Qakathekisa Imisebenzi Ephiwe UKhristu

“EKUQALENI uNkulunkulu wadala amazulu lomhlaba,” njalo konke ayekwenzile “kwakukuhle kakhulu.” (Gen. 1:1, 31) UJehova wadala abantu belethemba lokuphila impilo ethokozisayo kuze kube nini lanini. Kodwa konke lokhu kwaphambaniseka ngokuhlamuka okwabakhona e-Edeni. Loba kunjalo lokho uNkulunkulu ayekuhlosile akuzange kutshintshe. Wakhuluma amazwi atshengisa ukuthi zonke izizukulwane zika-Adamu ezazizamlalela zazizakhululwa esonweni lasekufeni lokuthi ukukhonza kweqiniso kwakuzabuyiselwa. Isiphrofetho leso satshengisa lokuthi uNkulunkulu uzatshabalalisa uSathane layo yonke imisebenzi yakhe emibi. (Gen. 3:15) Izinto zizaphinda zibe ‘zinhle kakhulu’ njengasekuqaliseni. UJehova uzakwenza konke lokhu esebenzisa iNdodana yakhe uJesu Khristu. (1 Joh. 3:8) Yikho kuqakathekile ukuthi sizwisise lokho okwenziwa nguKhristu ukuze injongo kaNkulunkulu igcwaliseke.—ImiSeb. 4:12; Flp. 2:9, 11.

IMISEBENZI EPHIWE UKHRISTU

² Minengi imisebenzi uKhristu ayiphiweyo ukuze injongo kaNkulunkulu igcwaliseke. Ngokwesibonelo unguMkhululi, uMphristi Omkhulu, iNhloko yebandla lobuKhristu njalo useyiNkosi yoMbuso kaNkulunkulu. Ukucabangisisa ngemisebenzi le kwenza siluzwisise uhlelo lukaNkulunkulu njalo simthande kakhulu uKhristu. IBhayibhili liyayichasisa imisebenzi le.

³ Ngesikhathi uKhristu esemhlabeni, kwacaca ukuthi uNkulunkulu wayemsebenzisa ukunceda abantu ukuthi babuyisane laye. (Joh. 14:6) UJesu waba nguMkhululi ngesikhathi enikela ngokuphila kwakhe ukuze ahlenge abantu. (Mat. 20:28) Uyisibonelo esihle sibili endabeni yokulalela uNkulunkulu. Kanti njalo okuqakatheke kakhulu yikuthi ulendima enkulu ekugcwaliseni injongo kaNkulunkulu. Nguye yedwa osivulela ithuba lokuthi sibuyisane loYise. (ImiSeb. 5:31; 2 Khor. 5:18, 19) Ukufa kanye lokuvuswa kwakhe kunika abantu abalalelayo ithuba lokuthola izibusiso ezizalethwa nguMbuso kaNkulunkulu.

⁴ UJesu unguMphristu oMkhulu ‘osizwelayo ebuthakathakeni bethu’ futhi uyenelisa ukwenza ukuthi abalandeli bakhe abathembekileyo bathethelelwe izono zabo. Umphostoli uPhawuli wabhala wathi: “Umphristi omkhulu esilaye akusilowo ongeke asizwele ebuthakathakeni bethu, kodwa ngulowo oseke walingwa kukho konke njengathi, kodwa yena kalasono.” Ngemva kwalokho wakhuthaza bonke abalokholo kuJesu Khristu ukuthi bazimisele ukubuyisana loNkulunkulu. Wathi: “Kasisondeleni-ke esihlalweni sobukhosi somusa omkhulu silenkululeko yokukhuluma ukuze samukele isihawu lomusa omkhulu, okuzasinceda ngesikhathi esifaneleyo.”—Heb. 4:14-16; 1 Joh. 2:2.

⁵ UJesu uphinda abe yiNhloko yebandla lobuKhristu. Lamuhla ibandla lobuKhristu kalilaye umkhokheli ongumuntu njengoba nje wayengekho langesikhathi sabaphostoli. UJesu nguye olikhokhelayo. Usebenzisa umoya ongcwele labelusi abangaphansi kwakhe abazalandisa kuye lakuYise ngendlela abanakekela ngayo izimvu abaziphathisiweyo. (Heb. 13:17; 1 Phet. 5:2, 3) UJehova waphrofetha ngoJesu wathi: “Khangelani, ngimenze waba ngufakazi ebantwini, umkhokheli lomlawuli wabantu.” (Isaya. 55:4) UJesu wagcwalisa isiphrofetho lesi ngesikhathi esithi kubafundi bakhe: ‘Akumelanga libizwe ngokuthi lingabakhokheli ngoba munye uMkhokheli wenu, uKhristu.’—Mat. 23:10.

⁶ UJesu watshengisa ukuthi ulendaba lathi lokuthi uhlala ekulungele ukusincedisa. Wathi: “Wozani kimi lina lonke elikhatheleyo lelisindwayo, ngizaliphumuza. Thwalani ijogwe lami lifunde kimi ngoba ngimnene futhi ngithobekile enhliziyweni. Lingenza njalo lizathola ukuphumula ngoba ijogwe lami lilula, lomthwalo wami kawusindi.” (Mat. 11:28-30) UJesu uliqondisa ngendlela elomusa ibandla lobuKhristu futhi lokho kwenza sithole ukuphumula. Ngokwenza njalo utshengisa ukuthi ‘ungumelusi omuhle’ lokuthi ulingisela uYise uJehova uNkulunkulu.—Joh. 10:11; Isaya. 40:11.

⁷ Encwadini yokuqala ayibhalela abaseKhorinte, uPhawuli wachasisa omunye umsebenzi uJesu Khristu alawo. Wathi: “Kumele abuse, uNkulunkulu aze abeke zonke izitha zakhe ngaphansi kwenyawo zakhe. Loba kunjalo, nxa konke sekubekwe ngaphansi kweNdodana, layo izazibeka ngaphansi kwaLowo owabeka zonke izinto ngaphansi kwayo, ukuze uNkulunkulu abe yikho konke kubo bonke.” (1 Khor. 15:25, 28) UJesu nguye owadalwa kuqala futhi engakabuyi emhlabeni “wayengumbumbi” eceleni kukaNkulunkulu. (Zaga. 8:22-31) Wathi esesemhlabeni waqhubeka esenza intando kaYise futhi wahlala ethembekile waze wafa. (Joh. 4:34; 15:10) Ngenxa yokuthembeka kwakhe, uNkulunkulu wamvusa wasembeka waba yiNkosi yoMbuso wakhe. (ImiSeb. 2:32-36) Ngesikhathi esizayo uzakhokhela izinkulungwane lezinkulungwane zezingilosi ezilamandla esezokhipha imibuso yabantu kanye labo bonke ububi obukhona. (Zaga. 2:21, 22; 2 Thes. 1:6-9; Isam. 19:11-21; 20:1-3) Ngalesosikhathi uMbuso kaNkulunkulu yiwo wodwa ozabe usubusa umhlaba.—Isam. 11:15.

TSHENGISA UKUTHI UYAYIQAKATHEKISA IMISEBENZI KAKHRISTU

⁸ UJesu Khristu kalasono njalo nguye ophiwe umsebenzi wokusinakekela. Kodwa ukuze sisizakale kumele sihlale siqotho kuJehova njalo sihambisane lenhlanganiso yakhe.

⁹ Abalandeli bakaJesu bokuqala babewuzwisisa futhi bewuqakathekisa umsebenzi uJesu alawo enjongweni kaNkulunkulu. Lokhu bakutshengisa ngokusebenza bemanyene langokulandela iziqondiso uKhristu ayebapha zona esebenzisa umoya ongcwele. (ImiSeb. 15:12-21) Umphostoli uPhawuli wakhuluma ngokumanyana kwamaKhristu la ayegcotshiwe wathi: “Kodwa kasikhulumeni iqiniso, ngothando sikhule ezintweni zonke kuye yena oyinhloko, uKhristu. Ngaye umzimba wonke uyabunjwa ubambane kuhle futhi amalunga omzimba apha lokho okufunakalayo enza ukuthi izitho zawo zibambisane. Nxa isitho ngasinye sisebenza kuhle, lokho kuyawunceda umzimba ukuthi ukhule njengoba uzakha ethandweni.”—Efe. 4:15, 16.

¹⁰ Nxa amalunga ebandla ebambisana njalo evuma ukukhokhelwa nguKhristu, ayathuthuka ekukhonzeni futhi ahlale ethandana ngoba uthando lwenza ‘simanyane ngokupheleleyo.’—Kol. 3:14; 1 Khor. 12:14-26.

¹¹ Okwenzakala emhlabeni lamuhla kugcwalisa isiphrofetho esiseBhayibhilini njalo kwenza singathandabuzi ukuthi uJesu Khristu waba yiNkosi ngo-1914 lokuthi ulokhu ebusa phakathi kwezitha zakhe. (Hubo. 2:1-12; 110:1, 2) Lokhu kutshengisa ukuthi sekuseduze ukuthi uJesu, onguMbusi wababusi leNkosi yamakhosi abhubhise izitha zakhe. (Isam. 11:15; 12:10; 19:16) Ngalesosikhathi uKhristu uzavikela abalungileyo, egcwalisa lokho okwakhulunywa nguJehova ngesikhathi u-Adamu lo-Eva behlamuka. (Mat. 25:34) Sizathokoza kakhulu ngalesosikhathi ngokuthi sayiqakathekisa imisebenzi uJesu alayo njalo savuma lokuthi asikhokhele. Sengathi singazimisela ukuqhubeka simanyene njalo sikhokhelwa nguKhristu kulezinsuku zokucina njengoba sisenza umsebenzi wokutshumayela owenziwa emhlabeni wonke.