Incwadi Evela KuQula Elibusayo

Kuwe Othanda uJehova:

UJesu wathi: “Lizalazi iqiniso, njalo iqiniso lizalikhulula.” (UJohane 8:32) Aze aba yisikhuthazo lawo mazwi! Singalazi iqiniso lanxa siphila kulezizinsuku “zokucina” ezinzima okugcwele khona amanga. (2 KuThimothi 3:1) Uyakhumbula yini lapho owaqalisa khona ukubona iqiniso njengoba lichasiswa eLizwini likaNkulunkulu? Lokho kwakuthokozisa kakhulu!

Kuqakathekile ukuba lolwazi lweqiniso oluqondileyo lokutshela abanye ngalo zikhathi zonke, kodwa futhi kumele siziphathe ngokuvumelana leqiniso lelo. Kumele sizigcine sisethandweni lukaNkulunkulu ukuze senelise ukwenza njalo. Kugoqelani lokhu? Amazwi kaJesu awakhuluma ngobusuku ezavuka esifa ayawuphendula umbuzo lo. Watshela abaphostoli bakhe abathembekileyo wathi: “Aluba lilalela imilayo yami, lizahlala lisothandweni lwami, njengoba lami ngilalele imilayo kaBaba ngahlala ngisothandweni lwakhe.”​—UJohane 15:10.

Uyananzelela yini ukuthi uJesu wahlala esethandweni lukaNkulunkulu ngokulalela imilayo kaYise? Lokhu kuyasebenza lakithi lamuhla. Kumele sisebenzise iqiniso nsukuzonke ekuphileni kwethu ukuze sihlale sisethandweni lukaNkulunkulu. Ngobusuku obufananayo, uJesu wathi: “Lingaze lizazi lezi izinto lizabusiswa nxa lizenza.”​—UJohane 13:17.

Sithemba ngenhliziyo yonke ukuthi ibhuku leli lizakunceda ukuthi uqhubeke usebenzisa iqiniso leli empilweni yakho njalo uzigcine ‘usethandweni lukaNkulunkulu ukuze ube lethemba lokuphila okulaphakade.’​—UJuda 21.