UMHLABA OGCWELE INHLUPHO

3 | Qinisa Ubudlelwano Bakho Labantu Obathandayo

KUNGANI KUQAKATHEKILE?

Ukwanda kwenhlupho emhlabeni kwenze abantu abanengi bangabi lendaba lezihlobo zabo kanye labangane.

Abantu bayaqhelelana labangane babo.
Abatshadileyo bacina bengasaphathani kuhle.
Abazali bacina bengaselandaba kangako lokuthi kuyini okukhathaza abantwababo.

Okumele Ukwazi

Ukuba labangane kuqakathekile ukuze sibe lempilakahle futhi singakhathazeki kakhulu ezikhathini lezi ezinzima.
Ubunzima obubangelwa zinhlupho ezisemhlabeni lo bungenza ukuthi kube lezinhlupho obungazikhangelelanga emulini yakho.
Imibiko eyethusayo ekhitshwa ngabezindaba ingenza abantwabakho besabe kakhulu futhi lokho ungabe ungakunanzeleli.

Ongakwenza

IBhayibhili lithi: “Umngane ulothando ngezikhathi zonke, lomzalwane uzalelwa izikhathi zenhlupheko.”—IZaga 17:17.

Abangane bangasinceda futhi basicebise. Ukwazi ukuthi kulomuntu olendaba lawe kungakunceda ukuthi ubekezele nxa uphakathi kwenhlupho.

KUYINI OKUNGAKUNCEDA? Amacebo Angakunceda

Nanka amacebo angakunceda ukuthi uvikele ubudlelwano bakho labantu obathandayo ngezikhathi ezinzima

QINISA UMTSHADO WAKHO

Qinisa umtshado wakho

IBhayibhili lithi: “Ababili bangcono kuloyedwa, . . . Omunye angawa, umngane wakhe uyamncedisa amvuse.” (UmTshumayeli 4:9, 10) Abatshadileyo akumelanga balwisane kodwa kumele basebenze ndawonye njengabatshayeli bendizamtshina abancedisanayo.

Zimisele ukungaphathi kubi omunye wakho nxa kulokunye okukukhathazayo. Woba ngumuntu obekezelayo.
Maviki wonke zinike isikhathi sokuhlala phansi lomunye wakho ukuze lilungise loba yiluphi uhlupho olufuna ukulungiswa. Khumbula ukuthi liyabe lihlose ukulungisa uhlupho hatshi ukuhlaselana.
Zinikeni isikhathi sokwenza izinto elizithandayo ndawonye.
Khumbulani izikhathi ezinhle elake laba lazo, mhlawumbe likhangele imifanekiso yomtshado wenu kumbe eyezinye nje izikhathi ezimnandi.

“Abatshadileyo ngeke bavumelane ezintweni zonke kodwa lokhu akutsho ukuthi abenelisi ukusebenza ndawonye. Indoda lomkayo bangenelisa ukwenza isinqumo, besebesebenza ndawonye ukuze benze lokho abakukhethileyo.”—UDavid.

HLALA USEDUZE LABANGANE BAKHO

Hlala useduze labangane bakho

Vuma ukuthi abangane bakho bakuncedise, kodwa lawe cabanga langendlela ongancedisa ngayo abanye. Ukukhuthaza abanye lokubaqinisa kuzakunceda lawe.
Zama ukuthi ilanga ngalinye uxoxe labangane bakho ukuze uzwe ukuthi banjani.
Babuze ukuthi kuyini okubancede ukuthi benelise ukulwisana lenhlupho ezifanana lalezo olazo.

“Izikhathi ezinzima zingafaniswa lesiphepho. Nxa izulu kanye lomoya kusenza kube nzima ukuthi ubone lapho okumele uyekhona, abangane bakho bangakuncedisa. Kwezinye izikhathi bangakukhumbuza izinto ovele uzazi. Abangane bakho balendaba lawe futhi bayakwazi ukuthi lawe ulendaba labo.”—UNicole.

WOBA NGUMZALI OLOTHANDO

Woba ngumzali olothando

IBhayibhili lithi: ‘Phangisa ukulalela, uphuze ukukhuluma.’ (UJakhobe 1:19) Ekuqaliseni kungabanzima ukuthi abantwabakho bakutshele okubakhathazayo, kodwa nxa ungababekezelela njalo ubalalelisise bazacina bekuthululela isifuba.

Yenza abantwabakho bakhululeke ukukutshela abakucabangayo. Abanye abantwana kungabathwalisa nzima ukutsho abakucabangayo nxa behlaliswe phansi ngabazali babo ukuze bakhulume ngokubakhathazayo. Kodwa kubalula ukwenza njalo nxa besenza ezinye izinto labazali babo bezikhululekele nje.
Woba leqiniso lokuthi abantwabakho abahlali belalele kumbe bebukele izindaba ezethusayo.
Batshele ukuthi kuyini osukwenzile ukuze uvikele imuli yenu.
Hlela ukuthi lizakwenzani nxa kungaba lesimo esiyingozi, ubusukuprakithiza labo.

“Xoxa labantwabakho futhi ubanike ithuba lokutsho indlela abazizwa ngayo. Kungenzakala ukuthi bayesaba, bakhathazekile kumbe bazondile. Batshele ukuthi lawe uyake uzizwe njalo lokuthi kuyini okujayele ukukunceda.”—UBethany.