IVANGELI ELABHALWA NGUMAKHO

1 Lesi yisiqalo sezindaba ezinhle ezimayelana loJesu Khristu iNdodana kaNkulunkulu: 2 Kubhaliwe esiphrofethweni sika-Isaya ukuthi: “(Ngithuma isithunywa sami phambi kwakho, sizalungisa indlela yakho.)+ 3 Ilizwi lalowo omemeza esenkangala lithi: ‘Lungisani indlela kaJehova!* Yenzani imigwaqo yakhe iqonde.’”+ 4 UJohane uMbhabhathizi wayesenkangala etshumayela esithi abantu babhabhathizwe betshengisa ukuthi sebephendukile ukuze bathethelelwe izono.+ 5 Bonke abaseJudiya labo bonke ababehlala eJerusalema babesiya kuye njalo wayebabhabhathiza* emfuleni uJodani, bevuma izono zabo phambi kwabantu.+ 6 UJohane wayegqoka izigqoko ezenziwe ngoboya bekamela, ebopha lebhanti lesikhumba ekhalweni lwakhe+ futhi esidla intethe loluju lweganga.+ 7 Wayetshumayela esithi: “Kulomuntu olamandla kulami oza ngemva kwami njalo akungifanelanga ukukhothama ngithukulule intambo zamanyathela akhe.+ 8 Mina ngilibhabhathize ngamanzi kodwa yena uzalibhabhathiza ngomoya ongcwele.”+

9 Ngalezonsuku uJesu weza evela eNazaretha yaseGalile, wafika wabhabhathizwa nguJohane emfuleni uJodani.+ 10 Ephuma nje emanzini wabona amazulu evuleka, lomoya owawunjengejuba usehlela phezu kwakhe.+ 11 Kwasekuzwakala ilizwi livela emazulwini lisithi: “Wena uyiNdodana yami engiyithandayo, ngiyakwamukela.”+

12 Masinyane nje umoya wamusa enkangala. 13 Ngakho waqhubeka esenkangala okwamalanga angu-40 elingwa nguSathane.+ Wayehlala lezinyamazana zeganga futhi izingilosi zazimsiza.+

14 UJohane wathi esebotshiwe, uJesu waya eGalile+ etshumayela izindaba ezinhle ezivela kuNkulunkulu+ 15 esithi: “Isikhathi esibekiweyo sesifikile njalo uMbuso kaNkulunkulu ususeduze. Phendukani+ libe lokholo ezindabeni ezinhle.”

16 Wathi ehamba eceleni koLwandle lweGalile, wabona uSimoni lomfowabo u-Andreya+ bephosela amanethi abo elwandle,+ njengoba babengabagoli benhlanzi.+ 17 UJesu wasesithi kubo: “Ngilandelani, ngizalenza libe ngabagoli babantu.”+ 18 Bahle batshiya amanethi abo bamlandela.+ 19 Esephambidlana wabona uJakhobe indodana kaZebhedi elomfowabo uJohane besesikepeni sabo belungisa amanethi,+ 20 wahle wababiza. Ngakho batshiya uyise uZebhedi esikepeni elamadoda ayeqhatshiwe, balandela uJesu. 21 Basebesiya eKhaphenawume.

Kuthe iSabatha lisanda kuqala, wangena esinagogeni waqalisa ukufundisa.+ 22 Bamangala kakhulu besizwa indlela ayefundisa ngayo ngoba wayebafundisa njengomuntu olamandla avela kuNkulunkulu, engabafundisi njengababhali.+ 23 Khonokho nje enye indoda eyayisesinagogeni eyayihlaselwe lidimoni yamemeza yathi: 24 “Kanti ufunani kithi Jesu waseNazaretha?+ Ulande ukuzosibhubhisa yini? Ngikwazi mhlophe ukuthi ungubani, ungoNgcwele kaNkulunkulu!”+ 25 Kodwa uJesu walikhuza idimoni wathi: “Thula uphume kuye!” 26 Layidlukuza indoda leyo ngapha liklabalala, laseliphuma. 27 Abantu bonke basala bebambe owangaphansi baze baxoxa ngakho besithi: “Kuyini lokhu? Indlela afundisa ngayo iyamangalisa!* Phela ulamandla okukhipha amadimoni futhi ayamlalela.” 28 Ngesikhatshana nje ayekwenza kwasekusaziwa kuwo wonke umango weGalile.

29 Basuka esinagogeni baya ngakibo kaSimoni lo-Andreya beloJakhobe loJohane.+ 30 Uninazala kaSimoni+ wayelele phansi umzimba wakhe utshisa. Yikho batshela uJesu ngokugula kwakhe, 31 wasesiya kuye wambamba ngesandla wamvusa. Ukutshisa komzimba kwaphela, waqalisa ukubalungisela ukudla.

32 Kwathi sekuntambama ilanga selitshonile, abantu baqalisa ukuletha kuye bonke ababegula lababelamadimoni.+ 33 Bonke abantu bedolobho lelo babuya babuthana phambi komnyango wendlu. 34 Ngakho welapha abanengi ababebulawa yimikhuhlane etshiyeneyo+ wakhipha lamadimoni amanengi. Kodwa kazange awavumele ukuthi akhulume ngoba ayemazi ukuthi unguKhristu.*

35 Wavuka ekuseni kusesemnyama waphuma waya endaweni engelabantu. Esefike khona waqalisa ukuthandaza.+ 36 Kodwa uSimoni lalabo ayelabo bamdinga yonke indawo 37 baze bamthola. Bathi kuye: “Abantu bonke bayakudinga.” 38 Kodwa yena wabaphendula wathi: “Asiyeni kwenye indawo, emadolobheni aseduzane ukuze ngitshumayele lakuwo ngoba yikho engikulandileyo.”+ 39 Ngakho wahamba etshumayela emasinagogeni abo kulo lonke elaseGalile njalo ekhipha amadimoni.+

40 Kwafika indoda elobulephero yamncenga iguqile isithi: “Ngiyakwazi ukuthi nxa ufuna ungangenza ngihlambuluke.”+ 41 UJesu wayizwela usizi welula isandla sakhe wayibamba wathi kuyo: “Ngiyafuna, hlambuluka.”+ 42 Masinyane nje ubulephero banyamalala yasala isihlambulukile. 43 Wahle wayitshela ukuthi ihambe, waseyiqonqosela 44 esithi: “Ungatsheli muntu ukuthi kwenzakaleni kodwa hamba uyeziveza kumphristi, unikele ngezinto uMosi athi kumele zinikelwe ngumuntu osehlanjululiwe,+ ukuze kube yibufakazi kubo.”+ 45 Kodwa indoda leyo yahamba itshela wonke umuntu ngendaba le, yayifafaza yonke indawo okokuthi uJesu wayengasenelisi ukungena kuloba yiliphi idolobho ekhululekile. Wayesehlala phandle ezindaweni ezingelabantu. Lanxa kunjalo abantu babeqhubeka besiza kuye bevela kuzo zonke indawo.+

2 Kodwa ngemva kwamalanga athile waphinda wangena eKhaphenawume. Ilizwi lokuthi wayekhona ngakibo lasabalala,+ 2 kwasekubuthana abantu abanengi kwaze kwasala kungaselandawo endlini. Lasemnyango kwakugcwele abantu njalo waqalisa ukubafundisa ilizwi.+ 3 Baletha kuye indoda eyayome umhlubulo ithwelwe ngamadoda amane.+ 4 Kodwa ehluleka ukuyifikisa kuJesu ngenxa yobunengi babantu. Ngakho avula isikhala ephahleni lwendlu maqondana loJesu, asesehlisa uhlaka* okwakulele khona leyondoda eyayome umhlubulo. 5 UJesu uthe ebona ukuthi ayelokholo,+ wathi endodeni eyayome umhlubulo: “Mntanami, izono zakho sezithethelelwe.”+ 6 Kwakulabanye ababhali ababehlezi khonapho ababesithi ezinhliziyweni zabo:+ 7 “Kungani indoda le ikhuluma kanje? Ithuka uNkulunkulu. Kambe ngubani ongathethelela izono ngaphandle kukaNkulunkulu?”+ 8 Kodwa uJesu wahle wakwazi* ukuthi yikho ababekucabanga, wasesithi kubo: “Kungani linakana ngalezizinto ezinhliziyweni zenu?+ 9 Yikuphi okulula, ukutshela indoda le eyome umhlubulo ukuthi, ‘Izono zakho sezithethelelwe,’ kumbe ukuthi, ‘Sukuma udobhe uhlaka* lwakho uhambe’? 10 Kodwa ukuze likwazi ukuthi iNdodana yomuntu+ ilamandla okuthethelela izono emhlabeni—”+ wasesithi endodeni eyayome umhlubulo: 11 “Ngithi kuwe, sukuma uthathe uhlaka* lwakho uye emzini wakho.” 12 Isizwa lokhu yasukuma yahle yathatha uhlaka* lwayo yaphuma abantu bonke beyikhangele. Basala bemangele kakhulu, bakhazimulisa uNkulunkulu besithi: “Okunje asikaze sikubone.”+

13 Waphinda waphuma waya eceleni kolwandle futhi abantu baqhubeka besiza kuye, waseqalisa ukubafundisa. 14 Wathi edlula wabona uLevi indodana ka-Alifewu ehlezi ewofisini yokubhadalisa imithelo, wathi kuye: “Woba ngumlandeli wami.” ULevi wahle wasukuma wamlandela.+ 15 Ngemva kwesikhathi uJesu labafundi bakhe bayakudla endlini kaLevi. Kwakulezoni labathelisi abanengi ababesidla labo ngoba abanengi babo babemlandela.+ 16 Kodwa ababhali abangabaFarisi bathi bebona ukuthi wayesidla lezoni labathelisi, babuza abafundi bakhe bathi: “Kanti kungani esidla labathelisi lezoni?” 17 UJesu wathi ekuzwa lokhu wathi kubo: “Abaphilileyo abamdingi udokotela, abagulayo yibo abamdingayo. Angilandanga ukuzobiza abalungileyo, ngalanda ukuzobiza izoni.”+

18 AbaFarisi labafundi bakaJohane babelomkhuba wokuzila ukudla. Yikho bafika kuye bambuza bathi: “Kungani abafundi bakaJohane labafundi babaFarisi bezila ukudla kodwa abafundi bakho bona bengazili?”+ 19 UJesu wathi kubo: “Kambe sikhona yini isizatho sokuthi abangane bomyeni+ bazile yena umyeni eseselabo? Nxa umyeni eseselabo, ngeke bazile. 20 Kodwa zizafika insuku lapho abazathathelwa khona umyeni.+ Yikho lapho abazazila khona ukudla. 21 Akulamuntu othungela isichibi esitsha esigqokweni esidala. Nxa angenza njalo, isichibi esitsha siyafinyela sidonse isigqoko esidala, besesidabuka ukwedlula kuqala.+ 22 Kanti njalo kakho ofaka iwayini elitsha emigodleni yesikhumba emidala. Nxa angenza njalo, iwayini liyadabula izikhumba lichitheke, lemigodla yesikhumba yonakale. Kodwa iwayini elitsha lifakwa emigodleni yesikhumba emitsha.”

23 Wathi edlula phakathi kwamasimu engqoloyi ngeSabatha, abafundi bakhe baqalisa ukuhamba besikha izikhwebu zengqoloyi.+ 24 AbaFarisi basebesithi kuye: “Khangela! Kanti benzelani into engekho emthethweni ngeSabatha?” 25 Kodwa wathi kubo: “Alikaze likubale yini ukuthi uDavida wenzani esephelelwe yikudla, yena lamadoda ayelawo sebelambile?+ 26 Alikubalanga yini endabeni ka-Abhiyatha+ umphristi okhokhelayo, ukuthi uDavida wangena endlini kaNkulunkulu wadla izinkwa zokubukiswa, ezinye wazinika amadoda ayelaye? Phela kwakungekho emthethweni ukuthi zidliwe yiloba ngubani ngaphandle kwabaphristi.”+ 27 Wasesithi kubo: “Abantu abenzelwanga iSabatha kodwa iSabatha yilo elenzelwa abantu.+ 28 Ngakho iNdodana yomuntu iphinda ibe yiNkosi yeSabatha.”+

3 Waphinda wangena esinagogeni njalo kwakulendoda eyayilesandla esitshwabheneyo.+ 2 Ngakho bamkhangela ngelihlo lokhozi befuna ukubona ukuthi wayezayelapha yini indoda le ngeSabatha besebemethesa icala. 3 Wathi endodeni elesandla esitshwabheneyo: “Sukuma uze lapha phakathi.” 4 Wasesithi kubo: “Kusemthethweni yini ukwenza okuhle loba okubi ngeSabatha? Kusemthethweni yini ukusindisa impilo loba ukubulala ngeSabatha?”+ Kodwa bona bazithulela. 5 Wabakhangela esecaphukile futhi esizwa ubuhlungu ngenxa yokuthi babengelazwelo ezinhliziyweni zabo,+ wasesithi endodeni leyo: “Yelula isandla sakho.” Lakanye yaselula satshwaphuluka. 6 AbaFarisi bathi bekubona lokhu baphuma, bahle benza umhlangano labalandeli bakaHerodi+ ukuze bambulale.

7 Kodwa uJesu wasuka waya elwandle labafundi bakhe futhi walandelwa ngabantu abanengi+ ababevela eGalile leJudiya. 8 Kwabuya labanye abanengi kakhulu ababevela eJerusalema, le-Idumiya, langaphetsheya kukaJodani, leThire kanye leSidoni ngoba babezwe izinto ezinengi ayezenza. 9 Yikho watshela abafundi bakhe ukuthi bamdingele isikepe esincane ayezasisebenzisa ukuze abantu bangamminyezeli. 10 Bonke ababelemikhuhlane emibi babembuthanela befuna ukumthinta+ ngoba wayeselapha abanengi. 11 Lamadimoni+ ayesithi angambona awele phansi phambi kwakhe, amemeze athi: “Wena uyiNdodana kaNkulunkulu.”+ 12 Kodwa yena wayewaqonqosela ukuthi angakuvezi ukuthi ungubani.+

13 Wakhwela entabeni wasebiza labo ayebafuna,+ baya kuye.+ 14 Wakhetha amadoda angu-12 wawabiza ngokuthi ngabaphostoli. Yiwo ayezahamba lawo njalo wayezawathuma ukuthi ayetshumayela, 15 awanike lamandla okukhipha amadimoni.+

16 Eqenjini lamadoda angu-12+ alibumbayo* kwakuloSimoni, lowo amnika ibizo elithi Phetro,+ 17 loJakhobe indodana kaZebhedi, loJohane umfowabo kaJakhobe, (laba uJesu waphinda wabapha ibizo elithi Bhowaji, okutsho ukuthi, “Amadodana omdumo”),+ 18 lo-Andreya, loFiliphu, loBhatholomewu, loMathewu, loTomasi, loJakhobe indodana ka-Alifewu, loThadewu, loSimoni umKhanani* 19 kanye loJudasi Iskariyothi owacina emthengisile.

UJesu wasuka waya kwenye indlu 20 njalo kwabuya abantu abanengi okokuthi yena labafundi bakhe baze baswela lethuba lokudla. 21 Izihlobo zakhe zathi zikuzwa lokhu zasuka zisiyambamba ngoba zazisithi: “Usephambene.”+ 22 Lababhali ababefike bevela eJerusalema babesithi: “Umuntu lo uloBhelizebhubhi* futhi ukhipha amadimoni esebenzisa umbusi wamadimoni.”+ 23 Ngakho wababiza wasekhuluma labo esebenzisa imizekeliso wathi: “Kungenzakala njani ukuthi uSathane axotshe uSathane? 24 Nxa umbuso ungehlukana phakathi, ngeke ume,+ 25 futhi nxa imuli* ingehlukana phakathi, ngeke ime. 26 Yikho nxa uSathane esezihlamukele futhi eseyehlukene phakathi, ngeke ame, kuyabe sekuphelile ngaye. 27 Phela kakho ongangena endlini yendoda elamandla enelise ukutshontsha izinto zayo engazange aqale ayibophe. Nxa eseyibophile usengabutha okusendlini yayo. 28 Ngiqinisile ngithi kini, amadodana abantu azathethelelwa zonke izono, kungelani lokuthi enza zono bani lokuthi akhuluma waphi amazwi okuthuka. 29 Kodwa loba ngubani othuka umoya ongcwele ngeke athethelelwe kuze kube nini lanini.+ Isono sakhe sizahlala sikhona kuze kube phakade.”+ 30 Watsho lokhu ngoba babesithi: “Indoda le iledimoni.”+

31 Kwafika unina kanye labafowabo+ bama phandle, basebethuma umuntu ukuthi ayembiza.+ 32 Kwakulabantu abanengi ababehlezi bembuthanele, yikho bathi kuye: “Unyoko labafowenu bayakucela phandle!”+ 33 Kodwa yena wabaphendula wathi: “Ngubani umama, labafowethu ngobani?” 34 Wasekhangela labo ababehlezi bemgombolozele wathi: “Khangelani, nangu umama, nampa abafowethu!+ 35 Loba ngubani owenza intando kaNkulunkulu, nguye umfowethu lodadewethu kanye lomama.”+

4 Waphinda waqalisa ukufundisa eceleni kolwandle, kwasekubuthana abantu abanengi kakhulu eduze kwakhe. Ngakho wangena esikepeni wahlala kuso siphakathi kwamanzi, kodwa abantu bonke babesekhunjini.+ 2 Wabafundisa izinto ezinengi esebenzisa imizekeliso.+ Wathi kubo:+ 3 “Lalelani! Umlimi waphuma esiyahlanyela.+ 4 Wathi ehlanyela, enye inhlanyelo yawela eceleni kwendlela, inyoni zafika zayidobha zayidla. 5 Enye yawela emhlabathini owawuledwala ngaphansi, lapho okwakungelanhlabathi enengi khona, yahle yamila ngoba umhlabathi wawungatshoni.+ 6 Kodwa ilanga lathi seliphumile yatsha yaswaba ngoba yayingelampande. 7 Enye inhlanyelo yawela emeveni, ameva asekhula ayiminyanisa, ayizange ithele.+ 8 Kodwa enye yawela emhlabathini omuhle yamila futhi yakhula yasiqalisa ukuthela. Enye yathela okuphindwe ka-30, eyinye ka-60 lenye ka-100.”+ 9 Waqhubeka wathi: “Olendlebe zokulalela kalalele.”+

10 Abantu bathi sebehambile, abaliTshumi Lambili kanye labanye abafundi baqalisa ukumbuza mayelana lemizekeliso yakhe.+ 11 Wathi kubo: “Lina liyiphiwe imfihlo engcwele+ yoMbuso kaNkulunkulu, kodwa abanye bonke bazizwela imizekeliso kuphela+ 12 ukuze bangaboni lanxa bekhangele, bangazwisisi lanxa besizwa njalo abasoze bafa baphenduka bathethelelwe.”+ 13 Waseqhubeka wathi kubo: “Nxa lingawuzwisisi umzekeliso lo, lizayizwisisa njani yonke eminye imizekeliso?

14 “Umlimi uhlanyela ilizwi.+ 15 Inhlanyelo ewela eceleni kwendlela lilizwi elihlanyelwa ebantwini, abathi besanda kulizwa uSathane afike+ alithathe ilizwi lelo elihlanyelwe kubo.+ 16 Inhlanyelo ewela emhlabathini oledwala ngaphansi lilizwi elihlanyelwa ebantwini, abathi belizwa nje balamukele ngentokozo.+ 17 Lanxa kunjalo abalampande phakathi kwabo. Baqhubeka okwesikhatshana besekusithi nxa inhlupho kumbe ukuhlukuluzwa ngenxa yelizwi kufika, bakhubeke. 18 Inhlanyelo ewela emeveni lilizwi elihlanyelwa ebantwini, kodwa bathi sebelizwile,+ 19 izinkathazo+ zomumo lo wezinto,* lenotho elamandla okuyenga+ kanye lezifiso+ ezitshiyeneyo kungene enhliziyweni zabo kuliminyanise ilizwi lehluleke ukuthela. 20 Inhlanyelo ewela emhlabathini omuhle lilizwi elihlanyelwa ebantwini balilalele njalo balamukele kuhle, besebethela okuphindwe ka-30, lokuphindwe ka-60, lokuphindwe ka-100.”+

21 Wasesithi kubo: “Kambe ukhona umuntu ongambokotha isibane ngebhasikiti* loba asifake ngaphansi kombheda? Kanti asibekwa phezu koluthi lwesibane yini?+ 22 Phela akulalutho olucatshileyo olungasoze lwembulwe futhi akulalutho olufihliweyo olungasoze luphume egcekeni.+ 23 Loba ngubani olendlebe zokulalela kalalele.”+

24 Waqhubeka wathi kubo: “Kulalelisiseni lokho elikuzwayo.+ Lizalinganiselwa ngesikali elilinganisa ngaso, lingezelelwe lokunye phezulu. 25 Loba ngubani olakho uzaphiwa okunye futhi,+ kodwa loba ngubani ongelalutho uzathathelwa lalokho alakho.”+

26 Waphinda wathi kubo: “UMbuso kaNkulunkulu ufanana lomuntu ohaza inhlanyelo emhlabathini. 27 Uyalala ebusuku avuke ekuseni, inhlanyelo imile ikhule kodwa ukuthi lokhu kwenzakala njani yena kakwazi. 28 Ikhula yodwa emhlabathini kancane kancane. Kuqala ikhaba kulandele isikhwebu kucine ngengqoloyi evuthiweyo. 29 Kodwa ingqoloyi iyathi ivuthwa nje, ahle ayithele isikela ngenxa yokuthi isikhathi sokuvuna siyabe sesifikile.”

30 Waqhubeka wathi: “Singawufanisa lani uMbuso kaNkulunkulu? Yiwuphi umzekeliso esingawusebenzisa ukuze siwuchasise? 31 Unjengentanga yemastadi, ethi ngesikhathi ihlanyelwa emhlabathini iyabe iyintanga encane kulazo zonke emhlabeni.+ 32 Kodwa nxa isihlanyeliwe, iyamila ikhule ibe yisilimo esikhulu kulazo zonke, esilezingatsha ezinkulu okokuthi inyoni ziyathola indawo yokuhlala emthunzini waso.”

33 Wabafundisa ilizwi esebenzisa imizekeliso eminengi+ enjengale, kusiya ngokuzwisisa kwabo. 34 Akukho lokukodwa abatshela khona engasebenzisi umzekeliso. Kodwa abafundi bakhe wayebachasisela zonke izinto sebebodwa.+

35 Ngalelolanga sekuntambama wathi kubo: “Asichapheni siye ngaphetsheya kolwandle.”+ 36 Ngakho batshela ixuku ukuthi lihambe, basebemthatha bahamba laye ngesikepe engalulungiselelanga uhambo. Kwakulezinye izikepe ezazihambisana labo.+ 37 Kwavuka isiphepho esikhulu esilolaka futhi amagagasi ayelokhu etshaya isikepe, lamanzi ekhaphakela phakathi kwaze kwasala kancane ukuthi isikepe sicwile.+ 38 Kodwa yena wayengemuva kwesikepe elele phezu komqamelo omkhulu. Yikho bamvusa bathi kuye: “Mfundisi, kanti awulandaba lokuthi sesisifa?” 39 Wasevuka wawukhuza umoya wakhuluma lolwandle wathi: “Thula! Thula zwi!”+ Lakanye umoya waphela, kwathula kwathi cwaka. 40 Wasesithi kubo: “Kungani lisesaba kangaka? Lilokhu lingakabi lokholo yini?” 41 Kodwa bona besaba kakhulu babuzana besithi: “Ngubani sibili yenalo? Phela umoya lolwandle lakho kuyamlalela.”+

5 Ngemva kwalokho bafika ngaphetsheya kolwandle, esabelweni samaGerasini.+ 2 UJesu wathi esanda kuphuma esikepeni, wahlangana lendoda eyayiledimoni ivela emangcwabeni. 3 Yayihlala emathuneni njalo kwakungelamuntu owayesenelisa ukuyigcina ibotshiwe, ngitsho langamaketane. 4 Babejayele ukuyibopha ngezankosi langamaketane kodwa yayiwaqamula, iqamule lezankosi. Kakho owayelamandla okuyichumisa. 5 Yayihlala imemeza ebusuku lemini isemathuneni lasezintabeni izisika ngamatshe. 6 Kodwa yathi ibona uJesu esesekhatshana, yagijima yafika yamkhothamela.+ 7 Yasimemeza ngelizwi elikhulu yathi: “Kanti ufunani kimi Jesu, Ndodana kaNkulunkulu oPhezukonke? Funga kuNkulunkulu ukuthi awusoze ungihlukuluze.”+ 8 Yayisitsho njalo ngoba uJesu wayelokhu ekhuluma ledimoni esithi: “Phuma endodeni le wena dimoni.”+ 9 UJesu waseyibuza wathi: “Ibizo lakho ngubani?” Yona yaphendula yathi: “NguLigiyoni ngoba sibanengi.” 10 Yaqhubeka incenga uJesu ukuthi angawaxotsheli ngaphandle kwelizwe amadimoni lawo.+

11 Kwakulomhlambi omkhulu wengulube+ ezazisidla khonapho entabeni.+ 12 Yikho amadimoni amncenga athi: “Sixotshele engulubeni siyengena kuzo.” 13 Wawavumela asephuma ayangena engulubeni. Ingulube lezo ezazingaba ngu-2 000 zaphaphatheka ziqonda eliweni zayazithela elwandle, zagalula. 14 Abelusi bazo babaleka bayabika lokhu edolobheni kanye lasemaphandleni, abantu basebebuya bezobona okwakwenzakele.+ 15 Bafika kuJesu bayibona indoda eyayikhitshwe amadimoni, leyo eyayikade ileligiyoni. Yayihlezi njalo igqokile, ingqondo zayo sezisebenza kuhle. Abantu bezwa besesaba 16 futhi labo ababezibonele ngawabo lokhu kusenzakala babalandisela ukuthi kwakwenzakaleni endodeni eyayilamadimoni kanye lasezingulubeni. 17 Yikho abantu bancenga uJesu ukuthi asuke esabelweni sabo.+

18 Wathi engena esikepeni, indoda eyayikade ilamadimoni yamncenga ukuthi ahambe layo.+ 19 Kodwa yena wala wathi kuyo: “Hamba ngakini ezihlotsheni zakho uyezitshela konke uJehova* akwenzele khona kanye lesihawu akutshengise sona.” 20 Indoda le yasuka lapho yahamba itshela abantu emangweni weDekhapholi* konke uJesu ayeyenzele khona futhi bonke bamangala.

21 UJesu waphinda wachaphela ngaphetsheya kolwandle ngesikepe, kwasekubuya abantu abanengi babuthana kuye eceleni kolwandle.+ 22 Kwafika omunye umphathi wesinagogi owayebizwa ngokuthi nguJayirosi. Wathi ebona uJesu wazilahla phansi enyaweni zakhe,+ 23 wamncenga kanengi esithi: “Indodakazi yami encane igulela ukufa. Ngicela sihambe uyeyibeka izandla+ ukuze isile, ingafi.” 24 UJesu wasehamba laye njalo abantu abanengi babemlandela futhi bemminyezela.

25 Kwakulowesifazana owayesehlutshwe ngumkhuhlane wokopha+ okweminyaka engu-12.+ 26 Wayesehlupheke kakhulu* odokotela abanengi bezama ukumelapha futhi wayeseqede konke ayelakho, kodwa umkhuhlane wawulokhu uqina kulokuthi ube ngcono. 27 Wezwa imibiko emayelana loJesu, yikho weza wazithukuza phakathi kwabantu wasethinta isembatho sakhe sangaphandle+ engemva kwakhe, 28 ngoba wayelokhu esithi: “Nxa nje ngingathinta izembatho zakhe zangaphandle, ngizasila.”+ 29 Masinyane nje ukopha kwama, wezwa emzimbeni wakhe ukuthi wayesesilisiwe emkhuhlaneni lo owawusumhlukuluze kakhulu.

30 UJesu wahle wananzelela ukuthi amandla+ ayephumile kuye, wasetshibilika wakhangela abantu wabuza wathi: “Ngubani othinte izembatho zami?”+ 31 Abafundi bakhe bathi kuye: “Kambe ungabuza ukuthi ngubani okuthintileyo wena ubona abantu bekuminyezela kangaka?” 32 Kodwa yena waqhubeka edinga ukuthi ngubani owayekwenzile lokho. 33 Owesifazana owayemthintile wesaba waqhuqha ngoba wayekwazi okwakwenzakele kuye. Yikho weza wazilahla phansi phambi kwakhe wamtshela lonke iqiniso. 34 Yena wathi kuye: “Ndodakazi, ukholo lwakho lukusilisile. Hamba ngokuthula,+ usile emkhuhlaneni wakho obukuhlukuluza.”+

35 Esakhuluma, amanye amadoda ayevela emzini womphathi wesinagogi afika athi kuJayirosi: “Indodakazi yakho isifile. Usamhluphelani uMfundisi?”+ 36 Kodwa uJesu wawezwa ekhuluma wasesithi kumphathi wesinagogi: “Ungesabi, wena woba lokholo kuphela.”+ 37 Kazange avumele muntu ukuthi amlandele, ngaphandle kukaPhetro loJakhobe loJohane umfowabo kaJakhobe.+

38 Bafika endlini yomphathi wesinagogi, wabona abantu bexokozela futhi abanye bekhala beqhinqa isililo.+ 39 Esengenile wathi kubo: “Kanti likhalelani futhi ngesani isiphithiphithi sonke lesi? Umntwana kafanga kodwa ulele.”+ 40 Bathi bekuzwa lokhu baqalisa ukumhleka bemenza isithutha. Wathi baphume phandle, wasebiza uyise womntwana lonina kanye lalabo ayehamba labo, wangena lapho umntwana ayekhona. 41 Wabamba isandla somntwana wathi kuye: “Thalitha khumi,” okutsho ukuthi: “Ntombazana, ngithi kuwe vuka!”+ 42 Masinyane nje intombazana yavuka yaqalisa ukuhamba. (Yayileminyaka engu-12.) Bathi bekubona lokhu bathaba kakhulu. 43 Kodwa wabaqonqosela ukuthi bangayitsheli muntu indaba le,+ wasesithi intombazana kayiphiwe ukudla.

6 Wasuka lapho waya edolobheni lakibo+ ehamba labafundi bakhe. 2 Ngelanga leSabatha waqalisa ukufundisa esinagogeni futhi abanengi ababemuzwa bamangala kakhulu bathi: “Indoda le yazithatha ngaphi izinto lezi?+ Ngubani owayinika ukuhlakanipha okungaka njalo kungani ilamandla okwenza izimangaliso lezi?+ 3 Kanti lo kayisuye yini umbazi+ indodana kaMariya?+ Abafowabo akusiJakhobe,+ loJosefa, loJudasi kanye loSimoni?+ Odadewabo bona kayisibo yini esilabo lapha?” Ngakho bamcaphukela.* 4 Kodwa uJesu wathi kubo: “Umphrofethi uhlonitshwa yonke indawo ngaphandle kwalapho adabuka khona lasezihlotsheni zakhe lasemulini yangakibo.”+ 5 Yikho uJesu kazange enze izimangaliso endaweni le ngaphandle kokwelapha lokubeka izandla abantu abalutshwana ababegula. 6 Waphelelwa ebona ukuthi babengelakholo. Esuka lapho wahamba ebhoda isigaba ngesigaba efundisa.+

7 Wasebiza abaliTshumi Lambili waqalisa ukubathuma ngababili,+ wabanika lamandla phezu kwamadimoni.+ 8 Wabatshela ukuthi bangahambi lalutho ngaphandle kwezintonga zabo lokuthi bangathwali isinkwa lesikhwama sokudla kanye lemali* emabhantini abo.+ 9 Wabatshela lokuthi bagqoke amanyathela kodwa bangagqoki izembatho ezimbili.* 10 Waqhubeka wathi kubo: “Loba yiwuphi umuzi elingena kuwo, hlalani kuwo lize lisuke kuleyondawo.+ 11 Nxa lingafika kuloba yiphi indawo bangalamukeli loba bangalilaleli, thintithani uthuli enyaweni zenu nxa selisuka ukuze kube yibufakazi kubo.”+ 12 Ngemva kwalokho abafundi basuka bayatshumayela betshela abantu ukuthi kumele baphenduke.+ 13 Bakhipha amadimoni+ amanengi, bagcoba labantu abanengi abagulayo ngamafutha babasilisa.

14 INkosi uHerodi yakuzwa lokhu ngoba ibizo likaJesu laselisaziwa yonke indawo njalo abantu babesithi: “UJohane uMbhabhathizi usevusiwe kwabafileyo, yikho elamandla okwenza izimangaliso lezi.”+ 15 Kodwa abanye babesithi: “Ngu-Elija,” abanye bona besithi: “Ngumphrofethi onjengabaphrofethi bakudala.”+ 16 Lokhu kwafika endlebeni zikaHerodi, wasesithi: “Umuntu lo nguJohane engamquma ikhanda, kutsho ukuthi usevusiwe.” 17 UHerodi lo nguye owayethe uJohane abotshwe ngamaketane afakwe ejele ngenxa kaHerodiya umkamfowabo uFiliphu. Phela uHerodi wayesetshade loHerodiya+ 18 futhi uJohane wayehlala esithi kuHerodi: “Akukho emthethweni ukuthi wena uthathe umkamfowenu.”+ 19 Yikho uHerodiya wayebambele uJohane isikhwili efuna ukumbulala kodwa wayengenelisi. 20 Lokhu kwakungenxa yokuthi uHerodi wayemvikela uJohane njalo emesaba ngoba wayekwazi ukuthi wayeyindoda elungileyo futhi engcwele.+ Wayekholisa ukumlalela kodwa wayesithi angamuzwa ekhuluma, aswele lokuthi enzeni.

21 Kodwa uHerodiya wathola ithuba elihle lokwenza ayekuhlosile lapho uHerodi esenza idili lantambama ngelanga lakhe lokuzalwa.+ Wayebize izikhulu zakhe lezinduna zamabutho kanye lamadoda aseGalile ayedume kakhulu.+ 22 Indodakazi kaHerodiya yangena yagida, yathokozisa iNkosi uHerodi lalabo eyayibanxusile. Inkosi yasisithi entombazaneni le: “Cela loba yini oyifunayo ngizakunika.” 23 Yaze yafunga yathi kuyo: “Ungaze ucele loba kuyini ngizakupha, ngitsho lengxenye yombuso wami.” 24 Ngakho intombazana yaphuma yaya kunina yathi: “Ngiceleni?” Unina wathi: “Ikhanda likaJohane uMbhabhathizi.” 25 Yahle yabuyela enkosini yafika yathi: “Ngifuna unginike ikhanda likaJohane uMbhabhathizi khathesi lisemganwini.”+ 26 Lanxa inkosi yezwa ubuhlungu kakhulu, ayizange ikwale okwakucelwe yintombazana ngoba yayifunge phambi kwabantu eyayibanxusile. 27 Yikho inkosi yahle yathuma umlindi ukuthi ayebuya lekhanda likaJohane. Umlindi waya ejele wafika wamquma ikhanda, 28 waseliletha lisemganwini. Walipha intombazana, yona yalinika unina. 29 Abafundi bakaJohane bathi bekuzwa lokhu bahamba bayathatha isidumbu sakhe bayasibeka ethuneni.

30 Abaphostoli babuthanela uJesu bamlandisela zonke izinto ababezenzile lababezifundise abantu.+ 31 Kwakulabantu abanengi kakhulu, abanye besuka abanye befika, okokuthi abafundi babeswela lesikhathi sokuphumula badle. Yikho wathi kubo: “Wozani lina lodwa siye endaweni engelabantu siyephumula kancane.”+ 32 Ngakho basuka ngesikepe baya endaweni engelabantu ukuze babe bodwa.+ 33 Kodwa abantu bababona behamba futhi abanengi bakwazi lokhu, bagijima bonke ngenyawo bevela kuwo wonke amadolobho babaqalela ukufika. 34 Wathi ephuma esikepeni wabona kulabantu abanengi, wabazwela usizi+ ngoba babenjengezimvu ezingelamelusi,+ waseqalisa ukubafundisa izinto ezinengi.+

35 Kwathi sekusemini yantambama abafundi bakhe beza kuye bathi: “Indawo le ikhatshana lemizi futhi lesikhathi sesihambile.+ 36 Batshele bahambe ukuze bayengena emizini lasezigabeni eziseduze bazithengele ukudla.”+ 37 Yena waphendula wathi: “Bapheni lina ukudla.” Basebesithi kuye: “Sihambe yini siyebathengela izinkwa ngabodenariyu* abangu-200 sibaphe badle?”+ 38 Wathi kubo: “Lilezinkwa ezingaki? Hambani liyekhangela!” Sebevela khangela bathi: “Silezinkwa ezinhlanu lenhlanzi ezimbili.”+ 39 UJesu wasetshela abantu bonke ukuthi bahlale ngamaqembu etshanini obuluhlaza.+ 40 Bahlala phansi bengamaqembu, amanye elabantu abangu-100, amanye elabangu-50. 41 Wathatha izinkwa lezo ezinhlanu lenhlanzi ezimbili wakhangela phezulu wathandaza.*+ Wahlephuna izinkwa waqalisa ukuzinika abafundi bakhe ukuze baphe abantu, wasebahlephunela lenhlanzi ezimbili ukuze bonke badle. 42 Ngakho bonke badla basutha 43 njalo babutha iziqephu zagcwala amabhasikiti angu-12, babutha lenhlanzi ezazisele.+ 44 Abadla izinkwa lezo kwakungamadoda angu-5 000.

45 Beqeda nje wahle watshela abafundi bakhe ukuthi bangene esikepeni bachaphe baye ekhunjini elingaphetsheya bedlula eduzane leBhethisayida, yena asale evalelisa abantu abeselandela.+ 46 Wathi esevalelisane labo waya entabeni esiyathandaza.+ 47 Ntambama isikepe sasesiphakathi laphakathi kolwandle kodwa yena wayelokhu eyedwa entabeni.+ 48 Kwathi sekungaba ngumlindo wesine wobusuku* wababona besadalala ukugwedla njengoba umoya wawuphambana labo, wasesiya kubo ehamba phezu kolwandle, kodwa kwakungathi uzabedlula.* 49 Bathi bembona ehamba phezu kolwandle bahlaba umkhosi besithi: “Yinto bani le?”* 50 Bonke bambona bakhathazeka. Kodwa yena wahle wathi kubo: “Wobani lesibindi! Yimi lingesabi.”+ 51 Wasengena esikepeni ababekuso, umoya wathula. Bathi bekubona lokhu bamangala kakhulu 52 ngoba babengakazwisisi ukuthi isimangaliso sezinkwa sasibafundisani. Izinhliziyo zabo zazilokhu zibuthundu ekuzwisiseni.

53 Bathe sebechaphe ulwandle, bafika eGenesaretha bamisa isikepe khonapho eduze.+ 54 Kodwa bathi bephuma nje esikepeni, abantu bamnanzelela. 55 Bagijima bagcwala sonke isabelo babuya labantu ababegula, ngamunye bemthwele ngohlaka* lwakhe. Babasa lapho okwakuloJesu khona. 56 Wayesithi angafika esigabeni loba edolobheni kumbe emaphandleni, abantu balethe abagulayo emamakethe, bamncenge becela ukuthinta nje umphetho wesembatho sakhe sangaphandle.+ Bonke ababewuthinta babesila.

7 AbaFarisi labanye ababhali ababevela eJerusalema babuya bazobuthana kuye,+ 2 basebebona abanye abafundi bakhe besidla ngezandla ezingahlanzekanga, okutsho ukuthi ezingagezwanga.* 3 (Phela abaFarisi lamaJuda wonke abadli bengagezanga izandla kuze kufike endololwaneni, belandela isiko labokhokho babo. 4 Nxa bevela emakethe kabadli bengakagezi. Kulamanye futhi amasiko amanengi asebewamukele banamathela kuwo, njengokucwilisa* amankomitsho lamajagi kanye lezitsha zekhopha emanzini.)+ 5 Ngakho abaFarisi lababhali ababebuthene kuye bambuza bathi: “Kungani abafundi bakho bengalandeli isiko labokhokho? Phela badla ngezandla ezingahlanzekanga.”+ 6 Yena wathi kubo: “U-Isaya wayeqinisile sibili lapho ephrofetha ngani bazenzisi. Wabhala wathi, ‘Abantu laba bangidumisa ngezindebe zabo* kuphela kodwa inhliziyo zabo zikhatshana kakhulu lami.+ 7 Akuncedi ngalutho ukuthi baqhubeka bengikhonza ngoba bafundisa izinto ezithethwe emilayweni yabantu.’+ 8 Litshiya umlayo kaNkulunkulu linamathele emasikweni abantu.”+

9 Waqhubeka wathi kubo: “Lisebenzisa izindlela zobuqili ukuze lingalaleli umlayo kaNkulunkulu lisenzela ukugcina isiko lenu.+ 10 Ngokwesibonelo uMosi wathi, ‘Hlonipha uyihlo lonyoko,’+ waphinda wathi, ‘Lowo okhuluma kubi ngoyise kumbe ngonina* kumele abulawe.’+ 11 Kodwa lina lithi, ‘Kusemthethweni ukuthi umuntu athi kuyise loba kunina: “Loba kuyini engilakho ebengingakuncedisa ngakho kuyikhobhani (okutsho isipho esinikelwe kuNkulunkulu).”’ 12 Ngokutsho njalo, lenza ukuthi angamenzeli ngitsho lento eyodwa uyise kumbe unina,+ 13 futhi lenza lokuthi ilizwi likaNkulunkulu libe yinto engelancedo ngenxa yesiko lenu elilidlulisela kwabanye.+ Kunengi okunye elikwenzayo okunjengalokhu.”+ 14 Waphinda wabiza abantu ukuthi basondele kuye, wasesithi kubo: “Lonke lalelani lizwisise engikutshoyo.+ 15 Akulalutho olungena emuntwini luvela ngaphandle olungamngcolisa, kodwa izinto eziphuma phakathi kwakhe yizo ezimngcolisayo.”+ 16 *——

17 Wasuka ebantwini wayangena kwenye indlu, abafundi bakhe basebembuza ngomzekeliso wakhe.+ 18 Yena wathi kubo: “Kanti lani alizwisisi njengabo? Alikwazi yini ukuthi akulalutho olungena phakathi komuntu luvela ngaphandle olungamngcolisa? 19 Phela alungeni enhliziyweni yakhe kodwa luya esiswini beseluphuma luye esambuzini.” Ngamazwi la wayesitsho ukuthi ukudla konke kuhlanzekile. 20 Waqhubeka wathi: “Okuphuma phakathi komuntu yikho okumngcolisayo+ 21 ngoba phakathi komuntu, okutsho enhliziyweni yakhe,+ kuphuma imicabango eyingozi: Ukufeba,* lobusela, lokubulala, 22 lokulala lomuntu ongasimkakho wena utshadile, lobuhwaba, lezenzo ezimbi, lobuqili, lokuxhwala,* lelihlo elilomona, lokuthuka, lokuzikhukhumeza, lokungabi lengqondo. 23 Zonke izinto lezi ezimbi zivela phakathi komuntu njalo ziyamngcolisa.”

24 Wasuka lapho waqonda emangweni weThire leSidoni.+ Esefike khona wangena kwenye indlu futhi wayengafuni ukuthi kube lomuntu okwaziyo ukuthi ukhona, kodwa abantu bacina sebekwazi. 25 Masinyane nje owesifazana owayelendodakazi encane eyayiledimoni wezwa ngaye, wasesiya kuye wafika wazilahlela phansi enyaweni zakhe.+ 26 Owesifazana lo wayengumGrikhi, eyisizalwane seFenikhiya yeSiriya.* Waqhubeka emcela ukuthi akhiphe idimoni endodakazini yakhe. 27 Kodwa yena wathi kuye: “Qala ume abantwana badle basuthe ngoba akuqondanga ukuthatha isinkwa sabantwana usiphosele imidlwane.”+ 28 Owesifazana waphendula wathi: “Ye mnumzana, kodwa phela lemidlwane engaphansi kwetafula iyadla imvuthu ezikhithizwa ngabantwana abancane.” 29 UJesu wathi esizwa lokhu wathi: “Ngenxa yalokho osukukhulumile idimoni seliphumile endodakazini yakho,+ usungahamba.” 30 Owesifazana wasebuyela emzini wakhe wafica indodakazi yakhe ilele embhedeni, idimoni seliphumile.+

31 UJesu wathi esephenduka evela emangweni weThire, wadlula eSidoni wasesiya eLwandle lweGalile edabula esabelweni seDekhapholi.*+ 32 Baletha kuye indoda eyayingenelisi ukukhuluma kuhle futhi iyisacuthe,+ bamncenga ukuthi abeke isandla sakhe kuyo. 33 Wayithatha wasuka layo ebantwini, bathi sebebodwa wafaka iminwe yakhe endlebeni zayo, wasekhafula wathinta ulimi lwayo.+ 34 Wakhangela phezulu ezulwini, wehlisa iphika wasesithi kuyo: “Efifatha,” okutsho ukuthi, “Vuleka.” 35 Indlebe zayo zasezivuleka+ lohlupho lwayo lokungenelisi ukukhuluma kuhle lwaphela, yaqalisa ukukhuluma kuhle. 36 UJesu wabatshela ukuthi bangatsheli muntu.+ Kodwa wayesithi angatsho njalo kube angathi ubatshotshozela ukuthi bakutshumayele ngamandla.+ 37 Abantu basala bemangale bengelankani,+ bathi: “Konke akwenzayo kuhle. Phela wenza lezacuthe zizwe, lezimungulu zikhulume.”+

8 Ngalezonsuku kwaphinda kwabuthana abantu abanengi kakhulu njalo babengelakudla. Ngakho wabiza abafundi wasesithi kubo: 2 “Ngiyabazwela abantu+ laba ngoba sebehlale lami okwamalanga amathathu futhi abalakudla.+ 3 Nxa ngingathi babuyele emakhaya belambile, bangaphela amandla endleleni njalo abanye babo bavela khatshana.” 4 Kodwa abafundi bakhe bamphendula bathi: “Kambe endaweni yonale ekhatshana lemizi kulomuntu ongathola izinkwa ezingenela abantu bonke laba?” 5 Sebetsho njalo wababuza wathi: “Lilezinkwa ezingaki?” Bona bathi: “Eziyisikhombisa.”+ 6 Wasetshela abantu ukuthi bahlale phansi. Wathatha izinkwa lezo eziyisikhombisa wabonga uNkulunkulu, wazihlephuna wasezinika abafundi bakhe ukuthi baphe abantu, abafundi benza njalo.+ 7 Babelenhlanzi ezincane ezilutshwana. Wathi esebonge uNkulunkulu wabatshela ukuthi lazo baziphe abantu. 8 Yikho abantu badla basutha, abafundi basebebutha iziqephu ezazisele, bagcwalisa amabhasikiti amakhulu* ayisikhombisa.+ 9 Amadoda ayelapho ayengaba ngu-4 000. Ngemva kwalokho wathi abantu bahambe.

10 Yena wahle wangena esikepeni labafundi bakhe, waya emangweni weDalimanutha.+ 11 AbaFarisi basebemlanda bafika bathi abatshengise isibonakaliso esivela ezulwini befuna ukumlinga.+ 12 Ngakho wakhathazeka kakhulu emoyeni wakhe, wasesithi: “Kanti isizukulwane lesi sisifunelani isibonakaliso?+ Ngiqinisile ngithi kini, isizukulwane lesi asisoze siphiwe isibonakaliso.”+ 13 Wasebatshiya khonapho, wangena futhi esikepeni waya ngaphetsheya kolwandle.

14 Abafundi bakhohlwa ukuthatha izinkwa, ngakho babengelakudla esikepeni ngaphandle kwesinkwa esisodwa.+ 15 Wabaxwayisa ebaqonqosela esithi: “Hlalani livule amehlo, linanzelele imvubelo yabaFarisi lemvubelo kaHerodi.”+ 16 Kodwa baqalisa ukuphikisana ngokuthi babengelasinkwa. 17 Ebona lokhu wathi kubo: “Kungani liphikisana ngokuthi alilasinkwa? Kanti lilokhu lingananzeleli futhi lingazwisisi yini? Okwenza lingazwisisi yikuthi izinhliziyo zenu zilokhu zilukhuni yini? 18 ‘Kungani lisehluleka ukubona lina lilamehlo, lisehluleka lokuzwa lina lilendlebe?’ Alikhumbuli yini 19 ukuthi lagcwalisa amabhasikiti amangaki ngeziqephu ngize ngihlephune izinkwa ezinhlanu+ ezaphiwa amadoda angu-5 000?” Bathi kuye: “Angu-12.”+ 20 Waqhubeka wathi: “Ngize ngihlephunele amadoda angu-4 000 izinkwa eziyisikhombisa, iziqephu elizibuthileyo zigcwale amabhasikiti amakhulu* amangaki?” Bathi kuye: “Ayisikhombisa.”+ 21 Sebetsho njalo wathi kubo: “Lilokhu lingazwisisi yini?”

22 Bafika bama eBhethisayida, abantu basebeletha kuye indoda eyisiphofu, bamncenga ukuthi ayithinte.+ 23 Wabamba isandla sendoda leyo eyisiphofu, waphuma layo ngaphandle kwedolobho. Wakhafulela emehlweni ayo,+ wasebeka izandla zakhe phezu kwayo wayibuza wathi: “Kulolutho olubonayo yini?” 24 Indoda leyo yavusa amehlo yasisithi: “Ngibona abantu, kodwa bakhanya angani yizihlahla ezihambahambayo.” 25 Waphinda wabeka izandla zakhe emehlweni endoda le, yasila yaqalisa ukubona kuhle. Konke nje yayisikubona kucacile. 26 Wayitshela ukuthi ihambe ngekhaya kodwa wathi kuyo: “Ungangeni edolobheni leli.”

27 UJesu labafundi bakhe basuka baya ezigabeni zeKhesariya Filiphi. Besendleleni wababuza wathi: “Abantu bathi ngingubani?”+ 28 Bamphendula besithi: “Bathi unguJohane uMbhabhathizi,+ kodwa abanye bathi ungu-Elija,+ abanye bona bathi ungomunye wabaphrofethi.” 29 Wasebabuza wathi: “Kodwa lina lithi ngingubani?” UPhetro waphendula wathi: “UnguKhristu.”+ 30 Yena wasebaqonqosela ukuthi bangatsheli muntu ngaye.+ 31 Waqalisa ukubafundisa ukuthi iNdodana yomuntu kumele yehlelwe zinhlupho ezinengi, ilahlwe ngabadala labaphristi abakhokhelayo kanye lababhali, ibisibulawa,+ ivuke ngemva kwamalanga amathathu.+ 32 Lokhu wakubeka kwacaca sibili, kodwa uPhetro wamdonsela eceleni wamkhuza.+ 33 UJesu watshibilika wakhangela abafundi bakhe, wakhuza uPhetro wathi: “Yana emva kwami Sathane! Awucabangi imicabango kaNkulunkulu kodwa ucabanga eyabantu.”+

34 Ngemva kwalokho wabiza abantu labafundi bakhe, wasesithi kubo: “Loba ngubani ofuna ukungilandela kazidele athwale isigodo sakhe sokuhlutshwa* aqhubeke engilandela+ 35 ngoba loba ngubani ofuna ukusindisa impilo* yakhe izamlahlekela, kodwa loba ngubani olahlekelwa yimpilo* yakhe ngenxa yami langenxa yezindaba ezinhle uzayisindisa.+ 36 Kambe umuntu kungamnceda ngani sibili ukuzuza umhlaba wonke kodwa alahlekelwe yimpilo yakhe?*+ 37 Kuyini sibili umuntu angabhadala ngakho ukuze athole impilo yakhe?*+ 38 Loba ngubani oba lenhloni ngami kumbe ngamazwi ami kulesisizukulwane esingathembekanga* lesonayo, iNdodana yomuntu layo izakuba lenhloni ngaye+ nxa isisiza isenkazimulweni kaYise ilezingilosi ezingcwele.”+

9 Waqhubeka wathi kubo: “Ngiqinisile ngithi kini, bakhona abanye abemi lapha abangasoze bafe bengakawuboni uMbuso kaNkulunkulu usubusa.”+ 2 Kwathi sekwedlule amalanga ayisithupha, uJesu wathatha uPhetro loJakhobe kanye loJohane wakhwela labo entabeni ende. Sebelapho waguquka isimo phambi kwabo,+ 3 izembatho zakhe zangaphandle zaqalisa ukukhazimula, zaba mhlophe nke okokuthi akulamuntu emhlabeni owayengaziwatsha zibe mhlophe kangako. 4 Kusenjalo babona sekulo-Elija loMosi bexoxa loJesu. 5 UPhetro wasesithi kuJesu: “Rabi, kuhle kithi ukuba lapha. Asimiseni amatende amathathu, elakho lelikaMosi lelika-Elija.” 6 Wayeseswele lokuthi athini ngoba uvalo lwaselubabulele. 7 Kwaqubuka iyezi labagubuzela, kwezwakala ilizwi+ liphuma kuleloyezi lisithi: “Le yiNdodana yami engiyithandayo.+ Yilaleleni.”+ 8 Bathi besithi bayakhangela bazibona sebesele loJesu kuphela.

9 Sebesehla entabeni wabaqonqosela ukuthi bangatsheli muntu ngababekubonile,+ kuze kube yilapho iNdodana yomuntu isivukile kwabafileyo.+ 10 Amazwi la bawagcina ezinhliziyweni zabo,* kodwa baxoxa bebodwa ngokuthi lokho kuvuka kwabafileyo kwakusitshoni. 11 Basebeqalisa ukumbuza besithi: “Manje kungani ababhali besithi u-Elija+ kumele aze kuqala?”+ 12 Yena wathi kubo: “U-Elija kumele abuye kuqala sibili, afike abuyisele zonke izinto endaweni yazo.+ Kodwa kungani kubhalwe ukuthi iNdodana yomuntu kufanele yehlelwe zinhlupho ezinengi+ njalo idelelwe?+ 13 Lanxa kunjalo ngilitshela ukuthi u-Elija+ sewabuya futhi bamenza konke ababekufuna, njengoba nje kubhaliwe ngaye.”+

14 Bathi befika kwabanye abafundi, bananzelela ukuthi babebuthanelwe ngabantu abanengi njalo kwakulababhali ababephikisana labo.+ 15 Kodwa bonke abantu bathi bebona uJesu bamangala kakhulu basebegijima besiyambingelela. 16 Ngakho wabuza wathi: “Liphikisana labo ngani?” 17 Omunye owayephakathi kwabantu wamphendula wathi: “Mfundisi, ngilethe indodana yami kuwe ngoba iledimoni eliyenza ibe yisimungulu.+ 18 Loba nini lapho eliyibamba khona, liyayilahlela phansi ibhubhudle amagwebu, itshayanise amazinyo futhi iphele amandla. Ngicele abafundi bakho ukuthi balikhiphe kodwa behlulekile.” 19 Yena wasesithi kubo: “Hawu lina sizukulwane esingelakholo,+ kumele ngiqhubeke ngilani kuze kube nini? Kufanele ngilibekezelele kuze kube nini? Mletheni lapha umfana.”+ 20 Lakanye bamletha kuye kodwa idimoni lathi libona uJesu lahle lamlahla phansi umfana laqalisa ukumgiqa. Esewele phansi, waqhubeka elokhu egiqika futhi ebhubhudla amagwebu. 21 UJesu wasebuza uyise womfana wathi: “Sekulesikhathi esinganani kumenza lokhu?” Yena wathi: “Kusukela esesemncane, 22 futhi lijayele ukumjikela emlilweni lasemanzini lifuna ukumbulala. Kodwa nxa kukhona ongenelisa ukukwenza, sizwele usincede.” 23 UJesu wasesithi kuye: “Kungani usithi, ‘Nxa kukhona ongenelisa ukukwenza’? Phela zonke izinto zingenzakala kulowo olokholo.”+ 24 Uyise womntwana wahle wamemeza wathi: “Ngilalo ukholo! Ngicela ungincede lapho ukholo lwami olusilela khona!”+

25 UJesu wathi ebona abantu sebegijimela kubo, walikhuza idimoni wathi: “Wena dimoni eliyisimungulu leliyisacuthe, ngithi phuma kuye, ungaphindi ungene kuye futhi!”+ 26 Idimoni laklabalala lamdlukuza ngamandla umfana, laseliphuma, wasala ethe daca angathi ufile, abantu abanengi baze bathi: “Usefile!” 27 Kodwa uJesu wambamba ngesandla wamsukumisa, umfana wama ngenyawo. 28 UJesu wathi esengene endlini, abafundi bakhe bambuza bebodwa bathi: “Kungani thina sehlulekile ukulikhipha?”+ 29 Wathi kubo: “Idimoni elinjengaleli lingakhitshwa ngomthandazo kuphela.”

30 Basuka lapho badabula eGalile kodwa wayengafuni kube lomuntu okwaziyo ukuthi ungaphi. 31 Wayefundisa abafundi bakhe esithi: “INdodana yomuntu izanikelwa* ezandleni zabantu bayibulale.+ Kodwa lanxa izabulawa, izavuka ngemva kwamalanga amathathu.”+ 32 Lanxa watsho njalo abazange bakuzwisise ayekutsho njalo babesesaba ukumbuza.

33 Basebefika eKhaphenawume. Esengenile endlini wababuza wathi: “Beliphikisana ngani endleleni?”+ 34 Bathula zwi ngoba endleleni babephikisane ngokuthi ngubani owayemkhulu phakathi kwabo. 35 Ngakho wahlala phansi wasebiza abaliTshumi Lambili wathi kubo: “Nxa umuntu efuna ukuba ngowokuqala, kufanele abe ngowokucina kubo bonke futhi abe yinceku yabo bonke.”+ 36 Wasethatha umntwana omncane wammisa phakathi kwabo, wamgona wasesithi kubo: 37 “Loba ngubani owamukela umntwana omncane njengalo+ ngenxa yebizo lami uyangamukela lami, futhi loba ngubani ongamukelayo kamukeli mina kuphela kodwa wamukela lalowo ongithumileyo.”+

38 UJohane wathi kuye: “Mfundisi, kulomuntu esimbone ekhipha amadimoni ngebizo lakho, sasesizama ukumalisa ngoba ubengasilandeli.”+ 39 Kodwa uJesu wathi: “Lingazami ukumalisa ngoba kakho ongathi eqeda nje ukwenza isimangaliso ngebizo lami, abesekhuluma izinto ezimbi ngami, 40 ngenxa yokuthi loba ngubani ongaphikisani lathi uyasisekela.+ 41 Lalowo olipha inkomitsho yamanzi ukuthi linathe ngenxa yokuthi lingabakaKhristu,+ ngiqinisile ngithi kini, kasoze alahlekelwe ngumvuzo wakhe loba sekutheni.+ 42 Kodwa loba ngubani okhuba omunye walaba abancinyane abalokholo, kungaba ngcono kuye ukuthi kugaxwe entanyeni yakhe inkalakatha yelitshe lokuchola elidonswa ngubabhemi, abesephoselwa elwandle.+

43 “Nxa isandla sakho sikwenza ukhubeke siqume. Kungcono ukuthi uthole ukuphila ukhubazekile kulokuthi uyengena ulezandla ezimbili eGehena,* emlilweni ongacitshekiyo.+ 44 *—— 45 Kanti njalo nxa unyawo lwakho lukwenza ukhubeke luqume. Kungcono ukuthi uthole ukuphila ugogekile kulokuthi uphoselwe eGehena*+ ulenyawo ezimbili. 46 *—— 47 Nxa ilihlo lakho likwenza ukhubeke lilahlele khatshana.+ Kungcono ukuthi ungene eMbusweni kaNkulunkulu ulelihlo elilodwa kulokuthi uhlale ulamehlo amabili ubusuphoselwa eGehena,*+ 48 lapho okulempethu ezingafiyo lomlilo ongacitshekiyo.+

49 “Phela umlilo kumele uvuvuzelwe emuntwini wonke njengesawudo elivuvuzelwa ekudleni.+ 50 Isawudo lihle kodwa nxa lingabaduma ungalifakani ukuze liphinde libe munyu?+ Wobani lesawudo phakathi kwenu+ futhi liqhubeke lihlalisana ngokuthula.”+

10 Esuka lapho waya ezindaweni ezisemngceleni weJudiya ngaphetsheya kukaJodani. Waphinda wabuthanelwa ngabantu abanengi, waseqalisa ukubafundisa njengenjayelo.+ 2 AbaFarisi bamlanda befuna ukumlinga bafika bambuza ukuthi kusemthethweni yini ukuthi indoda idivose umkayo.+ 3 Wabaphendula wathi: “UMosi walipha umlayo othini?” 4 Basebesithi: “UMosi wakuvumela ukuthi umuntu abhale incwadi yokudivosa inkosikazi yakhe abeseyixotsha.”+ 5 Kodwa uJesu wathi kubo: “Walibhalela umlayo lo+ ngoba lilenhliziyo ezilukhuni.+ 6 Kodwa ekuqaleni, uNkulunkulu wathi edala abantu, ‘wenza owesilisa lowesifazana.+ 7 Ngenxa yalokho indoda izatshiya uyise lonina+ 8 futhi bobabili bazakuba nyamanye,’+ yikho kabasebabili kodwa sebenyamanye. 9 Ngakho lokho uNkulunkulu asekuhlanganisile* akungabi lomuntu okwehlukanisayo.”+ 10 Bathi sebebuyele endlini abafundi bambuza ngendaba le. 11 Wathi kubo: “Loba ngubani odivosa inkosikazi yakhe abesetshada lomunye umfazi, uyafeba+ futhi kathembekanga kuyo. 12 Kanti njalo nxa inkosikazi ingadivosa umkayo ibisitshada lomunye umuntu, iyafeba.”+

13 Abantu baqalisa ukuletha abantwana abancane kuye ukuze ababambe kodwa abafundi babakhuza.+ 14 UJesu wathi ekubona lokhu wacaphuka wathi kubo: “Bayekeleni abantwana abancane beze kimi, lingazami ukubavimba ngoba uMbuso kaNkulunkulu ngowalabo abanjengabantwana.+ 15 Ngiqinisile ngithi kini, loba ngubani ongamukeli uMbuso kaNkulunkulu njengomntwana omncane kasoze angene kuwo loba sekutheni.”+ 16 Wasethatha abantwana wabagona futhi wababusisa ebabeka izandla.+

17 Wathi esesendleleni wagijinyelwa ngenye indoda yafika yazilahla phansi yaguqa phambi kwakhe, yambuza yathi: “Mfundisi Omuhle, kumele ngenzeni ukuze ngizuze ilifa lokuphila okungapheliyo?”+ 18 UJesu wathi kuyo: “Kungani ungibiza ngokuthi ngimuhle? Kakho omuhle ngaphandle kukaNkulunkulu kuphela.+ 19 Angithi uyayazi imilayo ethi: ‘Ungabulali,+ ungafebi,*+ ungatshontshi,+ ungafakazi amanga,+ ungaqili abanye,+ hlonipha uyihlo lonyoko.’”+ 20 Indoda le yathi kuye: “Mfundisi, yonke imilayo le ngiyigcinile kusukela ngisesemncane.” 21 UJesu wayikhangela wezwa eyithanda, wasesithi kuyo, “Kulento eyodwa esilelayo kuwe: Hamba uyethengisa zonke izinto olazo unike abayanga, lapho-ke uzakuba lenotho ezulwini. Ngemva kwalokho usungabuya uzokuba ngumlandeli wami.”+ 22 Kodwa yona yadana isizwa lokhu, yahamba isizwa ubuhlungu ngoba yayilempahla enengi.+

23 UJesu wakhangela abantu wasesithi kubafundi bakhe: “Kuzakuba nzima kakhulu ukuthi abalemali bangene eMbusweni kaNkulunkulu!”+ 24 Abafundi bamangala besizwa amazwi akhe. UJesu wasesithi: “Bantwabami, kunzima kakhulu ukungena eMbusweni kaNkulunkulu! 25 Kulula ukuthi ikamela lingene esikhaleni senalithi kulokuthi umuntu onothileyo angene eMbusweni kaNkulunkulu.”+ 26 Lapho-ke bamangala kakhulu bathi kuye:* “Pho ngubani ongasindiswa?”+ 27 UJesu wabakhangela wabathi nhlo wasesithi: “Ngokubona kwabantu lokhu ngeke kwenzeke, kodwa akunjalo kuNkulunkulu, ngoba kuNkulunkulu zonke izinto ziyenzeka.”+ 28 UPhetro wasesithi kuye: “Kodwa thina sitshiye zonke izinto sakulandela.”+ 29 UJesu wathi: “Ngiqinisile ngithi kini, kakho otshiye indlu kumbe abafowabo kumbe odadewabo kumbe unina kumbe uyise kumbe abantwana kumbe amasimu ngenxa yami langenxa yezindaba ezinhle,+ 30 ongasoze athole sekuphindwe ka-100 ngalesisikhathi—izindlu, abafowabo, odadewabo, onina, abantwana lamasimu kanye lokuhlukuluzwa,+ aphinde athole lokuphila okungapheliyo esikhathini esizayo.* 31 Kodwa abanengi abokuqala bazakuba ngabokucina, abokucina babe ngabokuqala.”+

32 UJesu labafundi bakhe babesendleleni besiya* eJerusalema, uJesu ehamba phambi kwabo. Abafundi babemangele futhi abanye ababelandela basebesesaba. Waphinda futhi wabizela abaliTshumi Lambili eceleni, wabatshela izinto ezasezizakwenzakala kuye,+ wathi: 33 “Lalelani! Siya* eJerusalema njalo iNdodana yomuntu izanikelwa kubaphristi abakhokhelayo lababhali. Bazayigwebela ukufa bayinikele ebantwini bezizweni. 34 Bona bazahlekisa ngayo, bayikhafulele, bayibhaxabule futhi bayibulale kodwa ngemva kwamalanga amathathu izavuka.”+

35 Amadodana kaZebhedi,+ uJakhobe loJohane, amlanda afika athi kuye: “Mfundisi, sifuna usenzele loba kuyini esizakucela kuwe.”+ 36 Yena wathi kuwo: “Lifuna ngilenzeleni?” 37 Aphendula athi: “Sivumele ukuthi nxa ususenkazimulweni yakho,+ omunye wethu ahlale esandleni sakho sokudla, omunye kwesenxele.” 38 Kodwa uJesu wathi kuwo: “Alikwazi elikucelayo. Lingayinatha yini inkomitsho engiyinathayo loba libhabhathizwe ngobhabhathizo engibhabhathizwa ngalo?”+ 39 Athi kuye: “Ye singakwenza.” UJesu wasesithi kuwo: “Inkomitsho engiyinathayo lizayinatha, lobhabhathizo engibhabhathizwa ngalo lizabhabhathizwa ngalo.+ 40 Kodwa ukuhlala esandleni sami sokudla loba kwesenxele ayisikho kwami ukuthi selingakuphiwa yimi, ngokwalabo asebekulungiselwe.”

41 Abalitshumi bathi bekuzwa lokhu bacaphukela uJakhobe loJohane.+ 42 Kodwa uJesu wababiza wasesithi kubo: “Liyakwazi ukuthi ababusa izizwe bazenzela umathanda phezu kwazo futhi labakhokheli bazo bazigcina zingaphansi kwabo.+ 43 Akumelanga kube njalo kini. Loba ngubani ofuna ukuba mkhulu phakathi kwenu kumele abe yinceku yenu,+ 44 njalo loba ngubani ofuna ukuba ngowokuqala phakathi kwenu kufanele abe yisigqili sabo bonke, 45 ngoba leNdodana yomuntu ayilandanga ukuzosetshenzelwa kodwa yalanda ukuzosebenza+ lokunikela ngempilo yayo ibe yinhlawulo yabanengi.”+

46 Ngemva kwalokho bangena eJerikho. Wathi esephuma eJerikho elabafundi bakhe labantu abanengi, uBhathimewu (indodana kaThimewu) owayeyisiphofu esihamba sicela ebantwini wayehlezi eceleni komgwaqo.+ 47 Wathi esizwa ukuthi nguJesu umNazaretha, waqalisa ukumemeza esithi: “Ndodana kaDavida,+ Jesu, woba lesihawu kimi!”+ 48 Abanengi bathi bemuzwa bamkhuza bemtshela ukuthi athule kodwa yena waqhubeka ememeza kakhulu esithi: “Ndodana kaDavida, woba lesihawu kimi!” 49 Yikho uJesu wama wasesithi: “Mtsheleni abuye lapha.” Ngakho bayibiza indoda eyisiphofu bathi kuyo: “Ungesabi! Sukuma uyakubiza.” 50 Yalahlela phansi isembatho sayo sangaphandle, yathi lothu yaqonda kuJesu. 51 UJesu wasesithi kuyo: “Ufuna ngikwenzeleni?” Indoda eyisiphofu yathi kuye: “Rabhoni,* ngicela ungenze ngiphinde ngibone.” 52 UJesu wasesithi kuyo: “Hamba. Ukholo lwakho lukusilisile.”+ Yahle yaqalisa ukubona,+ yasihamba imlandela emgwaqweni.

11 Bathi sebeseduze leJerusalema, bafika entabeni yama-oliva lapho okwakuleBhethifage leBhethani,+ uJesu wasethuma abafundi bakhe ababili+ 2 wathi kubo: “Hambani esigabeni lesiya elisikhangeleyo, lizakuthi lingena nje kuso libone idonkana ebotshelweyo engakaze igadwe ngumuntu. Liyikhulule libuye layo lapha. 3 Nxa kungaba lomuntu olibuza ukuthi likwenzelani lokho lithi, ‘INkosi iyayifuna, izayiphendukisa masinyane nje.’” 4 Ngakho bahamba bafica idonkana ibotshelwe emnyango wendlu eyayiseceleni komgwaqo, basebeyithukulula.+ 5 Kodwa abanye ababemi khonapho bathi kubo: “Kanti lenzani lithukulula idonkana leyo?” 6 Abafundi babatshela khona kanye uJesu ayekukhulumile, basebebayekela bahamba.

7 Bayiletha kuJesu idonkana+ leyo basebebeka izembatho zabo zangaphandle phezu kwayo, yena wayigada.+ 8 Abanengi bendlala izembatho zabo zangaphandle emgwaqweni, abanye bagamula izingatsha zezihlahla eceleni komgwaqo.+ 9 Ababehamba phambili lababelandela ngemuva babelokhu bememeza besithi: “Sicela umsindise!+ Ubusisiwe lowo oza ngebizo likaJehova!*+ 10 Ubusisiwe uMbuso ozayo, okababa wethu uDavida!+ Wena ophezulu emazulwini, sicela umsindise!” 11 UJesu wangena eJerusalema waqonda ethempelini wasekhangela konke okwakulapho. Kodwa njengoba ilanga laselitshona, waphuma waya eBhethani elabaliTshumi Lambili.+

12 Bathi sebesuka eBhethani ngelanga elilandelayo, wezwa eselambile.+ 13 Esesekhatshana wabona isihlahla somkhiwa esasilamahlamvu, wasesiya kuso efuna ukuyabona ukuthi sasilezithelo yini. Kodwa wathi efika kuso wathola singelazithelo, kulamahlamvu kuphela ngoba kwakungayisiso sikhathi samakhiwane. 14 Ngakho wathi kuso: “Akungabi lomuntu ozaphinda adle isithelo kuwe futhi.”+ Abafundi bakhe babemlalele.

15 Bafika eJerusalema wasengena ethempelini waqalisa ukuxotshela phandle ababethengisa lababethenga, wagenqula amatafula alabo ababetshintsha imali kanye lamabhentshi alabo ababethengisa amajuba.+ 16 Kazange avumele muntu ukuthi aqume ethempelini ethwele loba yini. 17 Wayebafundisa njalo ebatshela esithi: “Akubhalwanga yini ukuthi, ‘Indlu yami izabizwa ngokuthi yindlu yokuthandazela yezizwe zonke’?+ Kodwa lina seliyenza ubhalu lwamasela.”+ 18 Abaphristi abakhokhelayo lababhali bakuzwa lokho, basebeqalisa ukudinga ukuthi bangambulala njani+ ngoba babemesaba. Phela bonke abantu babemangaliswa yikufundisa kwakhe.+

19 Ilanga lathi selitshona baphuma edolobheni. 20 Kodwa bathi besedlula ekuseni kakhulu babona isihlahla somkhiwa sesomile kusukela empandeni.+ 21 UPhetro wakhumbula okwakwenzakele wasesithi kuye: “Rabi khangela! Isihlahla somkhiwa osiqalekisileyo sesomile.”+ 22 UJesu waphendula wathi: “Wobani lokholo kuNkulunkulu. 23 Ngiqinisile ngithi kini, loba ngubani othi entabeni le, ‘Quphuka uyewela elwandle,’ ekutsho engathandabuzi enhliziyweni yakhe futhi elokholo lokuthi kuzakwenzakala, kuzakwenzakala sibili.+ 24 Yikho ngilitshela ukuthi zonke izinto elithandaza lizicela, kholwani ukuthi selizamukele, lingenza njalo lizazamukela.+ 25 Nxa limi lithandaza, xolelani loba ngubani kungelani lokuthi uloneleni ukuze uBaba osezulwini laye alithethelele iziphambeko zenu.”+ 26 *——

27 Baphinda babuyela eJerusalema. Wathi ehambahamba ethempelini abaphristi abakhokhelayo lababhali kanye labadala bamlanda 28 bathi kuye: “Uwathatha ngaphi amandla okwenza izinto lezi? Ngubani okuphe amandla la?”+ 29 UJesu wathi kubo: “Lami ngizalibuza umbuzo owodwa. Nxa lingangiphendula ngizalitshela ukuthi ngiwathatha ngaphi amandla okwenza izinto lezi. 30 Ubhabhathizo lukaJohane+ lwaluvela ezulwini kumbe ebantwini? Ngiphendulani.”+ 31 Ngakho baqalisa ukucebisana besithi: “Nxa singathi, ‘Lwaluvela ezulwini,’ uzakuthi, ‘Pho kungani lingamkholwanga?’ 32 Kodwa ngeke sithi, ‘Lwaluvela ebantwini’!” Babesesaba abantu ngoba bonke babekholwa ukuthi uJohane wayengumphrofethi.+ 33 Ngakho baphendula uJesu bathi: “Asikwazi.” UJesu wasesithi kubo: “Lami angisoze ngilitshele ukuthi ngiwathatha ngaphi amandla okwenza izinto lezi.”

12 Waseqalisa ukukhuluma labo esebenzisa imizekeliso, wathi: “Kulomuntu owahlanyela amagilebisi ensimini yakhe+ waseyibiya, wagebha igodi lokuvoxela amagilebisi waphinda wakha lomphotshongo.+ Waqhatshisa leyonsimu kubalimi, wasesiya elizweni elikhatshana.+ 2 Ngesikhathi sokuvuna wathuma inceku yakhe kubalimi ukuthi iyethatha ezinye izithelo ezazisensimini. 3 Kodwa bayibamba bayitshaya basebeyixotsha, yabuyela ilengise izandla. 4 Waphinda wathuma enye inceku, yona bayitshaya ekhanda njalo bayiyangisa.+ 5 Wathuma enye futhi inceku, bayibulala. Wathuma lezinye ezinengi, ezinye bazitshaya, ezinye bazibulala. 6 Kwasekusele indodana yakhe ayithandayo+ kuphela. Ekucineni wathuma yona esithi, ‘Indodana yami bazayihlonipha.’ 7 Kodwa abalimi bacebisana bathi, ‘Le yiyo indlalifa.+ Buyani siyibulale ilifa libe ngelethu.’ 8 Ngakho bayibamba bayibulala, basebeyikhiphela phandle kwensimu yamagilebisi.+ 9 Manje umnikazi wensimu uzakwenzani? Uzabuya azobabulala abalimi laba, insimu ayiphe abanye.+ 10 Kanti alikaze liwubale yini umbhalo othi: ‘Ilitshe elaliwa ngabakhi selibe lilitshe eliyisiqokoqela.*+ 11 Livela kuJehova* futhi lihle kakhulu emehlweni ethu’?”+

12 Bathi bekuzwa lokho badinga icebo lokumbamba* ngoba babekwazi ukuthi wayekhulume umzekeliso lowo ecabanga ngabo. Kodwa besaba abantu, yikho bamtshiya bahamba.+

13 Bathuma abanye abaFarisi labanye abalandeli bakaHerodi ukuze bamthiye ngamazwi akhe.+ 14 Bafika bathi kuye: “Mfundisi, siyakwazi ukuthi wena uhlala ukhuluma iqiniso lokuthi awenzi izinto uhlose ukuthabisa abantu ngoba awukhangeli ukuthi umuntu ulesikhundla bani kodwa ufundisa iqiniso ngendlela kaNkulunkulu. Kusemthethweni* yini ukubhadala umthelo* kuKhesari kumbe hatshi? 15 Kumele sibhadale yini kumbe akumelanga sibhadale?” Ebona ukuthi babezenzisa wathi kubo: “Kanti lingilingelani? Nginikani udenariyu ngibone.” 16 Bamphathela udenariyu, wasesithi kubo: “Ngumfanekiso kabani lo futhi libizo likabani elibhalwe lapha?” Bona bathi kuye: “NgokukaKhesari.” 17 UJesu wasesithi: “Buyiselani okukaKhesari kuKhesari,+ kodwa okukaNkulunkulu kuNkulunkulu.”+ Bamangala besizwa amazwi akhe.

18 Kusenjalo kwafika abaSadusi ababesithi abafileyo abasoze bavuswe,+ bambuza bathi:+ 19 “Mfundisi, uMosi wasibhalela ukuthi nxa indoda ingafa ingelamntwana itshiye umkayo, umfowabo kufanele athathe lowomfazi azalele umfowabo abantwana.+ 20 Manje kwakulamadoda ayisikhombisa ayeyizelamani. Endala yathatha umfazi kodwa yafa ingelamntwana. 21 Wasethathwa ngeyesibili kodwa layo yafa ingelamntwana, kwaba yiso leso lakweyesithathu. 22 Wonke amadoda la ayisikhombisa afa engelabantwana. Ekucineni owesifazana laye wafa. 23 Nxa sekuvuswa abafileyo owesifazana lo uzakuba ngumkabani? Phela wayeke waba yinkosikazi yabo bonke boyisikhombisa.” 24 UJesu wathi kubo: “Yikho lilahleka, aliyazi iMibhalo futhi aliwazi amandla kaNkulunkulu.+ 25 Angithi nxa sebevuswa kwabafileyo amadoda awathathi labesifazana abendi, bonke bayabe sebenjengezingilosi emazulwini.+ 26 Kodwa mayelana lokuvuswa kwabafileyo, alikaze likubale yini ebhukwini likaMosi ukuthi endabeni yesihlahla sameva uNkulunkulu wathi kuye: ‘NginguNkulunkulu ka-Abrahama loNkulunkulu ka-Isaka loNkulunkulu kaJakhobe’?+ 27 UnguNkulunkulu wabaphilayo hatshi owabafileyo. Lilahlekile sibili!”+

28 Enye indoda engumbhali eyayikhonapho futhi eyayibalalele bephikisana yezwa ukuthi wayebaphendule kuhle, yasimbuza yathi: “Yiwuphi umlayo wokuqala kuyo yonke?”*+ 29 UJesu waphendula wathi: “Owokuqala ngothi, ‘Lalela we Israyeli, uJehova* uNkulunkulu wethu nguJehova* munye. 30 Kumele uthande uJehova* uNkulunkulu wakho ngenhliziyo yakho yonke, langomphefumulo* wonke, langengqondo yonke, langamandla akho wonke.’+ 31 Owesibili ngothi, ‘Kumele uthande umakhelwane wakho ngendlela ozithanda ngayo.’+ Awukho omunye umlayo omkhulu kulale.” 32 Umbhali wathi kuye: “Ukhulume kuhle Mfundisi, okutshoyo kuliqiniso, ‘Yena munye futhi kakho omunye ngaphandle kwakhe.’+ 33 Ukumthanda ngenhliziyo yonke, langokuzwisisa konke, langamandla wonke kanye lokuthanda umakhelwane ngendlela umuntu azithanda ngayo, kuqakatheke kakhulu ukwedlula iminikelo yokutshiswa egcweleyo kanye lemihlatshelo.”+ 34 UJesu wathi esizwa lokhu wananzelela ukuthi indoda le yayiphendule ngokukhalipha, wasesithi kuyo: “Awukhatshana loMbuso kaNkulunkulu.” Ngemva kwalokho akulamuntu owaba lesibindi sokumbuza futhi.+

35 UJesu waqhubeka efundisa ethempelini esithi: “Kanti kungani ababhali besithi uKhristu uyindodana kaDavida?+ 36 Phela uDavida ngokwakhe wakhuluma ekhokhelwa ngumoya ongcwele+ wathi, ‘UJehova* wathi eNkosini yami: “Hlala esandleni sami sokudla ngize ngibeke izitha zakho ngaphansi kwenyawo zakho.”’+ 37 Nxa uDavida embiza ngokuthi Nkosi, angaba yindodana yakhe njani?”+

Abantu abanengi babemlalele bekholisa. 38 Wathi elokhu efundisa wathi: “Nanzelelani ababhali abathanda ukuhambahamba begqoke amajazi futhi befuna ukubingelelwa emakethe.+ 39 Bathanda ukuhlala ezitulweni eziphambili* emasinagogeni lokuhlala ezindaweni zabahlonitshwa nxa besemadilini antambama.+ 40 Baqila abafelokazi babathathele impahla yabo* futhi bakhuleka imithandazo emide besenzela ukubukwa. Bazakwahlulelwa kabuhlungu kulabanye.”

41 Wahlala phansi maqondana lamabhokisi eminikelo,+ wasebukela abantu bephosela imali emabhokisini la. Abantu abanengi abanothileyo babephosela imali enengi.*+ 42 Kwasekufika umfelokazi owayengumyanga waphosela okuzinhlamvu kwemali okubili okungatsho lutho.*+ 43 Yikho wabiza abafundi bakhe wathi kubo: “Ngiqinisile ngithi kini, umfelokazi lo ongumyanga unikele ukwedlula bonke abanye abafake imali emabhokisini eminikelo,+ 44 ngoba bonke bacuphe enothweni yabo kodwa yena lanxa eswela* ufake konke abelakho, konke obekumele aphile ngakho.”+

13 Ngesikhathi ephuma ethempelini omunye wabafundi bakhe wathi kuye: “Mfundisi, khangela ukuthi amatshe la lezakhiwo lezi kuhle njani!”+ 2 Kodwa uJesu wathi kuye: “Uyazibona izakhiwo lezi ezinkulu? Akusoze kusale ilitshe phezu kwelinye, wonke azadilizelwa phansi.”+

3 Wathi elokhu esahlezi entabeni yama-oliva, ithempeli likhanya laphaya, uPhetro loJakhobe loJohane lo-Andreya bambuza bebodwa bathi: 4 “Sitshele, izinto lezi zizakwenzakala nini njalo sizakuba yini isibonakaliso sesiphetho sezinto zonke lezi?”+ 5 Ngakho uJesu wabatshela wathi: “Nanzelelani kungabi lomuntu olidukisayo.+ 6 Abanengi bazakuza ngebizo lami bathi, ‘Nginguye,’ badukise abanengi. 7 Kanti njalo nxa lisizwa izimpi lemibiko yezimpi lingethuki, izinto lezi kumele zenzakale kodwa ukuphela kuyabe kungakafiki.+

8 “Isizwe sizavukela isizwe lombuso uvukele umbuso.+ Kuzakuba lokuzamazama komhlaba ezindaweni ezehlukeneyo kanye lokuswelakala kokudla.+ Lokhu yikuqala kobuhlungu obunjengemihelo yokubeletha.+

9 “Kodwa lina nanzelelani. Abantu bazalihambisa ezinkundleni zamacala+ futhi lizatshaywa emasinagogeni,+ limiswe phambi kwababusi* lamakhosi ngenxa yami ukuze kube yibufakazi kubo.+ 10 Kodwa izindaba ezinhle kumele ziqale zitshunyayelwe ezizweni zonke.+ 11 Nxa sebelithatha belisa emthethwandaba lingakhathazeki ngokuthi lizafika lithini. Khulumani loba yini elizayiphiwa ngalesosikhathi ngoba kayisini elizabe likhuluma kodwa ngumoya ongcwele.+ 12 Phezu kwalokho umuntu uzathengisa umfowabo ukuze abulawe, lobaba athengise umntanakhe futhi abantwana bazahlamukela abazali babathengise ukuze babulawe.+ 13 Lizazondwa ngabantu bonke ngenxa yebizo lami.+ Kodwa lowo oqinisela kuze kube* sekucineni+ nguye ozasindiswa.+

14 “Nxa libona amanyala abangela umonakalo+ emi lapho okungamelanga ame khona (obalayo kasebenzise ukuqedisisa), akuthi abaseJudiya baqalise ukubalekela ezintabeni.+ 15 Umuntu osephahleni lwendlu kangehli futhi kangangeni endlini yakhe esiyathatha loba yini ephakathi. 16 Umuntu osemasimini kangabuyeli emuva esiyathatha isembatho sakhe sangaphandle. 17 Maye kubomama abazithweleyo lakulabo abazabe bemunyisa ngalezonsuku!+ 18 Qhubekani lithandazela ukuthi lokhu kungenzakali ngesikhathi somqando 19 ngoba insuku lezo zizakuba zinsuku zokuhlupheka+ okungakaze kube khona kusukela uNkulunkulu wadala abantu kuze kube yilesosikhathi, njalo okungasoze kuphinde kube khona.+ 20 Ngabe uJehova* kawaphungulanga amalanga lawo akulamuntu obezasinda. Kodwa uwaphungulile ngenxa yabakhethiweyo,+ abakhethwe nguye.

21 “Nxa lingezwa loba ngubani esithi kini, ‘Khangelani! Nangu uKhristu,’ kumbe esithi, ‘Khangelani! Nanguyana,’ lingakukholwa lokho+ 22 ngoba kuzakuba laboKhristu bamanga labaphrofethi bamanga+ futhi bazakwenza izibonakaliso lezimanga ukuze baphambule abakhethiweyo nxa kungenzeka. 23 Lina qaphelani.+ Sengilitshele zonke izinto zingakenzakali.

24 “Ngalezonsuku, ngemva kokuhlupheka lokho, ilanga lizakuba mnyama lenyanga kayisoze ikhanye.+ 25 Izinkanyezi zizabe zisiwa zivela ezulwini njalo amandla asemazulwini azanyikinywa. 26 Ngemva kwalokho abantu bazabona iNdodana yomuntu+ isiza ngamayezi ilamandla amakhulu lenkazimulo.+ 27 Izathuma izingilosi iqoqe abakhethiweyo bayo emagumbini womane omhlaba,* kusukela emkhawulweni womhlaba kusiya emkhawulweni wezulu.+

28 “Khathesi fundani emzekelisweni wesihlahla somkhiwa: Nxa ugatsha lwaso oluncane seluqalisa nje ukuba buthakathaka lamahlamvu aso esehluma, lihle likwazi ukuthi ihlobo seliseduze.+ 29 Lani nxa selibona izinto lezi zisenzakala, yazini ukuthi iNdodana yomuntu iseduze, isisemnyango.+ 30 Ngiqinisile ngithi kini, loba sekutheni isizukulwane lesi asisoze sidlule zingakenzakali zonke izinto lezi.+ 31 Izulu lomhlaba kuzadlula+ kodwa amazwi ami awasoze adlule loba sekutheni.+

32 “Kakho olaziyo lelolanga kumbe lelohora, kwala zona izingilosi ezulwini ngitsho leNdodana, kodwa nguBaba olaziyo.+ 33 Hlalani lilindile futhi lihlale liphapheme+ ngoba alikwazi ukuthi isikhathi esibekiweyo sinini.+ 34 Kufanana lomuntu owasuka esiya phetsheya watshiya indlu yakhe ikhangelwe zinceku zakhe,+ yinye ngayinye wayinika umsebenzi wayo, wasetshela olinda emnyango ukuthi ahlale elindile.+ 35 Ngakho hlalani lilindile ngoba alikwazi ukuthi umnikazi wendlu ubuya nini,+ ukuthi kuzabe kuntambama yini kumbe kuphakathi kobusuku, loba emadabukakusa,* kumbe ekuseni kakhulu.+ 36 Uzafika ngesikhathi elingasicabangeliyo, ngakho hlalani lilindile ukuze angalitholi lilele.+ 37 Engikutsho kini ngikutsho kubo bonke: Hlalani lilindile.”+

14 Kwasekusele amalanga amabili+ ukuthi kufike iPhasika+ kanye loMkhosi Wesinkwa Esingelamvubelo.+ Abaphristi abakhokhelayo lababhali babedinga indlela yokumbamba* ngobuqili ukuze bambulale+ 2 ngoba babesithi: “Akumelanga sikwenze emkhosini, abantu bangavuka ngolaka kube lokuxokozela.”

3 Wathi eseBhethani esidla endlini kaSimoni owayeke waba lobulephero, kwafika owesifazana elembodlela ye-alabhasta eyayilamafutha anukelelayo, inadi yoqobo edula kakhulu. Wayivula imbodlela leyo wasethela amafutha lawo ekhanda likaJesu.+ 4 Abanye bathi bekubona lokhu bacaphuka bakhuluma bodwa besithi: “Kanti amafutha la anukelelayo adlaliselwani? 5 Phela amafutha la abengathengiswa ngemali edlula odenariyu* abangu-300, imali yakhona iphiwe abayanga!” Bamzondela kakhulu* owesifazana lo. 6 Kodwa uJesu wathi: “Myekeleni. Kanti limhluphelani? Ungenzele into enhle kakhulu.+ 7 Abayanga lihlala lilabo+ futhi lingabenzela okuhle loba nini lapho elifuna khona, kodwa mina alisoze lihlale lilami.+ 8 Wenze lokho abesenelisa ukukwenza, uthele amafutha anukelelayo emzimbeni wami ewulungiselela ukungcwatshwa kwami.+ 9 Ngiqinisile ngithi kini, loba ngaphi lapho izindaba ezinhle ezizatshunyayelwa khona emhlabeni wonke,+ kuzakhulunywa ngokwenziwe ngowesifazana lo, ahlale ekhunjulwa ngakho.”+

10 UJudasi Iskariyothi omunye wabaliTshumi Lambili, waya kubaphristi abakhokhelayo ukuze amthengise kubo.+ 11 Bathi besizwa lokho bathaba basebemthembisa ukumnika imali yesiliva.+ Ngakho waqalisa ukudinga ithuba lokumthengisa.

12 Ngelanga lokuqala loMkhosi Wesinkwa Esingelamvubelo,+ ilanga okwakujayele ukunikelwa ngalo umhlatshelo wePhasika,+ abafundi bakhe bathi kuye: “Yiphi indawo esingayayilungisa ukuze udlele khona iPhasika?”+ 13 Wasethuma abafundi bakhe ababili wathi kubo: “Ngenani edolobheni, lizahlangana lendoda ethwele imbiza yamanzi, liyilandele.+ 14 Lingafika lapho ezangena khona lithi kumnikazi wendlu, ‘UMfundisi uthi: “Ingaphi indlu yezethekeli lapho engingadlela khona iPhasika labafundi bami?”’ 15 Uzalitshengisa indlu enkulu ephezulu, elezinto esifuna ukuzisebenzisa. Lisilungiselele khonapho iPhasika.” 16 Lakanye abafundi bahamba bayangena edolobheni bathola kunjengoba nje wayetshilo, basebelungiselela iPhasika.

17 Ilanga selitshonile wafika elabaliTshumi Lambili.+ 18 Bathi behlezi etafuleni besidla, uJesu wathi: “Ngiqinisile ngithi kini, omunye wenu odla lami uzangithengisa.”+ 19 Baqala ukukhathazeka, ngamunye wabo esithi kuye: “Ayisimi angithi?” 20 Wathi kubo: “Ngomunye wabaliTshumi Lambili otsheba lami emganwini.+ 21 INdodana yomuntu izalitshiya* njengoba kubhaliwe ngayo. Kodwa maye kulowo ozathengisa iNdodana yomuntu!+ Bekungaba ngcono kuye aluba kazalwanga.”+

22 Bathi belokhu besidla, wathatha isinkwa wathandaza,* wasihlephuna wasebanika wathi: “Thathani, lokhu kumela umzimba wami.”+ 23 Wasethatha inkomitsho wabonga uNkulunkulu, wabapha, basebenatha kuyo bonke.+ 24 Wathi kubo: “Lokhu kumela ‘igazi lami+ lesivumelwano’+ elizachithwa ngenxa yabanengi.+ 25 Ngiqinisile ngithi kini, angisoze ngiphinde nginathe iwayini elenziwe ngamagilebisi, kuze kube lilanga lapho engizanatha khona iwayini elitsha eMbusweni kaNkulunkulu.” 26 Ekucineni bahlabela izingoma zokudumisa,* basebephuma baya entabeni yama-oliva.+

27 UJesu wathi kubo: “Lonke lizakhubeka ngoba kubhaliwe ukuthi: ‘Ngizatshaya umelusi+ izimvu zisabalale zigcwale indawo yonke.’+ 28 Kodwa nxa sengivusiwe ngizakuya eGalile, lizangithola khonale.”+ 29 UPhetro waphendula wathi: “Lanxa bonke abanye bengakhubeka, mina angisoze ngikhubeke.”+ 30 UJesu wasesithi kuye: “Ngiqinisile ngithi kuwe, lamuhla ebusuku iqhude lingakakhali kabili, uzabe usungiphike kathathu.”+ 31 Kodwa wayelokhu ephikelela esithi: “Lanxa sekumele ngife lawe, angisoze ngikuphike loba sekutheni.” Labanye bonke batsho njalo.+

32 Ngemva kwalokho bafika endaweni okuthiwa yiGetsemane, wasesithi kubafundi bakhe: “Hlalani lapha ngisake ngiyethandaza.”+ 33 Wathatha uPhetro loJakhobe loJohane wahamba labo.+ Waqalisa ukukhathazeka kakhulu, wadabuka enhliziyweni. 34 Wathi kubo: “Inhliziyo yami ibuhlungu kakhulu+ kuthi ngife. Salani lapha, lihlale lilindile.”*+ 35 Wasesiya phambidlana wazilahla phansi waqalisa ukuthandazela ukuthi nxa kungenzeka ihora lelo lingafiki kuye. 36 Wathi: “Abha,* Baba,+ uyenelisa ukwenza zonke izinto, susa inkomitsho le kimi. Kodwa akungenzakali okufunwa yimi, akwenzakale okufunwa nguwe.”+ 37 Wathi ephenduka wabathola belele, wasesithi kuPhetro: “Simoni ulele? Kambe uswele amandla okuthi uhlale uphapheme okwehora elilodwa nje?+ 38 Hlalani lilindile* futhi likhuleka ukuze lingangeni ekulingweni.+ Umoya uyafisa* sibili kodwa umzimba ubuthakathaka.”*+ 39 Waphinda wahamba wayathandaza futhi, esitsho into efananayo.+ 40 Kodwa wathi ephenduka okwesibili wabathola belele ngoba babephethwe yibuthongo, futhi baswela lokuthi bamphendule bathini. 41 Waphenduka okwesithathu wathi kubo: “Kambe lingalala liphumule ngesikhathi esinje? Kwanele! Ihora selifikile!+ INdodana yomuntu isinikelwa* ezandleni zezoni. 42 Sukumani sihambe. Umthengisi wami usesondele!”+

43 Masinyane nje esakhuluma kwafika uJudasi omunye wabaliTshumi Lambili, elabantu abanengi ababethwele izinkemba lezinduku. Babethunywe ngabaphristi abakhokhelayo lababhali kanye labadala.+ 44 Umthengisi wakhe wayebaphe isibonakaliso wathi: “Lowo engizamqabuza nguye, limthathe limbophe beselihamba laye limlindile.” 45 Bathi befika waqonda kuJesu wathi kuye: “Rabi!” wasemqabuza. 46 Ngakho bambamba bambopha. 47 Kodwa omunye walabo ababemi khonapho wahwatsha inkemba yakhe wagalela inceku yomphristi omkhulu, wayijuqula indlebe.+ 48 UJesu wathi kubo: “Kambe lilande ukuzongibopha lithwele izinkemba lezinduku angani ngiyisigebenga?+ 49 Bengilani nsuku zonke ethempelini ngifundisa+ kodwa alizange lingibophe. Lanxa kunjalo, lokhu kwenzakele ukuze iMibhalo igcwaliseke.”+

50 Bonke abafundi bamtshiya babaleka.+ 51 Kodwa elinye ijaha elalingagqokanga lutho ngaphandle kwesembatho esenziwe ngelineni elohlonzi laqalisa ukumlandela lihambela eduze. Bazama ukulibamba 52 kodwa lona latshiya isembatho salo selineni labaleka linqunu.*

53 Bahamba loJesu kumphristi omkhulu+ njalo bonke abaphristi abakhokhelayo labadala kanye lababhali babuthana.+ 54 Kodwa uPhetro wamlandela ehambela khatshana waze wayafika egumeni lomphristi omkhulu, wasehlala lezinceku esotha umlilo.+ 55 ISanihedrini yonke kanye labaphristi abakhokhelayo babedinga ubufakazi ukuze babulale uJesu kodwa babengabutholi.+ 56 Banengi sibili ababefakaza amanga ngaye+ kodwa ubufakazi babo babungavumelani. 57 Kwakulabanye futhi ababesukuma befakaza amanga ngaye besithi: 58 “Samuzwa esithi, ‘Ngizadiliza ithempeli leli elenziwa ngezandla, kuthi ngamalanga amathathu ngakhe elinye elingenziwanga ngezandla.’”+ 59 Lanxa babesitsho njalo, ubufakazi babo babungavumelani.

60 Umphristi omkhulu wasukuma phakathi kwabo wabuza uJesu wathi: “Kanti awuphenduli? Uthini ngalokho amadoda la akumangalela ngakho?”+ 61 Kodwa waqhubeka ethule, kazange ake aphendule.+ Umphristi omkhulu waphinda wambuza wathi: “Nguwe yini uKhristu iNdodana yoBusisiweyo?” 62 UJesu wasesithi: “Nginguye. Lizabona iNdodana yomuntu+ ihlezi esandleni sokudla+ salowo olamandla* njalo isiza ngamayezi.”+ 63 Umphristi omkhulu wathi esizwa lokhu wadabula izembatho zakhe wathi: “Sisabafunelani abanye ofakazi?+ 64 Lani lizizwele ngezenu ethuka. Manje lithini?” Bonke bathi kumele afe.+ 65 Abanye baqalisa ukumkhafulela,+ bamvala ubuso futhi bamtshaya ngenqindi besithi kuye: “Phrofetha!” Izithunywa zamtshaya ngamampama ebusweni, zasezimthatha zahamba laye.+

66 UPhetro wathi engaphansi egumeni, kwafika enye yamantombazana ayeyizincekukazi zomphristi omkhulu.+ 67 Yabona uPhetro esotha umlilo, yamkhangela yamuthi nhlo yathi: “Lawe ubuloJesu umNazaretha.” 68 Kodwa yena waphika wathi: “Angimazi ngitsho, futhi angizwisisi ukuthi ukhuluma ngani,” wasephuma phandle waya duze legedi. 69 Eselapho incekukazi leyo yambona yaqalisa futhi ukutshela ababemi khonapho isithi: “Lo ngomunye wabo.” 70 UPhetro waphinda waphika. Kwasekusithi ngemva kwesikhatshana, ababemi khonapho baphinda bathi kuye: “Loba sekuthiwani wena ungomunye wabo, phela ungumGalile.” 71 Kodwa waqalekisa njalo wafunga esithi: “Angiyazi indoda le elikhuluma ngayo!” 72 Iqhude lahle lakhala okwesibili,+ uPhetro wasekhumbula ukuthi uJesu wayethe kuye: “Iqhude lingakakhali kabili, uzabe usungiphike kathathu.”+ Wehluleka ukuzibamba, wakhala.

15 Ekuseni kakhulu abaphristi abakhokhelayo labadala kanye lababhali, iSanihedrini yonke nje, bahlangana bakhuluma basebebopha uJesu bamqhuba bamusa kuPhilathu.+ 2 UPhilathu wambuza wathi: “UyiNkosi yamaJuda yini?”+ Waphendula wathi: “Kunjengoba nje usitsho.”+ 3 Kodwa abaphristi abakhokhelayo babemmangalela ngezinto ezinengi. 4 Yikho uPhilathu waphinda wambuza wathi: “Kanti awuphenduli?+ Zwana ukuthi bakumangalela ngezinto ezinengi njani.”+ 5 Kodwa uJesu kazange aphendule futhi lokhu kwammangalisa uPhilathu.+

6 Kwakusithi kungaba lomkhosi, akhulule isibotshwa esisodwa abayabe becele ukuthi sikhululwe.+ 7 Ngalesosikhathi kwakulendoda okwakuthiwa nguBharabha eyayisejele ibotshwe labantu ababevukela mbuso. Babebulele abantu ngesikhathi bevukela. 8 Abantu beza bacela ukuthi uPhilathu abenzele lokho ayejayele ukubenzela khona. 9 Yena wabaphendula wathi: “Lifuna ngilikhululele iNkosi yamaJuda yini?”+ 10 UPhilathu wayekwazi ukuthi abaphristi abakhokhelayo babemlethe kuye ngenxa yokuthi babelomona.+ 11 Kodwa abaphristi abakhokhelayo batshotshozela abantu ukuthi bamcele akhulule uBharabha kulokuthi akhulule uJesu.+ 12 UPhilathu wasesithi: “Manje lithi ngenzeni ngalo elimbiza ngokuthi yiNkosi yamaJuda?”+ 13 Baphinda bamemeza besithi: “Kabethelwe esigodweni!”+ 14 Kodwa uPhilathu waqhubeka wathi kubo: “Ngenxa yani? Kuyini okubi akwenzileyo?” Lanxa kunjalo bamemeza kakhulu besithi: “Kabethelwe esigodweni!”+ 15 Ngakho uPhilathu wakhulula uBharabha efuna ukuthabisa abantu, wasesithi uJesu abhaxabulwe.+ Ngemva kwalokho wathi kathathwe ayebulawa ngokubethelwa esigodweni.+

16 Amasotsha ahamba laye egumeni esigodlweni sombusi,* abuthanisa lonke ibutho ndawonye.+ 17 Amgqokisa isembatho esilombala oyibubende,* eluka lomqhele wameva awufaka ekhanda lakhe 18 asememeza esithi kuye: “Sabona wena* Nkosi yamaJuda!”+ 19 Ayemtshaya ngomhlanga ekhanda futhi emkhafulela. Aphinda aguqa phambi kwakhe amkhothamela. 20 Athi esemenze inhlekisa, amkhipha isembatho esiyibubende asemgqokisa izembatho zakhe zangaphandle, aphuma laye emqhuba esiyambethela esigodweni.+ 21 Abamba ngenkani uSimoni waseKhurene, uyise ka-Alekizanda loRufusi owayezidlulela evela emaphandleni, amthwalisa isigodo sikaJesu sokuhlutshwa.*+

22 Afika loJesu endaweni okuthiwa yi-Goligotha, okutsho ukuthi, “Indawo yokhakhayi.”+ 23 Eselapho azama ukumupha iwayini elalihlanganiswe lesidakamizwa okuthiwa yimure,+ kodwa wala ukulinatha. 24 Ambethela esigodweni, abelana izembatho zakhe zangaphandle ngenkatho ukuze abone ukuthi ngamunye wabo wayezathathani.+ 25 Ambethela esigodweni ngehora lesithathu.* 26 Kwakubhalwe amazwi ayetshengisa lokho ayemangalelwa ngakho. Kwakubhalwe ukuthi: “INkosi YamaJuda.”+ 27 Kwakulezigebenga ezimbili ezazibethelwe ezigodweni ezazimphahlile, esinye sikwesokudla, esinye kwesenxele.+ 28 *—— 29 Abantu ababedlula lapho babemthethisa benikina amakhanda+ besithi: “Ehe! Wena owawusithi uzadiliza ithempeli ulakhe ngensuku ezintathu,+ 30 zisindise phela, wehle esigodweni sokuhlutshwa.”* 31 Labaphristi abakhokhelayo kanye lababhali babekhuluma ngaye bemchothoza besithi: “Abanye wabasindisa kodwa yena kenelisi ukuzisindisa!+ 32 Kehle phela uKhristu iNkosi ka-Israyeli esigodweni sokuhlutshwa* ukuze sibone futhi sikholwe.”+ Izigebenga ezimbili ezazimphahlile lazo zazimthethisa.+

33 Ngehora lesithupha* kwaba mnyama yonke indawo kwaze kwaba lihora lesi-9.*+ 34 Ngehora lesi-9 uJesu wamemeza ngelizwi elikhulu wathi: “Eli, Eli, lama sabakthani?” okutsho ukuthi: “Nkulunkulu wami, Nkulunkulu wami, ungitshiyeleni?”+ 35 Abanye ababemi eduzane bathi besizwa lokho bathi: “Zwanini! Ubiza u-Elija.” 36 Omunye wabo wagxamuza isipontshi phakathi kwewayini elimunyu wasihloma emhlangeni, wamnika ukuthi anathe,+ esithi: “Myekeleni enjalo! Wothini sibone ukuthi u-Elija uzabuya yini azomethula.” 37 Kodwa uJesu wamemeza ngelizwi elikhulu wasephela.+ 38 Ikhetheni lendawo engcwele*+ ladabuka kusukela phezulu kusiyafika phansi laba zingxenye ezimbili.+ 39 Umkhokheli webutho owayemi khonapho emkhangele wathi esebone lokho okwakwenzakele ngesikhathi uJesu ephela wathi: “Indoda le ibiyiNdodana kaNkulunkulu sibili.”+

40 Kwakulabesifazana ababemele khatshana bebukele. Phakathi kwabo kwakuloMariya Magadalena, loSalome kanye loMariya unina kaJose loJakhobe omncane.+ 41 Babejayele ukuhamba laye bemncedisa+ ngesikhathi eseGalile futhi kwakulabanye abesifazana abanengi ababebuye laye eJerusalema.

42 Kwasekusemini yantambama njalo kuliLanga Lokulungiselela, okutsho ukuthi ilanga elilandelayo kwakuzabe kuliSabatha. 43 Ngakho uJosefa wase-Arimathiya, owayelilunga elihlonitshwayo loMthethwandaba Omkhulu wamaJuda njalo owayelindele uMbuso kaNkulunkulu, waqunga isibindi waya kuPhilathu wafika wacela isidumbu sikaJesu.+ 44 Kodwa uPhilathu wazibuza ukuthi uJesu wayesefile yini, wasebiza umkhokheli webutho wambuza. 45 Umkhokheli webutho wathi esemtshelile ukuthi wayesefile, uPhilathu wanika uJosefa isidumbu. 46 UJosefa wathenga ilineni elilohlonzi, wamethula wasemgoqela ngalo wambeka ethuneni+ elaligujwe edwaleni. Ngemva kwalokho wagiqela ilitshe entubeni yethuna.+ 47 Kodwa uMariya Magadalena loMariya unina kaJose baqhubeka bekhangele lapho ayebekwe khona.+

16 ISabatha+ lathi selidlulile, uMariya Magadalena loSalome kanye loMariya+ unina kaJakhobe bathenga amakha ukuze bayegcoba isidumbu sikaJesu.+ 2 Kwasekusithi ngelanga lokuqala leviki baya ethuneni ekuseni kakhulu, bafika ilanga lisanda kuphuma.+ 3 Babuzana bathi: “Manje ngubani ozasigiqela ilitshe alisuse entubeni yethuna?” 4 Kodwa bathi bekhangela, babona ukuthi ilitshe laselisusiwe lanxa lalilikhulu kakhulu.+ 5 Bangena ethuneni, bethuka bebona kulejaha elihlezi kwesokudla ligqoke ijazi elimhlophe. 6 Lathi kubo: “Lingethuki.+ Angithi lidinga uJesu umNazaretha obulewe ngokubethelwa esigodweni? Uvusiwe,+ kakho lapha. Khangelani bebembeke lapha.+ 7 Lina hambani liyetshela abafundi bakhe kanye loPhetro lithi, ‘Uzakuya eGalile. Lizamthola khonale+ njengoba walitshela.’”+ 8 Ngakho baphuma ethuneni babaleka. Babeqhuqha, bemangele bengelalankani. Abazange batshele muntu ngenxa yokuthi babesesaba.*+