UHezekheli

34 Ilizwi likaJehova laphinda lafika kimi lathi: 2 “Ndodana yomuntu, phrofetha ngabelusi bako-Israyeli. Phrofetha uthi kubo, ‘Nanku okutshiwo yiNkosi Enkulu uJehova: “Maye ngani belusi bako-Israyeli!+ Lina liyazidlela lisuthe kulokuthi linike umhlambi ukudla. Kanti abelusi akumelanga banike umhlambi ukudla yini?+ 3 Lidla inyama enonileyo, ligqoke izembatho zewulu futhi lihlaba izifuyo ezinone kulazo zonke+ kodwa umhlambi kaliwuniki ukudla.+ 4 Ezingelamandla aliziqinisanga, ezigulayo alizelaphanga, ezilimeleyo alizibhanditshanga, ezihlanhlathayo alizinqandanga, lezilahlekileyo alizange lizidinge.+ Kodwa belizikhahlameza futhi liziphatha* ngesihluku.+ 5 Zasabalala zagcwala iganga ngenxa yokuthi kwakungelamelusi,+ zadliwa zinyamazana zeganga. 6 Izimvu zami zazizulazula kuzo zonke izintaba lakuwo wonke amaqaqa aphakemeyo. Zasabalala zagcwala umhlaba wonke futhi akulamuntu owayezihlupha ngokuzilandela ayezidinga.

7 “‘“Ngakho zwanini ilizwi likaJehova lina belusi: 8 ‘“Ngifunga ngami uqobo,” kutsho iNkosi Enkulu uJehova, “izimvu zami zibanjwe zinyamazana, zaba yikudla kwenyamazana zonke zeganga ngenxa yokuthi bekungelamelusi. Abelusi bami abazidinganga izimvu zami kodwa baqhubeka besidla benganiki izimvu zami ukudla.”’ 9 Ngakho-ke zwanini ilizwi likaJehova lina belusi. 10 Nanku okutshiwo yiNkosi Enkulu uJehova: ‘Ngilwa labelusi futhi ngizabathonisisa ngenxa yendlela abaphathe ngayo izimvu zami. Ngizabaxotsha emsebenzini wokwelusa izimvu zami+ futhi abasoze baqhubeke besidla benganiki izimvu zami ukudla. Ngizakhipha izimvu zami emilonyeni yabo njalo abasoze baphinde bazidle.’”

11 “‘Nanku okutshiwo yiNkosi Enkulu uJehova: “Zwanini, mina ngokwami ngizazidingela izimvu zami futhi ngizazinakekela.+ 12 Ngizazinakekela njengomelusi opha izimvu zakhe ebezilahlekile ukudla.+ Ngizazikhipha kuzo zonke izindawo ezasabalala zaya kuzo ngosuku lwamayezi lomnyama omkhulu.+ 13 Ngizazikhipha ezizweni, ngiziqoqe kuwo wonke amazwe besengiziletha elizweni lazo, ngizelusele ezintabeni zako-Israyeli+ eceleni kwezifula lakuzo zonke izindawo zokuhlala zelizwe. 14 Ngizazelusela emadlelweni amahle futhi amadlelo azo azabe esezintabeni eziphakemeyo zako-Israyeli.+ Zizalala khonapho emadlelweni amahle,+ zidle utshani obuhle ezintabeni zako-Israyeli.”

15 “‘“Mina ngokwami ngizazelusela izimvu zami+ futhi ngizaziphumuza”+ kutsho iNkosi Enkulu uJehova. 16 “Ezilahlekileyo ngizazidinga,+ ezihlanhlathayo ngizinqande, ezilimeleyo ngizibhanditshe lezingelamandla ngiziqinise. Kodwa ezinonileyo leziqinileyo ngizazitshabalalisa. Isahlulelo engizazinika sona yiso esizakuba yikudla kwazo.”

17 “‘Kodwa wena mhlambi wami, nanku okutshiwo yiNkosi Enkulu uJehova: “Sekuseduze ukuthi ngahlulele phakathi kwenye imvu lenye, ngahlulele phakathi kwenqama lempongo.+ 18 Kanti alisuthiseki yini ngokudla emadlelweni amahle kakhulu? Manje kungani selinyathenyathela utshani obuseleyo emadlelweni enu? Nxa liqeda ukunatha amanzi amahle, kungani liwadunga ngenyawo zenu? 19 Kambe izimvu zami sekumele zidle utshani elibunyathele ngenyawo zenu, zinathe lamanzi eliwadunge ngenyawo zenu?”

20 “‘Ngakho iNkosi Enkulu uJehova ithi kubo: “Zwanini, mina ngokwami ngizakwahlulela phakathi kwemvu enonileyo lemvu ecakileyo, 21 ngoba zonke izimvu ezigulayo liyazisunduza ngomhlubulo langamahlombe enu futhi liyazihlaba ngempondo zenu zize zisabalale ziye ezindaweni ezikhatshana. 22 Ngizazisindisa izimvu zami futhi azisoze ziphinde zidliwe zinyamazana.+ Ngizazahlulela izimvu zami. 23 Ngizabeka umelusi oyedwa,+ inceku yami uDavida,+ nguye ozazikhangela azinike ukudla. Uzazelusa azinike ukudla.+ 24 Mina Jehova ngizakuba nguNkulunkulu wazo,+ inceku yami uDavida ibe ngumkhokheli phakathi kwazo.+ Mina Jehova sengikhulumile.

25 “‘“Ngizakwenza isivumelwano sokuthula lazo+ njalo ngizaqeda zonke inyamazana zeganga eziyingozi+ elizweni ukuze izimvu zami zihlale zivikelekile enkangala futhi zilale eguswini.+ 26 Izimvu zami ngizazibusisa, ngibusise lendawo eseduze loqaqa lwami+ njalo ngizanisa izulu ngesikhathi esifaneleyo. Izibusiso zizathululeka angathi lizulu.+ 27 Izihlahla zeganga zizathela izithelo zazo, lomhlabathi uveze isivuno sawo+ njalo izimvu zami zizahlala zivikelekile elizweni. Zizakwazi ukuthi mina nginguJehova nxa sengisephula amajogwe azo+ ngizikhulula kulabo ababezenza izigqili. 28 Izizwe azisoze ziphinde zizithaphuzele izimvu zami, lezinyamazana zeganga azisoze zizidle. Zizahlala ngokuthula futhi akulamuntu ozazenza zesabe.+

29 “‘“Ngizalimela izimvu zami insimu ezabatshazwa. Azisoze ziphinde zibulawe yindlala elizweni+ njalo azisoze ziphinde zeyiswe yizizwe.+ 30 ‘Lapho-ke abantu bako-Israyeli bazakwazi ukuthi mina Jehova uNkulunkulu wabo ngilabo lokuthi bona bangabantu bami,’+ kutsho iNkosi Enkulu uJehova.”’

31 “‘Kodwa lina zimvu zami,+ zimvu zami engizinakekelayo, lingabantu nje njalo mina nginguNkulunkulu wenu,’ kutsho iNkosi Enkulu uJehova.”