Ukuzehlisa Ehlelweni LukaNkulunkulu Kuyasinceda

KUQAKATHEKILE ukuthi sizehlise kuJehova uNkulunkulu, uMbusi wendawo yonke ukuze senelise ukwenza intando yakhe ngendlela ehlelekileyo. Kumele sizehlise laseNdodaneni yakhe eyiNhloko yebandla lobuKhristu njalo sizimisele ukulandela uhlelo lukaNkulunkulu kukho konke esikwenzayo. Ukwenza njalo kuzasisiza kakhulu.

² Indaba yokuzehlisa yaqalisa esivandeni sase-Edeni. Lokhu sikubona emazwini kaNkulunkulu akuGenesisi 1:28 lakusahluko 2:16, 17. Abantu kwakumele babuse izinyamazana, bona bazehlise kuNkulunkulu njalo benze intando yakhe. Ukulandela uhlelo lolu olwaqaliswa nguNkulunkulu kwakuzakwenza kube lokuthula lokuhleleka emhlabeni. Ngemva kwesikhathi, umphostoli uPhawuli wakhuluma mayelana lokuzehlisa wathi: “Ngifuna likwazi ukuthi inhloko yamadoda wonke nguKhristu, lenhloko yowesifazana yindoda, lokuthi inhloko kaKhristu nguNkulunkulu.” (1 Khor. 11:3) Amazwi la atshengisa ukuthi wonke umuntu ukhangelelwe ukuthi azehlise, ngaphandle kukaJehova.

³ Abantu abanengi lamuhla abafuni ukuzehlisa ehlelweni lukaNkulunkulu. Uhlupho lolu lwaqala ngesikhathi u-Adamu lo-Eva besala ukuba ngaphansi kobukhosi bukaNkulunkulu. (Gen. 3:4, 5) Kodwa esikhundleni sokuthi bathole inkululeko ababeyifisa, bacina sebengaphansi komubi uSathane uDeveli. Ukuhlamuka lokhu kwabangela ukuthi abantu babe khatshana loNkulunkulu. (Kol. 1:21) Kubangele lokuthi abantu abanengi lamuhla babe ngaphansi kwamandla omubi.—1 Joh. 5: 19.

⁴ Ukufunda iqiniso eliseLizwini likaNkulunkulu lokulisebenzisa empilweni zethu sokusincede ukuthi singabuswa nguSathane. Ukuzinikela kwethu kanye lokuba ngoFakazi ababhabhathiziweyo kutshengisa ukuthi sesikhethe ukuba ngaphansi kukaJehova, uMbusi wendawo yonke. Sivumelana leNkosi uDavida eyathi uJehova ‘uphezu kwakho konke.’ (1 ImiLan. 29:11) Siphinda sivumelane lamazwi la athi: “Yazini ukuthi uJehova unguNkulunkulu. Nguye owasenzayo, singabantu bakhe, izimvu zedlelo lakhe.” (Hubo. 100:3) Asithandabuzi ukuthi uJehova mkhulu, yikho kumele sizehlise kuye ngoba wadala zonke izinto. (Isam. 4:11) Njengoba siyizinceku zakhe kumele silingisele uJesu Khristu owasitshiyela isibonelo esihle endabeni yokuzehlisa kuYise.

⁵ UJesu wafundani ebunzimeni ahlangana labo ngesikhathi esemhlabeni? UHebheru 5:8 uthi: “Lanxa wayeyindodana, wafunda ukulalela ezintweni ahlupheka ngazo.” UJesu wahlala eqotho njalo ezehlisa kuYise lalapho esebunzimeni. Kazange akhulume kumbe enze loba yini ayezicabangela yona njalo kazange afune ukudunyiswa. (Joh. 5:19, 30; 6:38; 7:16-18) Ayekuqakathekisa yikwenza intando kaYise lanxa lokhu kwabangela ukuthi aphikiswe futhi ahlukuluzwe. (Joh. 15:20) UJesu waqhubeka ezehlisa njalo ‘ezithoba’ kuNkulunkulu ‘kwaze kwaba sekufeni esigodweni sokuhlutshwa.’ Ukuzehlisa kwakhe kwaba lempumela emihle kakhulu. Ngokwesibonelo kwenza ukuthi uYise adunyiswe, abantu bathole insindiso lokuthi yena aphakanyiselwe esikhundleni esiphezulu.—Flp. 2:5-11; Heb. 5:9.

NGOBANI OKUMELE SIZEHLISE KUBO?

⁶ Ukuzehlisa kuJehova lokwenza intando yakhe kuzasinceda ukuthi singabi lenhlupho ezehlela labo abangafuniyo ukuzehlisa ebukhosini bakhe. Isitha sethu uDeveli sihlala sidinga indlela zokusihlasela. Yikho nxa singazithoba njalo sizehlise kuJehova uzasikhulula futhi asincedise ukuthi senelise ukumelana lesitha lesi esibi.—Mat. 6:10, 13; 1 Phet. 5:6-9.

⁷ Ebandleni lobuKhristu kumele sizehlise kuKhristu oyiNhloko yebandla ‘lasencekwini ethembekileyo lehlakaniphileyo’ ayibekileyo. Ukwenza njalo kuzasinceda ukuthi sihlalisane kuhle labanye. Ukuhlonipha uhlelo lukaNkulunkulu ebandleni kuzakwenza kube lula ukuthi silandele okutshiwo liLizwi lakhe kukho konke esikwenzayo ekukhonzeni. Lokhu kugoqela ukuya ekutshumayeleni, ukungena imihlangano lokuhlanganyela kuyo, ukubambisana labadala kanye lokulandela konke okutshiwo yinhlanganiso.—Mat. 24:45-47; 28:19, 20; Heb. 10:24, 25; 13:7, 17.

⁸ Abantu abazehlisa kuNkulunkulu bayenelisa ukuba lobuntu obunjengobakhe. Yikho nxa singazehlisa ehlelweni lukaNkulunkulu, ibandla lizakuba lokuthula, livikeleke njalo libe ngelihlelekileyo. (1 Khor. 14:33, 40) Esikubona enhlanganisweni kwenza sivumelane lamazwi akhulunywa yiNkosi uDavida ngesikhathi ibona umehluko okhona phakathi kwababi lezinceku zikaNkulunkulu. Yathi: “Babusisiwe abantu oNkulunkulu wabo nguJehova.”—Hubo. 144:15.

⁹ Emulini, uNkulunkulu wahlela ukuthi ‘inhloko yowesifazana’ kube yindoda. Ngesikhathi esifananayo amadoda akhangelelwe ukuthi azehlise kuKhristu futhi laye uKhristu kumele azehlise kuNkulunkulu. (1 Khor. 11:3) Amakhosikazi kumele azehlise kubomkawo njalo abantwana kufanele bazehlise ebazalini babo. (Efe. 5:22-24; 6:1) Ukwenza njalo kuzanceda ukuthi kube lokuthula emulini.

¹⁰ Indoda kufanele ilingisele isibonelo sikaKhristu ngokukhokhela imuli yayo ngothando. (Efe. 5:25-29) Ingawasebenzisa kuhle amandla ewaphiweyo, kuzakuba lula ukuthi bonke emulini bazehlise kuyo. Umsebenzi wenkosikazi wona ngowokuncedisa lokusekela umkayo. (Gen. 2:18) Inkosikazi ehloniphayo izathandwa ngumkayo futhi yenze lokuthi uNkulunkulu adunyiswe. (1 Phet. 3:1-4) Nxa amadoda lamakhosikazi elandela okutshiwo liBhayibhili ngokuzehlisa kuNkulunkulu, abantwana labo bazalandela isibonelo sabo esihle.

¹¹ Ukuzehlisa kuNkulunkulu kugoqela lokuhlonipha “iziphathamandla ezikhona” ngoba “zibekwe nguNkulunkulu ezikhundleni ezitshiyeneyo.” (Rom. 13:1-7) AmaKhristu akhangelelwe ukuthi alandele imithetho yelizwe futhi abhadale lemithelo. Ngokwenza njalo ayabe ‘ebuyisela okukaKhesari kuKhesari, lokukaNkulunkulu kuNkulunkulu.’ (Mat. 22:21) Kanti njalo kumele silandele imithetho ebekiweyo nxa sitshumayela ngendlela ezitshiyeneyo. Ukulalela iziphathamandla ezintweni ezingaphikisani lemithetho kaJehova kuyasinceda ukuthi senelise ukwenza okunengi emsebenzini wokutshumayela esiwuphathisiweyo.—Mak. 13:10; ImiSeb. 5:29.

¹² Kumele sitshengise ukuthi siyazehlisa kuNkulunkulu kukho konke esikwenzayo. Sisilindele ngabomvu isikhathi lapho wonke umuntu azabe esezehlisa khona kuJehova uNkulunkulu. (1 Khor. 15:27, 28) Bonke abavuma ukuthi uJehova unguMbusi wendawo yonke njalo bazehlise kuye bazathola izibusiso ezinengi kuze kube nini lanini.