijtouaj okachi tiktekichiuiliskej Jehová uelis panos itlaj tlen amo otimokuayejyekouayaj. Ma tikitakan tlen okachi okinpanok Klaus uan Marisa. Ijkuak opanok eyi xiuitl omonamiktijkej, okikajkej inkalijtik uan okijtojkej tlapaleuitiuij Betel ompa Finlandia. Pero okimatkej ompa san uelis tlapaleuiskiaj chikuase metstli. Achto omoyolkokojkej pero satepan okinyolejkej ma momachtikan tlajtoli árabe uan axkan tlapaleuiaj itech se altepetl kanin tlajtouaj non tlajtoli. Marisa okijto: “Onimomojtiaya nias oksekan porque nochi onikpiaya uan san omonekiaya nikneltokas Jehová nechpaleuiskia. Pero yonikitak ye yotechpaleui miak. Axkan okachi nikneltoka Jehová nochipa nechpaleuis”. Non techititia uelis tikneltokaskej Jehová nochipa techteochiuas porque okachi tiktekichiuiliaj.

18. ¿Tlen uelis kichiuaskej akinmej yomonamiktijkej para kiteititiskej tlaneltokaj itech Jehová?

¹⁸ Akinmej monamiktiaj yetoskia ken se tetliokolil tlen Jehová kinmaka uan ye kineki ma yolpakikan (Mat. 19:5, 6; Prov. 5:18). Telpokamej uan ichpokamej tlen yikin onanmonamiktijkej, ¿uelis nanmokuayejyekoskej tlen nankichijtokej? ¿Nanmochijchikauaj okachi nankitekichiuiliskej Jehová uan ijkon nanmotlasojkamatiliaj? Xiktlatlaujtikan ye ma namechpaleui, xikitakan tlen principios bíblicos uelis namechpaleuis uan xikchiuakan tlen ompa nanmomachtiskej. Xikilnamikikan tla okachi nankitekichiuiliaj Jehová, okachi nanyolpakiskej.