UHOSIYA
1 Nanti ilizwi likaJehova elafika kuHosiya* indodana kaBheyeri ngensuku zika-Uziya,+ loJothamu,+ lo-Ahazi,+ loHezekhiya,+ amakhosi akoJuda,+ langezinsuku zenkosi yako-Israyeli uJerobhowami+ indodana kaJowashi.+ 2 Kwathi uJehova eqalisa ukukhuluma ilizwi lakhe esebenzisa uHosiya, uJehova wathi kuye: “Hamba uyethatha umfazi oliwule,* akuzalele abantwana ngokuthengisa umzimba ngoba ilizwe lenze ubuwule ngokuhlamukela uJehova.”+
3 Ngakho wahamba wayathatha uGomeri indodakazi kaDibhilayimi, uGomeri wazithwala wasemzalela umntwana ongumfana.
4 UJehova wasesithi kuHosiya: “Mnike ibizo uthi nguJeziriyeli* ngoba ngesikhatshana nje ngizajezisa usendo lukaJehu*+ ngenxa yokuchitha igazi okwenziwe eJeziriyeli njalo ngizabuqeda ubukhosi bendlu yako-Israyeli.+ 5 Ngalelolanga ngizakwephula idandili* lika-Israyeli esigodini seJeziriyeli.”
6 UGomeri waphinda wazithwala wasebeletha umntwana oyinkazana. UNkulunkulu wathi kuHosiya: “Mnike ibizo uthi nguLo-ruhama* ngoba angisoze ngiphinde ngibe lesihawu+ kwabendlu ka-Israyeli njalo ngizabaxotshela khatshana.+ 7 Kodwa abendlu yakoJuda ngizabatshengisa isihawu+ njalo ngizabasindisa mina Jehova uNkulunkulu wabo.+ Kangisoze ngibasindise ngedandili kumbe ngenkemba loba ngempi kumbe ngamabhiza loba ngabagadi bamabhiza.”+
8 Kwathi uLo-ruhama esekhitshwe ebeleni, uGomeri waphinda wazithwala wabeletha umntwana ongumfana. 9 UNkulunkulu wasesithi: “Mnike ibizo uthi nguLo-ami* ngoba kalisibo bantu bami, lami angisuye Nkulunkulu wenu.
10 “Abantu bako-Israyeli bazakuba banengi njengetshebetshebe yolwandle engeke ibalwe loba ilinganiswe.+ Lapho okwakuthiwa kubo, ‘Kalisibo bantu bami,’+ kuzatshintshwa kuthiwe kubo, ‘Lingamadodana kaNkulunkulu ophilayo.’+ 11 Abantu bakoJuda labako-Israyeli bazabuthaniswa ndawonye bamanyane.+ Bazazikhethela umkhokheli oyedwa njalo baphume elizweni ngoba usuku lukaJeziriyeli+ luzakuba lukhulu.
2 “Khulumani labafowenu lithi, ‘Lingabantu bami!’*+
Kubodadewenu lithi, ‘Lina besifazana abatshengiswe isihawu!’*+
2 Msoleni unyoko, msoleni,
Ngoba kayisuye mkami,+ lami angisiyo ndoda yakhe.
Kumele ayekele ukungaziphathi kwakhe,*
Asuse lobufebe emabeleni akhe,
3 Ngoba ngizamkhulula izigqoko asale enqunu njengamhla ezalwa,
Ngimenze abe njengenkangala,
Afanane lelizwe elome qha!
Ngimenze abulawe yikomela amanzi.
4 Abantwabakhe angisoze ngibatshengise isihawu,
Ngoba ngabantwana abazelwe ngokuthengisa umzimba.
5 Unina wenze ubuwule.+
Yena kanye owabathwala ngesisu sakhe wenze ihlazo+ wathi,
‘Ngizalandelana lezithandwa zami,+
Ezingipha isinkwa sami lamanzi ami,
Lewulu yami lelineni yami lamafutha ami lokunathwayo kwami.’
6 Ngakho ngizavala indlela yakhe ngamahlahla ameva,
Ngakhe umduli wamatshe ngimvimbe
Ukuze angaziboni izindlela zakhe.
Ekucineni uzakuthi, ‘Ngizabuyela kumkami,*+
Ngoba ngisesekuye ngangingcono kulalokho esengiyikho khathesi.’+
8 Kazange ananzelele ukuthi yimi engamupha iwayini elitsha lamabele+ lamafutha,
Lokuthi yimi engamnika isiliva esinengi kakhulu
Kanye legolide ayeselisebenzisa ukukhonza uBhali.+
9 ‘Yikho ngizaphenduka ngizothatha amabele ami ngesikhathi sawo
Lewayini lami elitsha ngesikhathi salo,+
Ngizahluthuna lewulu yami lelineni yami obekuzavala ubunqunu bakhe.
10 Khathesi izitho zakhe zensitha ngizaziveza egcekeni zibonwe yizithandwa zakhe,
11 Ngizayiqeda du yonke intokozo alayo,
Lemikhosi yakhe,+ lemikhosi yakhe yokuthwasa kwenyanga, lamasabatha akhe, layo yonke imikhosi yakhe yaminyaka yonke.
12 Ngizatshabalalisa izihlahla zakhe zamagilebisi lezomkhiwa, lezo athi ngazo:
“Lo ngumholo wami engiwuphiwe yizithandwa zami,”
Izihlahla lezo ngizazitshintsha zibe ligusu,
Njalo zizaqedwa zinyamazana zeganga.
13 Ngizamjezisela izinsuku ayenikela ngazo imihlatshelo ezithombeni zikaBhali,+
Ececa ngendandatho langamangqongqo futhi elandelana lezithandwa zakhe,
Njalo esekhohliwe ngami,’+ kutsho uJehova.
14 ‘Ngakho ngizamncenga,
Ngimuse enkangala,
Ngikhulume laye kamnandi aze avume.
15 Kusukela ngalesosikhathi kusiya phambili ngizambuyisela amasimu akhe amagilebisi,+
Ngimnike lesigodi se-Akhori+ sibe ngumnyango wethemba,
Uzaphendula ekuleyondawo njengasezinsukwini zobutsha bakhe,
Njengamhla ephuma elizweni leGibhithe.+
16 Ngalolosuku,’ kutsho uJehova,
‘Wena uzangibiza uthi mkami, awusoze uphinde ungibize ngokuthi Nkosi yami.’*
18 Ngalolosuku ngizabenzela isivumelwano lezinyamazana zeganga,+
Lenyoni zezulu kanye lezinanakazana ezihuquzelayo emhlabeni,+
19 Ngizakuthatha ube ngowami kuze kube nini lanini,
Ngiyathembisa ukuthi ngizakuphatha ngokulunga ngikwahlulele kuhle,
Ngibe lothando oluqotho lesihawu kuwe.+
20 Ngiyafunga ukuthi ngizahlala ngithembekile kuwe,
Loba sekutheni uzamazi uJehova.’+
21 ‘Ngalolosuku ngizaphendula,’ kutsho uJehova,
‘Ngizaphendula amazulu,
Amazulu aphendule umhlaba;+
22 Umhlaba uzanika amabele lewayini elitsha lamafutha impendulo yakho,
23 Ngizazihlanyelela yena njengenhlanyelo emhlabathini,+
Lowo obengatshengiswanga isihawu ngizamtshengisa isihawu,*
Ngizakuthi kulabo abangayisibo bantu bami:* “Lingabantu bami,”+
Bona bazakuthi: “UnguNkulunkulu wethu.”’”+
3 UJehova wasesithi kimi: “Hamba futhi, umthande umkakho lanxa esethandwa ngenye indoda futhi elala lamanye amadoda,+ njengoba nje uJehova laye ebathanda abako-Israyeli+ lanxa bemhlamukela besiya kwabanye onkulunkulu+ njalo bethanda amakhekhe enziwe ngamagilebisi awonyisiweyo.”*
2 Ngakho ngamthenga ngenhlamvu zesiliva ezingu-15 lebhali egcwele ihomeri* lehafu. 3 Ngasengisithi kuye: “Uzahlala ungowami okwensuku ezinengi. Akumelanga wenze ubuwule njalo akumelanga ulale lenye indoda. Lami kangisoze ngilale lawe.”
4 Lokhu kungenxa yokuthi abako-Israyeli bazahlala okwesikhathi eside* bengelankosi,+ bengelankosana,* bengelamhlatshelo, bengelansika, bengelayo i-efodi*+ kanye lezithombe zamatherafimu.*+ 5 Ngemva kwalokho, abantu bako-Israyeli bazaphenduka bamdinge uJehova uNkulunkulu wabo+ loDavida inkosi yabo+ njalo ekucineni kwezinsuku bazabuya kuJehova beqhuqha befuna ubuhle bakhe.+
4 Zwanini ilizwi likaJehova lina bantu bako-Israyeli,
UJehova wethesa izakhamizi zelizwe icala,+
Ngoba iqiniso alikho elizweni, alukho uthando oluqotho lolwazi olumayelana loNkulunkulu alukho.+
2 Kugcwele izifungo zamanga+ lokuqamba amanga lokubulala+
3 Ilizwe lizakhala ngenxa yalokho,+
Bonke abahlala kulo bazacikizeka,
Kutshabalale izinyamazana zeganga lenyoni zezulu,
Kanye lenhlanzi zolwandle.
4 “Kodwa akungabi lomuntu ophikisayo kumbe okhuzayo,+
Ngoba abantu bakho banjengalabo abaphikisana lomphristi.+
5 Ngakho wena uzakhubeka emini libalele,
Umphrofethi laye uzakhubeka kanye lawe njengomuntu okhubeka ebusuku.
Unyoko ngizamthulisa zwi.*
6 Abantu bami bazathuliswa* ngoba ulwazi alukho.
Kangisoze ngivume ukuthi ube ngumphristi wami
Ngoba awuvumanga ukwamukela ulwazi,+
Amadodana akho ngizawakhohlwa
Ngoba uwukhohliwe umthetho* kaNkulunkulu wakho.+
7 Nxa besiba banengi, lezono zabo ziyangezeleleka.+
Ngizatshintsha inkazimulo yabo ibe lihlazo.*
8 Badla ngesono sabantu bami,
Balambele ukuthi abantu bone.
9 Okuzakwenzakala ebantwini kuzakwenzakala lakubaphristi,
Ngizabajezisa ngenxa yalokho abakwenzayo,
Ngibehlisele izithelo zokuganga kwabo.+
10 Bazakudla kodwa bangasuthi.+
Bazafeba kodwa kabasoze bande,+
Ngoba batshengise ukuthi abalandaba loJehova.
12 Abantu bami badinga amacebo ezithombeni zabo zezigodo,
Benza lokho abakutshelwa zintonga zabo.*
13 Benza imihlatshelo eziqongweni zezintaba,+
Bathunqise intuthu yemihlatshelo emaqaqeni,
Langaphansi kwezihlahla zom-okhi lezomstorakhi lakuzo zonke izihlahla ezinkulu,+
Ngoba zilomthunzi omuhle.
Yikho amadodakazi akho ethengisa umzimba,*
Labomalukazana bakho belala lamanye amadoda.
14 Amadodakazi akho angisoze ngiwajezisele ubuwule bawo,*
Labomalukazana bakho kangisoze ngibajezisele ukulala lamanye amadoda.
Phela amadoda ahamba lamawule
Enza imihlatshelo lamawule asethempelini,
Abantu laba abangazwisisiyo+ bazatshabalala.
16 U-Israyeli useyisiqholo njengenkomo engathambisekiyo.+
Pho uJehova uzamelusa yini njengemvana enduna emadlelweni amakhulu?
17 U-Efrayimi ungene wacwila ezithombeni.+
Myekeleni enjalo!
Ababusi bakhe bayakuthanda ukwenza ihlazo.+
19 Umoya uzamthwala ngamaphiko awo umphephule,
Uzayangeka ngenxa yemihlatshelo yakhe.”
5 “Zwanini lokhu lina baphristi,+
Thiyani indlebe lina abendlu ka-Israyeli,
Lilalele lina abendlu yenkosi,
Ngoba yini elahlulelwayo,
Lingumjibila eMizipha
Lingumambule owendlalwe* phezu kweThabhori.+
2 Abahlamuki kababulali nje bathela amanzi,
Bonke ngiyabalimukisa.*
3 Ngiyamazi u-Efrayimi,
Lo-Israyeli ngeke angicatshele.
4 Izenzo zabo azibavumeli ukuthi babuyele kuNkulunkulu wabo,
Ngoba bayakuthanda ukwenza ubuwule,*+
Kabalandaba loJehova.
5 Ukuzigqaja kuka-Israyeli kufakaza okubi ngaye,+
U-Israyeli lo-Efrayimi bayakhubeka ngenxa yesono sabo,
LoJuda uyakhubeka kanye labo.+
6 Bahamba bayadinga uJehova beqhuba imihlambi yabo,
Kodwa abamtholanga.
Wayesesukile kubo.+
Bona lamasimu abo* bazatshabalaliswa ngenyanga eyodwa nje.
8 Tshayani uphondo+ eGibheya, likhalise icilongo eRama.+
Memezelani impi eBhethi-aveni,+ khokhela wena Bhenjamini.
9 Awu Efrayimi uzakuba yisiga ngelanga lokujeziswa kwakho.+
Sengenze kwaziwa okuzakwenzakala ezizwaneni zako-Israyeli.
10 Iziphathamandla zakoJuda* zinjengalabo abatshedisa umngcele.+
Ngizathululela ulaka lwami phezu kwazo njengamanzi.
11 U-Efrayimi usebunzimeni, uchotshozwe yisigwebo,
Ngoba ubezimisele ukulandela isitha sakhe.+
12 Ngakho benginjengesibungu* ku-Efrayimi
Lanjengokubola endlini yakoJuda.
13 U-Efrayimi wathi ebona ukugula kwakhe, loJuda ebona isilonda sakhe,
U-Efrayimi waya e-Asiriya+ wathumela ilizwi enkosini enkulu.
Kodwa ayizange yenelise ukulelapha,
Loba ukwelapha isilonda senu.
14 Ngizakuba njengejongosi lesilwane ku-Efrayimi,
Ngibe njengesilwane esilamandla endlini kaJuda.
15 Ngizasuka ngibuyele endaweni yami baze bathwale ubunzima becala labo,
Ngalesosikhathi bazafuna ukuthi ngibe lomusa kubo.+
Bazangidinga sebesebunzimeni.”+
6 “Wozani sibuyele kuJehova,
Ngoba uzaselapha lanxa ubesidabudabule.+
Usitshayile kodwa uzawabopha amanxeba ethu.
2 Uzasivuselela ngemva kwamalanga amabili.
Asivuse ngelanga lesithathu,
Njalo sizaphila phambi kwakhe.
3 Sizamazi futhi sizazimisela ukumdinga simazi uJehova.
Ukubuya kwakhe kuqinisekile njengokukhanya kokusa,
Uzakuza kithi njengezulu elina ngamandla,
Njengezulu lokucina elithelela umhlaba.”
4 “Ngenzeni ngawe Efrayimi?
Ngenzeni ngawe Juda?
Ngoba uthando oluqotho elithi lilalo lunjengenkungu,
Lunjengamazolo anyamalala ngesikhatshana nje.
Indlela engizabahlulela ngayo izakuba sobala njengokukhanya.+
6 Ngoba mina ngithokoziswa luthando oluqotho* hatshi umhlatshelo,
Ngithokoziswa yikumazi uNkulunkulu, hatshi iminikelo yokutshiswa egcweleyo.+
7 Kodwa benze njengabantu abalesono, bephula isivumelwano sami.+
Bangidanise ngithembile elizweni labo.
9 Abaphristi bafanana leqembu lezigebenga ezicathamele umuntu.
Babulala abantu emgwaqweni oya eShekhemu,+
Abakwenzayo kulihlazo.
10 Ngibone into eyesabekayo endlini ka-Israyeli.
11 Kodwa isivuno siyeza kuwe Juda,
Lapho sengibuthanisa ndawonye abathunjiweyo bami.”+
7 “Nxa ngisithi ngelapha u-Israyeli,
Amacala ka-Efrayimi ayavela egcekeni,+
Kanye lobubi obenziwa eSamariya.+
2 Kodwa akuthi thiki enhliziyweni zabo ukuthi ngizakukhumbula konke okubi abakwenzayo.+
Izenzo zabo zibahanqile,
Ngiyakubona konke abakwenzayo.
3 Bathabisa inkosi ngokwenza okubi,
Bathabise leziphathamandla* ngobuqili babo.
4 Bonke bayizifebe,
Batshisa njengeziko elibaselwe ngumpheki wezinkwa,
Elingadingi ukuthi alikhwezele nxa esavoxa inhlama njalo emelele ukuthi ikhukhumale.
Inkosi idlelana labathanda ukweyisa.*
6 Inhliziyo zabo zivutha njengeziko.*
Umpheki wezinkwa uyalala ubusuku bonke,
Kuthi ekuseni umlilo oseziko uvuthe kakhulu.
7 Bonke batshisa njengeziko,
Bayabaqeda ababusi* babo.
8 U-Efrayimi uzihlanganisa lezizwe.+
U-Efrayimi unjengekhekhe eliyisigombolozi elingaphendulwanga.
9 Abezinye izizwe sebemqede amandla+ kodwa yena kakwazi.
Lenwele zakhe seziphenduke zaba mhlophe kodwa yena kananzeleli.
10 Ukuzigqaja kwabako-Israyeli kufakaza okubi ngabo,+
Kodwa abazange babuyele kuJehova uNkulunkulu wabo,+
Kabazange bamdinge lanxa bekusenzakala konke lokhu.
11 Abako-Efrayimi banjengejuba eliyisithutha, elingelangqondo.+
Badinge uncedo eGibhithe,+ baphinda bayaludinga e-Asiriya.+
12 Loba ngaphi lapho abayakhona ngizakwendlala umambule wami phezu kwabo.
Ngizabehlisela phansi njengenyoni zezulu.
Ngizabajezisa njengoba nje ngabaxwayisa emhlanganweni wabo.+
13 Maye kubo ngoba bangibalekele!
Kabehlelwe ngumonakalo ngoba bangonele.
Besengizimisele ukubahlenga kodwa bona bangiqambela amanga.+
14 Lanxa bebelokhu bekhala emibhedeni yabo,
Abazange bangibize ngenhliziyo yonke bedinga uncedo.+
Bebezisikasika ngenxa yamabele abo lewayini labo elitsha,
Bayangihlamukela.
15 Lanxa ngibafundisile ngaqinisa lengalo zabo,
Balokhu bebumba amacebo amabi bephikisana lami.
16 Batshintshe izindlela zabo kodwa kabazange baye kokuphakemeyo,*
Iziphathamandla zabo* zizabulawa ngenkemba ngenxa yamazwi azo okweyisa.
Lokhu kuzakwenza zibe yinhlekisa elizweni laseGibhithe.”+
8 “Faka uphondo emlonyeni wakho!+
Isitha siza njengokhozi sizohlasela indlu kaJehova,+
2 Bayakhala kimi besithi, ‘Thina abako-Israyeli siyakwazi Nkulunkulu wethu!’+
3 Abako-Israyeli bakwalile okuhle.+
Yekela isitha sixotshane labo.
4 Babeke amakhosi ngingabaphanga imvumo,
Babeka izikhulu kodwa angizamukelanga.
5 Isithombe sakho esifana lethole silahliwe, wena Samariya.+
Ngithukuthele kakhulu ngenxa yabo.+
Kuzaze kube nini besehluleka ukuba msulwa?
6 Ithole leli lenziwe ko-Israyeli.
Libunjwe yingcitshi njalo kalisuye Nkulunkulu,
Ithole leSamariya lizaphahlazwa libe yizicucu.
7 Bahlanyela umoya,
Ngakho bazavuna isivunguzane.+
Akulangqoloyi ezakhahlela ibe lesikhwebu,+
Nxa ingaba laso akulafulawa ezaphuma
Nxa kukhona okutholakeleyo, abezizweni* bazakuginya konke.+
8 Abako-Israyeli bazaginywa yisitha.+
Bazakuba njengomganu ongafunekiyo
Phakathi kwezizwe.+
9 Sebeye e-Asiriya+ njengobabhemi weganga ohlanhlatha yedwa.
Abako-Efrayimi sebeqhatshe izithandwa.+
10 Lanxa izithandwa lezi beziqhatshe ezizweni,
Ngizababuthanisa ndawonye.
Bazaqalisa ukuhlupheka+ ngenxa yobunzima ababetheswe ngamakhosi lezikhulu.
11 Abako-Efrayimi bakhe ama-alithare amanengi ukuze bone.+
Asebe ngama-alithare abo okwenzela isono.+
12 Ngababhalela imithetho eminengi,
Kodwa bayithatha njengento engazwakaliyo.+
13 Banginika imihlatshelo yezipho, besebezidlela inyama yakhona,
Kodwa uJehova kathokozi ngayo.+
Ngakho uzalikhumbula icala labo, abajezise ngenxa yezono zabo.+
14 U-Israyeli usemkhohliwe uMenzi wakhe,+ wakha amathempeli,+
UJuda laye usezakhele amadolobho amanengi avikelwe ngemiduli.+
Kodwa ngizathumela umlilo emadolobheni akhe,
Uzatshisa ulobise yonke imiphotshongo yawo.”+
9 “Ungathabi wena Israyeli,+
Ungajabuli njengabantu bezinye izizwe,
Wenze ubuwule ngokuphambuka kuNkulunkulu wakho,+
Wathanda imbadalo yobuwule oyithola ezizeni zonke zokubhulela amabele.+
3 Kabasoze baqhubeke behlala elizweni likaJehova,+
U-Efrayimi yena uzabuyela eGibhithe,
Adle ukudla okungcolileyo e-Asiriya.+
Ifanana lesinkwa sokulila,
Bonke abasidlayo bazangcola.
Isinkwa sabo sizakuba ngesabo bodwa,
Kasisoze sinikelwe endlini kaJehova.
5 Lizakwenzani ngosuku lomhlangano,*
Ngelanga lomkhosi kaJehova?
6 Bazabaleka sibili ngoba isitha sizabuya sibabhubhise.+
IGibhithe izabaqoqela ndawonye,+ iMemfisi ibangcwabe.+
Izinto zabo eziligugu ezenziwe ngesiliva zizagcwala ukhula oluhlabayo,
Ameva amile ematendeni abo.
Umphrofethi wabo uzakuba yisithutha, lamadoda azenza aphefumulelweyo azahlanya,
Uzazondwa kakhulu ngoba amacala akho manengi okumangalisayo.”
8 Umlindi ka-Efrayimi+ wayeloNkulunkulu wami.+
Kodwa khathesi zonke izindlela zabaphrofethi+ bakhe zifanana lomjibila womuntu othiya inyoni,
Yinzondo yodwa endlini kaNkulunkulu wakhe.
9 Sebengene bacwila ebubini njengasezinsukwini zeGibheya.+
Uzalikhumbula icala labo abajezisele izono zabo.+
10 “U-Israyeli ngamthola njengamagilebisi asegangeni.+
Okhokho babo ngababona njengezithelo zakuqala esihlahleni somkhiwa.
Kodwa bona baya kuBhali wasePheyori,+
Bazinikela entweni elihlazo,*+
Basebesenyanyeka njengaleyonto ababeyithanda.
11 Inkazimulo ka-Efrayimi iyaphapha ihambe njengenyoni,
Akuselakubeletha lokuzithwala kanye lokuthatha isisu.+
12 Lanxa bengaze bakhulise abantwana,
Ngizabathathela bona baze baphele,+
Maye kubo nxa sengibafulathele!+
13 Ngesikhathi u-Efrayimi ehlanyelwe endaweni enhle* wayefanana leThire+ kimi,
Khathesi u-Efrayimi sekumele alethe abantwabakhe bazobulawa.”
14 Awu Jehova baphe lokho okumele ubaphe khona,
Isibeletho esichitha inzalo lamabele angelachago.
15 “Ububi babo basebubhahile eGiligali,+ yikho ngabazonda kuleyondawo.
Ngizabaxotsha baphume baphele endlini yami ngenxa yezinto ezimbi abazenzayo.+
Angisoze ngiphinde ngibathande;+
Zonke iziphathamandla zabo* ziyiziqholo.
16 Abako-Efrayimi bazaganyulwa bawele phansi.+
Impande zabo zizakoma njalo kabasoze bathele izithelo.
Lanxa bengaze bazale, ngizababulala abantwababo ababathandayo.”
10 “U-Israyeli unjengesihlahla samagilebisi esesixhwalile esilokhu sithela izithelo.+
Nxa izithelo zakhe zisanda, laye ungezelela ama-alithare akhe,+
Nxa ilizwe lakhe liqhubeka lithela, lensika zakhe azisebenzisa ekukhonzeni ziba zinhle.+
2 Ukuzenzisa kugcwele ezinhliziyweni zabo,
Bazatholakala belecala.
Ukhona ozadiliza ama-alithare abo adilize lensika zabo.
3 Khathesi bazakuthi, ‘Asiselayo inkosi+ ngoba kasimesabanga uJehova.
Kodwa yona inkosi izasinceda ngani vele?’
4 Amazwi abawakhulumayo kawancedi, benza izifungo zamanga,+ benze lezivumelwano,
Yikho ukwahlulela kwabo kunjengokhula oluletshefu ensimini elinyiweyo.+
5 Izakhamizi zeSamariya zizathuthumela ngenxa yesithombe sethole saseBhethi-aveni.+
Abantu baso bazasikhalela,
Labaphristi babonkulunkulu bezizweni ababethokoza ngaso langenkazimulo yaso bazalila,
Ngoba sizathunjwa sisuke kubo.
6 Sizahanjiswa e-Asiriya sibe yisipho senkosi enkulu.+
U-Efrayimi uzayangiswa,
Lo-Israyeli uzayangeka ngenxa yamacebo abewalandela.+
8 Izindawo eziphakemeyo zaseBhethi-aveni+ ezibangela ukuthi u-Israyeli awone+ zizabhidlizwa.+
Ema-alithareni abo kuzamila ameva lokhula oluhlabayo.+
Abantu bazakuthi ezintabeni, ‘Sigubuzeleni!’
Bathi lasemaqaqeni, ‘Welani phezu kwethu!’+
9 Wena Israyeli ubulokhu usona+ kusukela ezinsukwini zeGibheya.
Bebelokhu bephikelela besenza okubi khonale.
Impi yaseGibheya kayizange ibaqede bonke abantu abangalunganga.
10 Ngizabajezisa ngesikhathi sami.
Izizwe zizabuthana zimelane labo,
Nxa amacala abo amabili esebotshelwe kubo.*
11 U-Efrayimi wayelithokazi elithambileyo elalithanda ukubhula,
Yikho ngingazange ngiyithwalise nzima intamo yakhe enhle,
Khathesi ngizakwenza omunye umuntu atshayele u-Efrayimi+ egade phezu kwakhe.*
UJuda uzalima, uJakhobe alandele ebulala amagade.
12 Hlanyelani inhlanyelo yokulunga, livune uthando oluqotho.
Lilime emhlabathini ongakaze ulinywe.+
Lithembe izindlela zenu,
Lathemba lamabutho enu amanengi.
14 Kuzakuba lomsindo wempi omelene labantu bakho,
Amadolobho akho wonke avikelwe ngemiduli azabhidlizwa,+
Ngendlela uShalimani abhidliza ngayo indlu ka-Abheli,
Ngosuku lwempi lapho omama abazachotshozwa khona ndawonye labantwababo.
15 Lokhu yikho okuzakwenziwa kuwe wena Bhetheli+ ngenxa yezenzo zakho ezimbi kakhulu.
Loba sekutheni inkosi yako-Israyeli izabulawa emadabukakusa.”+
Babelokhu benikela imihlatshelo ezithombeni zikaBhali+
Benikela imihlatshelo ezithombeni ezibaziweyo.+
3 Kodwa yimi engafundisa abako-Efrayimi ukuhamba,+ ngabathwala ngezandla zami,+
Abazange bakunanzelele ukuthi ngangibasilisile.
4 Ngaqhubeka ngibadonsa ngezintambo zabantu,* ngezintambo zothando,+
Ngaba njengalowo osusa ijogwe entanyeni zabo,
Nganika munye ngamunye ukudla ngesineke.
5 Kabasoze babuyele eGibhithe kodwa i-Asiriya izakuba yinkosi yabo,+
Ngoba balile ukuphenduka beze kimi.+
6 Inkemba izagadla ihlasele amadolobho akhe,+
Izakwephula imigoqo yakhe ibabhuqe baphele nya ngenxa yamacebo abo.+
7 Abantu bami bazimisele ukungathembeki kimi.+
Lanxa bebabiza ukuthi baye endaweni ephakemeyo,* kakho osukumayo.
8 Kambe ngingakukhalala yini wena Efrayimi?+
Ngingakunikela ezitheni yini wena Israyeli?
Ngingakuphatha njenge-Adima yini?
Ngingakwenza ufanane leZebhoyimi yini?+
Sengitshintshe ingqondo,
Lozwelo lwami lonke luhle lwaqubuka.+
9 Ngizalubamba ulaka lwami oluvuthayo.
Angisoze ngiphinde ngibachithe abako-Efrayimi,+
Ngoba mina nginguNkulunkulu, kangifanani labantu,
NgingoNgcwele ophakathi kwenu,
Kangisoze ngibuye kini ngithukuthele.
10 Abako-Israyeli bazalandela uJehova futhi yena uzabhonga njengesilwane,+
Nxa esebhonga, abantwabakhe bazakuza beqhuqha bevela entshonalanga.+
11 Bazaphuma eGibhithe beqhuqha njengenyoni,
Baphume elizweni le-Asiriya+ njengejuba,
12 “U-Efrayimi ungitshela amanga kuphela,
Labendlu ka-Israyeli bayangiqila.+
Kodwa uJuda yena ulokhu ehamba loNkulunkulu,
Uthembekile kulowo oNgcwele Kakhulu.”+
12 “U-Efrayimi udla umoya,
Utshonela ukuxotshanisa umoya wasempumalanga.
Wandisa amanga lodlakela.
Wenza isivumelwano le-Asiriya+ futhi uhambisa amafutha eGibhithe.+
2 UJehova wethesa uJuda icala,+
Uzajezisa uJakhobe ngenxa yezindlela zakhe,
Amnike umvuzo ofanele imisebenzi yakhe.+
4 Waqhubeka esilwa* lengilosi waze wanqoba.
Wakhala eyincenga ukuthi imenzele umusa.”+
UNkulunkulu wamthola eBhetheli futhi wakhuluma lathi khonapho,+
5 UJehova uNkulunkulu wamabutho,+
UJehova yilo ibizo lakhe okumele akhunjulwe ngalo.+
6 “Ngakho buyela kuNkulunkulu wakho,+
Uhlale ulothando oluqotho futhi usahlulela kuhle,+
Hlala ulethemba kuNkulunkulu wakho.
Akulamuntu ozathola isono loba icala enothweni yami engiyisebenzele nzima.’
9 Kodwa mina nginguJehova uNkulunkulu wakho kusukela uselizweni leGibhithe.+
Ngizaphinda ngilihlalise ematendeni
Njengasezinsukwini zemikhosi eba khona ngesikhathi esimisiweyo.
10 Ngakhuluma labaphrofethi,+
Ngandisa imibono yabo,
Ngakhuluma imizekeliso ngisebenzisa abaphrofethi.
11 IGiliyadi igcwele ubuqili*+ lamanga.
Benze imihlatshelo yezinkunzi eGiligali,+
Ama-alithare abo anjengenqwaba zamatshe ensimini elinyiweyo.+
12 UJakhobe wabaleka waya elizweni lase-Aramu,*+
U-Israyeli+ wasebenza ukuze athole umfazi+ kuleyondawo,
Welusa izimvu ukuze aphiwe umfazi.+
13 UJehova wakhipha u-Israyeli eGibhithe esebenzisa umphrofethi,+
14 U-Efrayimi wenze icala elibi,+
Icala lakhe lokubulala abantu liphezu kwakhe,
INkosi yakhe izamupha umvuzo wokudelela kwakhe.”+
13 “U-Efrayimi wayesithi nxa ekhuluma abantu baqhuqhe,
Wayesaziwa ko-Israyeli.+
Kodwa waba lecala lokukhonza uBhali+ wasesifa.
2 Khathesi balokhu besengezelela isono sabo,
Benza izithombe ngesiliva sabo,+
Bazingcitshi zokwenza izithombe, yonke imisebenzi eyenziwa zingcitshi.
Bathi, ‘Akuthi abantu abazonikela umhlatshelo baqabuze amathole.’+
3 Ngakho bazakuba njengenkungu,
Lanjengamazolo anyamalala masinyane,
Babe njengomule ophetshulwa ngumoya wesiphepho esizeni,*
Lanjengentuthu ephuma ngomphongolo ephahleni.
4 Kodwa mina nginguJehova uNkulunkulu wakho kusukela uselizweni leGibhithe,+
Kakho uNkulunkulu elalimazi ngaphandle kwami,
Kakho umsindisi ngaphandle kwami.+
5 Ngangikwazi ngesikhathi usenkangala,+ elizweni lendlala,
6 Badla basutha emadlelweni abo,+
Bathi sebesutha baqalisa ukuzigqaja.
Yikho bangikhohlwa.+
7 Ngizakuba njengesilwane esilamandla kubo,+
Ngibacathamele endleleni njengengwe.
8 Ngizabeqela njengebhere elilahlekelwe yimidlwane yalo,
Ngidabule izifuba zabo zisale zikhamisile.
Ngizabadla ngibaqede njengesilwane,
Isilo seganga sizabadabudabula.
9 Sizakutshabalalisa wena Israyeli,
Ngoba ungihlamukele, wamelana lami umsizi wakho.
10 Ingaphi khathesi inkosi yakho ukuze ikusindise kuwo wonke amadolobho akho?+
12 Icala lika-Efrayimi ligoqelwe,*
Isono sakhe sigciniwe.
13 Uzafikelwa yimihelo njengowesifazana osezabeletha.
Kodwa yena ungumntwana oyisithutha,
Ongaphumiyo nxa isikhathi sakhe sokubelethwa sesifikile.
14 Ngizabahlenga emandleni engcwaba,
Ngizabakhulula ekufeni.+
We Kufa, lungaphi udonsi lwakho?+
We Ngcwaba, kungaphi ukutshabalalisa kwakho?+
Angisoze ngibe lozwelo.
15 Lanxa engahluma akhule phakathi kwemihlanga,
Umoya wasempumalanga uzafika, umoya ovela kuJehova,
Uzavunguza uvela enkangala, utshise umthombo wakhe, womise lesifudlana sakhe.
Uzaqeda zonke iziphala ezigcwele izinto zakhe eziligugu.+
16 ISamariya izakwetheswa icala+ ngoba ihlamukele uNkulunkulu wayo.+
Bazabulawa ngenkemba,+
Abantwababo bazataklazelwa phansi,
Labesifazana babo abazithweleyo badatshulwe izisu.”
14 “Awu Israyeli, phenduka kuJehova uNkulunkulu wakho,+
Ngoba usukhubekile wawa ngenxa yesiphambeko sakho.
2 Buyela kuJehova,
Uthi kuye, ‘Sicela usixolele iziphambeko zethu+ njalo wamukele okuhle okuvela kithi,
Sizanikela indumiso ngemilomo yethu+ ngendlela esinikela ngayo ngamajongosi.
3 I-Asiriya ayingeke isisindise.+
Kasisoze sigade amabhiza,+
Kasisoze siphinde sithi, “Nkulunkulu wethu,” kulokho esikwenze ngezandla zethu,
Ngoba wena uyayizwela isihawu intandane.’+
4 Ngizabelapha, ukungathembeki kwabo kuphele.+
5 Ngizakuba njengamazolo ku-Israyeli,
Yena uzaqhakaza njengeluba,
Atshonise impande zakhe njengezihlahla zaseLebhanoni.
6 Ingatsha zakhe zizakhula,
Ubuhle bakhe bube njengesihlahla sama-oliva,
Anukelele kamnandi njengeLebhanoni.
7 Bazaphinda bahlale emthunzini wami.
Bazalima amabele futhi bahlume njengesihlahla samagilebisi.+
Udumo* lwami luzakuba njengewayini laseLebhanoni.
8 U-Efrayimi uzakuthi, ‘Kambe ngisazidingelani izithombe?’+
Ngizamphendula njalo ngimlinde.+
Ngizakuba njengesihlahla somjunipha esiluhlaza.
Izithelo zakho zizatholakala kimi.”
9 Ngubani okhaliphileyo? Kazizwisise izinto lezi.
Ngubani ohlakaniphileyo? Kabezazi lezizinto.
Ngoba izindlela zikaJehova ziqondile,+
Umuntu olungileyo uzahamba ngazo,
Kodwa abangawulaleliyo umthetho bazakhubeka kuzo.
Leli libizo elifitshaniswe kwelithi Hoshaya. Litsho ukuthi, “Osindiswe nguJah; UJah usindisile.”
Kumbe, “ongaziphathanga.”
Ibizo leli litsho ukuthi, “UNkulunkulu uzahlanyela inhlanyelo.”
NgesiHebheru, “indlu kaJehu.”
Khangela iNgcazelo Yamabala.
Ibizo leli litsho ukuthi, “Ongatshengiswanga isihawu.”
Ibizo leli litsho ukuthi, “Kalisibo bantu bami.”
Khangela amabala angaphansi kuHos 1:9.
Khangela amabala angaphansi kuHos 1:6.
Kumbe, “ubuwule bakhe.”
Kumbe, “Uzagijimisana.”
Kumbe, “endodeni yami yokuqala.”
Kumbe, “ezamkhulula esandleni sami.”
Kumbe, “Bhali wami.”
Khangela iNgcazelo Yamabala.
Kumbe, “bevikelekile.”
Ibizo leli litsho ukuthi, “UNkulunkulu uzahlanyela inhlanyelo.”
Khangela amabala angaphansi kuHos 1:6.
Khangela amabala angaphansi kuHos 1:9.
Lapha kutshiwo amakhekhe asetshenziswa ekukhonzeni kwamanga.
Ihomeri yayilingana lamalitha angu-220. Khangela iSengezo ku-B14.
NgesiHebheru, “okwensuku ezinengi.”
Kumbe, “bengelasiphathamandla.”
Khangela iNgcazelo Yamabala leSengezo ku-B5.
Kumbe, “labonkulunkulu bezimuli zabo; lezithombe.”
Kumbe, “ngizambhubhisa.”
Kumbe, “bazabhujiswa.”
Kumbe, “umlayo.”
Ezinye inguqulo zithi, “Batshintshe inkazimulo yami yaba lihlazo.”
Kumbe, “Ukungaziphathi.”
Kumbe, “zintonga zabo zokuhlahlula.”
NgesiHebheru, “ngumoya wobufebe.”
Kumbe, “Ubuwule babo benza.”
Kumbe, “ewula; engaziphathanga.”
Kumbe, “ukungaziphathi kwawo.”
Kumbe, “ukungaziphathi.”
Kumbe, “Liyinethi eyendlalwe.”
Kumbe, “ngizabalaya.”
Kumbe, “kawuziphathanga.”
NgesiHebheru, “balomoya wokufeba.”
Kumbe, “abantwana bezizweni.”
Kumbe, “lezabelo zabo.”
Kumbe, “Amakhosana akoJuda.”
Ibala lesiHebheru elisetshenziswe lapha litsho izibungu eziphaphayo ezidla amalembu.
Kumbe, “yisihawu.”
Kumbe, “ukubulala.”
Kumbe, “lamakhosana.”
Kumbe, “Amakhosana ayagula.”
Kumbe, “yelulele isandla sayo kwabaklolodayo.”
Ezinye inguqulo zithi, “Nxa besondela lamacebo ayingozi, izinhliziyo zabo ziyabe zinjengeziko.”
NgesiHebheru, “abahluleli.”
Lapha kutshiwo indlela yokukhonza ephakemeyo.
Khangela iNgcazelo Yamabala.
Kumbe, “Amakhosana abo.”
Kumbe, “abantu abangaziwayo.”
Ezinye inguqulo zithi, “Bazabuyela.”
Lapha kutshiwo indawo okuvoxelwa kuyo amagilebisi.
Kumbe, “lomkhosi wenu obekiweyo.”
Kumbe, “kunkulunkulu owenyanyekayo.”
Kumbe, “emadlelweni.”
Kumbe, “Wonke amakhosana abo.”
Kumbe, “bazakuba yimihambuma.”
Kumbe, “kuzathuliswa.”
Lapha kutshiwo ukuthi sebegaxwe isijeziso sabo njengejogwe.
Kumbe, “agaxe ijogwe phezu kuka-Efrayimi.”
Lapha kutshiwo abaphrofethi labanye ababethunywe ukuthi bafundise u-Israyeli.
Kumbe, “ngezintambo zomusa,” njengalezo ezisetshenziswa ngumzali ukuze afundise umntwana ukuhamba.
Lapha kutshiwo indlela yokukhonza ephakemeyo.
Kumbe, “ezindlini zabo.”
Kumbe, “Wabindana.”
Kumbe, “ebindana.”
Kumbe, “kulezilinganiso.”
Kungabe kutshiwo ukusebenzisa amasalamusi lemilingo.
Kumbe, “laseSiriya.”
Kumbe, “wamlondoloza.”
Khangela iNgcazelo Yamabala.
NgesiHebheru, “abahluleli.”
Kumbe, “lamakhosana.”
Kumbe, “lilondoloziwe.”
Kumbe, “ngokuthanda kwami.”
NgesiHebheru, “Isikhumbuzo.”