UJoshuwa Uba Ngumkhokheli

UMOSI ufuna ukungena eKhenani lama-Israyeli. Ngakho uyacela: ‘Jehova, ngivumela ngichaphe uMfula uJodani ngiyebona ilizwe elihle.’ Kodwa uJehova uthi: ‘Kwanele! Ungaphindi ukhulume lami futhi ngendaba le!’ Uyakwazi yini ukuthi kungani uJehova watsho njalo?

Kungenxa yalokho okwenzakala lapho uMosi etshaya idwala. Khumbula ukuthi yena lo-Aroni kabazange badumise uJehova. Kabazange batshele abantu ukuthi nguJehova owayebakhiphele amanzi edwaleni. Ngenxa yalokhu uJehova wathi wayengasoze abavumele ukuthi bangene eKhenani.

Ngakho ngemva kwenyanga ezilutshwana u-Aroni efile, uJehova utshela uMosi: ‘Thatha uJoshuwa, ummise phambi kuka-Eliyazari umphristi laphambi kwabantu. Njalo ubatshele bonke ukuthi uJoshuwa nguye osengumkhokheli omutsha.’ UMosi wenza kanye lokho uJehova athi akwenze, njengoba ubona emfanekisweni.

UJehova abesetshela uJoshuwa: ‘Qina ungesabi. Uzawangenisa ama-Israyeli elizweni laseKhenani engiwathembise lona, njalo ngizaba lawe.’

Ngemva kwesikhathi, uJehova utshela uMosi ukuthi akhwele phezulu eNtabeni okuthiwa yiNebho elizweni laseMowabi. Ekhonale phezulu, uMosi uyenelisa ukubona ilizwe elihle laseKhenani ngale koMfula uJodani. UJehova uthi: ‘Leli yilo ilizwe engalithembisa ukulinika abantwana baka-Abhrahama, u-Isaka loJakhobe. Ngikuvumele ukuthi ulibone kodwa awusoze ungene kilo.’

UMosi ufela khonapho phezu kweNtaba iNebho. Wayeleminyaka engu-120. Wayelokhu esaqinile njalo elokhu esabona kuhle. Abantu bayadana kakhulu njalo bayakhala ngoba uMosi usefile. Kodwa bathabile ukuthi uJoshuwa ngumkhokheli wabo omutsha.