Induku ka-Aroni Imila Amaluba

KHANGELA induku noma isigodo lesi esimila amaluba lama-alimondi avuthiweyo. Yinduku ka-Aroni. Amaluba lezithelo lezi ezivuthiweyo kumile endukwini ka-Aroni ngobusuku obubodwa kuphela! Ake sibone ukuthi kungani lokhu kwenzakele.

Ama-Israyeli aselesikhathi ezulazula egangeni. Abanye abantu babona angani uMosi kakumelanga akhokhele, noma ukuthi u-Aroni kakumelanga abe ngumphristi omkhulu. UKhora, uDathani, u-Abhiramu labakhokheli abangu-250 yibo abacabanga njalo. Bonke laba balanda uMosi besebesithi: ‘Kungani liziphakamisa phezu kwethu?’

UMosi utshela uKhora labalandeli bakhe ukuthi: ‘Kusasa ekuseni lithathe imiganu beselifaka impepha kuyo. Beselibuya ethabanikeli likaJehova. Sizabona ukuthi uJehova uzakhetha bani.’

Ngelanga elilandelayo, uKhora labalandeli bakhe abangu-250 babuya ethabanikeli. Abanye abanengi babuya ukuzobasekela. UJehova uzonde kakhulu. UMosi uthi: ‘Sukani emathenteni abantu laba ababi. Lingathinti lutho olungolwabo.’ Abantu bayalalela besebesuka baye khatshana lamathente aboKhora, uDathani lo-Abhiramu.

UMosi abesesithi: ‘Nansi indlela elizabona ngayo ukuthi uJehova uthume bani. Umhlaba uzavuleka ubusuginya abantu laba ababi.’

UMosi eqeda nje ukukhuluma, umhlaba uyavuleka. Ithente likaKhora, uDathani lo-Abhiramu lalabo abalabo lezinto zabo zonke kuginywa ngumhlaba. Lapho abantu besizwa ukukhala kwalabo abawela phakathi komhlaba, bayamemeza besithi: ‘Balekani! Umhlaba ungasiginya lathi!’

UKhora labalandeli bakhe abangu-250 lokhu beseduze lethabanikeli. UJehova uthumela umlilo, bonke batshe. Utshela indodana ka-Aroni u-ELiyazari ukuthi athathe iziphathelo zempepha zamadoda la asefile, enze okokuvala i-alithare. Lokhu okokuvala i-alithare kumele kube yisixwayiso kuma-Israyeli ukuthi akula muntu okumele abe ngumphristi kaJehova ngaphandle kuka-Aroni lamadodana akhe.

Kodwa uJehova ufuna ukucacisa ukuthi ukhethe u-Aroni lamadodana akhe ukuthi babe ngabaphristi. Yikho utshela uMosi ukuthi: ‘Umkhokheli ngamunye wesizwana sako-Israyeli kalethe induku yakhe. U-Aroni kalethe induku yesizwana sikaLevi. Induku lezi ubusuzifaka ethabanikeli phambi kwebhokisi lesivumelwano. Induku yendoda engiyikhethileyo ukuthi ibe ngumphristi izamila amaluba.’

Ngelanga elilandelayo ekuseni uMosi ubona induku ka-Aroni isilamaluba lama-alimondi avuthiweyo akhula kiyo! Usubona yini ukuthi kungani uJehova wenza induku ka-Aroni yamila amaluba?