UHezekheli
47 Indoda engayibona embonweni yangibuyisela emnyango wethempeli.+ Khonapho ngabona amanzi egeleza esiya empumalanga, ephuma ngaphansi komnyango wethempeli.+ Ithempeli lalikhangele empumalanga. Amanzi ayephuma ngakwesokudla komnyango wethempeli, egeleza edlula ngaseningizimu kwe-alithare.
2 Indoda le yangikhiphela phandle ngegedi elisenyakatho,+ yasingibhodisa saya egedini elikhangele empumalanga,+ ngabona amanzi egeleza evela ngakwesokudla kwegedi lelo.
3 Indoda le yaqonda empumalanga iphethe intambo yokulinganisa ngesandla sayo.+ Yalinganisa umango ozingalo* ezingu-1 000 yasingidabulisa phakathi kwamanzi. Amanzi ayekhawula enqagaleni.
4 Yalinganisa ezinye izingalo ezingu-1 000 yasingidabulisa emanzini. Amanzi ayesekhawula emadolweni.
Yasilinganisa ezinye izingalo ezingu-1 000 yangidabulisa emanzini. Amanzi ayesefika ekhalweni.
5 Yalinganisa ezinye izingalo ezingu-1 000 futhi amanzi ayesetshona kakhulu, sekungumfula engangingeke ngiwuchaphe. Kwasekumele umuntu antsheze ngoba kwasekungumfula ongachapheki ngenyawo.
6 Yangibuza yathi: “Uyakubona yini lokhu ndodana yomuntu?”
Yasingihambisa ngenyawo ngabuyela ekhunjini lomfula. 7 Ngathi sengifike ekhunjini lomfula ngabona ukuthi emaceleni womabili omfula kwakulezihlahla ezinengi.+ 8 Yasisithi kimi: “Amanzi la ageleza esiya empumalanga, ehlele e-Arabha*+ aze ayengena elwandle. Nxa angafika elwandle,+ amanzi olwandle azahlambuluka. 9 Zonke inyamazana ezilapho okugelezela khona amanzi* zizaphila. Kuzakuba lenhlanzi ezinengi kakhulu ngoba amanzi la azagelezela khona. Amanzi olwandle azahlambuluka futhi loba ngaphi lapho amanzi azagelezela khona izinto ezilapho zizaphila.
10 “Abagoli benhlanzi bazakuma eceleni komfula lo kusukela e-Eni-gedi+ kuze kuyefika e-Eni-egilayimi, lapho okuzabe kulendawo yokuchayela amanethi. Kuzabe kulenhlanzi ezinengi futhi eziyimihlobo eminengi angathi zinhlanzi zoLwandle Olukhulu.*+
11 “Kuzakuba lezindawo ezingamaxhaphozi lezingamatete* kodwa zona azisoze zihlanjululwe, zizahlala zinjalo zilesawudo.+
12 “Yonke imihlobo yezihlahla ezilezithelo izakhula kuwo wonke amacele omfula. Amahlamvu azo awasoze abune futhi azisoze ziyekele ukuzala. Zizathela nyanga zonke ngoba zithelelwa ngamanzi avela endaweni engcwele.+ Izithelo zazo zizakuba yikudla, amahlamvu azo abe ngawokwelapha.”+
13 Nanku okutshiwo yiNkosi Enkulu uJehova: “Leli yilo ilizwe okumele ulabele izizwana ezingu-12 zako-Israyeli libe lilifa lazo. UJosefa uzaphiwa indawo ezimbili.+ 14 Lizalithatha libe lilifa lenu futhi lizathola indawo ezilinganayo. Ngangifunge kubokhokho benu ukuthi ngizabapha ilizwe leli,+ yikho khathesi seliliphiwa ukuthi libe lilifa lenu.
15 “Nanku umngcele welizwe ongasenyakatho: Usukela eLwandle Olukhulu ulandele indlela eya eHethiloni,+ uqonde eZedadi,+ 16 uye eHamathi,+ leBherotha,+ uyefika eSibhirayimi ephakathi kweDamaseko leHamathi. Usuka lapho uye eHazeri-hathikhoni esemngceleni weHawurani.+ 17 Yikho umngcele lo uzasuka elwandle uye eHazari-enoni,+ uhambe ulandelela umngcele weDamaseko ngasenyakatho lomngcele weHamathi.+ Lo yiwo umngcele osenyakatho.
18 “Umngcele wempumalanga udabula phakathi kweHawurani leDamaseko, udlule eJodani phakathi kweGiliyadi+ lelizwe lako-Israyeli. Kumele ulinganise usukela emngceleni usiya elwandle lwasempumalanga.* Lo yiwo umngcele osempumalanga.
19 “Umngcele weningizimu uzasuka eThamari usiya emfuleni weMeribhathi-khadeshi+ udlule esihotsheni* uyefika eLwandle Olukhulu.+ Lo yiwo umngcele oseningizimu.
20 “Umngcele wentshonalanga luLwandle Olukhulu, kusukela lapho okucina khona umngcele weningizimu kuze kuyefika eLebho-hamathi.*+ Lo yiwo umngcele osentshonalanga.”
21 “Kumele lehlukaniselane ilizwe leli, lilabele izizwana ezingu-12 zako-Israyeli. 22 Kumele lilabelane libe lilifa lenu futhi labele labantu bezinye izizwe abaphakathi kwenu abazele abantwana behlala phakathi kwenu. Kumele libaphathe njengabantu abadabuka ko-Israyeli. Labo bazaphiwa ilifa ndawonye lani phakathi kwezizwana zako-Israyeli. 23 Umuntu wesinye isizwe kumele limnike ilifa endaweni yesizwana ahlala phakathi kwaso,” kutsho iNkosi Enkulu uJehova.