Badala Lingabavuselela Yini “Abadiniweyo”?

U-Angelaa udadewethu ongatshadanga oleminyaka edlula engu-30 uzizwa efikelwa yikwesaba. Umelele abadala. Bazafika besithini kuye? Liqiniso ukuthi useke walova emihlanganweni ethile, lanxa kunjalo udinwe uphelile ngemva kokusebenza ilanga lonke encedisa abantu abakhulileyo. Phezu kwendubo zakhe zansukuzonke kuyamhlupha kakhulu ukuthi unina kezwa kuhle.

Aluba bekunguwe ovakatshela u-Angela, ubungafika umduduze njani lo “odiniweyo”? (Jer 31:25) Okwakuqala, ubuzalungiselela njani ukuze waluse ngendlela ezamvuselela?

CABANGA NGEZIMO ZABAFOWENU

Kwezinye izikhathi sonke siyadinwa ngenxa yemisebenzi yethu yokuziphilisa kumbe imisebenzi ephathelane loMbuso. Ngokwesibonelo umphrofethi uDanyeli “wadinwa kakhulu” ngesikhathi esamukela umbono ayengawuzwisisi. (Dan. 8:27) Wancedwa yingilosi uGabhriyeli eyabonakala kuye. Lesi sithunywa sikaNkulunkulu samupha ukuqonda lokuzwisisa njalo samqinisekisa ngokuthi uJehova wayeyizwile imithandazo yakhe futhi samtshela lokuthi “wayelokhu engumuntu oqakathekileyo.” (Dan. 9:21-23) Kwathi ngelinye ilanga umphrofethi lo edinwe efile kwabuya enye ingilosi yamqinisa ngamazwi amnandi.​—Dan 10:19.

Ngendlela efananayo, ungakavakatsheli omunye okhonza laye ongabe edanile kumbe ephela amandla qala uzinike isikhathi sokucabanga ngezimo zakhe. Ulaziphi izinhlupho? Izinhlupho lezi zingabe zimqeda njani amandla? Yiziphi izimpawu zobuntu ezinhle azitshengisayo? URichard oseleminyaka edlula engu-20 engumdala uthi, “Engikuqakathekisa kakhulu ngokuhle okwenziwa ngabafowethu.” Wengezelela esithi, “Ukucabangisisa ngezimo zabo ungakabavakatsheli kwenza kube lula ukuthi uthole ithuba lokubanika isikhuthazo abasidingayo.” Nxa omunye umdala ekuphelekezela ekwaluseni, kungaba kuhle ukuthi lihlale phansi lonke, beselicabangisisa ngesimo somfowenu.

YENZA UKUTHI ABAZALWANE BAKHULULEKE

Akuthandabuzwa ukuthi lawe uyavuma ukuthi umuntu aveze imizwa yakhe kungenza ukuthi abe lenhloni. Ngokwesibonelo kungaba nzima ukuthi umzalwane akhululeke ukutshela abadala ngalokho okumhluphayo. Yikho-ke ungenza njani ukuthi akhululeke? Okunganceda kakhulu yikubobotheka kanye lokumtshela amazwi amahle enza ukuthi akhululeke. UMichael oseleminyaka edlula engu-40 engumdala nxa evakatsha uqala ngokukhuluma amazwi la: “Uyakwazi ukuthini, esinye isibusiso esihle kakhulu sokuba ngumdala yikuvakatshela abazalwane emakhaya abo lokubazi ngcono. Ngakho ilanga lokukuvatshela kade selingiphuzele ukufika.”

Ekuvakatsheni kwakho, ungakhetha ukuqalisa ngokuthandaza ngenhliziyo yakho yonke. Emithandazweni yakhe, umphostoli uPhawuli waqamba ngokucacileyo ukholo lwabafowabo, uthando lwabo kanye lokubekezela kwabo. (1 Te 1:2, 3) Nxa ungakhuluma ngendlela ozizwa ngayo ngezimpawu zobuntu ezinhle zomfowenu, uyabe ulungiselela enhliziyweni yakho kanye leyakhe ukuthi libe lengxoxo ezaba luncedo kakhulu. Amazwi akho angathoba inhliziyo yakhe. URay, umzalwane oselesikhathi eside engumdala uthi, “Kwezinye izikhathi sonke siyakhohlwa izinto ezinhle esizenzayo. Ngakho nxa omunye umuntu angasikhumbuza ngakho, kuyasivuselela.”

NIKA ISIPHO SOMOYA

NjengoPhawuli, lawe unganika “isipho somoya” ngokutshela umfowenu ngokuthile okuseMbhalweni, lanxa kulivesi elilodwa nje. (Ro 1:11) Ngokwesibonelo, umfowenu odanileyo angazibona engumuntu ongelancedo njengomhubi owaziqathanisa ‘lesixaxa sewayini esesikhumba esifakwe entuthwini’ esitshwabheneyo. (Hu 119:83, 176) Nxa usumchasisele ngamafitshane amazwi asevesini le, ungamtshela-ke ukuthi uleqiniso lokuthi yena ‘kazilibalanga’ izimiso zikaNkulunkulu.

Ngendlela efananayo, umzekeliso wenhlamvu yesiliva eyalahlekayo ungamthinta yini udade osezehlukanisa lebandla kumbe osevilapha? (Luk 15:8-10) Mhlawumbe inhlamvu eyalahlekayo yayiyingxenye yamangqongqo enziwe ngenhlamvu zesiliva. Nxa lingaxoxa ngomzekeliso lo, kungamnceda ukubona ukuthi ulilunga eliqakathekileyo lebandla lobuKhristu. Lingaqeda ukuxoxa ngalokhu, mhlawumbe ungakhuluma lokuthi uJehova uyamkhathalela njengomunye wezimvu zakhe ezincane.

Kanengi labo esikhonza labo bayakukholisa ukukhuluma ngalokho abakubalayo eBhayibhilini. Ngakho akumelanga kube nguwe okhulumayo kuphela! Ngemva kokubala ivesi elihambelana lesimo sabo, ungakhetha ibala eliyisiqokoqela kumbe umutsho ubusubacela ukuthi batsho ukuthi bazwisisa njani. Ngokwesibonelo, ngemva kokubala u-2 Khorinte 4:16, umdala angabuza ukuthi, “Wake wakubona yini empilweni yakho ukuthi uJehova ukwenza njani ube mutsha?” Ukusebenzisa indlela le kungenza kube ‘lokuqinisana.’​—Ro 1:12.

Mhlawumbe ungavuselela okhonza laye ngokuxoxa ngomuntu othile oseBhayibhilini olesimo esihambelana lesakhe. Umuntu ozwa ubuhlungu enhliziyweni angaduduzwa yikufunda ngabantu abanjengoHana kumbe u-Ephafrodithu, abake badana kakhulu kodwa bahlala beligugu phambi kukaNkulunkulu. (1Sa 1:9-11, 20; Flp 2:25-30) Nxa izimo zivuma, kungaba kuhle ukuthi lixoxe ngezibonelo eziseBhayibhilini.

UNGEKELI UKUBAVAKATSHELA FUTHI

Ungatshengisa ukuthi uyabakhathalela ngobuqotho abafowenu labodadewenu ngokuqhubeka ubananza ngemva kokubavakatshela. (Seb 15:36) Ngesikhathi ubavakatshele, nxa usuvalelisa, kungaba kuhle ukuthi uhlele ukuthi usebenze labo ekutshumayeleni. UBernard oselesikhathi eside engumdala uthi nxa esehlangana futhi lomzalwane kumbe udade oyabe esanda kumvakatshela, ubuza ngokuhlakanipha ngesicebiso ayabe esinikiwe athi, “Akungitshele, sasebenza yini?” Nxa ungatshengisa ukukhathalela okunjalo, ungenelisa ukubona ukuthi olunye usizo luyadingeka kumbe hatshi.

Khathesi abafowethu labodadewethu bayakudinga ukuzizwa bethandwa, bekhathalelwa njalo bezwisiswa ukwedlula loba nini. (1 Te 5:11) Yikho-ke ungakahambi ukuyakwalusa, zinike isikhathi sokucabangisisa ngesimo somfowenu. Khuleka ngakho. Khetha imibhalo efaneleyo. Ungenza konke lokhu, uzathola amazwi afaneleyo okuvuselela “abadiniweyo.”