3. Kungani Abantu Abalungileyo Behlupheka?
Kungani Kumele Udinge Impendulo Yombuzo Lo?
Kubuhlungu kakhulu ukubona abantu abalungileyo behlupheka. Abanye bacina bebona kungancedi ukwenza okulungileyo ngoba vele uyabe uzahlupheka njengomuntu wonke.
Okumele Ucabange Ngakho
Abanye abantu bakholwa ukuthi nxa umuntu angafa uyabe elokhe ezalwa esiba ngomunye umuntu. Bathi nxa umuntu owayesenza izinto ezinhle angafa, uyabe ezazalwa futhi ukuthi aphile impilo emnandi. Kodwa lowo owafa esenza okubi uyabe ezazalwa futhi ukuthi aphinde ahlupheke. Imfundiso leyo ithi umuntu olungileyo angahlupheka nxa kuyikuthi wake wenza izinto ezimbi engakafi. Kodwa . . .
Uyabe esahluphekelani ngoba phela uyabe engasakhumbuli izinto azenza engakafi?
Kunceda ngani ukuba lempilakahle lokubalekela izingozi nxa kuyikuthi okwenzakala kithi kuya ngalokho esakwenza kudala?
FUNDA OKUNENGI
Bukela ividiyo ethi Yindaba UNkulunkulu Evumela Ukuhlupheka? etholakala ku-jw.org.
Okutshiwo LiBhayibhili
Ukuhlupheka ayisiso sijeziso esivela kuNkulunkulu.
Kwesinye isikhathi abantu behlelwa zinhlupho ngenxa yokuthi bayabe besendaweni engayisiyo ngesikhathi esingayisiso.
‘Ukutshiya abanye kakuyi ngesiqubu kumbe ukunqoba impi kuye ngamandla; kakutsho ukuthi ukudla kuya kwabahlakaniphileyo kumbe inotho kwabakhaliphileyo loba okuhle kwehlele abafundileyo; kodwa abantu bafikelwa yizikhathi ezimbi ezibafikela belibele.’—UMTSHUMAYELI 9:11, 12.
Okunye okwenza sihlupheke yisono.
EBhayibhilini, ibala elithi “isono” lisetshenziswa nxa kukhulunywa ngezenzo ezimbi umuntu ayabe ezenzile njalo liphinda lisetshenziswe nxa kukhulunywa ngokuthi wonke umuntu ulesono esasithatha ku-Adamu lo-Eva.
“Ngavele ngazalwa ngilesono, ngaba yisoni ngiqalisa esiswini sikamama.”—IHUBO 51:5.
Impumela yesono ebantwini.
Isono siphambanise ubuhlobo bethu loMdali wethu njalo senza lokuthi singazwanani lezinye izidalwa zakhe. Lokhu kwenze abantu bonke bahlupheka kakhulu.
“Nxa ngifisa ukwenza okuqondileyo, okubi kuyabe kukimi khonapho.”—KWABASEROMA 7:21.
“Konke okudaliweyo kuqhubeka kububula ndawonye futhi kusebuhlungwini kuze kube khathesi.”—KWABASEROMA 8:22.