IVANGELI ELABHALWA NGULUKHA
1 Banengi asebezame ukuqoqa lokubhala izindaba ezimayelana lazo zonke izinto esizikholwayo,+ 2 njalo labanye abazibonela ngawabo+ izinto lezi futhi abatshumayela ilizwi+ leli basilandisela ngazo. 3 Ngakho lami ngithe ngikubhalele izindaba lezo mhlonitshwa Thiyofilu,+ ngizibeke ngokulandelana kwazo njengoba ngizihlolisise kusukela ekuqaliseni ngathola okuqondileyo 4 ukuze ukwazi mhlophe ukuthi izinto owazifundiswayo* ziliqiniso sibili.+
5 Ngensuku zikaHerodi*+ inkosi yeJudiya, kwakulomphristi okwakuthiwa nguZakhariya. Wayengoweqembu lika-Abhija+ futhi inkosikazi yakhe yayingeyosendo luka-Aroni, ibizo layo kungu-Elizabethi. 6 Bobabili babelungile kuNkulunkulu, beyilandela yonke imilayo kaJehova* lemithetho yakhe njalo bephila impilo engelasici. 7 Kodwa babengelamntwana ngoba u-Elizabethi wayeyinyumba futhi basebebadala.
8 Ngelinye ilanga uZakhariya wayesenza umsebenzi wobuphristi phambi kukaNkulunkulu njengoba kwasekulithuba leqembu ayekulo.+ 9 Ngokomkhuba wabaphristi, kwasekulithuba lakhe lokungena endaweni engcwele kaJehova*+ atshise impepha.+ 10 Phandle kwakulabantu abanengi ababekhuleka njengoba kwakulihora lokutshisa impepha. 11 UZakhariya wabona ingilosi kaJehova* imi ngakwesokudla kwe-alithare lokutshisela impepha. 12 Kwamkhathaza lokho ayekubona, wesaba kakhulu. 13 Kodwa ingilosi yathi kuye: “Ungesabi Zakhariya ngoba umthandazo wakho wokuncenga uzwakele futhi umkakho u-Elizabethi uzakuzalela indodana. Kumele uyinike ibizo elithi Johane.+ 14 Wena uzathokoza kakhulu, inhliziyo yakho ichelese. Ukuzalwa kwayo kuzajabulisa abanengi+ 15 ngoba izakuba ngumuntu oqakathekileyo phambi kukaJehova.*+ Kodwa akufanelanga inathe iwayini kumbe utshwala loba sekutheni.+ UNkulunkulu uzayinika umoya ongcwele kusukela isesesiswini sikanina+ 16 futhi izakwenza ukuthi amadodana ako-Israyeli amanengi aphenduke kuJehova* uNkulunkulu wawo.+ 17 Izahamba phambi kukaNkulunkulu ilomoya kanye lamandla ka-Elija,+ yenze ukuthi izinhliziyo zabobaba ziphenduke zibe njengezabantwana+ lokuthi abangalaleliyo baphenduke futhi bahlakaniphe njengabantu abalungileyo. Lokhu iyabe ikwenzela ukuthi abantu balungele ukukhonza uJehova.”*+
18 UZakhariya wathi engilosini: “Kambe kungenzakala khonokho? Phela sengiluphele, lomkami usegugile.” 19 Ingilosi yamphendula yathi: “NginguGabriyeli,+ ngima phambi kukaNkulunkulu.+ Ngithunywe ukuthi ngizokhuluma lawe ngikutshele izindaba lezi ezinhle. 20 Lalela. Uzahlala uthule usehluleka ukukhuluma kuze kube lilanga izinto lezi ezizakwenzakala ngalo ngoba awuwakholwanga amazwi ami azagcwaliseka ngesikhathi esibekiweyo.” 21 Phandle abantu babelokhu belindele uZakhariya sebemangele ukuthi kungani wayesethe nya endaweni engcwele. 22 Uthe ephuma wayengasenelisi ukukhuluma, basebenanzelela ukuthi wayebone isimanga* endaweni engcwele. Wayelokhu ekhuluma labo ngezandla ngoba wayeseyisimungulu. 23 Amalanga akhe okwenza umsebenzi ongcwele athi esephelile, wabuyela emzini wakhe.
24 Ngemva kwesikhathi inkosikazi yakhe u-Elizabethi yazithwala. Kayizange iphume endlini okwenyanga ezinhlanu ngoba yayisithi: 25 “Lokhu yikho uJehova* asengenzele khona. Ungikhumbulile wasusa ihlazo ebengilalo ebantwini.”+
26 Ngenyanga yesithupha u-Elizabethi ezithwele, uNkulunkulu wathuma ingilosi uGabriyeli+ edolobheni leGalile okuthiwa yiNazaretha. 27 Wathi iye entombini egcweleyo+ eyayisithembise ukutshada lendoda okuthiwa nguJosefa eyosendo lukaDavida. Intombi leyo kwakuthiwa nguMariya.+ 28 Ingilosi yathi ingena yathi kuye: “Sabona wena obusiswe kakhulu, uJehova* ulawe.” 29 Kodwa amazwi ayo amhlupha kakhulu, wazama ukuzwisisa ukuthi ukubingelela lokho kwakungabe kusitshoni. 30 Ingilosi yathi kuye: “Ungesabi Mariya ngoba uNkulunkulu uyathokoza ngawe. 31 Uzazithwala ubelethe indodana.+ Kumele uyinike ibizo elithi Jesu.+ 32 Izakuba ngumuntu oqakathekileyo+ futhi izabizwa ngokuthi yiNdodana yoPhezukonke.+ UJehova* uNkulunkulu uzayipha isihlalo sobukhosi sikayise uDavida.+ 33 Izakuba yiNkosi endlini kaJakhobe kuze kube nini lanini njalo uMbuso wayo awusoze uphele.”+
34 Kodwa uMariya wathi engilosini: “Kuzakwenzakala njani lokho njengoba ngingakaze ngilale lendoda?” + 35 Ingilosi yamphendula yathi: “Umoya ongcwele uzakwehlela phezu kwakho,+ amandla oPhezukonke akugubuzele. Yikho umntwana ozazalwa uzabizwa ngokuthi ungcwele+ lokuthi uyiNdodana kaNkulunkulu.+ 36 U-Elizabethi isihlobo sakho laye uzithwele umntwana ongumfana lanxa esegugile. Le sekuyinyanga yakhe yesithupha, loba nje bekuthiwa uyinyumba. 37 Phela akulanto uNkulunkulu ayitshoyo engamehlula ukuyenza.”+ 38 UMariya wathi: “Ngiyincekukazi kaJehova!* Akwenzakale kimi njengoba nje utshilo.” Ingilosi yasisuka yahamba.
39 Ngemva kwalokho uMariya wasuka waya edolobheni lakoJuda elalisezintabeni. 40 Wafika wangena emzini kaZakhariya wabingelela u-Elizabethi. 41 U-Elizabethi uthe esizwa uMariya embingelela, usane olwalusesiswini sakhe lwakhabakhaba. U-Elizabethi wagcwala umoya ongcwele 42 wamemeza kakhulu wathi: “Ubusisiwe wena phakathi kwabesifazana futhi ubusisiwe umntwana ozamzala!* 43 Kwenzakale njani ukuthi ngithole isibusiso sokuvakatshelwa ngunina weNkosi yami? 44 Ngithe ngisizwa ungibingelela, usane olusesiswini sami lwathaba lwakhabakhaba. 45 Uyajabula lowo okholiweyo ngoba zizagcwaliseka zonke izinto uJehova* amthembise zona.”
46 UMariya wathi: “Umphefumulo* wami umemezela ubukhulu bukaJehova,*+ 47 lomoya wami uyathokoza kakhulu ngoNkulunkulu uMsindisi wami+ 48 ngenxa yokuthi uyikhumbulile incekukazi yakhe engasimuntu walutho.+ Kusukela khathesi zonke izizukulwane zizakuthi ngiyathokoza+ 49 ngoba uNkulunkulu olamandla ungenzele izinto ezinkulu. Ibizo lakhe lingcwele+ 50 futhi isihawu sakhe siphezu kwalabo abamesabayo+ kusukela kwesinye isizukulwane kusiya kwesinye. 51 Konke ukwenze ngengalo yakhe elamandla, wenza abalenhliziyo ezizigqajayo basabalala.+ 52 Wehlise amadoda alamandla ezihlalweni zobukhosi,+ waphakamisa abantukazana.+ 53 Usuthise abalambileyo* ngokubapha izinto ezinhle+ kodwa abanothileyo ubenze bahamba bephethe umoya. 54 Uyincedile inceku yakhe u-Israyeli, ekhumbula ukuthi wayethembise ukuthi uzakuba lesihawu+ 55 ku-Abrahama lezizukulwane zakhe+ kuze kube nini lanini, njengoba nje wayetshilo kubokhokho bethu.” 56 UMariya wahlala lo-Elizabethi okwenyanga ezingaba zintathu wasebuyela ngakibo.
57 Isikhathi sika-Elizabethi sokubeletha sathi sesifikile wabeletha umntwana ongumfana. 58 Izihlobo zakhe labomakhelwane bezwa ukuthi uJehova* wayemenzele isihawu esikhulu, bathokoza laye.+ 59 Ngelanga lesi-8 babuya bezosoka umntwana+ futhi babefuna ukumnika ibizo likayise elithi Zakhariya. 60 Kodwa unina wathi: “Hatshi! Uzabizwa ngokuthi nguJohane.” 61 Bekuzwa lokhu bathi kuye: “Kakho loyedwa ezihlotsheni zakho obizwa ngebizo lelo.” 62 Basebekhuluma ngezandla bebuza uyise womntwana ukuthi ufuna athiwe ngubani. 63 Uyise wacela ipulanka lokubhalela wasebhala ukuthi: “Ibizo lakhe nguJohane.”+ Bonke bamangala. 64 Khonokho nje umlomo wakhe wavuleka lolimi lwakhe lwatshwaphuluka, waseqalisa ukukhuluma+ edumisa uNkulunkulu. 65 Abantu bonke ababehlala kuleyondawo bamangala basala bengelankani. Indaba le kwakhulunywa ngayo kuso sonke isabelo seJudiya. 66 Bonke abakuzwayo lokho bakugcina ezinhliziyweni zabo besithi: “Umntwana lo uzakuba yini?” Phela uJehova* wayelaye.
67 Kusenjalo uyise uZakhariya wagcwala umoya ongcwele waphrofetha wathi: 68 “Kadunyiswe uJehova* uNkulunkulu ka-Israyeli+ ngoba ubakhumbulile abantu bakhe wabakhulula.+ 69 Usesivusele uphondo lwensindiso*+ endlini kaDavida inceku yakhe,+ 70 njengoba wakhuluma kusukela kudala esebenzisa abaphrofethi bakhe abangcwele.+ 71 Wathi uzasisindisa ezandleni zezitha zethu lakubo bonke abasizondayo,+ 72 asenzele isihawu ayesithembise okhokho bethu futhi akhumbule isivumelwano sakhe esingcwele,+ 73 isifungo asenza kukhokho wethu u-Abrahama.+ 74 Wathembisa ukuthi ngemva kokusikhulula ezandleni zezitha zethu uzasibusisa ngokusivumela ukuthi simenzele inkonzo engcwele singesabi, 75 ukuze sibe qotho njalo sibe ngabalungileyo phambi kwakhe okwempilo yonke. 76 Kodwa wena mntanami uzabizwa ngokuthi ungumphrofethi woPhezukonke ngoba uzahamba phambi kukaJehova* ulungise izindlela zakhe,+ 77 wenze labantu bakhe bazi ukuthi yena uzabasindisa ngokubathethelela izono zabo+ 78 ngenxa yokuthi yena unguNkulunkulu olozwelo olukhulu. Uzwelo lolu oluvela ezulwini luzakhazimula phezu kwethu njengelanga liphuma 79 ukuze kukhanyiselwe abahlezi emnyameni lasethunzini lokufa,+ lenyawo zethu zikhokhelwe endleleni yokuthula.”
80 Umntwana wakhula, umoya kaNkulunkulu wamenza waqina.* Waqhubeka esenkangala kwaze kwaba lilanga aphuma ngalo wabonakala ebantwini bako-Israyeli.
2 Ngalezonsuku uKhesari Agastu wabeka umlayo wokuthi wonke umuntu embusweni* ayebhalisa ibizo lakhe. 2 (Lokhu kwakuyikubhalisa kokuqala ngesikhathi uKhwirinu engumbusi* weSiriya.) 3 Abantu bonke bahamba bayabhalisa, lowo lalowo edolobheni lakibo. 4 Ngakho uJosefa+ laye wasuka edolobheni leNazaretha eliseGalile waya eJudiya edolobheni likaDavida elibizwa ngokuthi yiBhethilehema,+ ngoba wayengowendlu kaDavida futhi engowosendo lwakhe. 5 Wahamba wayabhalisa elomkakhe uMariya ayesetshade laye njengokuthembisana kwabo.+ UMariya wayesezabeletha.+ 6 Sebekhonale isikhathi sakhe sokubeletha safika, 7 wasebeletha indodana yakhe elizibulo,+ wayigoqela ngamalembu wayibeka emkolweni odlela izifuyo+ ngoba babeswele indawo ezindlini zezihambi.
8 Endaweni leyo kwakulabelusi ababehlala emlageni belinde imihlambi yabo ebusuku. 9 Besalibele kwabonakala ingilosi kaJehova* yama phambi kwabo lenkazimulo kaJehova* yakhanya lapho ababekhona, besaba kakhulu. 10 Kodwa ingilosi yathi kubo: “Lingesabi. Lalelani! Ngimemezela izindaba ezinhle zentokozo enkulu abantu bonke abazakuba layo. 11 Lamuhla edolobheni likaDavida+ lizalelwe umsindisi+ onguKhristu iNkosi.+ 12 Nanku elizambona ngakho: Lizabona usane lugoqelwe ngamalembu, lulaliswe emkolweni odlela izifuyo.” 13 Khonokho nje ingilosi le yabonakala isilebutho lasezulwini elikhulu+ lidumisa uNkulunkulu lisithi: 14 “Kakhazinyuliswe uNkulunkulu osezulwini, labantu abasemhlabeni abamukelwa nguye kababe lokuthula.”
15 Izingilosi zathi sezibuyele ezulwini, abelusi bakhuluma bodwa besithi: “Asiyeni eBhethilehema khathesi, siyebona lokho osekwenzakele esikutshelwe nguJehova.”* 16 Bahle basuka bahamba, bafica uMariya loJosefa kanye losane lulaliswe emkolweni odlela izifuyo. 17 Abelusi bathi bebona lokhu, balandisa izinto ababezitsheliwe ngomntwana. 18 Bonke abakuzwayo okwakhulunywa ngabelusi bamangala, 19 kodwa uMariya wawalondoloza wonke amazwi la, wacabangisisa ngawo.+ 20 Ngemva kwalokho abelusi babuyela bekhazimulisa uNkulunkulu futhi bemdumisa ngakho konke ababekubonile lababekuzwile. Lokho ababekutsheliwe yikho kanye abakutholayo.
21 Ngelanga lesi-8 okwakulilanga lokuthi asokwe,+ waphiwa ibizo elithi Jesu, lelo ayeliphiwe yingilosi unina engakazithwali.+
22 Kwathi sekufike isikhathi sokuthi bayehlanjululwa njengoba kutshiwo eMthethweni kaMosi,+ bamletha eJerusalema ukuze bamethule kuJehova,* 23 njengoba nje kubhaliwe eMthethweni kaJehova* ukuthi: “Wonke owesilisa olizibulo kumele abizwe ngokuthi ungcwele kuJehova.”*+ 24 Banikela ngomhlatshelo belandela uMthetho kaJehova* othi: “Kumele unikele ngamajuba amabili kumbe ngabantwana benkwilimba ababili.”+
25 EJerusalema kwakulendoda okwakuthiwa nguSimiyoni eyayilungile njalo izinikele kuNkulunkulu. Yayimelele ukududuzwa kwabako-Israyeli+ futhi umoya ongcwele wawuphezu kwayo. 26 UNkulunkulu wayekuvezile kuyo ngomoya ongcwele ukuthi yayingasoze ife ingakamboni uKhristu kaJehova.* 27 Yakhokhelwa ngumoya ongcwele yangena ethempelini. Abazali bakaJesu bathi bemletha lapho bezokwenza lokho okutshiwo nguMthetho,+ 28 indoda le yamphatha uJesu owayeseselusane yadumisa uNkulunkulu isithi: 29 “Khathesi-ke Nkosi Enkulu, usuyivumele inceku yakho ukuthi ihambe ngokuthula+ njengoba wawuthembisile, 30 ngoba amehlo ami aseyibonile indlela ozayisebenzisa ukuthi usindise abantu,+ 31 oyilungise izizwe zonke zikhangele,+ 32 njalo eyinkazimulo yabantu bakho bako-Israyeli kanye lokukhanya+ okususa iveyili eyembese amehlo ezizwe.”+ 33 Uyise womntwana kanye lonina bamangala besizwa izinto ezazikhulunywa ngomntanabo. 34 USimiyoni wababusisa wasesithi kuMariya unina womntwana: “Abanengi ko-Israyeli bazakuwa ngenxa yomntwana lo,+ labanye abanengi bazavuka.+ Uzakuba yisibonakaliso abazakhuluma kubi ngaso+ 35 ukuze imicabango yabantu abanengi ivezwe egcekeni. Kodwa wena uzagwazwa yinkemba ende.”+
36 Kwakulomunye umphrofethikazi okwakuthiwa ngu-Ana, owayeyindodakazi kaFanuweli owesizwana sako-Asheri. Owesifazana lo wayeseluphele futhi wayehlale lomkakhe okweminyaka eyisikhombisa ngemva kokutshada kwabo.* 37 Wayengumfelokazi njalo wayeseleminyaka engu-84. Wayehlala ekhona ethempelini, esenza inkonzo engcwele ubusuku lemini, ezila futhi esenza lemithandazo yokuncenga. 38 Ngalesosikhathi wasondela waqalisa ukubonga uNkulunkulu ekhuluma ngomntwana lo kubo bonke ababelindele ukukhululwa kweJerusalema.+
39 UJosefa loMariya bathi sebezenzile zonke izinto belandela okuseMthethweni kaJehova*+ babuyela eGalile, edolobheni lakibo iNazaretha.+ 40 Umntwana waqhubeka ekhula futhi eqina, egcwala ukuhlakanipha. Umusa kaNkulunkulu waqhubeka uphezu kwakhe.+
41 Abazali bakhe babejayele ukuya eJerusalema minyaka yonke belanda umkhosi wePhasika.+ 42 Eseleminyaka engu-12 bahamba emkhosini lo njengenjayelo.+ 43 Amalanga omkhosi athe esedlulile babuyela, kodwa uJesu yena wasala eJerusalema abazali bakhe bengananzeleli. 44 Bahamba okwelanga lonke becabanga ukuthi wayeseqenjini ababehamba lalo. Ngakho baqalisa ukumdinga ezihlotsheni zabo lakulabo ababesazana labo. 45 Sebemswele babuyela eJerusalema bamdinga yonke indawo, 46 baze bamthola ethempelini ngemva kwamalanga amathathu. Wayehlezi phakathi kwabafundisi, ebalalele futhi ebabuza imibuzo. 47 Bonke ababemlalele babelokhu bemangaliswa yikuzwisisa kwakhe lezimpendulo zakhe.+ 48 Abazali bakhe bathi bembona bamangala. Unina wathi kuye: “Mntanami, kambe usenzani? Mina loyihlo besesikhathazekile ngawe, akulamuhla sikudinga.” 49 Kodwa yena wabaphendula wathi: “Belingidingelani? Belingazi yini ukuthi kumele ngibe sendlini kaBaba?”+ 50 Lanxa kunjalo abazange bakuzwisise ayekutsho.
51 Wabuyela labo eNazaretha waqhubeka ezehlisa kubo.*+ Unina wawagcina enhliziyweni wonke amazwi la.+ 52 UJesu wayelokhu ekhula, eqhubeka ehlakanipha futhi esamukelwa nguNkulunkulu labantu.
3 Ngomnyaka wesi-15 wokubusa kukaThibheriyu Khesari, ngesikhathi uPhontiyu Philathu engumbusi* weJudiya, uHerodi*+ engumbusi wesabelo* seGalile, lomfowabo uFiliphu engumbusi wesabelo se-Ithuriya leseTrakhonithi, uLisaniya yena engumbusi wesabelo se-Abhilene, 2 ngensuku zabaphristi abakhokhelayo u-Anasi loKhayifasi,+ ilizwi likaNkulunkulu lafika enkangala+ kuJohane+ indodana kaZakhariya.
3 Ngakho wahamba umango wonke weJodani etshumayela esithi abantu babhabhathizwe betshengisa ukuthi sebephendukile ukuze bathethelelwe izono,+ 4 njengoba nje kubhaliwe ebhukwini elilamazwi omphrofethi u-Isaya ukuthi: “Ilizwi lalowo omemeza esenkangala lithi: ‘Lungisani indlela kaJehova!* Yenzani imigwaqo yakhe iqonde.+ 5 Izigodi zonke kumele zigcwaliswe, kudilizwe zonke izintaba kanye lamaqaqa. Izindlela ezimazombezombe kumele ziqonde lezimibundubundu zibe zinhle. 6 Bonke abantu bazayibona insindiso kaNkulunkulu.’”*+
7 Wakhuluma lamaxuku ayesiza kuye ezobhabhathizwa wathi: “Lina bantwana bamabululu, ngubani olixwayisileyo ukuthi libalekele intukuthelo ezayo?+ 8 Thelani izithelo ezitshengisa ukuthi seliphendukile. Lingaqali ukuziyenga lisithi, ‘Ubaba wethu ngu-Abrahama,’ ngoba ngilitshela ukuthi uNkulunkulu angenza ukuthi amatshe la abe ngabantwana baka-Abrahama. 9 Ihloka selibekiwe empandeni zesihlahla. Loba yisiphi isihlahla esingatheli izithelo ezinhle sizaganyulwa siphoselwe emlilweni.”+
10 Abantu abanengi babembuza besithi: “Manje kumele senzeni?” 11 Yena wayebaphendula athi: “Umuntu olezembatho ezimbili kathathe esisodwa aphe ongelaso, lalowo olokudla kaphe ongelakho.”+ 12 Labathelisi bamlanda bezobhabhathizwa+ bathi kuye: “Mfundisi, thina kumele senzeni?” 13 Wabaphendula wathi: “Lingabhadalisi abantu umthelo owedlula lowo okumele bawubhadale.”+ 14 Amasotsha lawo ayembuza esithi: “Kumele senzeni?” Yena athi kuwo: “Lingahlukuluzi muntu* futhi lingethesi muntu icala angalenzanga,+ kodwa suthisekani ngelikuholayo.”
15 Njengoba abantu babelindele uKhristu, bonke babelokhu bezibuza ngoJohane besithi: “Kambe kungabe kunguye yini uKhristu?”+ 16 UJohane wathi kubo: “Mina ngilibhabhathiza ngamanzi kodwa olamandla kulami uyeza njalo akungifanelanga ukuthukulula intambo zamanyathela akhe.+ Yena uzalibhabhathiza ngomoya ongcwele langomlilo.+ 17 Ifotsholo yakhe yokwela isesandleni sakhe. Uzayenza ihlanzeke ngokupheleleyo indawo abhulela kuyo, abuthe ingqoloyi ayifake esiphaleni sakhe kodwa amakhoba awatshise ngomlilo ongacitshekiyo.”
18 Waphinda wabakhuthaza ngezindlela ezinengi, waqhubeka etshumayela izindaba ezinhle ebantwini. 19 UHerodi umbusi wesabelo wathi esekhuzwe nguJohane ngoHerodiya inkosikazi yomfowabo langazo zonke izinto ezimbi ayezenzile, 20 waphinda wenza enye into embi, wavalela uJohane ejele.+
21 Abantu bonke sebebhabhathiziwe, uJesu laye wabhabhathizwa.+ Wathi esathandaza izulu lavuleka,+ 22 umoya ongcwele wehlela phezu kwakhe unjengejuba, kwezwakala ilizwi livela ezulwini lisithi: “Wena uyiNdodana yami engiyithandayo, ngiyakwamukela.”+
23 UJesu+ wathi eqalisa umsebenzi wakhe wayeleminyaka engaba ngu-30.+ Abantu babesithi
uyindodana kaJosefa,+
indodana kaHeli,
24 indodana kaMathathi,
indodana kaLevi,
indodana kaMelikhi,
indodana kaJanayi,
indodana kaJosefa,
25 indodana kaMathathiya,
indodana ka-Amosi,
indodana kaNahume,
indodana ka-Esili,
indodana kaNagayi,
26 indodana kaMahathi,
indodana kaMathathiya,
indodana kaSemeyini,
indodana kaJosekhi,
indodana kaJoda,
27 indodana kaJohanani,
indodana kaResa,
indodana kaZerubhabheli,+
indodana kaSheyalithiyeli,+
indodana kaNeri,
28 indodana kaMelikhi,
indodana ka-Adi,
indodana kaKhosamu,
indodana ka-Elimadami,
indodana ka-Eri,
29 indodana kaJesu,
indodana ka-Eliyezeri,
indodana kaJorimu,
indodana kaMathathi,
indodana kaLevi,
30 indodana kaSimiyoni,
indodana kaJudasi,
indodana kaJosefa,
indodana kaJonami,
indodana ka-Eliyakhimu,
31 indodana kaMeleya,
indodana kaMena,
indodana kaMathatha,
indodana kaNathani,+
indodana kaDavida,+
indodana ka-Obhedi,+
indodana kaBhowazi,+
indodana kaSalimoni,+
indodana kaNashoni,+
33 indodana ka-Aminadabi,
indodana ka-Ani,
indodana kaHezironi,
indodana kaPherezi,+
indodana kaJuda,+
indodana ka-Isaka,+
indodana ka-Abrahama,+
indodana kaThera,+
indodana kaNahori,+
indodana kaRewu,+
indodana kaPhelegi+
indodana ka-Ebheri,+
indodana kaShela,+
36 indodana kaKhayinani,
indodana ka-Aphakhishadi,+
indodana kaShemu,+
indodana kaNowa,+
indodana kaLamekhi,+
indodana ka-Inokhi,
indodana kaJaredi,+
indodana kaMahalaleli,+
indodana kaKhayinani,+
indodana kaSethi,+
indodana ka-Adamu,+
indodana kaNkulunkulu.
4 UJesu wasuka eJodani waya enkangala.+ Wayegcwele umoya ongcwele futhi wawumkhokhela ngesikhathi elapho 2 okwamalanga angu-40 elingwa nguDeveli.+ Wayengadli lutho ngensuku lezo, yikho zathi ziphela wayeselambile. 3 UDeveli wathi ekubona lokhu wathi kuye: “Nxa uyindodana kaNkulunkulu, tshela ilitshe leli ukuthi libe yisinkwa.” 4 Kodwa uJesu wamphendula wathi: “Kubhaliwe ukuthi, ‘Umuntu akumelanga aphile ngesinkwa sodwa.’”+
5 Ngakho uDeveli wamthatha wamusa endaweni ephakemeyo, wamtshengisa yonke imibuso yomhlaba ngesikhatshana nje+ 6 wasesithi kuye: “Ngizakupha amandla phezu kwayo yonke imibuso le kanye lenkazimulo yayo ngoba ngeyami,+ futhi ngiyinika loba ngubani engifuna ukumnika yona. 7 Yikho nxa ungaguqa phansi ungikhonze kanye nje kuphela, yonke izakuba ngeyakho.” 8 UJesu waphendula wathi: “Kubhaliwe ukuthi, ‘NguJehova* uNkulunkulu wakho okumele umkhonze njalo nguye yedwa okumele umenzele inkonzo engcwele.’”+
9 Ngemva kwalokho wamusa eJerusalema wafika wammisa esiqongweni sethempeli wasesithi kuye: “Nxa uyindodana kaNkulunkulu ziphosele phansi usuka lapha+ 10 ngoba kubhaliwe ukuthi, ‘Uzanika izingilosi zakhe umlayo mayelana lawe ukuze zikuvikele,’ 11 lokuthi, ‘Zizakuthwala ngezandla zazo ukuze unyawo lwakho lungatshayeki elitsheni.’”+ 12 UJesu wamphendula wathi: “Kubhaliwe ukuthi, ‘Akumelanga umlinge uJehova* uNkulunkulu wakho.’”+ 13 UDeveli wathi eseqedile ukumlinga ngezilingo zonke lezi wamtshiya wahamba, waselindela ukuthola esinye isikhathi esihle sokumlinga.+
14 UJesu wabuyela eGalile+ egcwele amandla omoya ongcwele. Imibiko emihle ngaye yasabalala kuzo zonke izindawo ezisemangweni lowo. 15 Waqalisa lokufundisa emasinagogeni abo njalo bonke abantu babekhuluma kuhle ngaye.
16 Wasuka waya eNazaretha+ lapho ayekhulele khona. Njengenjayelo wangena esinagogeni+ ngelanga leSabatha, wasukuma efuna ukubala. 17 Waqhutshelwa incwadimgoqwa yomphrofethi u-Isaya, wayivula wathola lapho okwakubhalwe ukuthi: 18 “Umoya kaJehova* uphezu kwami ngoba ungigcobile ukuthi ngitshumayele izindaba ezinhle kubayanga. Ungithume ukuthi ngimemezele ukukhululwa kwabathunjiweyo lokuvulwa kwamehlo eziphofu kanye lokuthi ngikhulule abacindezelweyo,+ 19 ngitshumayele mayelana lomnyaka wokwamukelwa nguJehova.”*+ 20 Eseqedile wagoqa incwadimgoqwa wayibuyisela encekwini yesinagogi wasehlala phansi. Amehlo abo bonke ababesesinagogeni ayethe nhlo kuye. 21 Wathi kubo: “Umbhalo lo elisanda kuwuzwa ugcwalisekile lamuhla.”+
22 Bonke bakhuluma kuhle ngaye bemangaliswa ngamazwi amnandi ayewakhuluma.+ Babesithi: “Kanti yenalo kasindodana kaJosefa?”+ 23 Esizwa lokhu wathi kubo: “Lizasisebenzisa kimi isitsho lesi esithi, ‘Dokotela zelaphe. Yenza lalapha edolobheni lakini izinto esizwe kuthiwa uzenze eKhaphenawume.’”+ 24 Wasesithi: “Ngiqinisile ngithi kini, akulamphrofethi owamukelwayo kibo.+ 25 Ngokwesibonelo, babebanengi sibili abafelokazi ko-Israyeli ezinsukwini zika-Elija izulu lize lingani okweminyaka emithathu lenyanga eziyisithupha, okwabangela ukuthi kube lendlala enkulu elizweni lonke.+ 26 Kodwa u-Elija kazange athunywe lakoyedwa wabesifazana labo. Wathunywa kumfelokazi weZarefathi kuphela, owayehlala emangweni weSidoni.+ 27 Kanti njalo banengi ababelobulephero ko-Israyeli ngesikhathi somphrofethi u-Elisha, kodwa kakho loyedwa phakathi kwabo owahlanjululwayo.* Kwasiliswa uNamani umSiriya kuphela.”+ 28 Bonke ababesesinagogeni bathi bekuzwa lokhu bazonda badla amalahle,+ 29 basukuma bamhahabela bamkhiphela phandle kwedolobho. Basebeqonda esiqongweni sentaba okwakwakhelwe kuyo idolobho labo, befuna ukumphosa ayetshaya phansi ngekhanda. 30 Kodwa yena wadabula phakathi kwabo wazihambela.+
31 Waya eKhaphenawume edolobheni leGalile njalo wayebafundisa ngeSabatha.+ 32 Bamangala kakhulu besizwa indlela ayefundisa ngayo+ ngoba wayekhuluma njengomuntu olamandla avela kuNkulunkulu. 33 Khonapho esinagogeni kwakulendoda eyayilomoya ongcolileyo, idimoni. Yamemeza ngelizwi elikhulu yathi:+ 34 “Ha! Kanti ufunani kithi Jesu waseNazaretha?+ Ulande ukuzosibhubhisa yini? Ngikwazi mhlophe ukuthi ungubani, ungoNgcwele kaNkulunkulu.”+ 35 Kodwa uJesu walikhuza idimoni wathi: “Thula uphume kuye.” Idimoni layiwisela phansi indoda leyo bonke bekhangele, laseliphuma kuyo lingazange liyilimaze. 36 Bonke bamangala bekubona lokhu, basebekhuluma bodwa besithi: “Liyawezwa amazwi akhe? Ulamandla okukhuza amadimoni aphume!” 37 Yikho izindaba ezimayelana laye zazilokhu zisabalala zigcwala kuleyondawo.
38 Wathi esesukile esinagogeni wangena emzini kaSimoni. Uninazala kaSimoni wayegula, umzimba wakhe utshisa kakhulu. Ngakho bacela uJesu ukuthi amncede.+ 39 Wasondela kuye wawukhuza umkhuhlane, ukutshisa komzimba kwaphela, wahle wavuka wabalungisela ukudla.
40 Ilanga lathi selisiyatshona, bonke ababelabantu abagulayo babaletha kuye kungelani lokuthi babebulawa ngumkhuhlane bani, wabasilisa bonke ngokubabeka izandla.+ 41 Kwaphuma amadimoni ebantwini abanengi ememeza esithi: “Wena uyiNdodana kaNkulunkulu.”+ Kodwa yena wayewakhuza njalo engawavumeli ukuthi akhulume+ ngoba ayekwazi ukuthi unguKhristu.+
42 Ekuseni kakhulu wasuka waya endaweni engelabantu.+ Kodwa abantu bamdinga baze bafika lapho ayekhona basebemncenga ukuthi angasuki kubo. 43 Loba kunjalo wathi kubo: “Kufanele ngitshumayele izindaba ezinhle zoMbuso kaNkulunkulu lakwamanye amadolobho ngoba yikho engathunywa ukuzokwenza.”+ 44 Ngakho wahamba etshumayela emasinagogeni aseJudiya.
5 Ngelinye ilanga uJesu wayefundisa abantu ilizwi likaNkulunkulu emi duze koLwandle lweGenesaretha.*+ Abantu babeminyezelana kuye. 2 Wabona izikepe ezimbili eceleni kolwandle kodwa abagoli benhlanzi basebephumile kuzo, begezisa amanethi abo.+ 3 Wangena esikepeni sikaSimoni wamcela ukuthi ake athi gudlu kancane ekhunjini. Wasehlala phansi wafundisa abantu ephakathi kwaso. 4 Wathi eseqedile ukufundisa wathi kuSimoni: “Gwedlani liye endaweni etshonayo beselisehlisa amanethi enu libambe inhlanzi.” 5 USimoni waphendula wathi: “Mfundisi, sisebenze nzima ubusuku bonke, asibambanga ngitsho leyodwa+ kodwa njengoba usitsho ngizawehlisa amanethi.” 6 Bawehlisa babamba* inhlanzi ezinengi okwamagama, amanethi abo aze aqalisa ukudabuka.+ 7 Ngakho babiza abanye babo ababekwesinye isikepe ukuthi babuye bazobancedisa. Sebefikile bagcwalisa izikepe zombili zaze zaqalisa ukucwila. 8 USimoni Phetro wathi ekubona lokhu wawela phansi waguqa phambi kukaJesu, wathi: “Suka kimi Nkosi ngoba ngingumuntu oyisoni.” 9 Watsho njalo ngoba yena lalabo ayelabo baphelelwa bebona inhlanzi abasebezibambile. 10 UJakhobe loJohane, amadodana kaZebhedi+ ayesebenza loSimoni, lawo asala engelankani. Kodwa uJesu wathi kuSimoni: “Ungesabi. Kusukela khathesi uzabe usugola abantu bephila.”+ 11 Ngakho bagwedla bayafika ekhunjini, basebetshiya konke bamlandela.+
12 Kwelinye idolobho afika kulo kwakulendoda eyayigcwele ubulephero. Yathi ibona uJesu yazilahla phansi yathi mbo ngobuso yamncenga isithi: “Nkosi, ngiyakwazi ukuthi nxa ufuna ungangenza ngihlambuluke.”+ 13 Ngakho welula isandla sakhe wayibamba wathi kuyo: “Ngiyafuna hlambuluka.” Masinyane nje ubulephero banyamalala,+ 14 wasesithi indoda le ingatsheli muntu ukuthi kwenzakaleni kodwa wathi kuyo: “Hamba uyeziveza kumphristi, unikele umnikelo wokuhlanjululwa kwakho, lowo uMosi athi kumele unikelwe,+ ukuze kube yibufakazi kubo.”+ 15 Lanxa kunjalo izindaba ezimayelana laye zaqhubeka zisabalala njalo abantu abanengi babebuthana kuye bezomlalela futhi bezokwelatshwa.+ 16 Wayejayele ukuya ezindaweni ezingelabantu esiyathandaza.
17 Ngelinye ilanga efundisa, kwakulabaFarisi labafundisi boMthetho ababevela kuzo zonke izigaba zeGalile laseJudiya kanye laseJerusalema, bethe gwaqa kuye. UJehova* wayemnike amandla okusilisa.+ 18 Kwafika abantu bethwele ngohlaka* indoda eyayome umhlubulo. Bazama ukuyingenisa endlini befuna ukuyibeka phambi kukaJesu+ 19 kodwa behluleka ngenxa yobunengi babantu. Yikho bakhwela ephahleni bavula isikhala, basebeyehlisela phakathi kwabantu ngohlaka,* phambi kukaJesu. 20 Wathi ebona ukuthi babelokholo, wathi endodeni eyayome umhlubulo: “Izono zakho sezithethelelwe.”+ 21 Yikho abaFarisi baqalisa ukukhuluma bodwa besithi: “Ngubani lo othuka uNkulunkulu? Kambe ngubani ongathethelela izono ngaphandle kukaNkulunkulu kuphela?”+ 22 Kodwa uJesu wakwazi ababekucabanga, wasesithi kubo: “Kanti linakana ngani ezinhliziyweni zenu? 23 Yikuphi okulula phakathi kokuthi, ‘Izono zakho sezithethelelwe,’ lokuthi, ‘Sukuma uhambe’? 24 Kodwa ukuze likwazi ukuthi iNdodana yomuntu ilamandla okuthethelela izono emhlabeni—” wathi endodeni eyayome umhlubulo: “Ngithi kuwe, sukuma uthathe uhlaka* lwakho uye emzini wakho.”+ 25 Yathi isizwa lokhu yasukuma beyikhangele, yathatha uhlaka* yaqonda emzini wayo ikhazimulisa uNkulunkulu. 26 Bonke bamangala babamba owangaphansi futhi besaba, bakhazimulisa uNkulunkulu besithi: “Lamuhla sibone izimanga!”
27 Ngemva kwalokhu waphuma wasebona umthelisi okwakuthiwa nguLevi ehlezi ewofisini yokubhadalisa umthelo, wathi kuye: “Woba ngumlandeli wami.”+ 28 ULevi wasukuma watshiya konke wamlandela. 29 Wenzela uJesu idili elikhulu endlini yakhe. Kulelodili kwakulabathelisi abanengi labanye ababesidla labo.+ 30 AbaFarisi lababhali babo bathi bekubona lokhu bakhonona kubafundi bakhe besithi: “Kungani lisidla futhi linatha labathelisi lezoni?”+ 31 UJesu wabaphendula wathi: “Abaphilileyo abamdingi udokotela, abagulayo yibo abamdingayo.+ 32 Angilandanga ukuzobiza abalungileyo, ngalanda ukuzobiza izoni ukuthi ziphenduke.”+
33 Bona bathi kuye: “Abafundi bakaJohane lababaFarisi bahlala bezila ukudla futhi besenza imithandazo yokuncenga, kodwa abafundi bakho bayadla futhi bayanatha.”+ 34 UJesu wathi kubo: “Kambe lingazilisa abangane bomyeni yena umyeni eseselabo? 35 Zizafika insuku lapho abazathathelwa khona umyeni.+ Yikho lapho abazazila khona ukudla.”+
36 Wabatshela omunye umzekeliso wathi: “Akulamuntu osika isichibi esigqokweni esitsha asithungele esigqokweni esidala. Nxa angenza njalo, isichibi esitsha siyadabula isigqoko esidala futhi siyabe singahambelani laso ngoba sithethwe esigqokweni esitsha.+ 37 Kanti njalo kakho ofaka iwayini elitsha emigodleni yesikhumba emidala. Nxa angenza njalo, iwayini elitsha liyadabula imigodla yesikhumba lichitheke, lemigodla yonakale. 38 Iwayini elitsha kumele lifakwe emigodleni yesikhumba emitsha. 39 Akulamuntu othi esenathe iwayini elidala abesefuna elitsha ngoba uyabe esithi, ‘Elidala limnandi.’”
6 Ngelinye ilanga kungeSabatha wadlula phakathi kwamasimu engqoloyi. Abafundi bakhe babehamba besikha izikhwebu zengqoloyi,+ bazihlikihle ngezandla bazidle.+ 2 Abanye abaFarisi bathi bekubona lokho bathi: “Lenzelani into engekho emthethweni ngeSabatha?”+ 3 UJesu wabaphendula wathi: “Kanti alikaze likubale yini ukuthi uDavida wenzani yena lamadoda ayelawo sebelambile?+ 4 Angithi wangena endlini kaNkulunkulu waphiwa izinkwa zokubukiswa wadla, ezinye wazinika amadoda ayelaye? Phela kwakungekho emthethweni ukuthi zidliwe yiloba ngubani ngaphandle kwabaphristi kuphela.”+ 5 Wasesithi kubo: “INdodana yomuntu iyiNkosi yeSabatha.”+
6 Ngelinye futhi iSabatha+ wangena esinagogeni waqalisa ukufundisa. Khonapho kwakulendoda eyayilesandla sokudla esitshwabheneyo.+ 7 Ababhali labaFarisi basebemkhangele ngelihlo lokhozi uJesu, befuna ukubona ukuthi uzakwelapha yini ngeSabatha besebemethesa icala. 8 Kodwa yena wayesazi ukuthi babecabangani,+ yikho wathi endodeni elesandla esitshwabheneyo: “Sukuma uzokuma lapha phakathi.” Yasisukuma yayakuma lapho ayesitsho khona. 9 UJesu wathi kubo: “Kengibuze madoda, kusemthethweni yini ukwenza okuhle loba okubi ngeSabatha? Kusemthethweni yini ukusindisa impilo loba ukubulala ngeSabatha?”+ 10 Ngemva kokubakhangela bonke wathi endodeni leyo: “Yelula isandla sakho.” Lakanye yaselula satshwaphuluka. 11 Kodwa bona bazonda kakhulu, basebecebisana ngokuthi bangamenzani uJesu.
12 Ngelinye ilanga wakhwela entabeni esiyathandaza+ kuNkulunkulu, wathandaza ubusuku bonke.+ 13 Kusisa wabiza abafundi bakhe wasekhetha kubo abangu-12, wababiza ngokuthi ngabaphostoli.+ 14 KwakunguSimoni lowo amnika ibizo elithi Phetro, lomfowabo u-Andreya, loJakhobe, loJohane, loFiliphu,+ loBhatholomewu, 15 loMathewu, loTomasi,+ loJakhobe indodana ka-Alifewu, loSimoni obizwa ngokuthi “ngotshisekayo,” 16 loJudasi indodana kaJakhobe kanye loJudasi Iskariyothi owacina esiba ngumthengisi.
17 Wehla labo bafika bama endaweni echayileyo. Kwakulabafundi bakhe abanengi kanye labantu abanengi kakhulu ababevela kulo lonke elaseJudiya, laseJerusalema kanye lasemangweni weThire leSidoni oseduze kolwandle. Babelande ukuzomlalela lokuzokwelatshwa imikhuhlane yabo. 18 Lalabo ababehlutshwa ngamadimoni belatshwa. 19 Bonke ngobunengi babo babefuna ukumthinta ngoba kwakuphuma amandla kuye,+ abasilise bonke.
20 Wakhangela abafundi bakhe wathi:
“Liyathokoza lina elingabayanga ngoba uMbuso kaNkulunkulu ngowenu.+
21 “Liyathokoza lina elilambayo khathesi ngoba lizasuthiswa.+
“Liyathokoza lina elikhalayo khathesi ngoba lizahleka.+
22 “Liyathokoza nxa abantu belizonda,+ belininela khatshana,+ belithethisa futhi bengcolisa ibizo lenu besithi lingabantu ababi* ngenxa yeNdodana yomuntu. 23 Ngalolosuku lithabe lijabule lize leqe ngoba umvuzo wenu mkhulu ezulwini. Labokhokho babo babebenza njalo abaphrofethi.+
24 “Kodwa maye kini lina elinothileyo+ ngoba alisayikuphiwa lutho phezu kwalokho eselikutholile.+
25 “Maye kini lina elisuthayo khathesi ngoba lizabulawa yindlala.
“Maye kini lina elihlekayo khathesi ngoba lizalila njalo likhale.+
26 “Maye kini nxa bonke abantu belibuka+ ngoba yikho okhokho babo ababekwenza kubaphrofethi bamanga.
27 “Kodwa ngithi kini lina elilaleleyo: Qhubekani lithanda izitha zenu, libenzela okuhle abalizondayo,+ 28 libusisa abaliqalekisayo futhi lithandazela abalihlukuluzayo.+ 29 Lowo okutshaya ngempama mnike esinye isihlathi, okuthathela isembatho sangaphandle mnike lesaphakathi.+ 30 Loba ngubani ocelayo mnike,+ lalowo okuthathela izinto zakho ungamceli ukuthi aziphendukise.
31 “Lokho elifuna abantu bakwenze kini, lani kwenzeni kubo.+
32 “Nxa lithanda abalithandayo kuphela, liyabe lenzeni okubukekayo? Phela lezoni yikho ezikwenzayo.+ 33 Nxa lisenza okuhle kulabo abalenzela okuhle, liyabe lenzeni okubukekayo? Lezoni lazo zenza njalo. 34 Kanti njalo nxa liboleka* labo elikhangelele ukuthi bazalibhadala, liyabe lenzeni okubukekayo?+ Lezoni lazo ziyaziboleka ezinye izoni zikhangelele ukuthi zizabuyiselwa konke. 35 Kodwa lina qhubekani lithanda izitha zenu, lisenza okuhle njalo liboleka abanye lingakhangelelanga ukuthola lutho.+ Lingenza njalo umvuzo wenu uzakuba mkhulu futhi lizakuba ngamadodana oPhezukonke ngoba yena ulomusa kwabangabongiyo kanye lababi.+ 36 Qhubekani lilesihawu njengoba nje loYihlo elesihawu.+
37 “Phezu kwalokho yekelani ukwahlulela ukuze lani lingahlulelwa loba sekutheni,+ liyekele lokusola abanye ukuze lani lingasolwa. Qhubekani lithethelela abanye, lani lizathethelelwa.+ 38 Hlalani lisipha abanye, labo bazalipha.+ Bazathela ezikhwameni zenu okunengi, bagqibe baze banyikinye, kugcwale kuze kuchitheke ngoba isikali elikala ngaso yiso abazalikalela ngaso.”
39 Wasebatshela umzekeliso wathi: “Kambe isiphofu singakhokhela esinye isiphofu? Angithi zombili zizawela egodini?+ 40 Umfundi kangcono kulalowo omfundisayo, kodwa loba ngubani ofundiswe kuhle uzakuba njengalowo omfundisileyo. 41 Pho kungani ukhangela ucezwana oluselihlweni lomfowenu kodwa ungananzeleli ugodo* oluselihlweni lakho?+ 42 Ungatsho njani kumfowenu ukuthi, ‘Mfowethu wothi ngikukhiphe ucezwana oluselihlweni lakho,’ wena ungaluboni ugodo* olukwelakho ilihlo? Mzenzisi! Qala ukhiphe ugodo* oluselihlweni lakho. Ungenza njalo uzabona kuhle ukuthi ungalukhipha njani ucezwana oluselihlweni lomfowenu.
43 “Akulasihlahla esihle esithela izithelo ezibolileyo futhi akulasihlahla esibi esithela izithelo ezinhle+ 44 ngoba isihlahla ngasinye saziwa ngezithelo zaso.+ Ngokwesibonelo amakhiwane awakhiwa emeveni, lamagilebisi awakhiwa esihlahleni sameva. 45 Umuntu omuhle ukhipha okuhle emagugwini amahle asenhliziyweni yakhe, kodwa omubi ukhipha okubi ezintweni ezimbi azigcinileyo ngoba umlomo ukhuluma okuphuphuma enhliziyweni.+
46 “Pho lingibizelani lisithi, ‘Nkosi! Nkosi!’ lina lingenzi izinto engilitshela zona?+ 47 Loba ngubani oza kimi azwe amazwi ami abesewenza, zwanini ukuthi unjengani:+ 48 Unjengendoda eyathi isakha indlu yayo yagebha yatshona yayafika edwaleni, yasisakhela isisekelo sayo phezu kwalo. Kuthe kufika isikhukhula, amanzi omfula ayitshaya indlu kodwa ayizange inyikinyeke ngoba yayakhiwe kuhle.+ 49 Kodwa loba ngubani ozwayo angenzi lutho+ unjengendoda eyakhetha ukwakha indlu yayo emhlabathini ingelasisekelo. Amanzi omfula ayitshaya leyondlu yahle yathi wohlo phansi yabhidlika.”
7 Wathi eseqedile ukufundisa abantu wangena eKhaphenawume. 2 Kwakulenceku yomkhokheli webutho eyayigulela ukufa.+ Umkhokheli webutho wayeyithanda kakhulu. 3 Yikho wathi esizwa ngoJesu wathuma abanye abadala bamaJuda ukuthi bayemcela ukuthi azosilisa inceku yakhe. 4 Bafika kuJesu bamncenga kakhulu besithi: “Indoda le kufanele uyincede sibili 5 ngoba iyasithanda isizwe sethu njalo yiyo eyasakhela isinagogi.” 6 Ngakho uJesu wahamba labo. Kodwa wathi esezafika endlini, umkhokheli webutho wathuma abangane bakhe ukuthi bayekuthi kuye: “Mnumzana, ungazihluphi. Kambe ngiyini mina ukuthi ungangena ngaphansi kophahla lwami?+ 7 Yikho ngibone kungangifanelanga ukuthi ngize kuwe. Wena tshono ilizwi kuphela usilise inceku yami. 8 Lami nginje kulabanye engingaphansi kwabo futhi ngilamasotsha angaphansi kwami. Ngiyathi kwelinye, ‘Hamba!’ lakanye lihambe, ngithi kwelinye, ‘Buya lapha!’ libuye, njalo ngithi encekwini yami, ‘Yenza lokhu!’ ikwenze.” 9 UJesu wathi esizwa lokhu wamangala wasetshibilika wathi ebantwini ababemlandela: “Ngilitshela ukuthi ngitsho lako-Israyeli angikamtholi umuntu olokholo olukhulu kangaka.”+ 10 Ababethunyiwe bathi befika endlini bathola inceku isiphilile, iqine saka.+
11 Ngemva nje kwalokho wasuka waya edolobheni okuthiwa yiNayini, ehamba labafundi bakhe labantu abanengi. 12 Wathi esezafika egedini ledolobho wahlangana labantu bephuma bethwele indoda efileyo. Kwakuyiyo yodwa indodana* kunina.+ Phezu kwalokho unina wayengumfelokazi. Kwakulabantu bedolobho lelo abanengi ababehamba laye. 13 INkosi yathi imbona yamzwela usizi+ yathi kuye: “Thula, ungakhali.”+ 14 Yasisondela yathinta uhlaka* ababethwele ngalo isidumbu, ababeluthwele bama mpo. Yasisithi: “Jaha, ngithi kuwe, vuka!”+ 15 Lakanye ijaha lelo lavuka lahlala laqalisa ukukhuluma, uJesu waselibuyisela kunina.+ 16 Bonke besaba bakhazimulisa uNkulunkulu besithi: “Sekuvele umphrofethi omkhulu phakathi kwethu,”+ baphinda bathi, “UNkulunkulu ubakhumbulile abantu bakhe.”+ 17 Izindaba lezi ezimayelana laye zaduma kulo lonke elaseJudiya lakuzo zonke izindawo ezikulowomango.
18 Abafundi bakaJohane babikela uJohane zonke izinto lezi.+ 19 Yikho uJohane wabiza abafundi bakhe ababili wasebathuma eNkosini ukuthi bayebuza bathi: “Unguye yini ozayo+ kumbe kufanele silindele omunye?” 20 Bafika kuJesu bathi kuye: “UJohane uMbhabhathizi usithume ukuthi sizokubuza ukuthi unguye yini ozayo kumbe kufanele silindele omunye?” 21 Ngalesosikhathi welapha abantu abanengi ababegula,+ lababelemikhuhlane emibi, lababelamadimoni njalo wenza leziphofu ezinengi zabona. 22 Ngemva kwalokho wathi kubafundi bakaJohane: “Hambani liyetshela uJohane elikubonileyo lelikuzwileyo: Iziphofu sezibona,+ izigoga sezihamba, abalobulephero bayahlanjululwa, izacuthe sezisizwa,+ abafileyo bayavuswa futhi abayanga batshelwa izindaba ezinhle.+ 23 Uyathokoza lowo ongasitholiyo isizatho sokukhubeka ngami.”+
24 Izithunywa zikaJohane zathi sezihambile, uJesu waqalisa ukukhuluma labantu ngoJohane esithi: “Lasuka lisiyabonani enkangala? Umhlanga ophetshulwa ngumoya?+ 25 Pho lalisiyabonani? Indoda egqoke izembatho ezibutshelezi?*+ Phela abagqoka izembatho ezibucwazicwazi labaphila ntofontofo basezindlini zamakhosi. 26 Manje lalisiyabonani? Umphrofethi yini? Ye, ungumphrofethi sibili futhi uqakatheke kulabo bonke abaphrofethi.+ 27 Nguye okubhalwe ngaye ukuthi: ‘Ngithuma isithunywa sami phambi kwakho, sizalungisa indlela yakho wena ungakafiki.’+ 28 Ngilitshela ukuthi kwabazelwe ngabesifazana, kakho loyedwa omkhulu kuloJohane, kodwa omncane eMbusweni kaNkulunkulu mkhulu kulaye.”+ 29 (Abantu bonke kanye labathelisi bathi bekuzwa lokhu bavuma ukuthi uNkulunkulu ulungile ngoba babebhabhathizwe ngobhabhathizo lukaJohane.+ 30 Kodwa abaFarisi lezazi zoMthetho abazange basilalele iseluleko* sikaNkulunkulu+ ngoba bona babengazange babhabhathizwe nguJohane.)
31 UJesu waqhubeka wathi: “Abantu besizukulwane lesi ngingabafanisa lobani?+ Banjengobani? 32 Banjengabantwana abancane abahlezi emakethe, abamemezana besithi: ‘Silitshayele ifluthi kodwa alizange ligide, sakhala kodwa alizange lilile.’ 33 UJohane uMbhabhathizi laye kadli isinkwa njalo kanathi iwayini+ kodwa lina lithi: ‘Uledimoni.’ 34 INdodana yomuntu yona iyadla njalo iyanatha kodwa lithi: ‘Khangelani! Indoda eyisihwaba, ephilela ukunatha iwayini lengumngane wabathelisi lezoni!’+ 35 Lanxa kunjalo, ukuhlakanipha kukhanya ngabantwana bakho bonke* ukuthi kulungile.”+
36 Omunye umFarisi wayelokhu emcela ukuthi azokudla laye. Ngakho wangena endlini yomFarisi lo wahlala phansi ukuze adle. 37 Owesifazana owayesaziwa kulelodolobho ukuthi uyisoni wezwa ukuthi wayesidla endlini yomFarisi, wasesiza lapho elamafutha anukelelayo esembodleleni ye-alabhasta.+ 38 Wafika waguqa ngemva kukaJesu waqalisa ukukhala emanzisa inyawo zikaJesu ngenyembezi, wazesula ngenwele zakhe. Waphinda wamqabuza enyaweni, wathela amafutha anukelelayo kuzo. 39 UmFarisi owayenxuse uJesu wathi ebona lokhu wathi enhliziyweni yakhe: “Ngabe indoda le ibingumphrofethi sibili, ibizakwazi ukuthi owesifazana lo oyithintayo ngubani lokuthi unjani, ngoba uyisoni.”+ 40 UJesu wakwazi ukuthi wayecabangani wasesithi kuye: “Simoni, kulento engifuna ukukutshela yona.” Yena wathi: “Khuluma Mfundisi!”
41 UJesu wasesithi: “Amadoda amabili ayelezikwelede zomuntu obolekisa imali. Enye yayilesikwelede sabodenariyu* abangu-500, enye abangu-50. 42 Athi eseswele ayengambhadala ngakho, womabili wawaxolela ngenhliziyo yonke. Manje ubona angani yiphi ezamthanda kakhulu?” 43 USimoni waphendula wathi: “Ngibona angathi yileyo eyaxolelwa isikwelede esikhulu.” Wathi kuye: “Uphendule kuhle.”* 44 Wasetshibilika wakhangela owesifazana, wathi kuSimoni: “Uyambona owesifazana lo? Ngingene endlini yakho, awuzange ungiphe amanzi okugeza inyawo. Kodwa owesifazana lo umanzise inyawo zami ngezinyembezi zakhe, wazesula ngenwele zakhe. 45 Awuzange ungiqabuze kodwa owesifazana lo ubelokhu eqabuza inyawo zami kusukela ngifika lapha. 46 Awuzange uthele amafutha ekhanda lami kodwa owesifazana lo uthele amafutha anukelelayo enyaweni zami. 47 Yikho ngikutshela ukuthi ngenxa yalokho akwenzileyo, izono zakhe sezithethelelwe lanxa zizinengi*+ ngoba uthande kakhulu. Kodwa lowo othethelelwe okuncane, uthanda kancane.” 48 Wasesithi kowesifazana: “Izono zakho sezithethelelwe.”+ 49 Ababesidla laye baqalisa ukukhuluma bodwa besithi: “Kanti ungubani umuntu lo othethelela izono?”+ 50 Kodwa yena wathi kowesifazana: “Ukholo lwakho lukusindisile,+ hamba ngokuthula.”
8 Ngemva kwalokho uJesu wahamba etshumayela futhi ememezela izindaba ezinhle zoMbuso kaNkulunkulu,+ engena idolobho ngedolobho lesigaba ngesigaba. WayelabaliTshumi Lambili 2 labanye abesifazana ababekhitshwe amadimoni belatshwa lemikhuhlane. Abesifazana laba kwakunguMariya owayebizwa ngokuthi nguMagadalena, owayekhitshwe amadimoni ayisikhombisa, 3 loJowana+ inkosikazi kaKhuza umphathi wendlu kaHerodi, loSusana kanye labanye abesifazana abanengi ababebancedisa besebenzisa impahla yabo.+
4 Emadolobheni ehlukeneyo kwabuya abantu abanengi babuthana kuye, wasebafundisa esebenzisa umzekeliso wathi:+ 5 “Umlimi waphuma esiyahlanyela inhlanyelo yakhe. Wathi ehlanyela, enye yawela eceleni kwendlela yasinyathelwa ngabantu futhi yadliwa zinyoni.+ 6 Enye yawela edwaleni kodwa yathi isimilile, yaswaba ngoba kwakungelamanzi.+ 7 Enye yawela emeveni, ameva akhula ayiminyanisa.+ 8 Enye yawela emhlabathini omuhle yamila, yasithela okuphindwe ka-100.”+ Esakhuluma lezizinto waphakamisa ilizwi wathi: “Olendlebe zokulalela kalalele.”+
9 Abafundi bakhe bambuza ukuthi umzekeliso lo wawusitshoni.+ 10 Yena wathi: “Lina likunikiwe ukuzwisisa imfihlo ezingcwele zoMbuso kaNkulunkulu, kodwa kwabanye ngikhuluma ngemizekeliso+ ukuze bangaboni lanxa bekhangele futhi bangazwisisi lanxa besizwa.+ 11 Nanku okutshiwo ngumzekeliso lo: Inhlanyelo lilizwi likaNkulunkulu.+ 12 Nxa inhlanyelo iwela eceleni kwendlela, kutsho ukuthi abantu bayalizwa ilizwi kodwa uDeveli abesefika alithathe ezinhliziyweni zabo ukuze bangakholwa futhi bangasindiswa.+ 13 Nxa inhlanyelo iwela edwaleni, kutsho ukuthi abantu bayalizwa ilizwi balamukele ngentokozo kodwa abalampande. Bayakholwa okwesikhatshana kodwa besebephambuka nxa sebelingwa.+ 14 Nxa inhlanyelo iwela emeveni, kutsho ukuthi abantu bayalizwa ilizwi kodwa liminyaniswe zinkathazo, lenotho+ lobunandi bempilo,+ besekusenza ukuthi bangatheli lutho.+ 15 Kodwa nxa inhlanyelo iwela emhlabathini omuhle, kutsho ukuthi abantu abalenhliziyo ezinhle+ bayalizwa ilizwi babambelele kulo, besebethela izithelo ngapha beqinisela ebunzimeni.+
16 “Kakho othi eselumathise isibane asimbokothe ngesitsha kumbe asifake ngaphansi kombheda, kodwa usifaka phezu koluthi lwesibane ukuze sikhanyisele abangenayo.+ 17 Phela akulalutho olucatshileyo olungasoze lubonakale futhi akulalutho olufihliweyo olungasoze lwaziwe kumbe luphumele egcekeni.+ 18 Ngakho nanzelelani indlela elilalela ngayo ngoba loba ngubani olakho uzaphiwa okunye,+ kodwa loba ngubani ongelalutho uzathathelwa lalokho acabanga ukuthi ulakho.”+
19 Unina labafowabo+ bamlanda kodwa behluleka ukufika eduze kwakhe ngenxa yobunengi babantu.+ 20 Abantu bathi kuye: “Unyoko labafowenu bamile phandle bafuna ukukubona.” 21 Yena wabaphendula wathi: “Umama labafowethu yilaba abezwa ilizwi likaNkulunkulu benze elikutshoyo.”+
22 Ngelinye ilanga wangena esikepeni labafundi bakhe wasesithi kubo: “Asichapheni siye ngaphetsheya kolwandle.”* Basuka bahamba.+ 23 Kodwa bathi besahamba ngesikepe yena wajumeka walala. Kwaqubuka isiphepho esikhulu elwandle, isikepe sabo saqalisa ukugcwala amanzi. Basebesengozini+ 24 yikho bahamba bayamvusa bathi: “Mfundisi, Mfundisi, sesisifa!” Esizwa lokho wavuka wawukhuza umoya lamagagasi ayelolaka. Isiphepho saphela, kwathula kwathi cwaka.+ 25 Wasesithi kubo: “Kungani lingelakholo?” Bamangala futhi besaba kakhulu babuzana besithi: “Ngubani sibili yenalo? Ukhuza ngitsho lomoya lolwandle kumlalele.”+
26 Bafika ekhunjini esabelweni samaGerasini+ esikhangelane leGalile. 27 UJesu wathi ephuma esikepeni wahlangabezwa yindoda eyayiledimoni ithutsha edolobheni. Yayisilesikhathi ihamba nqunu futhi ihlala emangcwabeni,+ ingasahlali endlini. 28 Yathi ibona uJesu yaklabalala yazilahla phansi phambi kwakhe, yamemeza isithi: “Kanti ufunani kimi Jesu Ndodana kaNkulunkulu oPhezukonke? Ngiyakucela, ungangihlukuluzi.”+ 29 (Phela uJesu wayetshela idimoni ukuthi liphume endodeni le. Laliyifikela kanengi*+ futhi babehlala beyibopha ngamaketane lezankosi besebeyilinda. Kodwa yayiwaqamula amaketane lezankosi lezo, idimoni beseliyisa ezindaweni ezingelabantu.) 30 UJesu wayibuza wathi: “Ibizo lakho ungubani?” Yona yathi: “NginguLigiyoni,” ngoba yayingenwe ngamadimoni amanengi. 31 Ayelokhu emncenga ukuthi angawaxotsheli emgodini ongelamkhawulo.+ 32 Khonapho entabeni kwakulomhlambi omkhulu wengulube+ owawusidla. Ngakho amncenga ukuthi awavumele angene engulubeni, wasewavumela.+ 33 Amadimoni aphuma endodeni le angena engulubeni, umhlambi waphaphatheka uqonda eliweni wayazithela elwandle, wagalula. 34 Kodwa abelusi bathi bebona lokhu babaleka bayabika edolobheni lasemaphandleni.
35 Abantu baphuma besiyabona okwakwenzakele. Bafika kuJesu bayibona indoda eyayikhitshwe amadimoni, bezwa besesaba. Yayihlezi loJesu futhi yayisigqokile, lengqondo zayo sezisebenza kuhle. 36 Ababezibonele ngawabo okwakwenzakele bababikela ukuthi indoda eyayilamadimoni yayisiliswe njani. 37 Ngemva kwalokho abanengi ababevela ezindaweni ezisesabelweni samaGerasini bacela ukuthi uJesu asuke kubo ngoba basebesesaba kakhulu. Wangena esikepeni esefuna ukuhamba, 38 kodwa indoda eyayikhitshwe amadimoni yayilokhu imncenga ifuna ukuqhubeka ilaye. Lanxa kunjalo yena wayitshela ukuthi ibuyele, wathi:+ 39 “Buyela ngekhaya, uqhubeke utshela abanye lokho okwenzelwe nguNkulunkulu.” Yasihamba itshela abantu edolobheni lonke ukuthi uJesu wayeyenzeleni.
40 UJesu wathi ephenduka abantu bamamukela kuhle ngoba bonke babemlindele.+ 41 Kwafika indoda okuthiwa nguJayirosi eyayingumphathi wesinagogi, yazilahla phansi enyaweni zikaJesu yamncenga ukuthi ahambe layo endlini yayo+ 42 ngoba indodakazi yayo eyayileminyaka engaba ngu-12 yayisisifa. Kwakuyiyo yodwa ayelayo.*
UJesu wasuka esesiya khona njalo abantu babemgcwalele. 43 Khonapho kwakulowesifazana owayesehlutshwe ngumkhuhlane wokopha+ okweminyaka engu-12 futhi bonke ababezame ukumelapha babeyehlulekile.+ 44 Wasondela ngemva kwakhe wathinta umphetho wesembatho sakhe sangaphandle,+ ukopha kwahle kwama. 45 Yikho uJesu wathi: “Ngubani ongithintileyo?” Bonke baphika, uPhetro wasesithi: “Mfundisi, abantu bakugombolozele futhi bayakuminyezela.”+ 46 Kodwa uJesu wathi: “Kulomuntu ongithintileyo ngoba ngiyakwazi ukuthi amandla+ aphumile kimi.” 47 Owesifazana wathi ebona ukuthi kwakungasayenzi ukuthi azifihle, wasondela eqhuqha wazilahla phansi phambi kwakhe, wakhuluma phambi kwabo bonke ukuthi wayemthinteleni lokuthi wayehle wasila. 48 Kodwa uJesu wathi kuye: “Ndodakazi, ukholo lwakho lukusilisile. Hamba ngokuthula.”+
49 Esakhuluma kwafika isithunywa somphathi wesinagogi sathi: “Indodakazi yakho isifile, ungasamhluphi uMfundisi.”+ 50 UJesu wathi ekuzwa lokhu wathi kuJayirosi: “Ungesabi, wena woba lokholo kuphela, indodakazi yakho izavuka.”*+ 51 Wathi efika endlini kazange avumele muntu ukuthi angene laye ngaphandle kukaPhetro, loJohane, loJakhobe kanye loyise lonina wenkazana. 52 Abantu bonke babekhala belokhu betshaya izifuba zabo beyililela. Ngakho wathi: “Thulani lingakhali+ ngoba kafanga, ulele.”+ 53 Bathi bekuzwa lokho baqalisa ukumhleka bemenza isithutha ngoba babekwazi ukuthi umntwana ufile. 54 Kodwa yena wambamba isandla wamemeza wathi: “Mntwana, vuka!”+ 55 Umntwana waqalisa ukuphefumula,*+ wahle wasukuma.+ UJesu wasesithi kaphiwe ukudla. 56 Abazali bakhe bona basebethabe bengasazazi, kodwa wathi bangatsheli muntu okwenzakeleyo.+
9 Ngemva kwalokho wabiza abaliTshumi Lambili wabapha ilungelo kanye lamandla okukhipha wonke amadimoni+ lokwelapha imikhuhlane.+ 2 Wabathuma ukuthi bayetshumayela ngoMbuso kaNkulunkulu basilise labagulayo. 3 Wathi kubo: “Lingahambi lalutho, lingathwali intonga loba isikhwama sokudla loba isinkwa loba imali* njalo lingathwali izembatho ezimbili.*+ 4 Loba yiwuphi umuzi elingena kuwo, hlalani kuwo lize lisuke kuleyondawo.+ 5 Loba yiliphi idolobho lapho abantu abangalamukeli khona, thintithani uthuli enyaweni zenu nxa selisuka kulo ukuze kube yibufakazi bokuthi abakwenzileyo kubi.”+ 6 Abafundi basuka bahamba bengena isigaba ngesigaba, betshumayela izindaba ezinhle njalo besilisa abagulayo kuzo zonke izindawo.+
7 UHerodi* umbusi wesabelo* wathi esizwa konke okwakusenzakala, wethuka kakhulu ngoba abanye babesithi uJohane wayesevusiwe kwabafileyo.+ 8 Kodwa abanye babesithi ngu-Elija, abanye bona besithi kuvuke omunye wabaphrofethi bakudala.+ 9 UHerodi wathi: “UJohane ngamquma ikhanda.+ Manje ngubani lo engizwa kuthiwa wenza izinto zonke lezi?” Ngakho wayesemdinga efuna ukumbona.+
10 Abaphostoli bathi sebephendukile balandisela uJesu konke ababekwenzile.+ Yikho wabathatha wasuka labo ebantwini, baya edolobheni okuthiwa yiBhethisayida.+ 11 Kodwa abantu bathi sebekwazi lokho bamlandela. Wabamukela kuhle waseqalisa ukubatshela ngoMbuso kaNkulunkulu njalo wasilisa ababegula.+ 12 Ilanga lathi selisiyatshona, abaliTshumi Lambili bamlanda bathi kuye: “Tshela abantu bazihambele ukuze bayengena emizini lasezigabeni eziseduze badinge ukudla lendawo yokuphumula ngoba lapha esikhona kukhatshana lemizi.”+ 13 Kodwa wathi kubo: “Bapheni lina ukudla.”+ Bathi kuye: “Silezinkwa ezinhlanu lenhlanzi ezimbili kuphela, ngaphandle nxa kumele thina sihambe siyethenga ukudla okungenela bonke abantu laba.” 14 Khonapho kwakulamadoda angaba ngu-5 000. Kodwa yena wathi kubafundi bakhe: “Bahlaliseni phansi babe ngamaqembu alabantu abangaba ngu-50.” 15 Benza njalo, babahlalisa phansi bonke. 16 Wathatha izinkwa lezo ezinhlanu lenhlanzi ezimbili wakhangela phezulu wathandaza.* Wasezihlephuna waqalisa ukuzinika abafundi bakhe ukuze bazinike abantu. 17 Ngakho bonke badla basutha njalo babutha amabhasikiti angu-12 eziqephu ezazisele.+
18 Ngemva kwesikhathi abafundi baya kuJesu bamthola eyedwa ethandaza, wasebabuza wathi: “Abantu bathi ngingubani?”+ 19 Baphendula bathi: “Bathi unguJohane uMbhabhathizi, kodwa abanye bathi ungu-Elija, abanye bona bathi kuvuke omunye wabaphrofethi bakudala.”+ 20 Wasesithi kubo: “Kodwa lina lithi ngingubani?” UPhetro waphendula wathi: “UnguKhristu kaNkulunkulu.”+ 21 Wasebaqonqosela ukuthi bangakutsheli muntu lokho.+ 22 Kodwa wathi: “INdodana yomuntu kumele yehlelwe zinhlupho ezinengi, ilahlwe ngabadala labaphristi abakhokhelayo kanye lababhali, ibisibulawa,+ ivuswe ngelanga lesithathu.”+
23 Ngemva kwalokho wathi kubo bonke: “Loba ngubani ofuna ukungilandela kazidele,+ asithwale nsuku zonke isigodo sakhe sokuhlutshwa* aqhubeke engilandela.+ 24 Loba ngubani ofuna ukusindisa impilo* yakhe izamlahlekela, kodwa loba ngubani olahlekelwa yimpilo* yakhe ngenxa yami, nguye ozayisindisa.+ 25 Kambe umuntu kungamnceda ngani sibili ukuzuza umhlaba wonke kodwa azilimaze loba alahlekelwe yimpilo yakhe?+ 26 Loba ngubani oba lenhloni ngami kumbe ngamazwi ami, iNdodana yomuntu izakuba lenhloni ngaye nxa isisiza isenkazimulweni yayo lekaYise kanye leyezingilosi ezingcwele.+ 27 Kodwa ngiqinisile ngithi kini, bakhona abanye abemi lapha abangasoze bafe bengakawuboni uMbuso kaNkulunkulu.”+
28 Kwathi sekwedlule amalanga angaba ngu-8 ekhulume amazwi la, wathatha uPhetro loJohane kanye loJakhobe wakhwela labo entabeni esiyakhuleka.+ 29 Wathi esakhuleka, ubuso bakhe babonakala sebutshintshile lempahla zakhe sezimhlophe nke, sezicazimula. 30 Kwakulamadoda amabili ayexoxa laye, uMosi lo-Elija. 31 Abonakala ekhazimula njalo aqalisa ukukhuluma ngokusuka kwakhe okwasekuzakwenzakala eJerusalema.+ 32 UPhetro lalabo ayelabo babejunywe yibuthongo, kodwa bathi sebevuke khwatshu, bayibona inkazimulo yakhe+ kanye lamadoda amabili ayemi lawo. 33 Amadoda la athi esesuka kuJesu, uPhetro wathi kuye: “Mfundisi, kuhle kithi ukuba lapha. Asimiseni amatende amathathu, elakho lelikaMosi lelika-Elija.” Wayengazizwa lokuthi uthini. 34 Kodwa wathi esakhuluma kwaqubuka iyezi laqalisa ukubagubuzela. Lathi libembesa besaba. 35 Kwasekuzwakala ilizwi+ liphuma kuleloyezi lisithi: “Le yiNdodana yami ekhethiweyo.+ Yilaleleni.”+ 36 Ilizwi lelo lithe lisakhuluma, babona uJesu eseyedwa. Ngalesosikhathi abafundi bakugcina kuyimfihlo lokho, abazange batshele muntu ababekubonile.+
37 Bathi besehla entabeni ngelanga elilandelayo, wahlangabezwa ngabantu abanengi.+ 38 Enye indoda eyayiphakathi kwabantu labo yamemeza yathi: “Mfundisi, ngiyakuncenga ukuthi ukhangele indodana yami ngoba yiyo yodwa engilayo.+ 39 Iyafikelwa lidimoni iklabalale, liyidlukuze ibhubhudle amagwebu, kube yinkani ukuthi liyiyekele, lize liphume seliyilimazile. 40 Ngincenge abafundi bakho ukuthi balikhiphe kodwa behlulekile.” 41 UJesu wasephendula wathi: “Hawu lina sizukulwane esingelakholo lesonakeleyo,+ kumele ngiqhubeke ngilani kuze kube nini? Kufanele ngilibekezelele kuze kube nini? Yilethe lapha indodana yakho.”+ 42 Kwathi lanxa umfana esesiya kuJesu, idimoni lamphosela phansi lamdlukuza. Kodwa yena walikhuza idimoni lelo, wamsilisa umfana wasembuyisela kuyise. 43 Bonke batsha amathe bebona amandla kaNkulunkulu amakhulu.
Bathi belokhu besamangele ngenxa yezinto zonke ayezenza, wathi kubafundi bakhe: 44 “Lalelisisani likhumbule amazwi la, iNdodana yomuntu izanikelwa* ezandleni zabantu.”+ 45 Kodwa bona abazange bazwisise ukuthi wayesitshoni ngoba babekufihlelwe ukuze bangakuzwisisi njalo babesesaba ukumbuza ngalokho ayekukhulumile.
46 Baqalisa ukuphikisana ngokuthi ngubani owayemkhulu kulabo bonke phakathi kwabo.+ 47 UJesu wakwazi okwakusezinhliziyweni zabo, yikho wathatha umntwana omncane wammisa eceleni kwakhe 48 wathi kubo: “Loba ngubani owamukela umntwana lo omncane ngenxa yebizo lami uyangamukela lami, futhi loba ngubani ongamukelayo wamukela lalowo ongithumileyo+ ngoba oziphatha njengomncane kulani lonke nguye omkhulu.”+
49 UJohane wasesithi kuye: “Mfundisi, kulomuntu esimbone ekhipha amadimoni ngebizo lakho, sasesizama ukumalisa ngoba engasuye omunye wethu.”+ 50 Kodwa uJesu wathi kuye: “Lingazami ukumalisa ngoba loba ngubani ongaphikisani lani uyalisekela.”
51 Amalanga okuthi aye ezulwini athi elokhu esondela,+ wazimisela ukuya eJerusalema. 52 Ngakho wathuma izithunywa ukuthi zihambe phambili. Lakanye zahamba zayangena esigabeni samaSamariya zisiyalungiselela ukufika kwakhe. 53 Lanxa kunjalo awazange amamukele+ ngoba wayezimisele ukuya eJerusalema. 54 Abafundi bakhe uJakhobe loJohane+ bathi bebona lokhu bathi: “Nkosi, uyafuna yini ukuthi sibize umlilo, wehle uvela ezulwini ubatshabalalise?”+ 55 Kodwa uJesu watshibilika wabakhuza, 56 wasesuka labafundi bakhe baya kwesinye isigaba.
57 Bathi besendleleni enye indoda yathi kuye: “Ngizakulandela loba ngaphi lapho oya khona.” 58 Kodwa uJesu wathi kuyo: “Amakhanka alemilindi lenyoni zilezidleke, kodwa iNdodana yomuntu yona ayilandawo yokubeka ikhanda.”+ 59 Wasesithi kwenye indoda: “Woba ngumlandeli wami.” Yona yathi: “Nkosi, ngivumela ukuthi ngiqale ngiyengcwaba ubaba.”+ 60 UJesu wathi kuyo: “Yekela abafileyo+ bangcwabe abafileyo babo. Kodwa wena hamba uyememezela uMbuso kaNkulunkulu kuyo yonke indawo.”+ 61 Omunye laye wathi: “Nkosi ngizakulandela kodwa qala ungivumele ukuthi ngiyevalelisa engihlala labo.” 62 UJesu wathi kuye: “UMbuso kaNkulunkulu+ awumfanelanga umuntu othi esebambe ikhuba ngesandla sakhe akhangele izinto ezisemuva.”+
10 Ngemva kwakho konke lokhu iNkosi yakhetha abanye abangu-70, yasibathuma ngababili+ ukuthi bahambe kuqala kuwo wonke amadolobho lakuzo zonke izindawo eyayizakuya kuzo. 2 Yathi kubo: “Manengi amabele okumele avunwe kodwa izisebenzi zilutshwana. Ngakho ncengani iNkosi yokuvuna ukuthi ithumele izisebenzi emsebenzini wayo wokuvuna.+ 3 Hambani kodwa linanzelele ngoba ngilithuma linjengamazinyane ezimvu phakathi kwamaganyana.+ 4 Lingathwali isikhwama semali kumbe esokudla kumbe amanyathela,+ futhi lingabingeleli muntu* emgwaqweni. 5 Loba yiphi indlu elizangena kuyo qalani ngokuthi: ‘Indlu le kayibe lokuthula.’+ 6 Nxa kulomngane wokuthula, ukuthula kwenu kuzakwehlela kuye kodwa nxa engekho kuzabuyela kini. 7 Hlalani kuleyondlu+ lidle futhi linathe lokho abazalinika khona+ ngoba isisebenzi kufanele sithole iholo laso.+ Lingabi lilokhu lithutha lisuka kwenye indlu lisiya kwenye.
8 “Kuloba yiliphi idolobho elizangena kulo balamukele, dlanini okufakwe phambi kwenu, 9 lelaphe abagulayo futhi libatshele lithi: ‘UMbuso kaNkulunkulu ususondele kini.’+ 10 Kodwa kuloba yiliphi idolobho elizangena kulo bangalamukeli, phumani liye emigwaqweni yalo emikhulu lithi: 11 ‘Siluthintithela kini uthuli lwedolobho lenu olunamathele enyaweni zethu.+ Kodwa okumele likwazi yikuthi uMbuso kaNkulunkulu ususondele.’ 12 Ngilitshela ukuthi okuzakwehlela idolobho lelo ngosuku lokwahlulela kuzabe kunzima kakhulu kulalokho okuzakwehlela iSodoma.+
13 “Maye kuwe Khorazini! Maye kuwe Bhethisayida! ngoba aluba izimangaliso ezenzakale kini zazenzakale eThire leSidoni, ngabe abantu balapho kudala baphenduka bahlala emlotheni begqoke izembatho zamasaka.+ 14 Ngakho okuzalehlela nxa sekusahlulelwa kuzabe kunzima kakhulu kulalokho okuzakwehlela iThire leSidoni. 15 Lawe Khaphenawume, uzaphakanyiselwa ezulwini yini? Hatshi! Uzakwehlela engcwabeni.
16 “Loba ngubani olilalelayo uyangilalela lami+ futhi loba ngubani ongelandaba lani kalandaba lami. Kanti njalo lowo ongelandaba lami kalandaba lalowo ongithumileyo.”+
17 Abangu-70 baphenduka bejabula bathi: “Nkosi, lamadimoni ayazehlisa kithi nxa sisebenzisa ibizo lakho.”+ 18 Sebetsho njalo yena wathi kubo: “Ngibona uSathane esewile+ njengombane ovela ezulwini. 19 Zwanini! Ngilinike amandla okunyathela inyoka lenkume, ngalinika lamandla adlula awesitha senu,+ akukho lokukodwa okuzalilimaza. 20 Lanxa kunjalo lingathokoziswa yikuthi amadimoni ayazehlisa kini, kodwa thokoziswani yikuthi amabizo enu asebhaliwe ezulwini.”+ 21 Ngalesosikhathi umoya ongcwele wamenza wathokoza kakhulu wasesithi: “Ngikudumisa phambi kwabo bonke Baba, Nkosi yezulu lomhlaba ngoba izinto lezi uzifihlele abahlakaniphileyo labafundileyo,+ waziveza ebantwaneni abancane. Awu Baba, le yiyo indlela ofuna kube yiyo.”+ 22 UJesu waqhubeka wathi: “UBaba usengiphe zonke izinto. Akulamuntu okwaziyo ukuthi iNdodana ingubani ngaphandle kukaBaba, futhi kakho okwaziyo ukuthi uBaba ungubani ngaphandle kweNdodana+ lalowo iNdodana efuna ukumveza kuye.”+
23 Eqeda lapho wakhuluma labafundi bakhe bebodwa wathi: “Bayathokoza abantu ababona izinto elizibonayo.+ 24 Ngithi kini, amakhosi amanengi labaphrofethi abanengi babefisa ukuzibona izinto elizibonayo kodwa abazibonanga,+ befisa lokuzwa izinto elizizwayo kodwa abazizwanga.”
25 Enye indoda eyayiyisazi soMthetho yasukuma yamlinga isithi: “Mfundisi, kumele ngenzeni ukuze ngizuze ilifa lokuphila okungapheliyo?”+ 26 Wathi kuyo: “EMthethweni kubhalweni? Ukuzwisisa njani lokho okubalayo?” 27 Yona yaphendula yathi: “‘Kumele uthande uJehova* uNkulunkulu wakho ngenhliziyo yakho yonke, langomphefumulo* wonke, langamandla akho wonke, langengqondo yonke,’+ futhi ‘uthande umakhelwane wakho ngendlela ozithanda ngayo.’”+ 28 Wathi kuyo: “Impendulo yakho iqondile. Qhubeka usenza njalo, uzakuzuza ukuphila.”+
29 Kodwa indoda le yayifuna ukutshengisa ukuthi ilungile,+ yasisithi kuJesu: “Ngubani sibili umakhelwane wami?” 30 UJesu wayiphendula wathi: “Kulendoda eyayisehla isuka eJerusalema isiya eJerikho yasihlaselwa yizigebenga, zayikhipha izigqoko zayitshaya zasuka zahamba zayitshiya sokusele udokoza. 31 Omunye umphristi wathi ezihambela esehla ngomgwaqo lowo wayibona indoda leyo kodwa wayiceza, wahambela kwelinye icele. 32 Kwasekufika lomLevi kuleyondawo wayibona indoda leyo, laye wayiceza wahambela kwelinye icele. 33 Kodwa kwafika umSamariya,+ laye ehamba ngalowomgwaqo. Wathi eyibona wayizwela usizi. 34 Ngakho wathela amafutha lewayini emanxebeni ayo wasewabopha, wayikhweza kubabhemi wakhe wahamba layo endlini yezihambi, wafika wayigcina. 35 Ngelanga elilandelayo wakhipha odenariyu* ababili wabanika umnikazi wendlu yokugcina izihambi, wasesithi kuye: ‘Mnakekele, loba yimalini ozayisebenzisa eyedlula lapha ngizabuya ngikubhadala.’ 36 Manje ubona angathi phakathi kwalaba abathathu ngubani owazenza waba ngumakhelwane+ wendoda eyahlaselwa yizigebenga?” 37 Yaphendula yathi: “Ngulowo owaba lesihawu kuyo.”+ UJesu wasesithi kuyo: “Lawe hamba uyekwenza njalo.”+
38 Bathi besaqhubeka ngohambo lwabo wangena kwesinye isigaba, lapho okwakulowesifazana okuthiwa nguMatha.+ Wamamukela kuhle emzini wakhe. 39 Wayelodadewabo okwakuthiwa nguMariya. UMariya wahlala phambi kweNkosi waqhubeka elalele eyayikukhuluma.* 40 Kodwa uMatha wayephathekile ebamba lokhu lalokhuya. Walanda iNkosi wathi: “Nkosi, awulandaba lokuthi udadewethu ungitshiye ngedwa ngisenza izinto zonke? Mtshele abuye azongincedisa.” 41 INkosi yamphendula yathi: “Matha, Matha, ukhathazeke kakhulu ngezinto ezinengi. 42 Kufuneka izinto ezilutshwana kumbe into eyodwa nje. UMariya yena ukhethe okuhle*+ njalo lokho kasoze akuthathelwe.”
11 Ngelinye ilanga wayekwenye indawo ethandaza. Wathi eseqedile omunye umfundi wakhe wathi kuye: “Nkosi, sifundise ukuthandaza njengoba nje loJohane wafundisa abafundi bakhe.”
2 Ngakho wathi kubo: “Zikhathi zonke thandazani lithi: ‘Baba, kalingcweliswe*+ ibizo lakho. UMbuso wakho kawuze.+ 3 Siphe ukudla kwethu* usuku ngalunye, kusiya ngalokho esikuswelayo.+ 4 Usithethelele izono zethu+ ngoba lathi siyabathethelela bonke abasonelayo,*+ njalo ungasingenisi ekulingweni.’”+
5 Wasesithi kubo: “Ake sithi omunye wenu ulomngane, abesesiya kuye phakathi laphakathi kobusuku afike athi, ‘Mngane, akungiboleke izinkwa ezintathu. 6 Ngisanda kuvakatshelwa ngumngane wami ovela khatshana, manje angilalutho engingamupha lona.’ 7 Kodwa yena amphendule esendlini athi: ‘Yekela ukungihlupha. Umnyango ukhiywe kudala, mina labantwabami sesilele. Ngeke ngivuke ngikuphe.’ 8 Ngilitshela ukuthi lanxa ubengeke avuke amuphe ngoba engumngane wakhe, uzavuka loba sekutheni amuphe loba yini ayifunayo ngenxa yokuthi uyaphikelela.+ 9 Ngakho ngithi kini, qhubekani licela+ lizaphiwa, qhubekani lidinga lizathola, qhubekani liqoqoda lizavulelwa+ 10 ngoba wonke umuntu ocelayo uyaphiwa,+ lomuntu wonke odingayo uyathola futhi wonke umuntu oqoqodayo uzavulelwa. 11 Kambe phakathi kwenu kulobaba ongathi indodana yakhe icela inhlanzi ayiqhubele inyoka kulokuthi ayinike inhlanzi?+ 12 Nxa ingacela iqanda, angayiqhubela inkume yini? 13 Ngakho nxa lina eliyizoni lisenelisa ukupha abantwabenu izipho ezinhle, kutsho ukuthi uBaba osezulwini uzimisele kakhulu ukubapha umoya ongcwele labo abawucela kuye!”+
14 Ngemva kwesikhathi wakhipha idimoni elalisenza ukuthi enye indoda ibe yisimungulu.+ Lathi seliphumile yakhuluma, abantu bamangala.+ 15 Kodwa abanye babo bathi: “Umuntu lo ukhipha amadimoni ngoBhelizebhubhi,* umbusi wamadimoni.”+ 16 Abanye bamlinga besithi abatshengise isibonakaliso+ esivela ezulwini. 17 Esazi ababekucabanga+ wathi kubo: “Loba yiwuphi umbuso owehlukene phakathi uyadilika, lemuli* eyehlukene phakathi iyachitheka. 18 Pho nxa uSathane eyehlukene phakathi, umbuso wakhe uzakuma njani? Phela lithi ngikhipha amadimoni ngoBhelizebhubhi. 19 Nxa mina ngikhipha amadimoni ngoBhelizebhubhi, amadodana enu wona awakhipha ngobani? Yikho amadodana enu ezalahlulela. 20 Kodwa nxa kuyikuthi ngikhipha amadimoni ngomunwe kaNkulunkulu,+ uMbuso kaNkulunkulu usulifice lilibele sibili.+ 21 Nxa indoda elamandla futhi ehlome yaphelela ilinde isigodlo sayo, akulamuntu ongathinta impahla yayo. 22 Kodwa nxa kungafika umuntu olamandla kulayo ayihlasele ayinqobe, uyathatha zonke izikhali zayo ebizithembile abesenika abanye izinto ayithathele zona. 23 Loba ngubani ongangisekeliyo uphikisana lami futhi loba ngubani ongancedisani lami ukubutha, uyachithiza.+
24 “Nxa idimoni lingaphuma emuntwini, liyadlula ezindaweni ezomileyo lidinga indawo yokuphumula, beselisithi lingayiswela lithi, ‘Ngizabuyela endlini yami lapho engathutha khona.’+ 25 Lingathi lifika lithole indlu leyo ithanyelwe yahlanzeka njalo yaceciswa, 26 liyasuka lihambe liyethatha amanye amadimoni ayisikhombisa, amabi kakhulu kulalo, afike angene ahlale khona. Ngakho isiphetho salowomuntu sicina sesisibi kulesiqalo sakhe.”
27 UJesu wathi esakhuluma, omunye owesifazana wamemeza phakathi kwabantu wathi kuye: “Siyathokoza isisu esakuthwalayo lamabele akumunyisayo!”+ 28 Kodwa yena wathi: “Hatshi, abathokozayo yilabo abalizwayo ilizwi likaNkulunkulu balilandele!”+
29 Abantu bathi belokhu bebuthana besiba banengi, uJesu wathi: “Isizukulwane lesi sibi, sidinga isibonakaliso kodwa akulasibonakaliso esizasiphiwa ngaphandle kwesibonakaliso sikaJona.+ 30 INdodana yomuntu izakuba yisibonakaliso esizukulwaneni lesi, njengoba nje uJona+ waba yisibonakaliso ebantwini beNiniva. 31 Indlovukazi yaseningizimu+ izavuswa labantu balesisizukulwane ngesikhathi sokwahlulelwa futhi izakwenza kukhanye ukuthi balecala, ngoba yona yabuya ivela emaphethelweni omhlaba izokuzwa ukuhlakanipha kukaSolomoni. Kodwa okulapha kukhulu kuloSolomoni!+ 32 Abantu beNiniva bazavuswa lalesisizukulwane ngesikhathi sokwahlulelwa njalo bazakwenza kukhanye ukuthi silecala ngoba bona baphenduka sebezwe intshumayelo kaJona.+ Kodwa okulapha kukhulu kuloJona! 33 Nxa umuntu angalumathisa isibane, kasifaki endaweni ecatshileyo njalo kasimbokothi ngebhasikiti,* kodwa usifaka phezu koluthi lwesibane+ ukuze sikhanyisele abangenayo. 34 Isibane somzimba lilihlo. Nxa ilihlo lakho lithe nhlo entweni eyodwa* umzimba wakho wonke uyakhanya,* kodwa nxa ilihlo lakho lilomhawu,* umzimba wakho uba mnyama.+ 35 Ngakho woba leqiniso lokuthi ukukhanya okukuwe kayisibo bumnyama. 36 Nxa umzimba wakho wonke ukhanya futhi ungelandawo emnyama, wonke uzakhanya njengesibane esikukhanyiseleyo.”
37 Esetsho njalo, omunye umFarisi wamcela ukuthi azokudla laye. Wasehamba endlini yakhe wafika wahlala phansi ukuze adle. 38 UmFarisi lo wamangala embona esidla engaqalanga wageza izandla.*+ 39 Kodwa iNkosi yathi kuye: “Lina baFarisi, ligezisa ingaphandle yenkomitsho leyomganu kodwa ngaphakathi ligcwele ubuhwaba lobubi.+ 40 Bantu abangelangqondo! Kanti lowo owenza ingaphandle ayisuye yini owenza lengaphakathi? 41 Nxa lisipha abayanga izipho* bapheni ngenhliziyo yonke. Lingenza njalo, lizahlambuluka ngokupheleleyo. 42 Maye kini baFarisi ngoba linikela okwetshumi kweminti lokweruwi* kanye lokwezilimo zonke elizilima engadini,+ kodwa alizihluphi ngokuthanda uNkulunkulu lokwahlulela kwakhe okuhle! Bekufanele sibili linikele okwetshumi, kodwa lalokhu okunye bekumele likuqakathekise.+ 43 Maye kini baFarisi ngoba lithanda ukuhlala ezitulweni eziphambili* emasinagogeni lokubingelelwa emakethe!+ 44 Maye kini ngoba linjengamangcwaba angakhanyi kuhle,+ abantu abahamba phezu kwawo bengazi!”
45 Omunye owayeyisazi soMthetho wamphendula wathi: “Mfundisi, nxa ususitsho njalo usuthethisa lathi phela.” 46 UJesu wasesithi: “Maye lakini zazi zoMthetho ngoba lithwalisa abantu imithwalo esindayo, kodwa lina kaliyithinti langomunwe!+
47 “Maye kini ngoba lakha amathuna abaphrofethi, kodwa bona babulawa ngokhokho benu!+ 48 Litshengisa ukuthi liyakwazi okwenziwa ngokhokho benu. Lanxa kunjalo livumelana lezenzo zabo. Babebulala abaphrofethi,+ kodwa lina selisakha amathuna alabobaphrofethi. 49 Yikho ngokuhlakanipha kwakhe uNkulunkulu wathi:* ‘Ngizathumela abaphrofethi labaphostoli kubo, abanye bazababulala abanye babahlukuluze, 50 ukuze igazi labo bonke abaphrofethi elachitheka kusukela ekusungulweni komhlaba libe phezu kwalesisizukulwane,+ 51 kusukela egazini lika-Abela+ kusiya egazini likaZakhariya owabulawelwa phakathi laphakathi kwe-alithare kanye lethempeli.’+ Ngilitshela ukuthi amacala la azakwetheswa lesisizukulwane.
52 “Maye kini lina zazi zoMthetho ngoba lathathela abantu ikhiye yolwazi. Lina alizange lingene futhi livalela lalabo abafuna ukungena!”+
53 Ngakho wathi ephuma lapho ababhali labaFarisi baqalisa ukumhlasela ngeminye imibuzo eminengi, bengasamniki sona isikhala sokuphefumula. 54 Babemthiyile befuna ukumbamba ngalokho ayengakutsho.+
12 Ngalesosikhathi kwabuthana izinkulungwane zabantu. Babebanengi kakhulu sebeze benyathelana. UJesu waqalisa ngokukhuluma labafundi bakhe wathi: “Qaphelani imvubelo yabaFarisi yokuzenzisa.+ 2 Phela akulalutho olufihliweyo olungasoze luvezwe futhi akulalutho oluyimfihlo olungasoze lwaziwe.+ 3 Ngakho loba kuyini elikukhuluma emnyameni kuzazwakala ekukhanyeni, lalokho elikunyenyeza lizivalele ezindlini kuzatshunyayelwa phezu kwezindlu. 4 Ngithi kini bangane bami,+ lingabesabi abangalibulala kodwa bengenelisi ukwenza okunye ngemva kwalokho.+ 5 Kodwa zwanini ukuthi ngubani okumele limesabe: Yesabani lowo olamandla okuthi nxa engabulala umuntu amphosele eGehena.*+ Ngithi kini, yesabani yena kuphela.+ 6 Intaka ezinhlanu zithengiswa ngenhlamvu ezimbili zemali* ezingatsho lutho. Lanxa kunjalo, ayikho leyodwa uNkulunkulu ayikhohlwayo.*+ 7 Ngitsho lenwele ezisemakhanda enu zibaliwe zonke.+ Lingesabi, lina liqakatheke kakhulu kulentaka ezinengi.+
8 “Ngithi kini, wonke umuntu ovuma iNdodana yomuntu phambi kwabantu,+ layo izamvuma phambi kwezingilosi zikaNkulunkulu.+ 9 Kodwa loba ngubani oyiphika phambi kwabantu, laye uzaphikwa phambi kwezingilosi zikaNkulunkulu.+ 10 Wonke umuntu othuka iNdodana yomuntu uzathethelelwa, kodwa loba ngubani othuka umoya ongcwele kasoze athethelelwe.+ 11 Nxa sebelithonisisa ezinkundleni,* laphambi kweziphathamandla zikahulumende kanye lababusi, lingakhathazeki ngokuthi lizakuthini langokuthi lizawabeka njani amazwi enu lizivikela, loba ngokuthi lizakhulumani+ 12 ngoba umoya ongcwele uzalifundisa ngalesosikhathi izinto okufanele lizitsho.”+
13 Kusenjalo enye indoda eyayiphakathi kwabantu yathi kuye: “Mfundisi, tshela umfowethu ukuthi angabele lami ilifa.” 14 Wathi kuyo: “Ndoda, ngubani ongibeke ukuthi ngibe ngumahluleli loba umlamuli wenu lobabili?” 15 Wasesithi kubo: “Hlalani livule amehlo, liqaphele yonke imihlobo yobuhwaba+ ngoba lanxa umuntu elokunengi, izinto alazo ayisizo ezimnika impilo.”+ 16 Wasebalandisela umzekeliso wathi: “Insimu yenye indoda enothileyo yathela kakhulu. 17 Yikho yathi enhliziyweni yayo, ‘Pho ngizakwenzani njengoba ngingaselandawo yokufaka amabele ami?’ 18 Yasisithi, ‘Nanku engizakwenza:+ Ngizadiliza iziphala zami ngakhe ezinkulu, ngifake khona wonke amabele ami lezinto zami zonke, 19 besengisithi enhliziyweni yami: “Ulezinto ezinengi ezinhle ozigcinileyo ozazisebenzisa okweminyaka eminengi elandelayo. Khululeka udle, unathe uzikholisele.”’ 20 Kodwa uNkulunkulu wathi kuye, ‘Wena sithuthandini, lamuhla ebusuku uzakufa. Manje ngubani ozathatha izinto ozibutheleleyo?’+ 21 Lokhu yikho okuzakwenzakala emuntwini obuthelela inotho kodwa enganothanga kuNkulunkulu.”+
22 Ngemva kwalokho wathi kubafundi bakhe: “Yikho ngithi kini, yekelani ukukhathazeka ngempilo yenu, ukuthi lizakudlani, kumbe ngemizimba yenu, ukuthi lizagqokani.+ 23 Impilo iqakathekile kulokudla, lomzimba uqakathekile kulezigqoko. 24 Cabangani ngamawabayi: Kawahlanyeli futhi kawavuni njalo awalaziphala loba izindlu zokugcinela ukudla. Kodwa uNkulunkulu uyawanika ukudla.+ Kanti lina aliqakathekanga kakhulu kulenyoni yini?+ 25 Ngubani phakathi kwenu ongangezelela umzuzu owodwa* nje empilweni yakhe ngokukhathazeka? 26 Pho nxa lisehluleka ukwenza into encane kangaka, kungani likhathazeka ngezinye izinto?+ 27 Khumbulani ukuthi amaluba eganga akhula njani: Kawasebenzi njalo kaweluki, kodwa ngilitshela ukuthi ngitsho loSolomoni enkazimulweni yakhe yonke kazange acece njengelilodwa lawo.+ 28 Manje nxa uNkulunkulu ezigqokisa njalo izinto ezimila egangeni, ezibakhona lamuhla kusasa ziphoselwe emlilweni, ngeke yini aligqokise ngcono lina elilokholo oluncane? 29 Ngakho yekelani ukukhathazeka ngokuthi lizakudlani langokuthi lizanathani. Yekelani ukukhathazeka kakhulu+ 30 ngoba zonke izinto lezi yizo abantu bomhlaba abazidinga ngamehlo abomvu. UYihlo uyakwazi ukuthi liyaziswela.+ 31 Kodwa qhubekani lifuna uMbuso wakhe, izinto lezi lazo lizaziphiwa.+
32 “Lingesabi mhlambi omncane+ ngoba uYihlo kuyamthokozisa ukulinika uMbuso.+ 33 Thengisani impahla yenu liphe abayanga izipho.*+ Yenzani izikhwama zemali ezingagugiyo, eziyinotho engapheliyo ezulwini,+ lapho isela elingeke lisondele khona lalapho engeke idliwe khona yizibungu.* 34 Phela lapho okulenotho yenu khona, yikho lapho okuzakuba lezinhliziyo zenu khona.
35 “Gqokani lihlale lizilungiselele,*+ lezibane zenu zihlale zibhebha.+ 36 Kumele libe njengamadoda amelele inkosi yawo esemtshadweni+ ukuthi iphenduke+ ukuze nxa ifika iqoqoda, ahle ayivulele. 37 Ziyathokoza lezozinceku inkosi ezithola zilindile! Ngiqinisile ngithi kini, izagqoka impahla zomsebenzi itshele izinceku ukuthi zihlale etafuleni, ibisisondela iziphe ukudla. 38 Nxa ingafika ngomlindo wesibili* loba owesithathu* izithole zizilungiselele, zizathokoza kakhulu! 39 Kodwa nanku okumele likwazi: Aluba umnikazi wendlu ubekwazi ukuthi isela lizakuza ngaliphi ihora, ubengeke avume ukuthi indlu yakhe igqekezwe.+ 40 Lani hlalani lizilungiselele ngoba iNdodana yomuntu izakuza ngehora elingalicabangeliyo.”+
41 UPhetro wasesithi: “Nkosi, umzekeliso lo uwutshela thina kuphela kumbe uwutshela labanye bonke?” 42 INkosi yathi: “Ngubani sibili umphathi* othembekileyo lohlakaniphileyo, lowo inkosi yakhe ezambeka ukuthi akhangele izisebenzi zayo* ukuze aqhubeke ezinika ukudla okwaneleyo ngesikhathi esifaneleyo?+ 43 Izathokoza kakhulu inceku leyo nxa inkosi yayo ingathi ifika iyithole isenza njalo! 44 Ngiqinisile ngithi kini, inkosi izayibeka ukuthi ikhangele konke okungokwayo. 45 Kodwa nxa inceku leyo ingathi enhliziyweni yayo, ‘Inkosi yami isiphuzile ukubuya,’ ibisiqalisa ukutshaya izinceku lezincekukazi esebenza lazo, idle futhi inathe idakwe,+ 46 inkosi yayo izabuya ngelanga inceku leyo engalikhangelelanga langehora engalaziyo njalo izayijezisa ngendlela ebuhlungu kakhulu, ibisiyihambisa endaweni elabantu abangathembekanga. 47 Inceku ezwisise okufunwa yinkosi yayo kodwa yekela ukuzilungiselela lokwenza ekutshelwe yinkosi* izatshaywa kakhulu.+ 48 Kodwa leyo engazange izwisise yasisenza izinto ezenza ifanele ukutshaywa, izatshaywa kancane. Wonke umuntu ophiwe okunengi kuzafuneka okunengi kuye, lalowo obekwe ukuthi akhangele izinto ezinengi kuzafuneka okunengi kakhulu kuye.+
49 “Ngalanda ukuzolumathisa umlilo emhlabeni. Pho kuyini okunye engingakufuna nxa usulumathile? 50 Kulobhabhathizo okumele ngibhabhathizwe ngalo njalo ngizahlala ngikhathazeke kakhulu luze lwenzakale!+ 51 Kanti libona angani ngalanda ukuzoletha ukuthula emhlabeni? Angilandanga lokho kodwa ngalanda ukuzoletha ukwehlukana.+ 52 Kusukela khathesi kuzakuthi kulabahlanu emulini behlukane, abathathu bexabana lababili, lababili bexabana labathathu. 53 Kuzakuba lokwehlukana phakathi kukababa lendodana, laphakathi kwendodana loyise, phakathi kukamama lendodakazi, laphakathi kwendodakazi lonina, phakathi kukamamazala lomalukazana, laphakathi kukamalukazana loninazala.”+
54 Wasesithi ebantwini: “Nxa libona iyezi liqubuka entshonalanga lihle lithi, ‘Kuza izulu elikhulu,’ lakanye kwenzakale. 55 Nxa lingabona kuvunguza umoya ovela eningizimu lithi, ‘Lizatshisa bhe,’ lakanye kube njalo. 56 Bazenzisi, liyakwazi ukuhlola umumo womkhathi. Manje kungani lingenelisi ukuhlola okwenzakala khathesi?+ 57 Kungani lingahluleli lina ukuthi kuyini okulungileyo? 58 Ngokwesibonelo, nxa usiya kumbusi lalowo okumangalela emthethweni, zama ukulungisa ingxabano yenu lisesendleleni ukuze angakuhambisi kumahluleli, umahluleli abesekudlulisela epholiseni lomthethwandaba, lona beselikufaka ejele.+ 59 Ngikutshela ukuthi awusoze uphume lapho uze ubhadale uhlamvu lokucina lwemali* olayo.”
13 Ngalesosikhathi abanye ababelapho bamtshela ngabantu beGalile ababebulewe nguPhilathu ngesikhathi benikela imihlatshelo yabo. 2 UJesu wabaphendula wathi: “Licabanga ukuthi amaGalile lawo ehlelwa yizinto lezo ngoba ayelezono ezimbi kulezabantu bonke beGalile? 3 Hatshi, ngilitshela ukuthi lonke lizatshabalala njengabo nxa lingaphendukanga.+ 4 Kumbe licabanga ukuthi abangu-18 abafayo baze bawelwe ngumphotshongo weSilowami babelezono ezinkulu kulezabantu bonke beJerusalema? 5 Hatshi, ngilitshela ukuthi lonke lizatshabalala njengabo nxa lingaphendukanga.”
6 Wabatshela umzekeliso wathi: “Kulomuntu owayelesihlahla somkhiwa ensimini yakhe yamagilebisi. Wahamba wayadinga izithelo kuso kodwa wathola singazalanga.+ 7 Ngakho wathi kulowo owayekhangela insimu, ‘Lo sekungumnyaka wesithathu ngizodinga izithelo esihlahleni lesi kodwa ngingatholi lutho. Sigamule! Kanti siyabe sigcinelwani sona siqeda indawo?’ 8 Yena waphendula wathi, ‘Nkosi siyekele okomnyaka owodwa ngiqale ngigebhe emaceleni aso ngithele umquba. 9 Nxa singathela izithelo kuyabe kukuhle, kodwa kungehlula usungasigamula.’”+
10 Ngelinye ilanga kuliSabatha wayefundisa kwenye isinagogi. 11 Kwakulowesifazana owayeledimoni elaselimgulise okweminyaka engu-18 njalo wayehlala ekhotheme, esehluleka ukuma aqonde. 12 UJesu wathi embona wathi kuye: “Dadewethu, ususilisiwe emkhuhlaneni wakho.”+ 13 Wasembeka izandla, wahle wama waqonda waqalisa ukukhazimulisa uNkulunkulu. 14 Umphathi wesinagogi wacaphuka ebona uJesu eselapha ngeSabatha, wasesithi ebantwini: “Kulamalanga ayisithupha okusebenza,+ libobuya lizokwelatshwa ngalawo malanga, lingabuyi ngeSabatha.”+ 15 Kodwa iNkosi yamphendula yathi: “Bazenzisi,+ ukhona yini phakathi kwenu ongayivuleliyo inkunzi yakhe kumbe ubabhemi wakhe ngelanga leSabatha ayemnathisa?+ 16 Bekungamelanga yini owesifazana lo oyindodakazi ka-Abrahama obesehlukuluzwe nguSathane okweminyaka engu-18 akhululwe ngelanga leSabatha?” 17 Wathi esekutshilo lokhu, bonke ababemphikisa baba lenhloni kodwa abantu bonke bathokoza ngenxa yazo zonke izimangaliso ayezenza.+
18 Wasesithi: “UMbuso kaNkulunkulu unjengani? Ngingawufanisa lani? 19 Unjengentanga yemastadi eyathathwa ngumuntu wayihlanyela ensimini yakhe, yakhula yaba yisihlahla, inyoni zasezihlala ezingatsheni zaso.”+
20 Waphinda wathi: “Ngingawufanisa lani uMbuso kaNkulunkulu? 21 Unjengemvubelo eyathathwa ngowesifazana wayihlanganisa lefulawa enengi,* inhlama yonke yaze yakhukhumala.”+
22 Wahamba engena idolobho ngedolobho lesigaba ngesigaba efundisa njalo waqhubeka ngohambo lwakhe lokuya eJerusalema. 23 Enye indoda yathi kuye: “Nkosi, balutshwana yini abazasindiswa?” Yena wathi kubo: 24 “Zamani ngamandla wonke ukungena ngomnyango omncane+ ngoba ngilitshela ukuthi abanengi bazafuna ukungena kodwa abasoze benelise. 25 Nxa umnikazi wendlu angasukuma akhiye umnyango, lizakuma phandle liqoqode lisithi, ‘Nkosi sivulele.’+ Kodwa yena uzakuthi kini: ‘Angikwazi ukuthi lingabangaphi.’ 26 Lina beselisithi, ‘Sasisidla sinatha lawe njalo wawufundisa emigwaqweni yethu emikhulu.’+ 27 Kodwa uzakuthi kini, ‘Angikwazi ukuthi lingabangaphi. Sukani phansi kwami lonke lina elenza okungalunganga!’ 28 Yikho lapho elizakhala khona litshayanise amazinyo, selibona u-Abrahama lo-Isaka loJakhobe kanye labo bonke abaphrofethi beseMbusweni kaNkulunkulu, kodwa lina seliphoselwe ngaphandle.+ 29 Abantu bazabuya bevela empumalanga, lentshonalanga, lenyakatho kanye leningizimu futhi bazahlala etafuleni eMbusweni kaNkulunkulu. 30 Kulabokucina abazakuba ngabokuqala, labokuqala abazakuba ngabokucina.”+
31 Ngalesosikhathi walandwa ngabanye abaFarisi bafika bathi kuye: “Suka lapha uhambe ngoba uHerodi ufuna ukukubulala.” 32 Yena wathi kubo: “Hambani liyetshela ikhanka leliyana ukuthi ngithe: ‘Lalela, lamuhla lakusasa ngizabe ngikhipha amadimoni ngiselapha labagulayo, kodwa ngizabe sengiqedile ngelanga lesithathu.’ 33 Kungasenani ngizaqhubeka ngohambo lwami lamuhla lakusasa laphambi kwakusasa ngoba akwenzeki ukuthi umphrofethi abulawelwe ngaphandle kweJerusalema.+ 34 Jerusalema, Jerusalema, mbulali wabaphrofethi! Wena obakhanda ngamatshe labo abathunywe kuwe.+ Kunini ngifuna ukubuthela abantwabakho ndawonye njengesikhukhukazi sibuthela amatsiyane aso ngaphansi kwamaphiko aso! Kodwa wena awuvumanga.+ 35 Khangelani manje! Indlu yenu isideliwe yatshiyelwa lina.+ Ngilitshela ukuthi alisoze langibona futhi lize lithi: ‘Ubusisiwe lowo oza ngebizo likaJehova!’”*+
14 Ngelinye ilanga kuliSabatha wahamba wayakudla endlini yomunye wabakhokheli babaFarisi. Abantu ababelapho babemkhangele ngelihlo lokhozi. 2 Phambi kwakhe kwakulendoda eyayilomkhuhlane wokuvuvuka inyawo lezandla. 3 Ngakho uJesu wabuza izazi zoMthetho labaFarisi wathi: “Kusemthethweni yini ukwelapha ngeSabatha kumbe akukho emthethweni?”+ 4 Kodwa bathula zwi. Wasebamba indoda eyayigula wayelapha, wayitshela ukuthi ihambe. 5 Ngemva kwalokho wathi kubo: “Ngubani phakathi kwenu ongathi indodana yakhe kumbe inkunzi yakhe iwele emthonjeni+ ngelanga leSabatha ayekele ukuyikhipha masinyane?”+ 6 Baswela lokuthi bamphendule bathini.
7 UJesu wathi enanzelela ukuthi ababenxusiwe babekhetha ukuhlala ezindaweni zabahlonitshwa,+ wabatshela umzekeliso wathi: 8 “Nxa unxuswe edilini lomtshado, ungafiki uhlale ezindaweni zabahlonitshwa+ ngoba kungenzeka ukuthi kulomunye oqakatheke kulawe onxusiweyo kulelodili, 9 besekusithi lowo olinxusileyo abuye athi kuwe, ‘Sukuma khonapho kuhlale indoda le,’ usuke usulenhloni usiya endaweni ephansi kulazo zonke. 10 Ngakho nxa unxusiwe hamba uyehlala endaweni ephansi kulazo zonke ukuze kuthi nxa indoda ekunxusileyo ifika, ithi kuwe, ‘Mngane, buya uzohlala phambili.’ Lapho-ke uzahlonitshwa yibo bonke abanxusiweyo+ 11 ngoba wonke umuntu oziphakamisayo uzakwehliswa futhi loba ngubani ozehlisayo uzaphakanyiswa.”+
12 Ngemva kwalokho wathi endodeni eyayimnxusile: “Nxa usenza idili kumbe ubiza abantu ekudleni kwantambama, ungabizi abangane bakho kumbe abafowenu kumbe izihlobo zakho kumbe omakhelwane bakho abanothileyo ngoba labo bangakunxusa besekusiba yimbadalo kuwe. 13 Kodwa nxa usenza idili nxusa abayanga, labagogekileyo, labaqhulayo labayiziphofu.+ 14 Ungenza njalo uzathokoza ngoba abalalutho abangakubhadala ngalo. Uzabhadalwa nxa sekuvuswa+ abalungileyo.”
15 Omunye owayenxusiwe wathi ekuzwa lokhu wathi kuye: “Uyathokoza odla* eMbusweni kaNkulunkulu.”
16 UJesu wasesithi kuye: “Kulendoda eyenza idili elikhulu ntambama+ yasinxusa abantu abanengi. 17 Kwathi sekuyisikhathi sokudla yathuma inceku yayo ukuthi iyekuthi kwabanxusiweyo, ‘Buyani ngoba konke sekulungile.’ 18 Kodwa bonke baqalisa ukukhuluma lokhu lalokhuya.+ Owokuqala wathi kuyo, ‘Ngithenge insimu, manje ngifuna ukuyayibona, ngicela ungixolisele.’ 19 Omunye wathi, ‘Ngithenge izipani zenkomo ezinhlanu,* ngisayazikhangela, ngicela ungixolisele.’+ 20 Omunye laye wathi, ‘Ngeke ngenelise ukubuya ngoba ngisanda kutshada.’ 21 Inceku yasiphenduka yatshela inkosi yayo konke ababekutshilo. Inkosi yendlu yazonda yasisithi encekwini yayo, ‘Phangisa uye emigwaqweni emikhulu lasezindledlaneni zedolobho, uyebiza abayanga, labagogekileyo, leziphofu kanye labaqhulayo.’ 22 Ngemva kwesikhathi inceku yathi, ‘Nkosi sengikwenzile ongithume khona kodwa indawo isesekhona.’ 23 Inkosi yasisithi encekwini yayo, ‘Hamba emigwaqweni lasezindleleni uyekhuthaza abantu ukuthi babuye ukuze indlu yami igcwale.+ 24 Ngithi kuwe kakho loyedwa kulabo ebengibanxusile ozanambitha ukudla kwami kwantambama.’”+
25 Kwakulabantu abanengi ababehamba laye. Watshibilika wathi kubo: 26 “Loba ngubani oza kimi kodwa engamzondi* uyise, lonina, lenkosikazi yakhe, labantwabakhe, labafowabo, labodadewabo, ngitsho lempilo yakhe,*+ ngeke abe ngumfundi wami.+ 27 Loba ngubani ongathwali isigodo sakhe sokuhlutshwa* angilandele ngeke abe ngumfundi wami.+ 28 Kambe ngubani phakathi kwenu ongathi efuna ukwakha umphotshongo* angaqali ahlale phansi abale izindleko ukuze abone ukuthi izinto alazo ziyenela yini ukuthi awakhe awuqede? 29 Phela uzakuthi eseyakhe isisekelo sawo ehluleke ukuwuqeda, bonke abakhangeleyo besebemhleka 30 besithi: ‘Umuntu lo waqalisa ukwakha kodwa wehluleka ukuqeda.’ 31 Kumbe yiphi inkosi engathi ilamasotsha angu-10 000 isuke iyekulwa lenkosi elamasotsha angu-20 000 ingaqalanga yahlala phansi yabonisana labanye bayo ukuthi iyenelisa yini ukulwisana lenkosi leyo? 32 Nxa ibona ukuthi izanqotshwa, iyathuma abameli enkosini leyo bayihlangabeze isesekhatshana, icele ukuthi kube lokuthula. 33 Lani hlalani likwazi ukuthi kakho loyedwa phakathi kwenu ongaba ngumfundi wami engazange atshiye* yonke impahla yakhe.+
34 “Isawudo lihle sibili. Kodwa nxa isawudo lingaba duma, lingafakwani ukuze liphinde libe munyu?+ 35 Kuyabe kungasancedi ukulithela emhlabathini kumbe emqubeni, yikho abantu belilahla. Lowo olendlebe zokulalela, kalalele.”+
15 Zonke izoni labo bonke abathelisi babelokhu bembuthanela ukuze bamuzwe.+ 2 AbaFarisi lababhali babengunguna besithi: “Indoda le yamukela izoni njalo idla lazo.” 3 Ngakho wabalandisela umzekeliso wathi: 4 “Ngubani phakathi kwenu ongathi elezimvu ezingu-100 abeselahlekelwa ngeyodwa, ongeke atshiye ezingu-99 egangeni ayedinga elahlekileyo aze ayithole?+ 5 Uzathi eseyitholile, ayithwale emahlombe esethabile. 6 Nxa efika ngekhaya uyabuthanisa abangane bakhe labomakhelwane athi kubo, ‘Thokozani lami ngoba sengiyitholile imvu yami ebilahlekile.’+ 7 Ngilitshela ukuthi lasezulwini kuba lentokozo enkulu ngenxa yesoni esisodwa esiphendukayo,+ kulaleyo ebakhona ngenxa yabangu-99 abalungileyo okungadingakaliyo ukuthi baphenduke.
8 “Kumbe ukhona yini owesifazana ongathi elamadrakhima* alitshumi abeselahlekelwa ngelilodwa, ongeke alumathise isibane athanyele indlu yakhe, alidinge yonke indawo aze alithole? 9 Uzathi eselitholile abuthanise abangane bakhe labomakhelwane athi, ‘Thokozani lami ngoba sengilitholile idrakhima* lami ebelilahlekile.’ 10 Ngilitshela ukuthi lezingilosi zikaNkulunkulu ziyathokoza nxa isoni esisodwa siphenduka.”+
11 Waqhubeka wathi: “Kulomuntu owayelamadodana amabili. 12 Encane yathi kuyise, ‘Baba, ngicela ungabele impahla okumele ibe lilifa lami.’ Ngakho wawapha womabili impahla okwakumele ayithole. 13 Ngemva kwensukwana, indodana yakhe encane yathatha zonke izinto zayo yaya elizweni elikhatshana, yafika yachitha yonke impahla yayo ngokuphila impilo yokuxhwala.* 14 Ithe isithintithe konke eyayilakho, kwaba lendlala enzima kulo lonke ilizwe lelo. Yaqalisa ukuswela 15 yaze yasuka yayaqhatshwa ngesinye isakhamuzi sakulelolizwe esayithuma ukuthi iyekwelusa ingulube+ zayo egangeni. 16 Akulamuntu owayeyinika ukudla futhi yayisize ifisa lokudla ukudla kwengulube lezo.
17 “Kuthe kusithi dlwe engqondweni yayo yathi, ‘Kambe bangaki abantu abaqhatshwe ngubaba abadla isinkwa baze basitshiye, mina ngilokhu ngilapha ngibulawa yindlala? 18 Ngizasuka lapha ngiye kubaba, ngifike ngithi kuye: “Baba, ngonele izulu ngakonela lawe. 19 Akusangifanelanga ukubizwa ngokuthi ngiyindodana yakho. Ngicela ukuthi lami ngibe yisisebenzi sakho.”’ 20 Ngakho yasuka yaya kuyise. Yathi isesekhatshana, uyise wathi mehlo suka wayibona wayizwela, wasegijima wafika wayigona* wayiqabuza. 21 Indodana yakhe yasisithi kuye, ‘Baba, ngonele izulu ngakonela lawe.+ Akusangifanelanga ukubizwa ngokuthi ngiyindodana yakho.’ 22 Kodwa uyise wathi ezincekwini zakhe, ‘Phangisani! Lethani ijazi elihle kulawo wonke limgqokise, lifake indandatho emunweni wakhe, limgqokise lamanyathela enyaweni. 23 Lethani lethole elinonileyo lilihlabe senze idili sidle 24 ngoba indodana yami le ibifile kodwa isiphila,+ ibilahlekile kodwa isitholakele.’ Basebeqalisa ukuzikholisela.
25 “Ngalesosikhathi indodana yakhe endala yayisemasimini. Yathi isizafika endlini ivela emasimini yezwa izingoma labantu ababegida, 26 yasibiza enye inceku yayibuza ukuthi kwakusenzakalani. 27 Inceku yathi kuyo, ‘Umfowenu ubuyile njalo uyihlo umhlabele iguqa elinonileyo ngoba uphenduke eziphilele.’ 28 Kodwa indodana endala yazonda yala ukungena. Uyise waseyilanda waqalisa ukuyincenga, 29 yona yathi kuyise, ‘Iminyaka yonke le bengikusebenzela futhi ngikulalela sonke isikhathi, kodwa awuzange uke ungiphe izinyane lokuthi ngidle ngizikholisele labangane bami. 30 Kodwa indodana yakho le eyatshaphaza impahla yakho lezifebe ithe ifika nje wayihlabela ithole elinonileyo.’ 31 Yena wathi kuyo, ‘Ndodana yami, ubulokhu ulami futhi konke okungokwami ngokwakho. 32 Lanxa kunjalo bekufanele silenze idili sithokoze ngoba umfowenu ubefile kodwa usephila, ubelahlekile kodwa usetholakele.’”
16 Waqhubeka wathi kubafundi bakhe: “Kulendoda enothileyo eyayilomphathi* owayesolwa ngokuthi uphatha butshapha impahla yayo. 2 Ngakho yambiza yathi kuye, ‘Kuyini lokhu engikuzwayo ngawe? Ngipha umbiko wokuthi ubuyiphatha njani impahla yami ngoba ungeke uqhubeke ukhangela indlu yami.’ 3 Umphathi wathi enhliziyweni yakhe, ‘Manje ngizakwenzani njengoba inkosi yami isingithathela umsebenzi wokuba ngumphathi? Angilamandla okugebha futhi ngilenhloni zokucela. 4 Ya! Sengikwazi ukuthi ngizakwenzani ukuze abantu bangamukele emizini yabo nxa sengixotshiwe emsebenzini.’ 5 Ngakho wabiza labo ababelezikwelede zenkosi yakhe wathi kowokuqala, ‘Ulesikwelede esinganani enkosini yami?’ 6 Waphendula wathi, ‘Ngilesikwelede samafutha ama-oliva angamalitha angu-2 200.’* Wasesithi kuye, ‘Thatha nansi isivumelwano sakho esibhaliweyo, uhlale phansi uhle ubhale ukuthi angu-1 100.’ 7 Wasebiza omunye wathi kuye, ‘Wena ulesikwelede esinganani?’ Wathi, ‘Amasaka angu-100* engqoloyi.’ Wathi kuye, ‘Thatha nansi isivumelwano sakho esibhaliweyo, ubhale ukuthi angu-80.’ 8 Yikho inkosi yamncoma umphathi lanxa wayengalunganga ngoba wayetshengise ukuthi uhlakaniphile.* Phela indlela abantu bomhlaba lo* abaphatha ngayo isizukulwane sabo itshengisa ukuthi bahlakaniphile ukwedlula amadodana okukhanya.+
9 “Kanti njalo ngithi kini: Zenzeleni abangane ngenotho engalunganga+ ukuze balamukele ezindaweni zokuhlala zaphakade nxa inotho leyo ingaphela.+ 10 Umuntu othembeke kokuncane uthembekile lakokukhulu, lomuntu ongalunganga kokuncane kalunganga lakokukhulu. 11 Ngakho nxa indlela elisebenzisa ngayo inotho engalunganga itshengisa ukuthi alithembekanga, ngubani ozaliphathisa inotho yeqiniso? 12 Nxa indlela elisebenzisa ngayo izinto zabanye layo itshengisa ukuthi alithembekanga, ngubani ozalinika okumele kube ngokwenu?+ 13 Akulanceku engaba yisigqili samakhosi amabili ngoba izazonda enye ithande enye, kumbe izanamathela kwenye idelele enye. Ngeke libe yizigqili zikaNkulunkulu lezeNotho.”+
14 AbaFarisi ababelalele ekhuluma konke lokhu baqalisa ukumenza inhlekisa+ ngoba babeyithanda imali. 15 Ngakho wathi kubo: “Lina lizenza abalungileyo ebantwini+ kodwa uNkulunkulu uyazazi inhliziyo zenu+ ngoba lokho okuligugu ebantwini kuyenyanyeka kuNkulunkulu.+
16 “UMthetho labaPhrofethi kwasebenza kwaze kwafika uJohane. Kusukela lapho izindaba ezinhle zoMbuso kaNkulunkulu bezitshunyayelwa njalo yonke imihlobo yabantu izama ngamandla wonke ukuthola lowoMbuso.+ 17 Kulula sibili ukuthi izulu lomhlaba kudlule kulokuthi ingxenyana encane yohlamvu lwebala eliseMthethweni ingagcwaliseki.+
18 “Wonke umuntu odivosa inkosikazi yakhe abesetshada lomunye uyafeba,* njalo loba ngubani otshada lowesifazana odivosiweyo uyafeba.+
19 “Kwakulendoda eyayinothile eyayihlala igqoke eziyibubende* lezenziwe ngelineni futhi izikholisela nsuku zonke, ikhomba ngophakathi. 20 Kodwa kwakulenye indoda eyayiphihlika izilonda emzimbeni wonke ababejayele ukuyihlalisa egedini lendoda enothileyo. Yayithiwa nguLazaro futhi yayiphila ngokucela, 21 ize ifise ukudla okwakukhithika etafuleni yesinothi leso. Ngitsho lezinja zazibuya zizoyikhotha izilonda. 22 Ngokuhamba kwesikhathi uLazaro wafa wathathwa zingilosi zamusa eceleni kuka-Abrahama.*
“Indoda eyayinothile layo yafa yangcwatshwa. 23 Ithe isengcwabeni ithwele nzima, yavusa amehlo yabona nanguya u-Abrahama, kuloLazaro eceleni kwakhe.* 24 Ngakho yamemeza yathi, ‘Baba Abrahama, woba lesihawu kimi uthume uLazaro azothintisa umunwe wakhe emanzini, apholise ulimi lwami ngoba ngisebuhlungwini emlilweni lo ovutha amalangabi.’ 25 U-Abrahama waphendula wathi: ‘Mntanami, khumbula ukuthi usaphila wathola izinto ezinengi ezinhle. ULazaro yena wathola ezimbi kodwa khathesi useduduzwa, wena ususebuhlungwini. 26 Singasayiphathi eyokuthi kulesihotsha esikhulu esifakwe phakathi kwethu lani, okokuthi labo abafuna ukusuka ngapha baze kini abenelisi, labakhonangapho abenelisi ukuchapha baze kithi.’ 27 Yasisithi, ‘Baba Abrahama nxa kunjalo ngicela umthume endlini kababa 28 ngoba ngilabafowethu abahlanu. Ngifuna ayebatshumayeza ngokugcweleyo ukuze bangacini sebebuya endaweni le ebuhlungu.’ 29 Kodwa u-Abrahama wathi, ‘BaloMosi labaPhrofethi, kabalalele bona.’+ 30 Yona yathi, ‘Hatshi baba Abrahama. Nxa omunye kwabafileyo angasuka aye kubo, bazaphenduka.’ 31 Kodwa u-Abrahama wathi kuyo, ‘Nxa bengamlaleli uMosi+ labaPhrofethi, abasoze batshintshe ingqondo kungaze kuvuke omunye kwabafileyo.’”
17 Wasesithi kubafundi bakhe: “Kuzahlala kulezinto ezenza abantu bakhubeke. Kodwa maye kulowo owenza abanye bakhubeke! 2 Bekungaba ngcono kakhulu kuye ukuthi agaxwe ilitshe lokuchola entanyeni, abesephoselwa elwandle kulokuthi akhube omunye walaba abancinyane.+ 3 Yikho nanzelelani. Nxa umfowenu angenza isono mkhuze,+ nxa angaphenduka mxolele.+ 4 Lanxa engakonela kasikhombisa ngelanga abelokhu ephenduka kuwe kuze kube kasikhombisa esithi, ‘Ngiyaxolisa,’ kumele umxolele.”+
5 Abaphostoli basebesithi eNkosini: “Sincedise ukuthi sibe lokholo oluqinileyo.”+ 6 INkosi yathi: “Nxa lilokholo olungangentanga yemastadi lizakuthi esihlahleni lesi somabhulosi, ‘Quphuka lapho uyezigxumeka elwandle!’ Lakanye sililalele.+
7 “Kambe ukhona phakathi kwenu ongabiza inceku yakhe ivela lima emasimini kumbe ivela kwelusa athi kuyo, ‘Buya ngapha etafuleni uzokudla’? 8 Angithi uyathi kuyo, ‘Gqoka ezokupheka ungilungisele ukudla kwami kwantambama, ubusunginika engikufunayo ngize ngiqede ukudla lokunatha. Ngemva kwalokho lawe usungadla unathe.’ 9 Kambe angatshona eyibonga inceku yona yenze umsebenzi ebithunywe ukuthi iwenze? 10 Lani nxa selizenzile zonke izinto ebelithunywe ukuthi lizenze kumele lithi: ‘Siyizinceku ezingatsho lutho. Senze obekumele sikwenze.’”+
11 Ngesikhathi esiya eJerusalema wadlula emngceleni weSamariya leGalile. 12 Wathi engena kwesinye isigaba wahlangabezwa ngamadoda alitshumi ayelobulephero, kodwa afika amela khatshana.+ 13 Asememeza esithi: “Jesu, Mfundisi, sizwele isihawu!” 14 Wawakhangela wasesithi kuwo: “Hambani liyeziveza kubaphristi.”+ Athi esendleleni ahlambuluka.+ 15 Enye yawo yathi ibona ukuthi isisilisiwe yaphenduka idumisa uNkulunkulu ngelizwi elikhulu. 16 Yafika yazilahla phansi enyaweni zikaJesu yathi mbo ngobuso yambonga. Indoda le yayingumSamariya.+ 17 UJesu wasesithi: “Bonke abangu-10 bahlanjululiwe angithi? Pho bangaphi abangu-9? 18 Litsho ukuthi kakho loyedwa ophenduke wazodumisa uNkulunkulu ngaphandle kwendoda le evela kwesinye isizwe?” 19 Wasesithi kuyo: “Sukuma uhambe, ukholo lwakho lukusilisile.”+
20 AbaFarisi bambuza ukuthi uMbuso kaNkulunkulu ubuya nini.+ Wabaphendula wathi: “UMbuso kaNkulunkulu awusoze ubuye ngendlela ezabonakala emuntwini wonke 21 njalo abantu abasoze bathi, ‘Nanku lapha!’ kumbe bathi, ‘Nankuya.’ Khangelani! UMbuso kaNkulunkulu uphakathi kwenu.”*+
22 Wasesithi kubafundi bakhe: “Zizafika insuku elizafisa khona ukubona usuku olulodwa lweNdodana yomuntu kodwa alisoze lilubone. 23 Abantu bazathi kini, ‘Khangelani nanguya!’ kumbe bathi, ‘Nangu lapha!’ Lingaphumi futhi lingabalandeli+ 24 ngoba ukubakhona+ kweNdodana yomuntu+ kuzaba njengombane obaneka ukhanyise esibhakabhakeni kusukela kwelinye icele kusiya kwelinye. 25 Kodwa kumele iqale yehlelwe zinhlupho ezinengi futhi ilahlwe yisizukulwane lesi.+ 26 Njengoba nje kwenzakala ezinsukwini zikaNowa,+ kuzakuba njalo lasezinsukwini zeNdodana yomuntu.+ 27 Babesidla, benatha, amadoda ethatha labesifazana besendiswa kwaze kwaba lilanga uNowa angena ngalo emkhunjini,+ uZamcolo wafika wababhubhisa bonke.+ 28 Kwakunjalo langensuku zikaLothi.+ Abantu babesidla, benatha, bethenga, bethengisa, behlanyela futhi besakha. 29 Kodwa ngelanga uLothi aphuma ngalo eSodoma, kwana umlilo lesalufa kuvela ezulwini kwabatshabalalisa bonke.+ 30 Kuzakuba njalo langelanga iNdodana yomuntu ezavezwa ngalo.+
31 “Ngalelolanga umuntu osephahleni lwendlu kangehli ayethatha impahla yakhe endlini, lomuntu ophandle emasimini akumelanga abuyele ezintweni ezisemuva. 32 Khumbulani umkaLothi.+ 33 Loba ngubani ozama ukulondoloza impilo* yakhe izamlahlekela, kodwa loba ngubani emlahlekelayo uzayilondoloza aphile.+ 34 Ngilitshela ukuthi ngalobobusuku, ababili bazabe besembhedeni owodwa kodwa kuzathathwa oyedwa, omunye atshiywe.+ 35 Kuzabe kulabesifazana ababili abazabe bechola elitsheni, omunye uzathathwa, omunye atshiywe.” 36 *—— 37 Basebemphendula bathi: “Ngaphi Nkosi?” Yena wathi kubo: “Lapho okulesidumbu khona, yikho lapho ingqungqulu ezizabuthana khona.”+
18 Wasebalandisela umzekeliso owawutshengisa ukuthi kuqakathekile ukuthi bahlale bethandaza njalo bangakhalali,+ 2 wathi: “Kwelinye idolobho kwakulendoda engumahluleli eyayingamesabi uNkulunkulu futhi ingahloniphi muntu. 3 Omunye umfelokazi wakulelodolobho wayehlala esiya kuyo esithi, ‘Ngicela ube leqiniso lokuthi ngahlulelwa kuhle endabeni yami lomuntu ongimangalelayo.’ 4 Kwahlala isikhathi ingafuni ukumncedisa kodwa yacina isithi enhliziyweni yayo, ‘Lanxa ngingamesabi uNkulunkulu futhi ngingahloniphi muntu, 5 umfelokazi lo ulokhu engihlupha, yikho ngizaba leqiniso lokuthi wahlulelwa kuhle ukuze angabi elokhu ebuya ezongidaka ngesicelo sakhe.’”+ 6 INkosi uJesu yaqhubeka yathi: “Liyezwa yini ukuthi umahluleli wathini lanxa wayengalunganga? 7 Manje uNkulunkulu ngeke yini abe leqiniso lokuthi abakhethiweyo bakhe abakhala kuye ubusuku lemini+ bahlulelwa kuhle? Uzakwenza lokho futhi uzaqhubeka ebabekezelela.+ 8 Ngilitshela ukuthi uzaba leqiniso lokuthi bahlulelwa kuhle masinyane nje. Kodwa nxa iNdodana yomuntu ifika izaluthola yini ukholo olunje* emhlabeni?”
9 Khonapho kwakulabanye ababezithemba, bezitshela ukuthi balungile futhi bekhangelela abanye phansi. Yikho walandisa omunye umzekeliso wathi: 10 “Amadoda amabili aya ethempelini esiyakhuleka. Enye yayingumFarisi, enye ingumthelisi. 11 UmFarisi wama waqalisa ukuthandazela enhliziyweni esithi, ‘O Nkulunkulu, ngiyabonga ukuthi angifanani labanye bonke, abayizigebenga, labangalunganga, labafebayo,* ngitsho layenalo umthelisi. 12 Ngizila ukudla kabili ngeviki futhi nginikela okwetshumi kwakho konke engikutholayo.’+ 13 Kodwa umthelisi wayemele khatshana, engafuni lokuphakamisela amehlo akhe ezulwini. Wayelokhu etshaya isifuba sakhe esithi, ‘Awu Nkulunkulu, woba lomusa* kimi, mina muntu oyisoni.’+ 14 Ngilitshela ukuthi indoda le yabuyela emzini wayo kucacile ukuthi ilungile kulomFarisi+ ngoba wonke umuntu oziphakamisayo uzayangiswa, kodwa loba ngubani ozehlisayo uzaphakanyiswa.”+
15 Abantu baletha izinsane zabo kuye ukuze azibambe. Abafundi bathi bekubona lokhu baqalisa ukubakhuza.+ 16 Lanxa kunjalo, uJesu wathi izinsane lezo zilethwe kuye, wathi: “Bayekeleni abantwana abancane beze kimi, lingazami ukubavimba ngoba uMbuso kaNkulunkulu ngowalabo abanjengabantwana.+ 17 Ngiqinisile ngithi kini, loba ngubani ongamukeli uMbuso kaNkulunkulu njengomntwana omncane kasoze angene kuwo loba sekutheni.”+
18 Omunye umbusi wasembuza wathi: “Mfundisi Omuhle, kumele ngenzeni ukuze ngizuze ilifa lokuphila okungapheliyo?”+ 19 UJesu wathi kuye: “Kungani ungibiza ngokuthi ngimuhle? Kakho omuhle ngaphandle kukaNkulunkulu kuphela.+ 20 Angithi uyayazi imilayo ethi: ‘Ungafebi,*+ ungabulali,+ ungatshontshi,+ ungafakazi amanga,+ hlonipha uyihlo lonyoko.’”+ 21 Yena wathi: “Yonke imilayo le ngiyigcinile kusukela ngisesemncane.” 22 UJesu uthe esizwa lokho wathi kuye, “Iyodwa kuphela into esisele kuwe: Thengisa zonke izinto olazo, imali ozayithola uyinike abayanga, lapho-ke uzakuba lenotho ezulwini. Ngemva kwalokho usungabuya uzokuba ngumlandeli wami.”+ 23 Wathi ekuzwa lokhu wadana kakhulu ngoba wayenothe kakhulu.+
24 UJesu wamkhangela wasesithi: “Kuzakuba nzima kakhulu ukuthi abalemali bangene eMbusweni kaNkulunkulu!+ 25 Phela kulula ukuthi ikamela lingene esikhaleni senalithi kulokuthi umuntu onothileyo angene eMbusweni kaNkulunkulu.”+ 26 Abakuzwayo lokhu bathi: “Pho ngubani ongasindiswa?”+ 27 Yena wathi: “Izinto ezingeke zenzeke ebantwini ziyenzeka kuNkulunkulu.”+ 28 UPhetro wasesithi: “Kodwa thina sitshiye izinto zethu sakulandela.”+ 29 UJesu wathi: “Ngiqinisile ngithi kini, kakho otshiye indlu kumbe inkosikazi kumbe abafowabo kumbe abazali kumbe abantwana ngenxa yoMbuso kaNkulunkulu,+ 30 ongasoze athole sekuphindwe kanengi ngalesisikhathi, aphinde athole lokuphila okungapheliyo esikhathini esizayo.”*+
31 Wabizela abaliTshumi Lambili eceleni wathi kubo: “Lalelani! Siya* eJerusalema njalo zonke izinto ezabhalwa ngabaphrofethi mayelana leNdodana yomuntu zizagcwaliseka.+ 32 Ngokwesibonelo, izanikelwa ebantwini bezizweni+ bahlekise ngayo,+ bayihlukuluze futhi bayikhafulele.+ 33 Bazayibhaxabula besebeyibulala+ kodwa ngelanga lesithathu izavuka.”+ 34 Kodwa abazange bakuzwisise lokhu ngoba ayekutsho kwakufihlakele kubo.
35 UJesu wathi esezafika eJerikho, enye indoda eyisiphofu eyayihlezi eceleni komgwaqo icela uncedo ebantwini+ 36 yezwa ukuthi kwakulabantu abanengi ababedlula, yasibuza ukuthi kwenzakalani. 37 Bayitshela bathi: “Kudlula uJesu umNazaretha!” 38 Yathi isizwa lokho yamemeza yathi: “Jesu Ndodana kaDavida, woba lesihawu kimi!” 39 Ababephambili bayikhuza beyitshela ukuthi ithule kodwa yona yaqhubeka imemeza kakhulu isithi: “Ndodana kaDavida, woba lesihawu kimi!” 40 UJesu wama wasesithi indoda leyo ilethwe kuye. Yathi isiseduze wayibuza wathi: 41 “Ufuna ngikwenzeleni?” Yona yathi: “Nkosi, yenza ukuthi ngiphinde ngibone.” 42 Ngakho uJesu wathi kuyo: “Kulungile phinda ubone, ukholo lwakho lukusilisile.”+ 43 Yahle yaqalisa ukubona, yasimlandela+ idumisa uNkulunkulu. Abantu bonke bathi bekubona lokhu labo badumisa uNkulunkulu.+
19 Wangena eJerikho waquma phakathi kwayo. 2 Kulelodolobho kwakulendoda okwakuthiwa nguZakhewu eyayiyinduna yabathelisi futhi inothile. 3 UZakhewu wayefuna ukumbona ngawakhe uJesu kodwa wayesehluleka ngoba kwakulabantu abanengi njalo wayemfitshane. 4 Ngakho wagijima waya phambili wafika wakhwela esihlahleni somsikhamori ukuze ambone ngoba wayesiza ngaleyondlela, esezadlula khonapho. 5 UJesu wathi efika kulesosihlahla wakhangela phezulu wathi kuye: “Zakhewu, yehla masinyane ngoba lamuhla ngizokuvakatshela emzini wakho.” 6 Esizwa lokho wahle wehla wamamukela emzini wakhe ethokoza. 7 Bathi bekubona lokhu bonke bangunguna besithi: “Uvakatshele emzini wendoda eyisoni.”+ 8 Kodwa uZakhewu wasukuma wathi eNkosini: “Nkosi, impahla engilayo ngizayehlukanisa phakathi, enye ngiyinike abayanga njalo loba ngubani engamqila imali ngizambuyisela isiphindwe kane.”+ 9 UJesu wasesithi kuye: “Lamuhla insindiso ifikile endlini le ngoba lawe uyindodana ka-Abrahama. 10 Phela iNdodana yomuntu yalanda ukuzodinga lokuzosindisa abalahlekileyo.”+
11 Bathi belokhu belalele, wabatshela omunye umzekeliso ngoba wayeseseduze leJerusalema futhi babecabanga ukuthi uMbuso kaNkulunkulu wawuzahle ufike ngalesosikhathi.+ 12 Wathi: “Omunye umuntu wesikhosini waya elizweni elikhatshana+ ukuze ayephiwa ubukhosi abesephenduka. 13 Wabiza izinceku zakhe ezilitshumi wazinika imali engamamina* alitshumi, wathi kuzo, ‘Yenzani ibhizinesi ngamamina la ngize ngiphenduke.’+ 14 Kodwa abantu bakibo babemzonda, yikho bathuma iqembu labameli ukuthi limlandele lifike lithi, ‘Asifuni ukuthi indoda le ibe yinkosi yethu.’
15 “Wathi esephendukile esebuphiwe ubukhosi,* wabiza izinceku ayezinike imali* ukuze azwe ukuthi zazitholeni kubhizinesi ezazisele ziyenza.+ 16 Eyokuqala yasondela yathi, ‘Nkosi, ngithole amanye amamina alitshumi ngemina lakho.’+ 17 Wathi kuyo, ‘Wenze kuhle nceku enhle! Busa amadolobho alitshumi ngoba utshengise ukuthi uthembekile entweni encane kakhulu.’+ 18 Eyesibili yafika yathi, ‘Nkosi, ngithole amamina amahlanu ngemina lakho.’+ 19 Lasencekwini le wathi, ‘Lawe busa amadolobho amahlanu.’ 20 Kodwa enye yafika yathi, ‘Nkosi, nanti imina lakho. Ngaligoqela ngelembu ngalifihla. 21 Bengikwesaba ngoba wena ulomoya omubi, uthatha imali ongazange uyifake ebhanga njalo uvuna ongakuhlanyelanga.’+ 22 Wasesithi kuyo, ‘Ngikwahlulela ngamazwi akho nceku embi. Angithi ubukwazi ukuthi ngilomoya omubi lokuthi ngithatha imali engingayifakanga ebhanga, ngivune lengingakuhlanyelanga?+ 23 Manje wayekelelani ukufaka imali yami* ebhanga? Phela bengizathi ngifika ngiyithathe isizele.’
24 “Wasesithi kwababemi khonapho, ‘Mthatheleni imina lelo lilinike olamamina alitshumi.’+ 25 Kodwa bona bathi, ‘Nkosi, yena evele elamamina alitshumi?’ 26 Wabaphendula wathi, ‘Ngithi kini, wonke umuntu olakho uzaphiwa okunye futhi, kodwa ongelalutho uzathathelwa lalokho alakho.+ 27 Lethani lapha izitha zami ezazingafuni ukuthi ngibe yinkosi yazo, lizibulale phambi kwami.’”
28 Ngemva kwalokho uJesu waqhubeka ngohambo lwakhe esiya eJerusalema. 29 Wathi eseseduze leBhethifage leBhethani entabeni yama-oliva,+ wathuma abafundi bakhe ababili+ 30 wathi: “Hambani esigabeni lesiya elisikhangeleyo, lingangena kuso lizafica kuledonkana ebotshelweyo engakaze igadwe ngumuntu. Liyikhulule libuye layo lapha. 31 Kodwa kungaba lomuntu olibuza esithi, ‘Liyithukululelani?’ lithi kuye, ‘INkosi iyayifuna.’” 32 Ngakho ababethunyiwe bahamba bafika bayithola njengoba wayebatshelile.+ 33 Kodwa bathi besayithukulula abanikazi bayo bathi kubo: “Kanti liyithukululelani idonkana leyo?” 34 Bona bathi: “INkosi iyayifuna.” 35 Basebeyiqhuba bayisa kuJesu, babeka izembatho zabo zangaphandle phezu kwayo, uJesu wayigada.+
36 Lapho ayehamba khona abantu babesendlala izembatho zabo zangaphandle emgwaqweni.+ 37 Wathi efika nje emgwaqweni owawusehla usuka entabeni yama-oliva, bonke abafundi bajabula badumisa uNkulunkulu ngelizwi elikhulu ngenxa yazo zonke izimangaliso ababezibonile. 38 Babesithi: “Ubusisiwe lowo oyiNkosi oza ngebizo likaJehova!* Akube lokuthula ezulwini lenkazimulo kulowo ophezulu emazulwini!”+ 39 Kodwa abanye abaFarisi ababelapho bathi kuye: “Mfundisi, khuza abafundi bakho.”+ 40 Yena wabaphendula wathi: “Ngilitshela ukuthi nxa laba bangathula, amatshe azamemeza.”
41 Wathi eseseduze kwedolobho leJerusalema, walikhangela walikhalela+ 42 esithi: “Aluba nje ubuzizwisisile lamuhla izinto eziphathelane lokuthula! Kodwa khathesi sezifihliwe ukuze ungaziboni.+ 43 Phela zizafika insuku lapho izitha zakho ezizafaka khona uthango lwezigodo ezicijileyo, zikugombolozele njalo zikuvalele uswele lesikhala sokuphunyuka.+ 44 Zizakutaklazela phansi wena labantwabakho bonke,+ zingatshiyi ilitshe phezu kwelinye phakathi kwakho+ ngoba awuzange usinanzelele isikhathi sokuhlolwa kwakho.”
45 Wangena ethempelini waqalisa ukuxotshela phandle ababethengisa,+ 46 esithi kubo: “Kubhaliwe ukuthi, ‘Indlu yami izakuba yindlu yokuthandazela,’+ kodwa lina seliyenza ubhalu lwamasela.”+
47 Waqhubeka efundisa nsuku zonke ethempelini. Kodwa abaphristi abakhokhelayo lababhali kanye labakhokheli besizwe babefuna ukumbulala.+ 48 Lanxa kunjalo, babesehluleka ngoba abantu babehlala bemlandela befuna ukumlalela.+
20 Ngelinye ilanga wathi efundisa abantu ethempelini futhi etshumayela izindaba ezinhle, abaphristi abakhokhelayo lababhali kanye labadala bamlanda 2 bathi kuye: “Akusitshele, uwathatha ngaphi amandla okwenza izinto lezi? Ngubani okuphe amandla la?”+ 3 Wabaphendula wathi: “Lami ngizalibuza umbuzo lingiphendule: 4 Ubhabhathizo lukaJohane lwaluvela ezulwini kumbe ebantwini?” 5 Basebecebisana besithi: “Nxa singathi, ‘Lwaluvela ezulwini,’ uzakuthi, ‘Kungani lingamkholwanga?’ 6 Kodwa nxa singathi, ‘Lwaluvela ebantwini,’ bonke abantu bazasikhanda ngamatshe ngoba bakholwa ukuthi uJohane wayengumphrofethi.”+ 7 Ngakho bamtshela ukuthi abakwazi lapho oluvela khona. 8 UJesu wasesithi kubo: “Lami angisoze ngilitshele ukuthi ngiwathatha ngaphi amandla okwenza izinto lezi.”
9 Ngemva kwalokho watshela abantu umzekeliso, wathi: “Kulomuntu owahlanyela amagilebisi ensimini+ yakhe wayiqhatshisa kubalimi, yena wasesiya elizweni elikhatshana okwesikhathi eside.+ 10 Ngesikhathi sokuvuna wathuma inceku yakhe kubalimi ukuthi iyethatha ezinye izithelo ezazisensimini. Kodwa abalimi bayitshaya bayixotsha, yabuyela ilengise izandla.+ 11 Waphinda wathuma enye inceku, layo bayitshaya bayiphatha kubi, yabuyela ilengise izandla. 12 Wathuma leyesithathu, layo bayitshaya bayilimaza basebeyikhiphela phandle kwensimu. 13 Umnikazi wensimu yamagilebisi wathi, ‘Manje ngenzeni? Ngizathuma indodana yami engiyithandayo.+ Kumele ukuthi yona bazayihlonipha.’ 14 Abalimi bathi beyibona indodana yakhe bacebisana bathi, ‘Le yiyo indlalifa. Asiyibulaleni ukuze ilifa libe ngelethu.’ 15 Ngakho bayikhiphela phandle kwensimu yamagilebisi bayibulala.+ Manje umnikazi wensimu leyo uzabenzani abalimi laba? 16 Uzabuya azobabulala, insimu ayiphe abanye.”
Bathi bekuzwa lokho bathi: “Lokho ngeke kwenzakale!” 17 Kodwa yena wabakhangela wabathi nhlo, wasesithi: “Pho utshoni umbhalo othi: ‘Ilitshe elaliwa ngabakhi selibe lilitshe eliyisiqokoqela’?*+ 18 Wonke umuntu owela elitsheni lelo uzaphahlazeka+ futhi loba ngubani elizawela phezu kwakhe lizamhlifiza.”
19 Ababhali labaphristi abakhokhelayo basebefuna ukumbamba ngalesosikhathi ngoba bananzelela ukuthi wayekhulume umzekeliso lo ecabanga ngabo.+ Kodwa besaba abantu. 20 Bakhangelisisa konke ayekwenza, basebethuma amadoda ababewaqhatshile bawatshela ukuthi azenze alungileyo ukuze amthiye ngamazwi akhe.+ Babesenzela ukuthi bayemnikela kuhulumende lakumbusi.* 21 Amadoda la afika athi kuye: “Mfundisi, siyakwazi ukuthi konke okukhulumayo lokufundisayo kuqondile lokuthi awukhethi muntu, kodwa ufundisa iqiniso ngendlela kaNkulunkulu. 22 Kusemthethweni* yini ukuthi sibhadale umthelo kuKhesari kumbe hatshi?” 23 Kodwa uJesu wabunanzelela ubuqili babo wasesithi kubo: 24 “Ngitshengisani udenariyu.* Ngumfanekiso kabani lo futhi libizo likabani elibhalwe lapha?” Bathi kuye: “NgokukaKhesari.” 25 Wasesithi kubo: “Yikho kufanele libuyisele okukaKhesari kuKhesari,+ kodwa okukaNkulunkulu+ kuNkulunkulu.” 26 Bamangala besizwa impendulo yakhe bathula. Behluleka ukumthiya ngamazwi akhe phambi kwabantu.
27 Kodwa kwafika abanye abaSadusi ababesithi abafileyo abasoze bavuswe,+ bambuza bathi:+ 28 “Mfundisi, uMosi wasibhalela wathi, ‘Nxa indoda ingafa ingelamntwana itshiye umkayo, umfowabo kufanele athathe lowomfazi azalele umfowabo abantwana.’+ 29 Manje kwakulamadoda ayisikhombisa ayeyizelamani. Endala yathatha umfazi kodwa yafa ingelamntwana. 30 Ngakho watshada leyesibili, 31 waphinda watshada leyesithathu. Wonke eyisikhombisa acina etshade laye kodwa afa engelabantwana. 32 Ekucineni owesifazana laye wafa. 33 Pho uzakuba ngumkabani nxa sekuvuswa abafileyo? Phela wayeke waba yinkosikazi yabo bonke boyisikhombisa.”
34 UJesu wathi kubo: “Abantu bomumo lo wezinto* bayathatha futhi bayendiswa, 35 kodwa labo uNkulunkulu athi bafanele ukuvuswa kwabafileyo lokuthola ukuphila kumumo wezinto ozayo abasoze bathathe kumbe bende.+ 36 Abasoze baphinde bafe ngoba bazabe sebenjengezingilosi njalo bazakuba ngabantwana bakaNkulunkulu ngenxa yokuthi bazavuswa kwabafileyo. 37 UMosi laye wakuveza endabeni yesihlahla sameva ukuthi abafileyo bazavuswa. Wabiza uJehova* ngokuthi ‘nguNkulunkulu ka-Abrahama loNkulunkulu ka-Isaka loNkulunkulu kaJakhobe.’+ 38 UnguNkulunkulu wabaphilayo hatshi owabafileyo ngoba kuye bonke bayaphila.”+ 39 Abanye ababhali basebesithi: “Lapha ukhulume kuhle Mfundisi.” 40 Babengaselaso isibindi sokubuza ngitsho lombuzo owodwa.
41 Yena wasebabuza wathi: “Kungani besithi uKhristu uyindodana kaDavida?+ 42 Phela uDavida ngokwakhe wabhala ebhukwini lamaHubo wathi, ‘UJehova* wathi eNkosini yami: “Hlala esandleni sami sokudla 43 ngize ngenze izitha zakho zibe yisenabelo* senyawo zakho.”’+ 44 Manje nxa uDavida embiza ngokuthi Nkosi, uyindodana yakhe njani?”
45 Abantu bonke bathi besamlalele, wathi kubafundi bakhe: 46 “Nanzelelani ababhali abathanda ukuhambahamba begqoke amajazi lokubingelelwa emakethe. Bathanda ukuhlala ezitulweni eziphambili* emasinagogeni lokuhlala ezindaweni zabahlonitshwa nxa besemadilini antambama.+ 47 Baqila abafelokazi babathathele impahla yabo* futhi bakhuleka imithandazo emide besenzela ukubukwa. Bazakwahlulelwa kabuhlungu kulabanye.”
21 UJesu wathi ekhangela wabona abanothileyo bephosela izipho zabo emabhokisini eminikelo.+ 2 Wabona lomfelokazi oswelayo ephosela okuzinhlamvu kwemali okubili okungatsho lutho,*+ 3 wasesithi: “Ngiqinisile ngithi kini, umfelokazi lo ongumyanga unikele ukwedlula bonke abanye+ 4 ngoba bonke laba banikele becupha enothweni yabo kodwa yena lanxa eswela* ufake konke abephila ngakho.”+
5 Abanye bathi sebekhuluma ngokuthi ithempeli laliceciswe ngamatshe amahle langezinto ezinikelwe kuNkulunkulu,+ 6 yena wathi: “Ziyeza insuku lapho izinto lezi elizibonayo ezizadilizelwa khona phansi, kungasali ilitshe phezu kwelinye.”+ 7 Basebembuza bathi: “Mfundisi, izinto lezi zizakwenzakala nini sibili, njalo sizakuba yini isibonakaliso sokuthi sezizakwenzakala?”+ 8 Wathi: “Nanzelelani ukuze lingadukiswa+ ngoba abanengi bazakuza ngebizo lami bathi, ‘Nginguye,’ baphinde bathi, ‘Isikhathi esibekiweyo sesiseduze.’ Lingabalandeli.+ 9 Kanti njalo nxa lisizwa ngezimpi lokungahlaliseki* lingesabi ngoba izinto lezi kumele ziqale zenzakale, kodwa ukuphela akusoze kuhle kufike.”+
10 Waqhubeka wathi: “Isizwe sizavukela isizwe,+ lombuso uvukele umbuso.+ 11 Kuzakuba lokuzamazama komhlaba okwesabekayo, kuphinde kube lemikhuhlane emibi lokuswelakala kokudla ezindaweni ezehlukeneyo. Kuzakuba lezinto ezesabisayo lezibonakaliso ezinkulu ezivela ezulwini.+
12 “Kodwa izinto zonke lezi zingakenzakali, abantu bazalibamba balihlukuluze,+ balihambise emasinagogeni lasemajele. Lizamiswa phambi kwamakhosi lababusi* ngenxa yebizo lami.+ 13 Lokhu kuzalinika ithuba lokufakaza. 14 Ngakho lingazihluphi lilungiselela* ukuthi lizazivikela njani+ 15 ngoba ngizalipha amazwi lokuhlakanipha okuzakwenza zonke izitha zenu zehluleke ukumelana lani kumbe ukuliphikisa.+ 16 Phezu kwalokho lizanikelwa* langabazali benu, labafowenu, lezihlobo zenu kanye labangane benu njalo abanye benu bazabulawa.+ 17 Lizazondwa ngabantu bonke ngenxa yebizo lami.+ 18 Kodwa akusoze kutshabalale ngitsho lonwele olulodwa emakhanda enu.+ 19 Nxa lingaqinisela lizalondoloza impilo zenu.+
20 “Kodwa lingabona iJerusalema isigonjolozelwe ngamabutho,+ yazini ukuthi ukutshabalaliswa kwayo sekusondele.+ 21 Lapho-ke abaseJudiya kabaqalise ukubalekela ezintabeni,+ abaphakathi kweJerusalema baphume, labasemaphandleni bangangeni kuyo 22 ngoba lezo kuzakuba zinsuku zokujezisa* ukuze konke okwabhalwayo kugcwaliseke. 23 Maye kubomama abazithweleyo lakulabo abazabe bemunyisa ngalezonsuku!+ Indawo le izakwehlelwa zinhlupho ezinkulu futhi abantu bazajeziswa. 24 Bazakuwa bebulawa ngenkemba njalo bazathunjwa yizizwe zonke.+ IJerusalema izanyathenyathelwa yizizwe kuze kuphele izikhathi ezibekiweyo zabezizwe.+
25 “Kuzakuba lezibonakaliso elangeni lasenyangeni lasezinkanyezini,+ futhi emhlabeni izizwe zizakuba phakathi kosizi, zingasakwazi lokuthi zingaphunyuka njani ulwandle selubhonga njalo seluzondile. 26 Amandla amazulu azanyikinywa, abantu baphele amandla ngenxa yokwesaba lokulindela izinto ezizakwehlela umhlaba. 27 Ngemva kwalokho bazabona iNdodana yomuntu+ isiza ngeyezi ilamandla lenkazimulo enkulu.+ 28 Nxa izinto lezi seziqalisa ukwenzakala, sukumani lime liphakamise amakhanda ngoba ukukhululwa kwenu kuyabe sekuseduze.”
29 Waqhubeka wabatshela umzekeliso wathi: “Cabangani ngesihlahla somkhiwa lazo zonke ezinye izihlahla.+ 30 Nxa lizibona sezihluma lihle likwazi ukuthi ihlobo seliseduze. 31 Lani nxa selibona izinto lezi zisenzakala, yazini ukuthi uMbuso kaNkulunkulu ususeduze. 32 Ngiqinisile ngithi kini, loba sekutheni isizukulwane lesi asisoze sidlule zingakenzakali zonke izinto lezi.+ 33 Izulu lomhlaba kuzadlula kodwa amazwi ami awasoze adlule loba sekutheni.+
34 “Nanzelelani izinhliziyo zenu zingakhulelwa yikudla kakhulu lokunatha+ ledlulise kanye lezinkathazo zokuphila,+ lolosuku beselulifica lilibele, lulijume 35 njengomjibila.+ Phela luzafikela bonke abahlala emhlabeni. 36 Ngakho hlalani liphapheme,+ lithandaze zikhathi zonke lincenga+ ukuze lenelise ukuphunyuka ezintweni zonke lezi okumele zenzakale njalo lenelise lokuma phambi kweNdodana yomuntu.”+
37 Emini uJesu wayefundisa ethempelini kodwa ebusuku ehambe ayephumula entabeni yama-oliva. 38 Bonke abantu babevukela kuye ekuseni kakhulu ukuze bamuzwe efundisa ethempelini.
22 UMkhosi Wesinkwa Esingelamvubelo wawususeduze,+ lowo obizwa ngokuthi liPhasika.+ 2 Abaphristi abakhokhelayo lababhali babedinga ukuthi bangambulala njani+ ngoba babesesaba ukuthi abantu bazathini.+ 3 USathane wasengena kuJudasi owayebizwa ngokuthi ngu-Iskariyothi, owayengomunye wabaliTshumi Lambili.+ 4 UJudasi waya kubaphristi abakhokhelayo labaphathi bethempeli, wakhuluma labo ngokuthi wayengamthengisa njani kubo.+ 5 Bathaba besizwa lokho, basebesithi bazamnika imali yesiliva.+ 6 Yikho wavumelana labo waseqalisa ukudinga ithuba elihle lokumthengisa kubo kungelabantu abanengi.
7 Lafika-ke ilanga loMkhosi Wesinkwa Esingelamvubelo, ilanga lokunikela umhlatshelo wePhasika.+ 8 Ngakho uJesu wathuma uPhetro loJohane wathi: “Hambani liyesilungisela iPhasika sidle.”+ 9 Bathi kuye: “Ufuna sililungiselele ngaphi iPhasika?” 10 Yena wathi: “Lizakuthi lingena edolobheni lihlangane lendoda ethwele imbiza yamanzi. Liyilandele liyengena endlini ezangena kuyo,+ 11 beselisithi kumnikazi wendlu, ‘UMfundisi uthi: “Ingaphi indlu yezethekeli lapho engingadlela khona iPhasika labafundi bami?”’ 12 Uzalitshengisa indlu enkulu ephezulu, elezinto esifuna ukuzisebenzisa. Lililungiselele khonapho iPhasika.” 13 Abafundi bahamba bathola kunjengoba nje wayebatshelile, basebelungiselela iPhasika.
14 Isikhathi sathi sesifikile, wahlala etafuleni labaphostoli bakhe+ 15 wasesithi kubo: “Bengifisa kakhulu ukulidla lani iPhasika leli ngingakahlupheki, 16 ngoba ngilitshela ukuthi angisoze ngiphinde ngilidle kuze kugcwaliseke konke okuphathelane lalo eMbusweni kaNkulunkulu.” 17 Wamukela inkomitsho wabonga uNkulunkulu, wasesithi: “Thathani inkomitsho le liyiqhubelane, 18 ngoba ngilitshela ukuthi kusukela khathesi angisoze ngiphinde nginathe iwayini elenziwe ngamagilebisi uMbuso kaNkulunkulu uze ufike.”
19 Wathatha lesinkwa+ wabonga uNkulunkulu, wasihlephuna wasebanika wathi: “Lokhu kumela umzimba wami+ ozanikelwa ngenxa yenu.+ Qhubekani likwenza lokhu lingikhumbula.”+ 20 Bathe sebeqedile ukudla, wenza njalo langenkomitsho, wathi: “Inkomitsho le imela isivumelwano esitsha+ esizakwenziwa ngegazi lami+ elizachithwa ngenxa yenu.+
21 “Kodwa umuntu ozangithengisa uhlezi lami khonapha etafuleni!+ 22 INdodana yomuntu izalitshiya njengoba nje kwavele kwatshiwo.+ Lanxa kunjalo, maye kulowo muntu ozayithengisa!”+ 23 Ngakho baqalisa ukubuzana ukuthi ngubani phakathi kwabo owayesezamthengisa.+
24 Kusenjalo baphikisana kwaba nzima, bebanga ukuthi ngubani owayemkhulu kulabo bonke phakathi kwabo.+ 25 Yikho wathi kubo: “Amakhosi ezizwe azenzela umathanda phezu kwezizwe lezo, leziphathamandla zazo zibizwa ngokuthi ngabantu abanceda umphakathi.+ 26 Kodwa lina akumelanga libe njalo.+ Omkhulu kulani lonke kumele abe njengomncane kulani lonke,+ lalowo okhokhelayo abe njengesisebenzi senu. 27 Kanti omkhulu ngohlezi etafuleni* kumbe ngosebenzayo? Ngulowo ohlezi etafuleni* angithi? Kodwa phakathi kwenu mina ngiyisisebenzi.+
28 “Lanxa kunjalo lina alizange lingilahle+ ebunzimeni bami.+ 29 Yikho ngenza lani isivumelwano sokuthi libuse embusweni, njengoba loBaba enze isivumelwano lami,+ 30 ukuze lidle njalo linathe etafuleni yami eMbusweni wami,+ lihlale ezihlalweni zobukhosi+ lahlulele izizwana zako-Israyeli ezilitshumi lambili.+
31 “Simoni, Simoni! USathane uthi uyalifuna lonke ukuze alehlukanise* njengomuntu owehlukanisa ingqoloyi lamakhoba.+ 32 Kodwa sengikuthandazele ngikuncengela ukuthi ukholo lwakho lungapheli+ njalo nxa usuphendukile uqinise abafowenu.”+ 33 UPhetro wathi kuye: “Nkosi, ngizimisele ukuhamba lawe ejele lokufa lawe.”+ 34 Kodwa uJesu wathi: “Phetro, ngikutshela ukuthi lamuhla iqhude lingakakhali, uzabe usuphike kathathu ukuthi uyangazi.”+
35 Waphinda wathi kubo: “Ngize ngilithume lingelasikhwama semali lesokudla kanye lamanyathela,+ kulolutho elake laluswela yini?” Bathi: “Hatshi!” 36 Wasesithi: “Kodwa khathesi olesikhwama semali kasithathe, lalowo olesokudla kenze njalo. Ongelankemba kathengise isembatho sakhe sangaphandle ayithenge 37 ngoba ngilitshela ukuthi kufanele kugcwaliseke okwabhalwa mayelana lami ukuthi, ‘Laye kwathiwa ngomunye wezephulamthetho.’+ Amazwi la ayagcwaliseka kimi.”+ 38 Basebesithi: “Nkosi, khangela! Nanzi inkemba ezimbili.” Wathi kubo: “Zanele.”
39 Wasuka waya entabeni yama-oliva njengenjayelo, abafundi bakhe bamlandela.+ 40 Bathi befika lapho wathi kubo: “Hlalani lithandaza ukuze lingangeni ekulingweni.”+ 41 Wasesuka kubo waya phambidlana wafika waguqa waqalisa ukuthandaza 42 esithi: “Baba, nxa ufuna susa inkomitsho le kimi. Kodwa akungenzakali intando yami, akwenzakale eyakho.”+ 43 Ingilosi yasibonakala kuye ivela ezulwini yamqinisa.+ 44 Loba kunjalo waqhubeka ekhuleka ngenhliziyo yonke+ ngoba wayesizwa ubuhlungu obukhulu njalo amaginqo akhe aba njengamathonsi egazi ethontela phansi. 45 Wathi eseqedile ukuthandaza wasukuma waya kubafundi bakhe wabathola belele, bengelamandla ngenxa yosizi ababekulo.+ 46 Wasesithi kubo: “Kanti lilaleleni? Vukani liqhubeke lithandaza ukuze lingangeni ekulingweni.”+
47 Uthe esakhuluma kwathutsha uJudasi omunye wabaliTshumi Lambili, ehamba labantu abanengi. Waqonda kuJesu wafika wamqabuza.+ 48 Kodwa uJesu wathi kuye: “Judasi, kambe uthengisa iNdodana yomuntu ngokuyiqabuza?” 49 AbabeloJesu bathe bebona okwasekuzakwenzakala bathi: “Nkosi sigadle ngenkemba yini?” 50 Omunye wabo wahle wagalela inceku yomphristi ngenkemba, wayijuqula indlebe yesokudla.+ 51 Kodwa uJesu wathi: “Kwanele.” Wasethinta indlebe yenceku leyo wayelapha. 52 Ngemva kwalokho wathi kubaphristi abakhokhelayo labaphathi bethempeli kanye labadala ababezombopha: “Kambe lingangilanda lithwele izinkemba lezinduku angani ngiyisigebenga?+ 53 Bengilani ethempelini nsuku zonke+ kodwa alizange lingibambe.+ Lanxa kunjalo, lesi yisikhathi senu lesikhathi sokubusa kobumnyama.”+
54 Basebembopha bahamba laye,+ bafika bamngenisa emzini womphristi omkhulu. Kodwa uPhetro wayelandela ehambela khatshana.+ 55 Babasa umlilo phakathi laphakathi kweguma, bathi gwaqa ndawonye. UPhetro laye wayehlezi labo.+ 56 Enye intombazana eyincekukazi yathi imbona ehlezi emlilweni yamkhangelisisa yathi: “Indoda le layo ibihamba laye.” 57 Kodwa yena waphika wathi: “Angimazi mina.” 58 Ngemva kwesikhatshana waphinda wabonwa ngomunye wathi kuye: “Lawe ungomunye wabo.” Kodwa uPhetro wathi: “Ndoda, angisuye.”+ 59 Kwadlula isikhathi esingaba lihora elilodwa, enye indoda yaqalisa ukugcizelela isithi: “Loba sekuthiwani indoda le ingomunye wabo. Phela ingumGalile!” 60 Kodwa uPhetro wathi: “Ndoda, angikwazi ukuthi ukhuluma ngani.” Engakaqedi lokukhuluma, iqhude lahle lakhala. 61 INkosi yasitshibilika yamkhangela yamuthi nhlo, wasekhumbula ukuthi ibithe kuye: “Lamuhla iqhude lingakakhali, uzabe usungiphike kathathu.”+ 62 Waphuma phandle wakhala kabuhlungu.
63 Amadoda ayelinde uJesu aqalisa ukumchothoza+ lokumtshaya,+ 64 asemvala ubuso athi: “Phrofetha phela! Ngubani okutshayileyo?” 65 Amthethisa ekhuluma izinto ezinengi ezimbi ngaye.
66 Kwathi sekusekuseni, iqembu labadala besizwe elalibunjwa ngabaphristi abakhokhelayo lababhali lahlangana,+ laselimqhuba limusa ewolu yeSanihedrini. UJesu wathi esemiswe phambi kwabo bathi: 67 “Nxa unguKhristu sitshele.”+ Kodwa wathi kubo: “Ngingaze ngilitshele alisoze lakholwa loba sekutheni, 68 lanxa ngingalibuza ngeke liphendule. 69 Kodwa kusukela khathesi iNdodana yomuntu+ izahlala esandleni sikaNkulunkulu sokudla esilamandla.”+ 70 Besizwa lokho bonke bathi kuye: “Manje uyiNdodana kaNkulunkulu yini?” Yena wathi: “Lina ngokwenu lithi ngiyiyo.” 71 Basebesithi: “Sisabufunelani obunye ubufakazi? Sesizizwele ekutsho ngowakhe umlomo.”+
23 Basuka loJesu bamqhuba bamusa kuPhilathu,+ 2 baqalisa ukummangalela+ besithi: “Sithole indoda le idukisa isizwe sethu isithi abantu bangabhadali imithelo kuKhesari+ futhi isithi yona inguKhristu inkosi.”+ 3 UPhilathu wasembuza wathi: “UyiNkosi yamaJuda yini?” Yena waphendula wathi: “Kunjengoba nje usitsho.”+ 4 UPhilathu wathi kubaphristi abakhokhelayo lasebantwini: “Mina angiliboni icala elenziwe yindoda le.”+ 5 Kodwa baphikelela besithi: “Imfundiso yakhe yenza kube lokuxokozela kulo lonke elaseJudiya, kusukela eGalile kuze kufike lapha.” 6 UPhilathu uthe ekuzwa lokho wabuza wathi: “Indoda le ingumGalile yini?” 7 Wathi esezwile ukuthi uJesu wayevela endaweni eyayibuswa nguHerodi+ wamdlulisela kuye. Ngalezonsuku uHerodi laye wayeseJerusalema.
8 UHerodi wathaba ebona uJesu. Kwasekulesikhathi eside efuna ukumbona ngoba wayesezwe okunengi ngaye+ futhi wayefisa ukumbona esenza isimangaliso. 9 Ngakho waqalisa ukumbuza imibuzo eminengi kodwa yena kazange amphendule.+ 10 Abaphristi abakhokhelayo lababhali babelokhu besukuma bemmangalela bezondile. 11 UHerodi lamasotsha akhe bamchothoza+ njalo wamgqokisa isembatho esibucwazicwazi emenza inhlekisa,+ wasembuyisela kuPhilathu. 12 Lanxa uHerodi loPhilathu babezondana, ngalelolanga bahle baba ngabangane.
13 UPhilathu wasebiza abaphristi abakhokhelayo lababusi kanye labantu 14 wathi kubo: “Lilethe umuntu lo kimi lisithi utshotshozela abantu ukuthi bahlamuke. Ngimthonisise phambi kwenu kodwa angimtholanga elecala ngalokho elimmangalela ngakho.+ 15 UHerodi laye katholanga lutho, nanko phela umphendukisile kithi. Umuntu lo kenzanga lutho olungenza abulawe. 16 Yikho ngizamjezisa+ besengimkhulula.” 17 *—— 18 Kodwa bonke abantu bamemeza bathi: “Mbulale* usikhululele uBharabha!”+ 19 (UBharabha wayefakwe ejele ngoba yena labanye babevukele umbuso kulelodolobho njalo wayelecala lokubulala.) 20 UPhilathu waphinda wakhuluma labo ngoba wayefuna ukukhulula uJesu.+ 21 Baqalisa ukumemeza besithi: “Kabethelwe esigodweni! Kabethelwe esigodweni!”+ 22 Wakhuluma labo okwesithathu wathi: “Ngenxa yani? Kuyini okubi akwenzileyo? Mina angisitholanga isizatho sokuthi abulawe, yikho ngizamjezisa besengimkhulula.” 23 Lapho-ke babamba inkani bamemeza kakhulu besithi abulawe,* baze bacina bemkhulela uPhilathu.+ 24 Yikho wathi kwenziwe lokho ababekufuna. 25 Wayikhulula indoda ababesithi ikhululwe, leyo eyayiphoselwe ejele ngenxa yokuvukela umbuso lokubulala, kodwa wathi uJesu bamenze abakufunayo.
26 Bathi sebeqhuba uJesu, babamba indoda yeKhurene okwakuthiwa nguSimoni eyayivela emaphandleni, bayithwalisa* isigodo sokuhlutshwa* bathi ilandele uJesu.+ 27 Wayelandelwa ngabantu abanengi kakhulu kanye labesifazana ababehamba betshaya izifuba zabo bekhala futhi bephakathi kosizi. 28 UJesu watshibilika wakhangela abesifazana laba wathi: “Madodakazi eJerusalema, lingangikhaleli. Zikhaleleni lina labantwabenu+ 29 ngoba ziyeza insuku lapho abantu abazakuthi, ‘Bayathokoza abesifazana abazinyumba labangazalanga kanye lalabo abalamabele angamunyisanga!’+ 30 Bazaqalisa lokuthi ezintabeni, ‘Welani phezu kwethu!’ baphinde bathi emaqaqeni, ‘Sigubuzeleni!’+ 31 Nxa besenza izinto lezi isihlahla siluhlaza, pho kuzakwenzakalani nxa sesiswabile?”
32 Babemqhuba elamanye amadoda amabili ayeyizigebenga, lawo esiyabulawa kanye laye.+ 33 Bathi befika endaweni eyayibizwa ngokuthi yiNdawo Yokhakhayi+ bambethela esigodweni, ephahlwe yizigebenga ezimbili, esinye sikwesokudla, esinye sikwesenxele.+ 34 Kodwa uJesu wathi: “Baba, bathethelele ngoba abakwazi abakwenzayo.” Baphinda benza inkatho ukuze babelane izembatho zakhe.+ 35 Abantu bama babukela. Kodwa ababusi babekhuluma okokweyisa besithi: “Angithi abanye wabasindisa, laye kazisindise phela nxa kuyikuthi unguKhristu kaNkulunkulu, lowo okhethiweyo.”+ 36 Amasotsha lawo amenza inhlekisa, asondela kuye amnika iwayini elimunyu,+ 37 esithi: “Zisindise nxa uyiNkosi yamaJuda.” 38 Ngaphezu kwakhe kwakubhalwe amabala athi: “Le YiNkosi YamaJuda.”+
39 Esinye isigebenga esasiseceleni kwakhe samthethisa+ sathi, “Ayisuwe yini uKhristu? Zisindise phela, usisindise lathi!” 40 Sasesikhuzwa ngesinye sathi: “Kanti awumesabi ngitsho uNkulunkulu? Awuboni yini ukuthi sonke sithole isigwebo esifananayo? 41 Kodwa thina sisifanele ngoba sithola umvuzo wezinto esazenzayo. Indoda le yona kayonanga lutho.” 42 Isigebenga leso saphinda sathi: “Jesu, ungikhumbule nxa ufika eMbusweni wakho.”+ 43 Wasesithi kuso: “Ngikutshela iqiniso lamuhla ngithi, uzakuba lami ePharadayisi.”+
44 Lanxa kwakungaba lihora lesithupha,* kwaba mnyama yonke indawo kwaze kwaba lihora lesi-9*+ 45 ngoba ilanga lalingasakhanyisi. Kusenjalo ikhetheni lendawo engcwele+ ladabuka lehlukana phakathi.+ 46 UJesu wamemeza ngelizwi elikhulu wathi: “Baba, impilo yami ngiyibeka* ezandleni zakho.”+ Esetsho njalo waphela.*+ 47 Umkhokheli webutho wathi ebona okwakwenzakele wakhazimulisa uNkulunkulu wathi: “Indoda le ibilungile sibili.”+ 48 Abantu bonke ababebuye ukuzobona okwakusenzakala bathi sebebone konke lokhu babuyela emakhaya betshaya izifuba zabo belila. 49 Bonke ababemazi babemele khatshana. Abesifazana ababesuke laye eGalile labo babekhona futhi bazibona izinto lezi.+
50 Kwakulendoda okwakuthiwa nguJosefa eyayililunga loMthethwandaba Omkhulu wamaJuda. Yayilomusa futhi ilungile.+ 51 (Indoda le ayizange ilivotele icebo labo kanye lalokho ababekwenza.) Yayidabuka e-Arimathiya, idolobho leJudiya, njalo yayilindele uMbuso kaNkulunkulu. 52 Yahamba kuPhilathu yafika yacela isidumbu sikaJesu, 53 yasisethula+ yasigoqela ngelineni elilohlonzi, yasibeka ethuneni elaligujwe edwaleni.+ Kwakungakaze kubekwe isidumbu ethuneni lelo. 54 Manje kwakulilanga lokulungiselela+ futhi iSabatha+ laselizaqalisa. 55 Kodwa abesifazana ababesuke loJesu eGalile balandela bafika balibona ithuna, babona lokuthi isidumbu sakhe sasibekwe njani,+ 56 basebebuyela bayalungisa amakha lamafutha anukelelayo. Kodwa baphumula ngeSabatha+ njengoba nje umlayo wawusitsho.
24 Ngelanga lokuqala leviki bafika ethuneni ekuseni kakhulu bethwele amafutha anukelelayo ababewalungisile.+ 2 Kodwa bafica ilitshe ligiqiwe lasuswa ethuneni,+ 3 basebengena bathola isidumbu seNkosi uJesu singekho.+ 4 Bathi belokhu besathithibele, babona sekulamadoda amabili emi khonapho, egqoke izembatho ezikhazimulayo. 5 Abesifazana laba bethuka bakhangela phansi, baqhubeka bekhothamise amakhanda. Amadoda la athi kubo: “Kungani lidinga umuntu ophilayo ebantwini abafileyo?+ 6 Kakho lapha, usevusiwe. Khumbulani ukuthi wathi eseGalile walitshela ukuthi 7 iNdodana yomuntu kumele inikelwe ebantwini abayizoni ibisibulawa ngokubethelwa esigodweni, ivuke ngelanga lesithathu.”+ 8 Bawakhumbula amazwi akhe,+ 9 basebesuka ethuneni bayatshela abaliTshumi Lanye labanye konke okwakwenzakele.+ 10 Abatshela abaphostoli izindaba lezi kwakunguMariya Magadalena, loJowana, loMariya unina kaJakhobe kanye labanye abesifazana ababelapho. 11 Kodwa abazange babakholwe abesifazana laba ngoba kubo kwakungathi bakhuluma into engelangqondo.
12 Loba kunjalo uPhetro wasukuma, wagijima esiya ethuneni. Wafika wakhothama walunguza phakathi, wasebona amalembu elineni kuphela. Ngakho wasuka wahamba, ezibuza ukuthi kwakwenzakaleni.
13 Ngalelolanga abafundi ababili babesiya esigabeni okuthiwa yi-Emawusi, esingaba ngamakhilomitha angu-11* nxa usuka eJerusalema. 14 Babehamba bexoxa ngezinto zonke lezi ezazenzakele.
15 Bathi belokhu besakhuluma ngezinto lezo, uJesu wafika waqalisa ukuhamba labo 16 kodwa abananzelelanga ukuthi nguye.+ 17 Wathi kubo: “Kanti lihamba likhuluma ngani?” Bama mpo kukhanya ukuthi badanile. 18 Omunye wabo okwakuthiwa nguKlewophasi wathi kuye: “Kanti uyisihambi yini esihlala sodwa eJerusalema? Utsho ukuthi awuzazi izinto ezenzakale lapho ezinsukwini ezisanda kwedlula?” 19 Wasesithi kubo: “Izinto ziphi?” Bathi kuye: “Izinto eziphathelane loJesu umNazaretha,+ owatshengisa ngezenzo langamazwi phambi kukaNkulunkulu labantu bonke ukuthi ungumphrofethi olamandla.+ 20 Abaphristi bethu abakhokhelayo lababusi bamnikele ukuthi agwetshelwe ukufa,+ basebembethela esigodweni. 21 Kodwa besilethemba lokuthi umuntu lo nguye ozakhulula abako-Israyeli.+ Phezu kwalokho, lamuhla sekulilanga lesithathu izinto lezi zenzakele 22 njalo abanye abesifazana abaphakathi kwethu basimangalisile ngoba bahambe ethuneni kusesele+ 23 bathola isidumbu sakhe singekho, basebebuya basitshela ukuthi babone izingilosi ezibatshele ukuthi uyaphila. 24 Abanye ebesilabo basebesuka baya ethuneni,+ bathola kunjengoba nje abesifazana betshilo kodwa yena abambonanga.”
25 Ngakho wathi kubo: “Lina bantu abangafuni ukucabanga labaphuza ukukholwa izinto zonke ezakhulunywa ngabaphrofethi, 26 bekungafanelanga yini ukuthi uKhristu ahlupheke kanje+ njalo athole inkazimulo yakhe?”+ 27 Waseqalisa kuMosi lakubo bonke abaPhrofethi,+ wabachasisela izinto eziphathelane laye eziseMibhalweni yonke.
28 Bathi sebeseduze lesigaba ababesiya kuso, wenza angathi uzadlula aqhubeke ngohambo. 29 Basebemncenga ukuthi angahambi, bathi: “Hlala lathi ngoba sekusiba ntambama lelanga selisiyatshona.” Yikho wangena labo endlini. 30 Wathi elokhu esahlezi labo besidla, wathatha isinkwa wathandaza,* wasihlephuna waqalisa ukubaqhubela.+ 31 Kwasekusithi dlwe emehlweni abo bamnanzelela kodwa wasenyamalala wasuka kubo.+ 32 Babuzana bathi: “Inhliziyo zethu bezingavuthi yini ngesikhathi ekhuluma lathi emgwaqweni, esichasisela kuhle* iMibhalo?” 33 Bahle basukuma ngalesosikhathi babuyela eJerusalema, bathola abaliTshumi Lanye bebuthene labanye. 34 Laba ababebuthene bathi: “INkosi ivusiwe sibili futhi ibonakele kuSimoni!”+ 35 Abafundi ababili babatshela okwakwenzakele emgwaqweni lokuthi uthe ehlephuna isinkwa bahle bananzelela ukuthi nguye.+
36 Bathi belokhu besaxoxa ngezinto lezi, yena ngokwakhe wama phakathi kwabo wathi kubo: “Ukuthula akube kini.”+ 37 Kodwa bethuka batshaywa luvalo becabanga ukuthi babona isidalwa somoya. 38 Yikho wathi kubo: “Kungani likhathazekile futhi lithandabuza ezinhliziyweni zenu? 39 Khangelani izandla zami lenyawo zami, yimi kanye. Ngithintani lizibonele, umoya awulanyama lamathambo kodwa liyazibonela ukuthi mina ngilakho.” 40 Watsho njalo ebatshengisa izandla lenyawo zakhe. 41 Kodwa basebethabe bengasazazi futhi bemangele kakhulu, belokhu bengamkholwa. Wasesithi kubo: “Lilakho yini okudliwayo lapha?” 42 Bamqhubela inhlanzi ewosiweyo, 43 wayithatha wayidla bemkhangele.
44 Wasesithi kubo: “Nanka amazwi ami engalitshela wona ngiseselani.+ Ngalitshela ukuthi konke okumayelana lami okubhalwe eMthethweni kaMosi lakubaPhrofethi kanye lakumaHubo kufanele kugcwaliseke.”+ 45 Wasebavula ingqondo ukuze bazwisise kuhle okwakutshiwo yiMibhalo.+ 46 Wathi kubo, “Kubhaliwe ukuthi uKhristu uzahlupheka abesevuka kwabafileyo ngelanga lesithathu+ 47 lokuthi kusukela eJerusalema,+ kuzatshunyayelwa ezizweni zonke+ ngebizo lakhe ukuze abantu baphenduke bathethelelwe izono.+ 48 Lizakuba ngofakazi bezinto lezi,+ 49 futhi zwanini: Ngizalithumela lokho uBaba akuthembisayo. Lina nje hlalani edolobheni leli lize lembathiswe amandla avela phezulu.”+
50 Ngemva kwalokho wahamba labo baze bayafika eBhethani, wasephakamisa izandla zakhe wababusisa. 51 Wathi esababusisa wehlukaniswa labo, wathathwa waya ezulwini.+ 52 Bamkhothamela basebebuyela eJerusalema bethabe okwamagama.+ 53 Babehlala besethempelini bedumisa uNkulunkulu.+
NgesiGrikhi, “owazifundiswa ngomlomo.”
Khangela iNgcazelo Yamabala.
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Kumbe, “umbono.”
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Khangela iSengezo ku-A5.
NgesiGrikhi, “sibusisiwe isithelo sesisu sakho.”
Khangela iSengezo ku-A5.
Khangela iNgcazelo Yamabala.
Khangela iSengezo ku-A5.
Kumbe, “abaswelayo.”
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Kumbe, “umsindisi olamandla.” Khangela iNgcazelo Yamabala ebaleni elithi, “Uphondo.”
Khangela iSengezo ku-A5.
NgesiGrikhi, “waqina emoyeni.”
Kumbe, “emhlabeni wonke.”
Kumbe, “engugavena.”
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Khangela iSengezo ku-A5.
NgesiGrikhi, “kusukela eyintombi egcweleyo.”
Khangela iSengezo ku-A5.
Kumbe, “ebalalela.”
Kumbe, “engugavena.”
Lapha kutshiwo uHerodi Antiphasi. Khangela iNgcazelo Yamabala.
NgesiGrikhi, “engumthethirakhi,” okutsho isikhulu sendawo ethile esimele umbusi weRoma.
Khangela iSengezo ku-A5.
Kumbe, “indlela kaNkulunkulu yokusindisa.”
Kumbe, “Lingathatheli abantu imali ngenkani.”
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Kumbe, “owasiliswayo.”
Lapha kutshiwo uLwandle lweGalile.
NgesiGrikhi, “bavalela.”
Khangela iSengezo ku-A5.
Lapha kutshiwo umbheda omncane wokuthwala umuntu ogulayo.
Lapha kutshiwo umbheda omncane wokuthwala umuntu ogulayo.
Lapha kutshiwo umbheda omncane wokuthwala umuntu ogulayo.
Lapha kutshiwo umbheda omncane wokuthwala umuntu ogulayo.
Kumbe, “besithi ibizo lenu libi.”
Lapha kutshiwo ukuboleka imali engazaliyo.
Kumbe, “uthungo.”
Kumbe, “uthungo.”
Kumbe, “uthungo.”
NgesiGrikhi, “Yayiyindodana ezelwe yodwa.”
Lapha kutshiwo umbheda okwakubekwa kuwo isidumbu.
Kumbe, “ezilohlonzi.”
Kumbe, “isiqondiso.”
Kumbe, “ngempumela yakho yonke.”
Khangela iSengezo ku-B14.
NgesiGrikhi, “Wahlulele kuhle.”
Kumbe, “zizinkulu.”
Lapha kutshiwo uLwandle lweGenesaretha kumbe uLwandle lweGalile.
Ezinye inguqulo zithi, “Kwasekulesikhathi eside liyibambile.”
NgesiGrikhi, “Yayizelwe yodwa.”
NgesiGrikhi, “izasinda.”
NgesiGrikhi, “Umoya wakhe waphenduka.” Khangela iNgcazelo Yamabala ebaleni elithi, “Umoya.”
NgesiGrikhi, “isiliva.”
Kumbe, “esinye isembatho.”
Lapha kutshiwo uHerodi Antiphasi. Khangela iNgcazelo Yamabala.
NgesiGrikhi, “umthethirakhi,” okutsho isikhulu sendawo ethile esimele umbusi weRoma.
NgesiGrikhi, “wazibusisa.”
Khangela iNgcazelo Yamabala.
Kumbe, “umphefumulo.”
Kumbe, “ngumphefumulo.”
Kumbe, “izathengiselwa.”
Kumbe, “lingabingeleli muntu ngokumgona.”
Khangela iSengezo ku-A5.
Khangela iNgcazelo Yamabala.
Khangela iSengezo ku-B14.
NgesiGrikhi, “ilizwi layo.”
Kumbe, “okungcono kulakho konke.”
Lapha kutshiwo ukuthi kalihlonitshwe njalo liqakathekiswe.
NgesiGrikhi, “isinkwa sethu.”
NgesiGrikhi, “abalezikwelede zethu.”
Leli libizo okubizwa ngalo uSathane.
NgesiGrikhi, “lendlu.”
Kumbe, “ngebhasikiti yokulinganisa.”
Kumbe, “libona kuhle.” NgesiGrikhi, “lilula.”
Kumbe, “ugcwele ukukhanya.”
NgesiGrikhi, “lilibi.”
Lapha kutshiwo ukuthi wayengagezanga ngokwesiko lamaJuda.
NgesiGrikhi, “izipho zesihawu.” Khangela iNgcazelo Yamabala.
Iminti leruwi yizihlahlakazana ezilinywayo ezifakwa ekudleni ukuze kube mnandi.
Kumbe, “ezingcono kulazo zonke.”
NgesiGrikhi, “ukuhlakanipha kukaNkulunkulu kwathi.”
Khangela iNgcazelo Yamabala.
NgesiGrikhi, “ngama-asariyoni amabili.” Khangela iSengezo ku-B14.
Kumbe, “angelandaba layo.”
Ezinye inguqulo zithi, “emasinagogeni.”
NgesiGrikhi, “ingalo eyodwa.” Khangela iSengezo ku-B14.
NgesiGrikhi, “izipho zesihawu.” Khangela iNgcazelo Yamabala.
Kumbe, “yinondo.” Ibala lesiGrikhi elisetshenziswe lapha litsho izibungu eziphaphayo ezidla amalembu.
NgesiGrikhi, “Izinkalo zenu kazibotshwe.”
Lesi yisikhathi esisukela kubo-9 ebusuku kusiya phakathi kwamabili.
Lesi yisikhathi esisukela phakathi kwamabili kusiya ekuseni ngabo-3.
Kumbe, “umphathi wendlu.”
Kumbe, “izisebenzi zendlini.”
Kumbe, “intando yenkosi yayo.”
NgesiGrikhi, “ilephuthoni yokucina.” Khangela iSengezo ku-B14.
NgesiGrikhi, “engamaseya ayizilinganiso ezintathu.” Iseya yayilingana lamalitha angu-7,33. Khangela iSengezo ku-B14.
Khangela iSengezo ku-A5.
NgesiGrikhi, “odla isinkwa.”
Kumbe, “inkomo ezilitshumi.”
Kumbe, “emthanda ukwedlula mina.”
Kumbe, “lomphefumulo wakhe.”
Khangela iNgcazelo Yamabala.
Lapha kutshiwo isakhiwo eside.
NgesiGrikhi, “avalelise.”
Khangela iSengezo ku-B14.
Khangela iSengezo ku-B14.
Kumbe, “yobutshapha.”
NgesiGrikhi, “wawela entanyeni yayo.”
Kumbe, “eyayilomphathi wendlu.”
NgesiGrikhi, “ayizilinganiso zamabhathi ezingu-100.” Khangela iSengezo ku-B14.
Kumbe, “ayisilinganiso samakhori angu-100.” Khangela iSengezo ku-B14.
Kumbe, “uyaqedisisa.”
Kumbe, “bomumo lo wezinto.” Khangela iNgcazelo Yamabala.
Lapha kutshiwo umuntu otshadileyo olala lomuntu ongasimkakhe.
NgesiNgisi umbala oyibubende yi-purple.
NgesiGrikhi, “esifubeni sika-Abrahama.”
NgesiGrikhi, “esifubeni sakhe.”
Kumbe, “ukini.”
Kumbe, “umphefumulo.”
Khangela iSengezo ku-A3.
Kumbe, “lolu.”
Lapha kutshiwo umuntu otshadileyo olala lomuntu ongasimkakhe.
Kumbe, “lesihawu.”
Lapha kutshiwo umuntu otshadileyo olala lomuntu ongasimkakhe.
Kumbe, “kumumo wezinto ozayo.” Khangela iNgcazelo Yamabala.
Kumbe, “Siyaqansa siya.”
Imina lamaGrikhi lalingamagremu angu-340 njalo kwakuthiwa lilingana lamadrakhima angu-100. Khangela iSengezo ku-B14.
Kumbe, “esewuphiwe umbuso.”
NgesiGrikhi, “isiliva.”
NgesiGrikhi, “isiliva sami.”
Khangela iSengezo ku-A5.
Khangela iNgcazelo Yamabala.
Kumbe, “lakugavena.”
Kumbe, “Kuqondile.”
Khangela iSengezo ku-B14.
Khangela iNgcazelo Yamabala.
Khangela iSengezo ku-A5.
Khangela iSengezo ku-A5.
Isenabelo kulapho umuntu abeka khona inyawo zakhe nxa ehlezi esitulweni.
Kumbe, “ezingcono kulazo zonke.”
NgesiGrikhi, “izindlu zabo.”
NgesiGrikhi, “amalephuthoni amabili.” Khangela iSengezo ku-B14.
Kumbe, “engumyanga.”
Kumbe, “lemivukela; lokuxokozela.”
Kumbe, “labogavena.”
Kumbe, “zimiseleni ezinhliziyweni zenu ukungalungiseleli.”
Kumbe, “lizathengiswa.”
Kumbe, “zokuphindisela.”
Kumbe, “ngodlayo.”
Kumbe, “odlayo.”
Kumbe, “alihlungule.”
Khangela iSengezo ku-A3.
NgesiGrikhi, “Msuse lowo.”
Kumbe, “abulawe ngokubethelwa esigodweni.”
Kumbe, “bayethesa.”
Khangela iNgcazelo Yamabala.
Kumbe, “kwakungabo-12 emini.”
Kumbe, “ngabo-3 emini.”
NgesiGrikhi, “umoya wami ngiwubeka.”
Kumbe, “waphefumula okokucina.”
NgesiGrikhi, “ngamastadiya angu-60.” Istadiya yayingamamitha angu-185. Khangela iSengezo ku-B14.
NgesiGrikhi, “wabusisa.”
NgesiGrikhi, “esivulela.”