Isethulo

Ibhuku leli lizakunceda ukuthi uthole amavesi kanye lezindaba eziseBhayibhilini ezingakunceda ukuthi ulwisane lenhlupho ohlangana lazo. Uzathola lamavesi ongakhuthaza ngawo abanye futhi ubancede benze izinqumo ezizakwenza uJehova adunyiswe. Khetha isihloko osifunayo, ngaphansi kwesihloko leso uzathola imibuzo kanye lemitsho efinqa indaba ezithile eBhayibhilini. (Khangela ibhokisi elithi “Indlela Ibhuku Leli Elisetshenziswa Ngayo.”) Uzathola imibhalo ezakucebisa futhi ikududuze. Uzathola lamagugu ongawaxoxela abanye, imibhalo engaqinisa abanye futhi ibancede balwisane lenhlupho abahlangana lazo.

Indlela Ibhuku Leli Elisetshenziswa Ngayo

Nxa ufuna ukuthola isihloko osifunayo ungasebenzisa ingxenye ethi dinga loba ukhangele ngaphansi kwezihloko ezinkulu. Ibhuku leli lenziwe laba lezihloko ezinkulu ezingu-⁠7, izihloko zakhona yilezi: Inhlupho, Ukuziphatha, Ibandla, Ukuphila Kwansuku Zonke, Imuli, Ukukhonza, lesithi Ubuntu. Izihloko ezinengi ungazithola ngaphansi kwezihloko ezinkulu. Hamba esihlokweni esikhulu ubusudinga ngaphansi kwaso indaba oyifunayo. Kodwa nxa ungakwazi ukuthi ungayithola ngaphi indaba oyidingayo ungakhangela ngaphansi kwazo zonke izihloko uze uthole okufunayo. Ngaphansi kwesihloko ngasinye uzathola izihlokwana ezibhalwe ngamabala amakhulu. Kwezinye izikhathi kungaba yimitsho loba imibuzo. Nxa ubala amavesi cabangisisa ngokuthi angenelana njani lesihlokwana loba umbuzo. Ezinye izihlokwana zenziwe zaba zingxenye ezitshiyeneyo ukuze ukuthole masinya okudingayo. Kwezinye indawo uzabona kubhalwe “Khangela lo” besekufakwa eminye imibhalo. Amavesi la ayakunceda uthole okunye ngesihloko leso. Uzathola lengxenye ezakunceda ethi “Izibonelo eziseBhayibhilini.” Engxenyeni le kulamavesi kanye lemicijo loba izifundo esizitholayo emavesini lawo. Imitsho leyo izakunceda uzwisise okutshiwo yivesi.

Ebhukwini leli kufakwe imibhalo emilutshwana ekhuluma ngendaba ethile. Kodwa yonale ekhona izakunceda ubone ukuthi ungaqalisela ngaphi ukuchwayisisa. (Zag 2:1-6) Ukuze uthole okunengi sebenzisa imibhalo eseceleni kanye lemicijo yokutaditsha etholakala ku-New World Translation of the Holy Scriptures. Ukuze uzwisise umbhalo othile ungasebenzisa Ibhuku Lokuchwayisisa LaboFakazi BakaJehova loba i-Watch Tower Publications Index. Khangela amabhuku asanda kuphuma ukuze ubone indlela esizwisisa ngayo umbhalo othile.

Sithemba ibhuku leli lizakunceda uthole ulwazi lenhlakanipho ezakunceda ukuthi uyizwisise iMibhalo Engcwele. Ngesikhathi usebenzisa ibhuku leli uzazibonela ngawakho ukuthi “ilizwi likaNkulunkulu liyaphila njalo lilamandla.”—Heb 4:12.