UHezekheli
35 Ilizwi likaJehova laphinda lafika kimi lathi: 2 “Ndodana yomuntu, tshibilika ukhangele eSeyiri+ ilizwe lezintaba, uphrofethe ngalo,+ 3 uthi kulo, ‘Nanku okutshiwo yiNkosi Enkulu uJehova: “Ngizakulwa lawe wena lizwe lezintaba laseSeyiri. Ngizakwelula isandla sami ngikutshabalalise usale uyinkangala.+ 4 Ngizakwenza amadolobho akho abe ngamanxiwa futhi yonke indawo yakho izasala iyinkangala.+ Lapho-ke uzakwazi ukuthi mina nginguJehova, 5 ngoba watshengisa ukuthi uyabazonda kakhulu+ abako-Israyeli, wabanikela ukuthi babulawe ngenkemba ngesikhathi besebunzimeni futhi bejeziswa okokucina.”’+
6 “‘Ngakho ngifunga ngami uqobo,’ kutsho iNkosi Enkulu uJehova, ‘ngizakwenza ukuthi ubulawe futhi ukufa kuzakuxotshanisa.+ Kuzakuxotshanisa sibili ngoba lawe wababulala labo obazondayo.+ 7 Ngizakwenza ilizwe lezintaba laseSeyiri libe yinkangala+ futhi ngizabulala loba ngubani odabula phakathi kwalo. 8 Ngizagcwalisa izintaba zalo ngezidumbu zababuleweyo. Abantu bazabulawa ngenkemba emaqaqeni akho lasezigodini lasezifudlaneni zakho zonke. 9 Ngizakwenza uhlale uyinkangala kuze kube nini lanini njalo akulamuntu ozahlala emadolobheni akho.+ Lapho-ke uzakwazi ukuthi mina nginguJehova.’
10 “Lanxa uJehova wayekhona phakathi kwezizwe lezi ezimbili wena wathi, ‘Izizwe lezi ezimbili lamazwe la amabili azakuba ngawami futhi sizawathatha wonke.’+ 11 ‘Ngakho ngifunga ngami uqobo,’ kutsho iNkosi Enkulu uJehova, ‘ngizakuthukuthelela ngendlela owawubathukuthelele ngayo ngesikhathi utshengisa ukuthi uyabazonda futhi ngizakwenzela umhawu onjengalowo owabenzela wona.+ Nxa sengikwahlulela ngizakwenza ukuthi bangazi. 12 Uzakwazi ukuthi mina Jehova ngizizwile zonke izinto ezimbi ozikhulumileyo ngentaba zako-Israyeli usithi, “Sezitshabalalisiwe futhi sezinikelwe kithi ukuthi sizitshaye sizibhuqe.”* 13 Wakhuluma izinto ezimbi ngami uzikhukhumeza njalo wangithethisa.+ Ngakuzwa konke owawukukhuluma.’
14 “Ngakho nanku okutshiwo yiNkosi Enkulu uJehova: ‘Nxa sengikutshabalalisile waba yinkangala, wonke umhlaba uzathokoza, 15 njengoba nje lawe wathokoza ngesikhathi ilizwe lako-Israyeli litshabalaliswa. Lokhu yikho engizakwenza kuwe.+ Uzakuba yinkangala wena lizwe lezintaba laseSeyiri, yonke nje i-Edomi izatshabalala.+ Abantu bazakwazi ukuthi mina nginguJehova.’”