UMosi Utshaya Idwala

IMINYAKA iyadlula ibe ngu-​10, 20, 30 ize ibe ngu-39! Ama-Israyeli alokhu esegangeni. Kodwa phakathi kweminyaka yonke le, uJehova uyabagcina abantu bakhe. Ubanika imana. Emini ubakhokhela ngeyezi njalo ebusuku ubakhokhela ngeyezi elingumlilo. Phakathi lesikhathi sonke lesi impahla zabo kazigugi njalo inyawo zabo kazibi buhlungu.

Sekuyinyanga yokuqala yomnyaka wesi-40 besuke eGibhithe. Ama-Israyeli ayama aphinde enze izihonqo eKhadeshi. Le yiyo indawo ababekiyo ngesikhathi abantu abangu-12 bethunywa ukuyahlola ilizwe leKhenani phose iminyaka engu-40 eyadlulayo. UMiriyamu udadewabo kaMosi ufela eKhadeshi. Njengakuqala, kuba lohlupho lapha.

Abantu sebeswele amanzi. Yikho bakhonona kuMosi besithi: ‘Kwakuzaba ngcono ngabe sazifela. Lasikhuphelani eGibhithe lasiletha endaweni le embi kangaka, engamili lutho? Ayilamabele kumbe amakhiwane, amavini loba amaphomegranethi. Njalo akulamanzi okunatha!’

Ngesikhathi uMosi lo-Aroni besiya ethabanikeli ukuyakhuleka, uJehova uthi kuMosi: ‘Biza abantu babendawonye. Beselikhuluma ledwala leliyana phambi kwabo. Amanzi enela abantu lazo zonke izifuyo zabo azaphuma kulo.’

UMosi uyababuthanisa abantu, abesesithi: ‘Lalelani, lina elingamthembiyo uNkulunkulu! Silikhuphele yini amanzi kulelidwala mina lo-Aroni?’ UMosi abesetshaya idwala kabili ngenduku besekuphuma amanzi egeleza elitsheni. Amanzi aphumayo enela abantu bonke lezifuyo zabo.

Kodwa uJehova ubazondele uMosi lo-Aroni. Uyakwazi ukuthi kungani? Kungenxa yokuthi uMosi lo-Aroni bathe bona yibo abazakhupha amanzi edwaleni. Kodwa eqinisweni nguJehova owawakhuphayo. Ngenxa yokuthi uMosi lo-Aroni kabakhulumanga iqiniso, uJehova uthi uzabajezisa. Uthi: ‘Kalisoze libangenise abantu bami eKhenani.’

Kungakabi yisikhathi eside, abako-Israyeli bayasuka eKhadeshi. Ngemva kwesikhatshana bafika eNtabeni yaseHori. U-Aroni ufela phezu kwentaba le. Ufa eseleminyaka engu-123. Abako-Israyeli badane kakhulu, yikho okwamalanga angu-​30, abantu bonke bakhalela u-Aroni. Indodana yakhe u-Eliyazari uba ngumphristi omkhulu olandelayo wesizwe sako-Israyeli.