¿Tleka moneki tiktlakaitaskej Jehová?

1, 2. ¿Tlen moneki tikchiuaskej para kuali timouikaskej iuan Jehová ijkon ken kijtoua Salmo 25:14?

¿TLEN techpaleuis para kuali timouikaskej inmiuan oksekimej? Xamo tikijtoskej moneki timotlasojtlaskej uan timopaleuiskej. Moneki timotlakaitaskej para kuali timouikaskej inmiuan oksekimej. Ijkon ken kijtoua texto tlen kajki itech nin tlamachtil akinmej kinekij mouikaskej iuan Jehová moneki kitlakaitaskej (xiktlajtolti Salmo 25:14).

² Tinochtin moneki tiktlakaitaskej Jehová maski yimiak xiuitl tiktekichiuilijtokej noso amo. Pero ¿tlen kijtosneki tiktlakaitaskej toTajtsin Dios? ¿Tlen techpaleuis ijkon matikchiuakan? ¿Tlen techmachtia tlen okichi Abdías, teopixki Jehoiadá uan tekiua Jehoás?

¿TLEN KIJTOSNEKI TIKTLAKAITASKEJ TOTAJTSIN DIOS?

3. Xikyekijto ken techpaleuia tla timomojtiaj.

³ Ijkuak itlaj techmomojtiaj, tikmauiliaj porque uelis techpanos tlen amo kuali. Ijkon timomaluiaj porque amitlaj techpanoua. Ken ijkuak tikatej kanin tlauejkapan, amo timotokiaj tlatentli porque timomojtiaj tiuetsiskej. Amo tiknekij itlaj matechpano ikinon amo timotokiaj kanin amo tlakualkan. Noijki amo tiknekij tikyolkokoskej se toyolikni porque tiknekij nochipa iuan timouikaskej.

4. ¿Tlen kineki Satanás matikneltokakan?

⁴ Satanás kineki matikmauilikan toTajtsin Dios. Ye kineki matikneltokakan Jehová sapanoua kualani uan amo keman uelis tikyolpaktiskej ijkon ken yiuejkika Elifaz okilui Job (Job 4:18, 19). Noijki kineki ayakmo matiktekichiuilikan Jehová. Tejuan moneki tiktlakaitaskej toTajtsin Dios para amo tikchiuaskej tlen Satanás kineki.

5. ¿Tlen kijtosneki tiktlakaitaskej toTajtsin Dios?

⁵ Ijkuak Jesús okatka nikan tlaltikpak okiteititi okitlakaitaya iTajtsin, noijki ijkon akin kitlakaita Jehová amo kichiua itlaj tlen kiyolkokos (Heb. 5:7). Jesús okitlakaitaya iTajtsin amo porque okimauiliaya (Is. 11:2, 3). Ye okitlasojtlaya iTajtsin ika nochi iyolo ikinon nochipa okitlakamatki (Juan 14:21, 31). Tejuan noijki sapanoua tiktlakaitaj toTajtsin Dios uan tiktekichiuiliaj porque ye tetlasojtla, ixtlamatki, kichiua tlen kuali uan sapanoua chikauak. Noijki tikmatokej tlen tikchiuaj uelis kiyolpaktis noso kiyolkokos porque ye sapanoua techtlasojtla (Sal. 78:41; Prov. 27:11).

¿TLEN TECHPALEUIS MATIKTLAKAITAKAN TOTAJTSIN DIOS?

6. ¿Tlen techpaleuis matiktlakaitakan toTajtsin Dios? (Salmo 34:11).

⁶ Ijkuak tinesij ayamo tiktlakaitaj toTajtsin Dios ikinon moneki timochijchikauaskej tiktlakaitaskej (xiktlajtolti Salmo 34:11). Ijkuak tikitaj tlen okichijchi techpaleuia matiktlakaitakan uan tikitaj ye ixtlamatki, sapanoua chikauak uan tetlasojtla. Non techpaleuia okachi matiktlakaitakan uan matiktlasojtlakan (Rom. 1:20). Se tokni tlen itoka Adrienne okijto: “Sapanoua nechpaktia ijkuak nikita tlen Jehová okichijchi uan nikita ye ixtlamatki, non nechpaleuia manikajsikamati nochi itlanauatiluan melauak nechpaleuia”. Ye omokuayejyeko uan okijto: “Amo nikneki nikchiuas itlaj tlen kiyolkokos Jehová porque ye okichi maniyolto”. ¿Uelis timokuayejyekoskej nin semana tlen techmachtia tlen okichijchi Jehová? Non techpaleuis okachi matiktlakaitakan uan matiktlasojtlakan (Sal. 111:2, 3).

7. ¿Ken techpaleuia ijkuak tiktlatlaujtiaj Jehová?

⁷ Noijki techpaleuis matiktlakaitakan Jehová tla tiktlatlaujtiaj. Ijkuak okachi iuan timotlapouiaj, okachi tikixmatij. Noijki tikitaj ye sapanoua chikauak ijkuak techpaleuia matitlaxikokan. Sapanoua tiktlasojkamatiliaj Jehová porque techtlasojtla uan topatka okitemakak iKone. Noijki ijkuak tiktlatlaujtiaj matechpaleui tikitaj ye ixtlamatki. Nochi non techpaleuia okachi matiktlakaitakan Jehová uan amo tikchiuaskej itlaj tlen uelis kichiuas ayakmo iuan matimouikakan.

8. ¿Tlen moneki tikchiuaskej para nochipa tiktlakaitaskej Jehová?

⁸ Matimomachtikan tlen Biblia kijtoua para tikitaskej tlen okichijkej akinmej okitlakamatkej Jehová uan akinmej amo. Non techpaleuis nochipa matiktlakaitakan Jehová. Matikitakan tlen okichijkej eyi tlakamej. Achto tikitaskej tlen okichi itlakeual Acab tlen omotokayotiaya Abdías. Satepan tikitaskej tlen okichi Jehoiadá teopixki tlen otlayekanaya. Saiktlami tikitaskej tlen okichi Jehoás tlen otlanauatiaya Judá. Ye achto okitekichiuiliaya Jehová pero satepan ayakmo ijkon okichi.

MATIYETOKAN TIYOLCHIKAUAKEJ IJKON KEN ABDÍAS

9. ¿Ken okipaleui Abdías porque okitlakaitaya Jehová? (1 Reyes 18:3, 12).

⁹ Biblia kijtoua Abdíasb sapanoua okitlakaitaya Jehová (xiktlajtolti 1 Reyes 18:3, 12). Non okipaleui amo matlakajkayaua ikinon oksekimej okineltokiliayaj uan satepan tekiua okilui makimalui ikalijtik (noijki xikita Nehemías 7:2). Ye noijki okatka yolchikauak porque okitlakaitaya toTajtsin Dios. Omonekiaya yetos yolchikauak porque ijkuak ye okatka otlanauatiaya Acab. Biblia kijtoua Acab “sapanoua okichi tlen amo kuali ixpan Jehová uan amo ken oksekimej tekiuajkej” (1 Rey. 16:30). Isiua Acab okatka Jezabel uan okiueyichiuaya Baal. Ye okikokoliaya Jehová ikinon okinekiaya kinmixpolos nochtin israelitas tlen okiueyichiuayaj. Noijki okinmixpolo miakej iprofetas toTajtsin Dios (1 Rey. 18:4). Sapanoua oui okatka kiueyichiuaskej Jehová.

10. ¿Ken okiteititi Abdías okatka yolchikauak?

¹⁰ ¿Ken okiteititi Abdías okatka yolchikauak? Ye okintlati itech cuevas iprofetas Jehová ijkuak Jezabel opejki kintlajyouiltia uan okinekiaya kinmiktis. Okintlati ome grupos, se 50 uan okse 50 uan okintlamakak (1 Rey. 18:13, 14). Tla Jezabel kimatiskia Abdías okipaleui profetas, ye tlanauatiskia san niman makimiktikan. Abdías omomojtiaya porque ueliskia kimiktiskiaj pero ye okachi okintlasojtlaya Jehová ikinon okinpaleui iprofetas.

11. ¿Ken kichiuaj sekimej tokniuan ijkon ken okichi Abdías? (Noijki xikita foto).

¹¹ Axkan miakej tokniuan chantij kanin amo kitekauiliaj matetlapouikan nion mamonechikokan. Yejuan kintlakaitaj tekiuajkej ijkon ken okichi Abdías pero okachi kitlakaitaj Jehová uan kiueyichiuaj ijkon ken moneki (Mat. 22:21). Kitlakaitaj Jehová ikinon kitlakamatij uan amo kichiuaj tlen tekiuajkej kinnauatiaj (Hech. 5:29). Ikinon ichtaka tetlapouiaj uan monechikouaj (Mat. 10:16, 28). Noijki kinmakaj oksekimej tokniuan tlen ika momachtiskej. Matikitakan tlen okipanok se tokni tlen itoka Henri. Ye chanti itech se altepetl tlen kajki África uan ompa amo okinkauiliayaj matetlapouikan nion mamonechikokan. Pero ye okinuikiliaya amatlajkuilolmej oksekimej tokniuan. Henri okijto: “Ne nikmati Jehová onechpaleui maniyeto niyolchikauak porque sapanoua niktlakaita. Noselti amo uelis nikchiuaskia nipinaua”. Tla tiktlakaitaj toTajtsin Dios, noijki uelis tiyetoskej tiyolchikauakej ijkon ken tokni Henri.

MATIKTLAKAMATIKAN JEHOVÁ IJKON KEN OKICHI JEHOIADÁ

12. ¿Ken okiteititijkej Jehoiadá uan isiua nochipa okitlakamatiayaj Jehová?

¹² Teopixki Jehoiadá okitlakaitaya toTajtsin Dios ikinon amo keman okika uan okinpaleui oksekimej makiueyichiuakan Jehová. Jehoiadá okiteititi okitlakaitaya toTajtsin Dios ijkuak Atalía tlen okatka ichpoch Jezabel okimoaxkati tekiuajkayotl ompa Judá. Miakej okimauiliayaj Atalía porque otetlajyouiltiaya uan san okinekiaya tlanauatijtos. Ikinon okinekiaya kinmixpolos nochtin ixuiuan tlen okinnamikiaya tlanauatiskej (2 Crón. 22:10, 11). Pero isiua Jehoiadá tlen omotokayotiaya Jehosabeat okipaleui se chokotsin tlen omotokayotiaya Jehoás para amitlaj makipano. Yejuan okitlatijkej uan okiskaltijkej Jehoás ijkon otlapaleuijkej para se ixui David matlanauati. Jehoiadá nochipa okitlakamatiaya Jehová uan amo okimauiliaya Atalía ikinon otlapaleui (Prov. 29:25).

13. ¿Ken oksepa okiteititi Jehoiadá okitlakamatiaya Jehová?

¹³ Ijkuak Jehoás okipiaya chikome xiuitl Jehoiadá oksepa okiteititi okitlakamatiaya Jehová. Porque ye omokuayejyeko tlen kichiuaskia para Jehoás ixui David matlanauati. Pero okimatiaya tla itlaj amo kuali kisaskia, uelis kimiktiskiaj. Jehová okipaleui kuali makisa tlen okichi. Levitas uan akinmej otlayekanayaj inkalijtik okipaleuijkej Jehoiadá. Ikinon ye okitlali matlanauati Jehoás uan otlanauati makimiktikan Atalía (2 Crón. 23:1-5, 11, 12, 15; 24:1). Satepan “okichi se tlajtolsenkaualis iuan Jehová, tekiua uan akinmej opouiayaj itech altepetl. Yejuan omokajkej ok yetoskiaj ialtepe Jehová” (2 Rey. 11:17). “Noijki itech ikal Jehová kaltempa okintlali akinmej otlamaluiayaj. Ijkon amikaj kalakiskia tlen amo okatka chipauak” (2 Crón. 23:19).

14. ¿Tlen okipanok Jehoiadá porque okitlakaitak Jehová?

¹⁴ Jehová okijto kintlakaitas akinmej kitlakaitaj uan ijkon okichi iuan Jehoiadá (1 Sam. 2:30). Jehová okichi makijkuilokan itech itlajtol nochi tlen kuali okichi teopixki Jehoiadá uan ijkon matimomachtikan (Rom. 15:4). Biblia kijtoua ijkuak Jehoiadá oixpoliuik, “okitokakej itech ialtepe David kanin otoktokaj tekiuajkej porque okichiuili tlen kuali toTajtsin Dios uan ikal ompa Israel” (2 Crón. 24:15, 16).

15. ¿Tlen techmachtia tlen okichi Jehoiadá? (Noijki xikinmita fotos).

¹⁵ Tlen okichi Jehoiadá techpaleuia okachi matiktlakaitakan toTajtsin Dios. Tlayekankej uelis kichiuaskej ken ye okichi tla mochijchikauaj kinmaluiskej tokniuan (Hech. 20:28). Tokniuan tlen yikipiaj miak xiuitl uelis kineltokaskej tla nochipa kitlakaitaj Jehová, uelis tlapaleuiskej mamochiua tlen ye kineki. Yotikitakej Jehová okitlakaitak Jehoiadá. Non kinmachtia telpochmej yejuan noijki moneki kintlakaitaskej tokniuan tlen yikipiaj miak xiuitl uan yiuejkika kitekichiuilijtokej Jehová (Prov. 16:31). Tinochtin uelis tikchiuaskej ken levitas uan ken akinmej otlayekanayaj inkalijtik. Nochipa matikinpaleuikan akinmej techyekanaj uan matikintlakamatikan (Heb. 13:17).

AMO MATIKCHIUAKAN KEN OKICHI JEHOÁS

16. ¿Ken okiteititi Jehoás amo okitlasojtlaya Jehová?

¹⁶ Jehoás okiyolpakti Jehová san ijkuak okatka telpochtli porque Jehoiadá okipaleui (2 Rey. 12:2). Ijkuak Jehoiadá oixpoliuk, Jehoás okichi tlen okiluijkej sekimej príncipes tlen okatkaj Judá. Pero yejuan ayakmo okiueyichiuayaj toTajtsin Dios uan okixnamikiayaj. Ikinon Jehoás uan oksekimej tlen ompa ochantiayaj “opejki kinueyichiuaj tlaketsalmej uan ídolos” (2 Crón. 24:4, 17, 18). Tlen okichijkej sapanoua okiyolkoko Jehová, pero ye “nochipa okintitlaniliaya profetas para oksepa mamokopakan inauak [...] pero yejuan amo otlakakiayaj”. Noijki amo okikakej Zacarías tlen okatka itelpoch Jehoiadá. Zacarías okatka iprimo Jehoás uan noijki okatka profeta uan teopixki. Ifamilia Zacarías okiskalti Jehoás pero ye otlanauati makimiktikan Zacarías. Ye amo okitlasojkamatki tlen yejuan okichijkej (2 Crón. 22:11; 24:19-22).

17. ¿Tlen okipanok Jehoás?

¹⁷ Jehoás otlajyoui porque ayakmo okitlakaitak toTajtsin Dios. Jehová okijto akinmej amo kitlakaitaj noijki amo kintlakaitas uan Jehoás ijkon okipanok (1 Sam. 2:30). Satepan soldados sirios tlen amo miakej okatkaj okintlanilijkej isoldados Jehoás uan ye okikojkojkej. Ijkuak sirios oyajkej, isoldados Jehoás okimiktijkej porque ye okimikti Zacarías. Ye amo okitokakej inmiuan oksekimej tekiuajkej porque okatka sapanoua amo yolkuali (2 Crón. 24:23-25; Mateo 23:35).

18. ¿Tlen moneki tikchiuaskej para amo matechpano ken Jehoás ijkon ken kijtoua Jeremías 17:7, 8?

¹⁸ Jehoás okitekichiuili Jehová porque teopixki Jehoiadá okipaleui. Okatka ken se kuauitl tlen ineluayo amo uejkatlan otoktoka uan omonekiaya kitlaliliskej se kuauitl tlen kipaleuiskia amo mauetsi. Porque ijkuak oixpoliuik teopixki Jehoiadá, miakej opejkej kixnamikij Jehová ikinon Jehoás ayakmo otlaneltokak. Tlen okipanok Jehoás techmachtia amo uelis tiktekichiuiliskej Jehová san porque tokniuan noso tofamilia techpaleuiaj. Tejuan moneki toselti timomachtiskej, timokuayejyekoskej uan nochipa tiktlatlaujtiskej Jehová. Ijkon kuali iuan timouikaskej, okachi tiktlasojtlaskej uan tiktlakaitaskej (xiktlajtolti Jeremías 17:7, 8; Col. 2:6, 7).

19. ¿Tlen kineki Jehová matikchiuakan?

¹⁹ Jehová amo techiluia matikchiuakan miak tlamantli. Eclesiastés 12:13 kijtoua: “Xiktlakaita akin melauak toTajtsin Dios uan xikintlakamati itlanauatiluan, nochi nin moneki kichiuas tlaltikpaktlakatl”. Tla tiktlakaitaj Jehová, uelis tikchiuaskej ken Abdías uan Jehoiadá. Ijkuak titlajyouiskej uelis titlaxikoskej uan amo keman tikkauaskej Jehová.