Miakej amo kuali momachiliaj
“Nochipa nimotekipachoua maski amitlaj nikchiua”.
“Ijkuak nimokuayejyekoua kuali nika, oksepa peua nimotekipachoua. Satepan sapanoua nimoyolkokoua”.
“Maski nimochijchikaua amo okachi nimotekipachos, ualeua nikilnamiki nochi tlen nechpanos se metstli”.
Ijkon kijtouaj akinmej moyolkokouaj. ¿Noijki ijkon timomachilia noso tikixmati ikaj tlen ijkon kipanotok?
Tla ijkon mitspanotok, xikilnamikto amo san te ijkon mitspanoua. Miakej axkan tlajyouiaj porque moyolkokouaj noso kipiaj se infamiliar tlen ijkon kipanoua.
Axkan onka “miak tlaijyowílistli” ikinon timotekipachouaj uan timoyolkokouaj (2 Timoteo 3:1). Akinmej pouij itech Organización Mundial de la Salud kijtouaj tla katej chikueyi tlakamej xamo se moyolkokoua. Ijkuak opejki COVID-19 itech 2 020, okachi omomiaktilijkej akinmej amo kuali momachiliaj. Kanaj 26% akinmej motekipachouaj uan kanaj 28% akinmej sapanoua moyolkokouaj.
Pero amo san moneki tikmatiskej keski ijkon kinpanoua para kuali timomachiliskej. Moneki timokuayejyekoskej tlen tikchiuaskej uan tlen kichiuaskej tofamiliares para kuali tiyetoskej.
¿Tlen tikchiuaj ijkuak kuali timomachiliaj?
Ijkuak kuali timomachiliaj, amo tikitaj oui tikchiuaskej seki tlamantli, tikxikouaj tlen techpanoua, kuali titekipanouaj uan tiyolpakij.
¿Tlen techpanoua ijkuak amo kuali timomachiliaj?
AMO xikijto amo tiyolchikauak.
Ijkuak amo kuali timomachiliaj uelis kichiuas amo kuali matimokuayejyekokan, matimotekipachokan uan uelis tikchiuaskej seki tlamantli tlen amo tiknekij.
Akin amo kuali momachilia nochipa kita oui mouikas inuan oksekimej uan oui kichiuas seki tlamantli.
Nochtin uelis ijkon kinpanos, maski tlatlamantli inmialtepe, religión, kipiaj tomin noso amo.
Xiktemo se tepajti
Sekimej mota amo kuali momachiliaj ijkuak kipatlaj inyelis, amo kikuaj tlen kinpaleuia noso ayakmo ueli kochij. Oksekimej ualeua yiuejkika motekipachouaj noso moyolkokouaj. Tla ijkon mitspanoua noso tikixmati akin ijkon kipanotok, xamo moneki makitemo ikaj makipaleui. Ijkon kimatis tleka ijkon kipanoua. Pero ¿akin uelis kipaleuis?
Jesucristo akin sapanoua ixtlamatki okijto: “Akimeh amo mokokoah [amo] kinekih se tepajti, yej non mokokoah” (Mateo 9:12). Akinmej kichiuaj tlen kinmiluia tepajti peua kuali momachiliaj uan oksepa yolpakij. Tla tikita ijkon timomachilia noso yopanok miak tonal uan ok ijkon timomachilia, timitsyoleuaj san niman xiktemo tlen uelis mitspaleuis.a
Biblia amo kijtoua tlen pajtli ika tipajtiskej pero uelis techpaleuis kuali matimomachilikan. Tlen satepan tikitaskej techmachtia Biblia techpaleuia matikitakan tlen uelis tikchiuaskej tla amo kuali timomachiliaj. Ikinon timitsyoleuaj xiktlajtolti.
a Revista Akin Tetlapouijtok amo kijtoua ken uelis timopajtiskej. Sejse moneki achto timokuayejyekoskej tlen tikchiuaskej.