AMACEBO OKULWISANA LOKUKHATHAZEKA

Kuyini Ukukhathazeka?

Nxa kulolutho olukuhluphayo uyaqalisa ukukhathazeka. Lokhu kubangelwa yikuthi ingqondo iyathumela imilayezo emzimbeni wonke. Inhliziyo yakho iyaqalisa ukutshaya ngamandla, igazi ligijime, uzwe ukuthi kukhona okwenzakala emaphatshini futhi uzwe lemisipha yakho isibopha. Umzimba wakho uyabe usulungele loba yini lanxa wena ungabe ungakazwisisi ukuthi kwenzakalani. Nxa okukade kukukhathaza sekudlulile, umzimba wakho uyabuyela esimeni osijayeleyo.

UKUKHATHAZEKA OKUNCEDAYO LOKUKHATHAZEKA OKUYINGOZI

Ukukhathazeka kuyazenzakalela futhi kunceda ukuthi wenelise ukulungela ubunzima loba ingozi engaba khona. Ingqondo ihle ikutshele ukuthi sekulento ekukhathazayo. Ukukhathazeka okuncedayo kuyakusiza ukuthi wenze isinqumo ngokuphangisa. Okunye ukukhathazeka kungakunceda uphumelele ezintweni ohlele ukuzenza. Ngokwesibonelo, kungakunceda nxa ubhala umhloliso, udinga umsebenzi kumbe ngesikhathi usemncintiswaneni.

Lanxa kunjalo, ukuhlala ukhathazekile kuyingozi. Kungaphambanisa indlela ocabanga ngayo kanye lemizwa yakho. Indlela ophatha ngayo abanye layo ingantshintsha. Abantu abahlala bekhathazekile bandise ukunatha kakhulu, ukusebenzisa izidakamizwa kanye lokwenza eminye imikhuba emibi ecina ibalimaza. Kungabangela lokuthi uhlulukelwe, uzwe ungelamandla okwenza loba yini kumbe ucine usucabanga ukuzibulala.

Lanxa ukukhathazeka kungahlaseli abantu ngendlela efananayo, kungabangela imikhuhlane etshiyeneyo. Kungahlasela phose zonke izingxenye zomzimba.

OKWENZAKALA EMZIMBENI WOMUNTU OKHATHAZEKE KAKHULU

Ingqondo lomgogodla.

Izinto lezi zikhipha ama-hormone afanana le-adrenaline le-cortisol. Lokhu kwenza inhliziyo itshaye kakhulu, igazi ligijime njalo letshukela esegazini iqanse ukuze uthole amandla okubalekela ingozi masinyane. Ukukhathazeka kakhulu kungabangela ukuthi:

ucatshulwe yizinto ezingatsholutho, ungahlaliseki, uhlulukelwe, utshaywe likhanda njalo uphelelwe yibuthongo

Amathambo lemisipha.

Imisipha yakho iyabopha ukuze ikuvikele ukuthi ungalimali kakhulu. Ukukhathazeka kakhulu kungabangela ukuthi:

umzimba ube buhlungu, utshaywe likhanda, imisipha idonseke

Ukuphefumula.

Uyabe usuphefumula masinyane ukuze udonse umoya omnengi. Ukukhathazeka kakhulu kungabangela ukuthi:

uphefumule ngendlela engajayelekanga njalo uzwe angathi usuphela umoya, ikanti abanye bajayele ukufikelwa layikwesaba

Inhliziyo lemithambo yegazi.

Inhliziyo yakho iyabe isitshaya ngamandla ukuze ihambise igazi emzimbeni wonke. Imithambo yegazi iyaqhela kumbe inciphe ukuze igazi liye lapho elidingakala khona kakhulu. Ukukhathazeka kakhulu kungabangela ukuthi:

inhliziyo ime ukutshaya, ube lomkhuhlane we-BP, kumbe utshaywe yi-stroke

Isibindi.

I-adrenaline le-cortisol ngama-hormone akunceda ukuthi ulwisane lokukhathazeka. Isibindi senza itshukela esegazini iqanse ukuze uthole amandla amanengi. Ukukhathazeka kakhulu kungabangela ukuthi:

ucine usulomkhuhlane wetshukela, umzimba wehluleke ukuzivikela emikhuhlaneni, uhlale ugulagula, uphangise ukudana, ube lomzimba omkhulu

Ukusebenza kwezitho ezigaya ukudla.

Ukugayeka kokudla emzimbeni kuyaphambaniseka. Ukukhathazeka kakhulu kungabangela:

isiyezi, ukuhlanza, isihudo, ukwehluleka ukuya ngaphandle

Izitho zensitha.

Ukukhathazeka kuyantshintsha isifiso sokuya emacansini. Ukukhathazeka kakhulu kungenza:

isitho sowesilisa singavuki nxa sekumele aye emacansini, kungaphambanisa indlela owesifazana angena ngayo esikhathini