March

UJefitha wayezondwa ngabafowabo ababelomhawu. Bamxotsha basebemthathela lelifa lakhe lanxa wayelizibulo. (Abahlu. 11:1-3) Kodwa lapho becela uncedo lwakhe kazange atshile izikeyi. (Abahlu. 11:4-11) Okwakuqakatheke kakhulu kuJefitha yikulwela ibizo likaJehova ukwedlula indlela ayesizwa ngayo. Wayezimisele ukuhlala ethembekile kuJehova futhi lokhu kwenza yena lesizwe sakibo bathole izibusiso. (Heb. 11:32, 33) Uzamlingisela yini uJefitha? Mhlawumbe sewake wadaniswa kumbe waphathwa kubi ngomunye umzalwane ebandleni. Nxa kunjalo, ungavumeli izinto lezi zikwenze ungasayingeni imihlangano kumbe ukhalale ukukhonza uJehova. Kodwa yenza njengoJefitha, vumela izimiso zikaJehova zikusize ukuthi ulwisane lokudaniswa ngabantu futhi uqhubeke usiba yisibonelo esihle kwabanye.​—Rom. 12:20, 21; Kol. 3:13. w16.04 1:7, 9, 10

Kumele sibekezele kuze kube sekupheleni. Nanku umzekeliso ongasisiza ukuthi sikuzwisise lokhu: Ake sithi isikepe sesicwila emanzini. Ukuze bonke abasigadileyo basinde, kumele babhukutshe baze bayefika ekhunjini. Umuntu obhukutsha ibanganyana elincane adinwe abeseyekela, lalowo oyekela ukubhukutsha esezafika ekhunjini bayafanana ngoba bonke bazafela emanzini. Lathi kumele sizimisele ukubekezela size siyengena emhlabeni omutsha. Phela singayekela ukwenza njalo kasisoze sikuthole ukuphila okuphakade. Kumele sibe njengomphostoli uPhawuli owakhuluma amazwi la athi: “Kasiphelelwa lithemba.” (2 Khor. 4:16) Sileqiniso lokuthi uJehova uzasisiza ukuthi sibekezele kuze kube sekupheleni. Sivumelana lamazwi atshiwo nguPhawuli akuRoma 8:37-39 athi: “Singaphezu kokuba ngabanqobi ngaye owasithandayo. Ngoba ngiyakholwa ukuthi loba yikufa kumbe ukuphila, loba yizingilosi kumbe amadimoni, loba likhathesi kumbe isikhathi esizayo, loba kungamandla bani, loba kuyikuphakama kumbe ukutshona, loba olunye ulutho kukho konke okudaliweyo, akuyikusehlukanisa lothando lukaNkulunkulu olukuKhristu uJesu iNkosi yethu.” w16.04 2:17, 18

Thandaza kuJehova umcele akunike ukuhlakanipha ukuze wenelise ukunanzelela izinto ezingakwenza ucine usungena kwezombusazwe. Mcele lokuthi akuncedise ukuthi ungaphumi endleleni eyiyo. Nxa ungabotshwa loba uhlukuluzwe ngenxa yokuthi awungeni kwezombusazwe, thandaza kuJehova ukuthi akunike isibindi sokuvikela ukholo lwakho njalo ubekezelele loba yibuphi ubunzima. (ImiSeb. 4:27-31) UJehova uyasiqinisa esebenzisa iLizwi lakhe. Ngakho cabangisisa ngamavesi angakusiza ukuthi uhlale uqotho kuNkulunkulu nxa usuphakathi kwelitshe lembokodo. Wabambe ngekhanda amavesi lawo ukuze akuqinise nxa ungasavunyelwa ukuthi ube leBhayibhili. ILizwi likaNkulunkulu lingakunceda lokuthi uhlale ulethemba eliqinileyo ngekusasa elihle esilithenjiswayo. Ukuba lethemba kuzakuchaphisa amazibuko alukhuni okuhlukuluzwa. (Rom. 8:25) Khetha imibhalo ekhuluma ngezibusiso ozikhangeleleyo emhlabeni omutsha, ubusucabangisisa ngayo uzibone ususePharadayisi usuzikholisa lezozibusiso. w16.04 4:14, 15

Abafundisi bamasonto kabatshumayeli okuliqiniso ngoMbuso kaNkulunkulu. Nxa bekhuluma ngoMbuso lo batshela abantu ukuthi yinto esenhliziyweni yomuntu. (Luk. 17:21) Bayehluleka ukucacisela abantu ukuba bazwisise ukuthi uMbuso kaNkulunkulu nguhulumende okhona sibili ezulwini lokuthi uJesu Khristu nguye iNkosi yawo. Kababatsheli ukuthi uMbuso lo yiwo wodwa ozaqeda zonke izinhlupho zabantu lokuthi sekuseduze ukuthi ususe bonke ububi emhlabeni. (Isam. 19:11-21) Ngesikhathi seKhisimusi lese-Easter yikho kuphela lapho abakhuluma khona ngoJesu. Kukhanya basemnyameni, kabakwazi lokho okuzakwenziwa nguJesu nxa esebusa umhlaba. Kabakwazi lokuthi kungani kumele batshumayele. Umsebenzi lo akumelanga wenzelwe ukuthola imali loba ukwakha izakhiwo eziyibunkanyankanya. ILizwi likaNkulunkulu akumelanga lisetshenziselwe ukwenza imali. (2 Khor. 2:17) Abatshumayela izindaba ezinhle akumelanga bakhangelele ukubhadalwa.​—ImiSeb. 20:33-35. w16.05 2:7, 8

Mhlawumbe usuthanda indlela ethile yokugqoka kodwa uyakwazi ukuthi indlela leyo ingabakhuba abanye ebandleni. IBhayibhili kalitsho lutho ngaleyondlela osugqoka ngayo. Manje ungakwazi njani ukuthi uJehova ucabangani ngendaba leyo? Umphostoli uPhawuli wabhala amazwi la: “Abesifazana [kumele] bagqoke ngokuchumileyo, ngokuhle lokufaneleyo, kungabi ngezinwele ezelukiweyo loba igolide loba amangqongqo loba izigqoko ezidulayo, kodwa ngezenzo ezinhle, ezifanele abesifazana abathi bayamkhonza uNkulunkulu.” (1 Tim. 2:9, 10) Isimiso esisevesini le siyasebenza lakubazalwane. Bonke abantu bakaJehova akumelanga baqakathekise okufunwa yibo kuphela kodwa kufanele bacabangisise lokuthi indlela abagqoka ngayo labazilungisa ngayo izabaphatha njani abanye. Ukuthanda abanye kanye lokubahlonipha kuzasenza sitshengise ukuthi silendaba labo lokuthi asifuni ukubakhuba loba ukulimaza umzwangedwa wabo.​—1 Khor. 10:23; Flp. 3:17. w16.05 3:14

U-Adamu wahlamukela uMdali wakhe njalo walahlekelwa yisibusiso sokuba yindodana kaNkulunkulu. Lanxa kunjalo likhona ‘ixuku elikhulu’ labantu abayizizukulwane zika-Adamu elakhetha ukusekela ubukhosi bukaNkulunkulu. (Heb. 12:1) Ukulalela kwabo ngokuzithoba kwatshengisa ukuthi babefuna ukubuswa nguJehova hatshi uSathane. (Joh. 8:44) Ukuba qotho kwabo kusikhumbuza amazwi asembhalweni walamuhla. Lamuhla bonke abakhonza uJehova ngomoya langeqiniso kumele bazame ngamandla wonke ukumlalela lokuzithoba kuye. Bakubona kuyisibusiso ukubiza uJehova ngokuthi Baba kanye lokumvumela ukuthi abe nguMbumbi wabo. Wena ungumdaka obuthakathaka yini ezandleni zikaNkulunkulu, ovumayo ukubunjwa ube yisitsha esibukekayo? Abafowethu labodadewethu ubabona bengumdaka osezandleni zikaJehova olokhu usabunjwa yini? w16.06 1:2, 3

Sekuseduze ukuthi singene emhlabeni omutsha. Kodwa zinengi izinto ezingaxegisa ukholo lwethu. Ngakho kungaba kuhle ukuthi sizihlole sibone langabe ukholo lwethu luqinile yini. Ngokwesibonelo singahlola ukuthi siyawakholwa yini amazwi kaJesu akuMathewu 6:33 ngokuzibuza imibuzo le: ‘Engikhetha ukukwenza empilweni kanye lezinqumo zami kuyatshengisa yini ukuthi ngiyawakholwa amazwi kaJesu? Ngikhetha ukulova yini emihlanganweni loba ekutshumayeleni ukuze ngithole imali enengi? Ngizakwenzani nxa umsebenzi engiwenzayo usungidlela isikhathi futhi ungitshiya ngidinwe ngingasazazi? Kambe ngizawuvumela yini umhlaba lo ungibumbe, mhlawumbe uze ungenze ngitshiye ukukhonza uJehova?’ Izinhliziyo zethu zingaba lukhuni nxa singayekela ukulandela lokho iBhayibhili elikutshoyo mayelana labangane ababi, abantu abasusiweyo kanye lokukhetha ezokuzilibazisa. Nxa ungananzelela ukuthi lawe awusakulandeli lokho iBhayibhili elikutshoyo ngezindaba lezi, zama ukuhlola ukholo lwakho ngokuphangisa. Nxa sikwenza lokhu akumelanga siziqile, kodwa kufanele sisebenzise iLizwi likaNkulunkulu zikhathi zonke ukuze liqondise imicabango yethu. w16.06 2:8, 9

OFakazi bakaJehova emhlabeni lamuhla babumba inhlanganiso etshiyene lezinye ezikhona. Kuliqiniso ukuthi inhlanganiso le ilabantu abalesono futhi abaphambanisayo. Lanxa kunjalo umoya ongcwele kaNkulunkulu ubusenza ukuthi kube lengqubelaphambili enhlanganisweni le esemhlabeni wonke. Kwathi kuqalisa izinsuku zokucina ngo-1914 abantu bakaNkulunkulu babelihlekana nje. Kodwa uJehova wawubusisa umsebenzi wabo wokutshumayela. Eminyakeni eminengi eyalandelayo izigidi zabantu zafunda iqiniso njalo zaba ngoFakazi bakaJehova. UJehova wayevele ekhulumile ngakho ukwanda lokhu njengoba sibona embhalweni walamuhla. Evesini efananayo waphinda wathi: “Mina nginguJehova; ngesikhathi esifaneleyo lokhu ngizakwenza ngokuphangisa.” Akuthandabuzwa ukuthi isiphrofetho lesi siyagcwaliseka kulezi zinsuku zokucina! Abantu bakaNkulunkulu banjengesizwe esikhulu. Ngokwesibonelo emhlabeni kulamazwe amanengi alenani labantu eliphansi kakhulu nxa kuqathaniswa lenani laboFakazi bakaJehova. w16.06 4:1, 2

UJesu wayekubona kungelangqondo ukuthi uYise osezulwini anganika izinyoni ukudla kodwa ayekele ukunakekela abantu bakhe ngezinto abazidinga nsuku zonke. (1 Phet. 5:6, 7) UJehova kasifunzi ukudla emilonyeni yethu, akwenzayo yikubusisa yonke imisebenzi esiyenzayo ukuze sithole ukudla kwansuku zonke. Nxa izinto zinzima angasebenzisa abanye ukuthi basihlephunele abalakho. Izinyoni zezulu zilayo indawo yokuhlala ngoba uJehova wathi ezidala wazinika ukuhlakanipha lobuciko bokwenza izidleke zazo. Yikho lathi angasinceda sithole indawo yokuhlala esenelayo thina lezimuli zethu. Ngesikhathi uJesu esitsho amazwi asembhalweni walamuhla akuthandabuzwa ukuthi wayekwazi ukuthi kwasekuseduze ukuba anikele ngokuphila kwakhe ngenxa yabantu. (Khangela loLukha 12:6, 7) UJesu kazange afele izinyoni kodwa wafela thina abantu ukuze sithole ukuphila okungapheliyo.​—Mat. 20:28. w16.07 1:11-13

Savela ngaphi isono esibangela ukufa okuthwalele abantu ubhulo kangaka? IBhayibhili lithi: “Ngesiphambeko salowomuntu oyedwa, [u-Adamu] ukufa kwabusa” phezu kwabantu bonke. (Rom. 5:12, 14, 17) Kodwa okuthokozisayo yikuthi sesingazikhethela ukuphuma ebugqilini besono sibuswe ngumusa omkhulu kaNkulunkulu. Lokhu singakwenza ngokuba lokholo emhlatshelweni wenhlawulo kaKhristu. (Rom. 5:20, 21) Lanxa sisesengabantu abalesono, kumele sizame ukulwisa ngamandla wonke ukuthi isono singabi silokhu sibusa empilweni zethu. Ngakho nxa singenza isono kumele sithandaze kuJehova simcele ukuthi asithethelele. Singenza njalo siyabe sivumela ukuthi umusa omkhulu kaNkulunkulu uqondise izimpilo zethu. Kuzasisiza yini ukwenza njalo? Ye kuzasisiza sibili ngoba uPhawuli wathi: ‘Umusa kaNkulunkulu uyasifundisa ukuthi “Hayi” ekweyiseni uNkulunkulu lasezinkanukweni zasemhlabeni, njalo siphile ngokuzikhuza, ngokuqonda empilweni yokulalela uNkulunkulu ngesikhathi samanje.’​—Tit. 2:11, 12. w16.07 3:5, 6

Kuyadanisa ukuthi umtshado wokuqala waphambaniseka ngoba u-Adamu lo-Eva bakhetha ukuhlamukela uJehova. USathane uDeveli obizwa langokuthi ‘yinyoka endala’ nguye owaqila u-Eva ngokumtshela ukuthi nxa angadla “isihlahla sokwazi okuhle lokubi” uzavuleka amehlo, enelise ukuzikhethela okuhle lokubi. U-Eva wadelela inhloko yakhe u-Adamu, kazange alinde umkakhe ukuze azwe ukuthi uzakuthini ngalolodaba. U-Adamu laye kazange alalele uNkulunkulu, wathatha isithelo asinikwa ngumkakhe wadla. (Isam. 12:9; Gen. 2:9, 16, 17; 3:1-6) UNkulunkulu wathi esebabuza u-Adamu wasola umkakhe. U-Eva yena wathi inyoka yiyo eyayimkhohlisile. (Gen. 3:12, 13) Bacatsha ngomunwe lanxa kwakusegcekeni ukuthi bonile. Baba ngabahlamuki ngenxa yokungalaleli kwabo uJehova. Abakwenzayo kuyisibonelo kithi ngoba phela ukuze umtshado uphumelele kumele indoda lomkayo bavume nxa bephambanisile njalo balalele uJehova. w16.08 1:1, 4, 5

Okungabangela izinhlupho emtshadweni yikuthi izinto azisazange zihambe ngendlela umuntu abefisa ngayo. Lokhu kungenza ukuthi umuntu aqalise ukuzwa ubuhlungu, ukuzisola futhi acabange ukuthi waqilwa. Okunye okungabangela ukungazwanani yindlela esakhuliswa ngayo lendlela omunye umuntu ayiyo yona. Ikanti abanye bangaxatshaniswa yizindaba eziphathelane labazali, ukukhulisa abantwana kanye lendlela yokusebenzisa imali. Kodwa okuhle yikuthi amaKhristu amanengi atshadileyo ayenelisa ukulungisisa izinhlupho alazo ngoba ayavumela ukuthi uNkulunkulu awaqondise. Nxa amaKhristu atshadileyo esephakathi kwezinhlupho ezingapheliyo kumele abonane labadala bebandla. Abadala bangabasiza ukuthi basebenzise iseluleko esiseLizwini likaNkulunkulu. Okunye okungabanceda yikuthandaza kuJehova becela umoya wakhe ongcwele ukuze ubancede ukuthi benelise ukusebenzisa izimiso eziseBhayibhilini futhi batshengise izithelo zomoya.​—Gal. 5:22, 23. w16.08 2:11-13

UJesu wayehlala ephathekile ngemisebenzi eminengi. Lanxa kunjalo wayezinika isikhathi sokunceda abantu ababelesifiso sokufunda okunengi ngoNkulunkulu. Ngokwesibonelo ixuku labantu labuthana ekhunjini lifuna ukuzwa izindaba ezinhle. UJesu kazange aphongubathapha ngamehlo abantu labo kodwa wangena esikepeni waseqalisa ukubafundisa. Mhlalokho wenza isimanga, watshela uPhetro ukuthi aphosele amanethi emanzini njalo kwaphuma inhlanzi ezinengi okumangalisayo. Ngemva kwalokho wasemtshela amazwi asembhalweni walamuhla. Masinyane uPhetro labakhula bakhe bahle ‘badonsela izikepe zabo okhunjini batshiya konke bamlandela [uJesu].’ (Luk. 5:1-11) Indoda okwakuthiwa nguNikhodemu eyayililunga leSanihedrini yaba lesifiso sokwazi okunengi ngalokho uJesu ayekufundisa. Kodwa yayisesaba ukuthi abantu bazakuthini bangayibona ikhuluma laye. Yikho yavakatshela uJesu ebusuku lapho eyayingasoze ibonwe khona ngabantu njalo uJesu wavuma ukubonana layo ngalesosikhathi. (Joh. 3:1, 2) INdodana kaNkulunkulu yayizinika isikhathi sokuxoxa labantu ukuze ibaqinise ukholo. Yikho lathi kumele siphindele ebantwini njalo sikukhuthalele ukuqhuba izifundo zeBhayibhili. w16.08 4:10, 11

Singakwenza njani lokhu? Ngokuzihlola ngonanzelelo ukuze sibone langabe esikwenzayo kuyahambisana yini lezimiso zikaJehova kanye lobungcwele bakhe. Singakwenza langokuhlonipha imizwangedwa yabanye kanye lemibono yabo. Nxa singenza njalo siyabe ‘sihamba ngokuzithoba loNkulunkulu.’ Sifuna ukuthi indlela esigqoka ngayo yenze kukhanye ebantwini bonke ukuthi sikhonza uJehova. Kanti njalo abafowethu labodadewethu labo kumele bangathandabuzi ukuthi simela uNkulunkulu wethu olungileyo. Ulezimiso ezinhle afuna sizilandele futhi kuyasithokozisa ukuzisebenzisa ekuphileni kwethu. Sibatshayela ihlombe abafowethu labodadewethu abazama ngamandla ukugqoka ngendlela elesithunzi futhi edonsela abantu ukuthi bafune ukufunda iBhayibhili ukuze badumise njalo bathokozise uJehova. w16.09 3:18-20

UJakhobe waphikelela, watshukana lengilosi ubusuku bonke yaze yambusisa. (Gen. 32:24-26) Mhlalokho waphiwa ibizo elitsha elithi Israyeli elitsho ukuthi, “Ukutshukana loNkulunkulu” kumbe “Ukuphikelela.” Lakanye uJehova wamamukela uJakhobe futhi wambusisa, lathi yikho kanye esikufunayo. URakheli owayeyintandokazi kaJakhobe wayekulindele ngabomvu ukubona ukuthi uJehova wayezasigcwalisa njani isithembiso sokubusisa inzalo yomkakhe. Kodwa wayeyinyumba futhi ngalezonsuku ukuba yinyumba kwakusenza owesifazana angabi lesithunzi emphakathini. Manje uRakheli wawathatha ngaphi amandla okubekezela lokulwisana lobunzima lobu obabuphezu kwamandla akhe? Okwamsizayo yikuthi kazange alahle ithemba futhi waqhubeka ethandaza kokuphela. UJehova wawuzwa umthandazo kaRakheli futhi wambusisa ngokumupha abantwana.​—Gen. 30:8, 20-24. w16.09 2:6, 7

Kuqakathekile ukuthi uzame ngamandla wonke ukunceda abantwabakho babone ubuhle bokusebenzisa izimiso eziseBhayibhilini. (Hubo. 1:1-3) Zinengi izindlela ongakwenza ngazo lokhu. Ngokwesibonelo ungabatshela umzekeliso lo: “Ake sithi ucelwe ukuthi uyehlala esihlengeni esithile esingelabantu, ubusutshelwa ukuthi ukhethe abantu ongayahlala labo khonale. Ubungakhetha abantu abalobuntu obunjani ukuze lihlale ngokuthula langokuzwanana kuleyondawo?” Ngemva kwalokho, usungamvulela uGalathiya 5:19-23 ukuze abone ukuthi uJehova ufuna ukuthi emhlabeni omutsha kube labantu abanjani. Umzekeliso lo ungasiza umntanakho ukuthi athole izifundo ezimbili eziqakathekileyo. Okokuqala ungamfundisa ukuthi izimiso zikaNkulunkulu zenza abantu bamanyane futhi bazwanane. Okwesibili ungamtshengisa ukuthi uJehova uyasifundisa khathesi ukuze asenze sifanele ukuphila emhlabeni omutsha. (Isaya. 54:13; Joh. 17:3) Mhlawumbe ungadinga emabhukwini ethu isibonelo somuntu othile owantshintsha ukuphila kwakhe. Ungakhangela ikakhulu esihlokweni esithi “IBhayibhili Liyakuntshintsha Ukuphila” esijayele ukuphuma ku-Nqabayokulinda. w16.09 5:13, 14

Kufanele sizame ngamandla wonke ukuba lesikhathi sokutaditsha sisodwa loba esokukhonza kwemuli lanxa silokunengi esikwenzayo. (Efe. 5:15) Lanxa kunjalo akumelanga siphongudlulisa amehlo nje kumbe sikwenze sidinga impendulo esizayitsho emihlanganweni. Inhloso yethu kumele ibe yikuvumela iLizwi likaNkulunkulu lifinyelele izinhliziyo zethu njalo liqinise ukholo lwethu. Izikhathi ezinengi sandise ukungayisebenzisi ekuphileni kwethu imicijo esiyithola nxa silungiselela imihlangano, izinkulumo kumbe ukuya ekutshumayeleni. Yikho akumelanga ukuthi nxa sibala sicabange ukuthi esikutholayo kungabasiza njani abanye kodwa kumele sizame ukudingisisa ukuthi kusisiza njani thina ngokwethu. (Flp. 1:9, 10) Cabanga ngesibonelo lesi: Umuntu osebenza ukupheka wandise ukunambitha ukudla engakakuphakuleli abantu. Lanxa kunjalo kasoze aphile ngokunambitha nje kuphela. Kuqakathekile ukuthi laye aziphekele okwakhe ukudla okwakha umzimba ukuze ahlale ephilile. Ngakho lathi kumele sihlale sibala iBhayibhili. Singenza njalo ukholo lwethu luzaqina futhi sizahlala silobuhlobo obuhle loJehova. w16.10 2:10, 11

Ingcazelo yokholo itholakala kuHebheru 11:1. Evesini le kukhulunywa ngezinto ezimbili mayelana lokholo. Okokuqala ukukholwa “yikuba leqiniso lalokhu esikulindeleyo” okugoqela izithembiso zesikhathi esizayo kodwa ezingakenzakali khathesi njengesithembiso sokususwa kobubi emhlabeni lesokufika komhlaba omutsha. Okwesibili ‘yikuqiniseka ngalokho esingakuboniyo.’ Ibala lesiGrikhi elihunyutshwe ngokuthi “kuqinisekile” litsho ukuba lobufakazi obugcweleyo ngezinto eziliqiniso kodwa esingaziboniyo. Ngokwesibonelo kasikuthandabuzi ukubakhona kukaJehova uNkulunkulu, uJesu Khristu, izingilosi kanye loMbuso wasezulwini. Singatshengisa njani ukuthi sileqiniso ngalokho esikulindeleyo lokuthi siyazikholwa izinto esingaziboniyo okukhulunywa ngazo eLizwini likaNkulunkulu? Singakutshengisa ngamazwi langezenzo zethu futhi kokubili lokhu kuqakathekile ngoba nxa singelakho, ukholo lwethu luyabe lufile. w16.10 4:6

UJehova loJesu bayakuqakathekisa konke esikwenzayo ukuze sisekele umsebenzi woMbuso lanxa kwezinye izikhathi singenelisi ukwenza okunengi ngenxa yezimo. (Luk. 21:1-4; 2 Khor. 8:12) Ngokwesibonelo abanye abazalwane asebekhulile benza umzamo sibili ukuthi bangene imihlangano yebandla njalo baye lekutshumayeleni. Kumele sibancome futhi sibakhuthaze ngokuhle abakwenzayo. Zimisele ukuhlala ukhuthaza abanye. Nxa ungabona okuthile okuhle okwenziwe ngomunye ungayekeli ukumncoma. Lapho uPhawuli loBhanaba bese-Antiyokhi yasePhisidiya, abaphathi besinagogi babatshela bathi: “Bazalwane, uma lilelizwi lokukhuthaza abantu, khulumani.” UPhawuli wasukuma wakhuluma inkulumo eyayikhuthaza kakhulu. (ImiSeb. 13:13-16, 42-44) Nxa sithole ithuba lokukhuthaza abanye kumele silisebenzise. Singahlala sikwenza lokhu abanye labo bazasikhuthaza.​—Luk. 6:38. w16.11 1:3, 15, 16

Kuyisibusiso ukuba senhlanganisweni kaJehova! Kodwa njengoba sizazi izimiso zakhe kanye lalokho akufunayo, kufanele sizimisele ukwenza okulungileyo njalo sisekele ubukhosi bakhe. Umhlaba lo ulokhu usiba mubi ngamandla, lanxa kunjalo thina kumele silwele ‘ukuzonda okubi’ njengoJehova. (Hubo. 97:10) Kasifuni ukulingisela abantu bomhlaba lo, sicine sisithi ‘okubi kuhle, okuhle kubi.’ (Isa. 5:20) Sifuna ukuhlala sithokozisa uNkulunkulu, yikho sizimisele ukuhlala sihlanzekile emzimbeni, ekuziphatheni lasekukhonzeni. (1 Khor. 6:9-11) Siyamthanda uJehova njalo siyamthemba, yikho sifuna ukuqhubeka siqotho kuye ngokuphila ngezimiso eziseLizwini lakhe iBhayibhili. Kanti njalo siyazama ukusebenzisa izimiso lezi loba ngaphi lapho esikhona, kungaba semizini yethu, ebandleni, esikolo loba emsebenzini. w16.11 3:13

ABafundi beBhayibhili babezimisele ukuhlala bethembekile. Kodwa ngo-1914 kusiya ku-1919 babengazwisisi ukuthi iMibhalo iyabe isitshoni nxa isithi bazithobe kubohulumende ababusayo. Ngakho bonke nje kwezinye izikhathi babengenela ezindabeni zempi. Ngokwesibonelo lapho umongameli we-Melika ekhupha umlayo wokuthi umhlaka-30 May 1918 abe lilanga lokuthandazela ukuthula, iNqabayokulinda yakhuthaza abazalwane ukuthi labo bakwenze lokho. Abanye abazalwane bakhupha izimali besekela impi njalo abalutshwana bangena esisotsheni bathwala izikhali baya empini. Kodwa akuqondanga ukuthi sithi lesi yiso isizatho esabangela ukuthi uJehova avumele ukuba aBafundi beBhayibhili bathunjwe yiBhabhiloni Enkulu ukuze abaqondise. Esikunanzelelayo yikuthi ngesikhathi seMpi Yomhlaba Yokuqala, abafowethu labodadewethu basebekuzwisisa ukuthi akumelanga bazihlanganise lenkolo yamanga. Kanti njalo kwasekusele kancane ukuthi bayitshiye ngokupheleleyo.​—Luk. 12:47, 48. w16.11 5:9

Kungani uPhawuli waxwayisa amaKhristu agcotshiweyo ngengozi yokuphila ‘ngemvelo yesono’? Isixwayiso lesi siyasebenza yini kuwo wonke amaKhristu lamuhla? Iqiniso elikhona yikuthi loba nguphi umKhristu angaqalisa ukulandela izinkanuko zemvelo yesono. Ngokwesibonelo uPhawuli wabhala ukuthi abanye abazalwane eRoma basebebuswa ‘zinkanuko zabo’ okungenzakala ukuthi basebeqakathekisa ezemacansini, ukudla, ukunatha loba ezinye nje izinto. Abanye babo ‘babekhohlisa izingqondo zabantu’ abaqotho. (Rom. 16:17, 18; Flp. 3:18, 19; Jud. 4, 8, 12) Khumbula lokuthi okwesikhathi esithile kwake kwaba lomzalwane ebandleni laseKhorinte ‘owayethethe umkayise.’ (1 Khor. 5:1) Siyabona-ke ukuthi kungani uNkulunkulu wasebenzisa uPhawuli ukuthi axwayise amaKhristu ukuthi angagxilisi izingqondo zawo kulokho okufiswa ‘yimvelo yesono.’ (Rom. 8:5, 6) Isixwayiso lesi siyasebenza lalamuhla. w16.12 2:5, 8, 9

Ukuxoxa lomuntu omthembayo kungakunceda umelane lokukhathazeka. Ungakhuluma lomuntu otshade laye, umngane wakho loba umdala webandla ukuze bakusize uluzwisise ngcono uhlupho ongabe ukulo. Ukutshela umuntu omthembayo konke okusenhliziyweni yakho kuzakwenza ukukhathazeka kwakho kube nganeno. Phela “amaqhinga ayehluleka uma kungelazeluleko, kodwa ayaphumelela ngabeluleki abanengi.” (Zaga. 15:22) UJehova usebenzisa lemihlangano yebandla eyenziwa maviki wonke ukuze asisize ukuthi silwisane lokukhathazeka. Emihlanganweni le kulapho esithola khona abantu abasithandayo futhi abazimiseleyo ukusikhuthaza. (Heb. 10:24, 25) Ukukhuthazana labanye kuzakunceda ukuthi uhlale uqinile ekukhonzeni njalo wenelise ukulwisana lokukhathazeka.​—Rom. 1:12. w16.12 3:17, 18

Nxa sithwele nzima ngenxa yokugula kumbe ezinye nje inhlupho eziphezu kwamandla ethu kumele sethule ukukhathazeka kwethu kuJehova ngoba yena uyasikhathalela. (1 Phet. 5:6, 7) Okunye okumele sikwenze yikuqhubeka singena imihlangano njalo sisebenzise konke esikuphiwa yinhlanganiso kaJehova. (Heb. 10:24, 25) Nxa ungumzali olabantwana abatshiya ukukhonza khumbula indaba kaSamuyeli. Wayengeke ababambe ngamandla abantwabakhe ukuthi bahlale benamathele kulokho ayebafundise khona. (1 Sam. 8:1-3) Kwakumele indaba le ayitshiyele uJehova. Loba kunjalo yena kwakufanele ahlale ethembekile futhi esenza izinto ezithokozisa uYise osezulwini. (Zaga. 27:11) Lalamuhla bakhona abazali abalabantwana abatshiya ukukhonza uJehova. Bayakwazi ukuthi uJehova ukulindele ukwamukela bonke abalesifiso sokubuyela kuye. (Luk. 15:20) Lanxa kunjalo abazali laba kumele basebenze gadalala ukuze bahlale beqinile ekukhonzeni ngoba isibonelo sabo esihle singafuqa abantwababo ukuthi balungisise ubuhlobo babo loJehova. w17.01 1:15, 16

Umuntu ozithobayo uyananzelela ukuthi zikhona izinto angeke enelise ukuzenza, uyavuma nxa ephambanisile njalo uyamukela imibono yabanye. UJehova uyathokoza ngomuntu onjalo. IBhayibhili liphinda litshengise ukuthi umuntu ozithobayo uyakwazi ukuthi zikhona ezinye izinto angelalungelo lokuzenza. Lokhu kuyamnceda ukuthi ahloniphe abanye njalo abaphathe ngomusa. Ungabona njani ukuthi umkhuba wokuziphakamisa lokuzigqaja usukunyenyela? Nanku okunye ongabona ngakho. Ukuzibona angathi ungcono kulabanye abantu kumbe ukuzitshaya isifuba ngenxa yemisebenzi ethile oyenzayo ebandleni loba eyenziwa ngomunye umuntu omjayeleyo. (Rom. 12:16) Ukuqalisa ukwenza izinto ufuna ukubukwa ngabantu. (1 Tim. 2:9, 10) Ukuqalisa ukutshela abanye ukuthi yiziphi izinto okumele bazenze lokungamelanga bezenze. Ungabona sekusenzakala kuwe lokhu uyabe usunyenyelwa ngumkhuba wokuziphakamisa.​—1 Khor. 4:6. w17.01 3:6-8

Umsebenzi wokutshumayela owenziwa lamuhla ukhula ngendlela emangalisayo njalo lokhu kwenze inhlanganiso kaJehova yasebenzisa izindlela ezintsha ezihambisana lempucuko ukuze izindaba ezinhle zifikiswe ebantwini abanengi. Yikho kuba nzima kwabanye asebekhulile ukuthi benelise ukusebenzisa izindlela lezi. (Luk. 5:39) Kwezinye izikhathi bangenelisa ukufunda izindlela lezi kodwa iqiniso yikuthi kabaselawo amandla ababelawo besesebatsha. Ngakho kuhle ukuthi amadoda asekhulile afundise abazalwane abaseselamandla ukuze bakulungele ukwenza imisebenzi etshiyeneyo enhlanganisweni. (Hubo. 71:18) Kwezinye izikhathi kuba nzima ukuthi abazalwane asebekhulile batshiyele abanye imisebenzi abayenzayo. Abanye kuyabe kubazwisa ubuhlungu ukutshiya leyomisebenzi ngoba beyithanda. Ikanti abanye bayabe becabanga ukuthi abazalwane abasesebatsha ngeke benelise ukuyiphatha kuhle leyomisebenzi. Abanye njalo bangabe becabanga ukuthi kabalaso isikhathi sokubaqeqetsha. Lanxa kunjalo abazalwane abasesebatsha akumelanga baphelelwe yisineke nxa bengakaphiwa imisebenzi. w17.01 5:3, 4

UJesu wayengelasono njalo kazange enze njengo-Adamu. (Joh. 1:14) Wahlala ethembekile kuNkulunkulu futhi lokhu kwatshengisa ukuthi umuntu ongelasono angenelisa ukuhlala eqotho. Kazange aphambuke loba ephule imithetho kaNkulunkulu lanxa wayesebunzimeni obukhulu. Yikho njengoba uJesu wayengelasono, wayengabafela abantu ukuze bakhululwe esonweni lekufeni. Wabhadala inhlawulo eyayilingana lalokho okwakulahlwe ngu-Adamu ngoba wayengelasono, eqotho futhi elalela uNkulunkulu. (1 Tim. 2:6) Ukufa kwakhe kunika ‘abanengi’ ithemba lokuthola ukuphila okungapheliyo. (Mat. 20:28) Kanti njalo kwenza kube lula ukuthi uNkulunkulu abuyisele lokho ayevele ekuhlosile ngabantu ekuqaleni. (2 Khor. 1:19, 20) Ngakho bonke abantu abathembekileyo sebelethemba lokuphila phakade. w17.02 1:15, 16

Ake sithi uquma phakathi kwenkalakatha yobhalu. Ungazibuza ukuthi uzaphinda ukubone yini ukukhanya. Lathi kwezinye izikhathi singakhulelwa yibunzima sibone sekumnyama emuva laphambili. Kumele ukuthi lokhu kwenzakala lakuJesu. ‘Wabekezelela ukuphikiswa ngabantu abayizoni’ kanye lokuphathwa kubi njalo wafa kabuhlungu esigodweni sokuhlutshwa. Ngalesosikhathi kwakungani uJesu uphakathi kwenkalakatha yobhalu olumnyama okwesabekayo. (Heb. 12:3) Kodwa wakubekezelela konke lokhu. Wayekhangele umvuzo owawuphambi kwakhe ikakhulu lokhu ayezakwenza ukuze ibizo likaNkulunkulu lingcweliswe lokuthi atshengise ukuthi uJehova nguye yedwa olelungelo lokubusa. Ubunzima ahlangana labo babungobesikhathi esincane kodwa umvuzo ayezawuphiwa wawuzahlala kuze kube phakade. Lathi lamuhla singabe sisehlelwa yizilingo ezibuhlungu futhi ezisiqeda amandla. Kodwa kumele sikhumbule ukuthi ubunzima lobu ngobesikhathi esifitshane, buzaphela. w16.04 2:10

Emhlabeni lo ogcwele ububi akuthi thiki ebantwini abanengi nxa besona, yikho bengakunanzeleli ukuthi bayakudinga ukuhlawulelwa izono. Kabakuzwisisi ukuthi isono siyini, ukuthi sibangelani ebantwini lokuthi kumele benzeni ukuze bakhululwe kuso. Abalesifiso sokufunda bayathokoza nxa befunda ukuthi uJehova watshengisa abantu umusa omkhulu ngokuthumela iNdodana yakhe emhlabeni ukuthi izobafela ukuze bakhululwe esonweni lasekufeni. (1 Joh. 4:9, 10) Umhlatshelo wenhlawulo kaKhristu utshengisa ukuthi uNkulunkulu uyasithanda kakhulu futhi uveza lobukhulu bomusa wakhe. Kuyasiduduza ukwazi ukuthi nxa singaba lokholo egazini likaJesu elachithekayo, izono zethu zizathethelelwa njalo sizakuba lomzwangedwa omuhle. (Heb. 9:14) Lezi zindaba ezinhle okumele sizitshele abantu! w16.07 4:6, 7

Ukuba lokholo emhlatshelweni wenhlawulo kusinika ithuba lokuthethelelwa izono. ILizwi likaNkulunkulu lisitshela ukuthi ‘angazesula’ izono zethu. (ImiSeb. 3:19-21) Inhlawulo yavula ithuba lokuthi kukhethwe abanye abantu emhlabeni ukuthi bayekuba ngamadodana kaNkulunkulu ezulwini. (Rom. 8:15-17) Kodwa labo ababumba iqembu ‘lezinye izimvu’ bazaphiwa isibusiso sokuba ngamalunga emuli kaNkulunkulu emhlabeni. Ekupheleni kweminyaka eyinkulungwane bazabe bengaselasono. Ngemva kwalokho uSathane uzakhululwa entolongweni aphume ukuyakhohlisa izizwe. Kodwa nxa bangaqhubeka belalela uJehova, bazathola isibusiso sokuba ngabantwana bakhe. (Rom. 8:20, 21; Isam. 20:7-9) UJehova uzahlala ebathanda abantu bakhe njalo inhlawulo izabanceda kuze kube phakade. Siyabona-ke ukuthi inhlawulo yisipho esiligugu okungelamuntu ongasithathela sona. w17.02 2:15, 16

Lapho uJehova esinxusa ukuthi sibe ngabangane bakhe wayekwazi ukuthi sinjani lokuthi kuyini okusezinhliziyweni zethu, sileqiniso lokuthi uyakwazi ukuthi yiphi imikhutshana engalunganga engaba luhlupho komunye lomunye wethu. Kodwa lokhu akuzange kumvimbele ukuthi abe ngumngane wethu. Indlela uNkulunkulu asithanda ngayo yamfuqa ukuthi anikele ngeNdodana yakhe eyiyo yodwa ukuze ahlawulele izono zethu. (Joh. 3:16) Ngakho-ke nxa singaphambanisa kumele sicele ukuthi uJehova asithethelele. Inhlawulo yenza sibe leqiniso lokuthi uzasithethelela siqhubeke singabangane bakhe lanxa silesono.​—1 Tim. 1:15. w16.05 4:6, 7