Ubuhlungu Obubangelwa Yikufa

Ukufa yindaba engamnandi. Abanengi bakhetha ukungakhulumi ngakho. Kodwa iqiniso yikuthi kwelinye ilanga sonke kuzasehlela. Kanti njalo udonsi lokufa luyahlaba njalo lubuhlungu.

Akulamuntu ongathi mina akungeke kungethuse ukufelwa ngengitshade laye, umzali wami kumbe umntanami. Ingozi ebuhlungu ingasehlela loba nini kumbe sitshudule lomkhuhlane okwesikhathi eside. Kungelani lokuthi kufike ngayiphi indlela, ubuhlungu bakho ngeke sibubalekele futhi impumela yakho iqeda amandla.

U-Antonio owafelwa nguyise engozini yemota uthi: “Lokhu kufanana lomuntu ofika avale indlu yakho athathe amakhiye ahambe. Ngeke wenelise ukuphenduka ekhaya lakho loba sekutheni. Osusele lakho yimikhumbulo kuphela. Izinto sezintshintshile. Lanxa kungabanzima ukukuvuma lokhu ngenxa yokuthi ubona angani kade kungamelanga kwenzakale, akula lutho ongalwenza.”

Lapho efelwa ngumkakhe umama okuthiwa nguDorothy owayeleminyaka engu-47 wazimisela ukudinga izimpendulo. Njengoba wayengumbalisi we-Sunday-school, kwakumsinda ukuthi avume ukuthi umuntu angafa kuphelela khonapho. Kodwa wayengelazo izimpendulo ezicacileyo. Wabuza umfundisi wesonto ayeyingena, i-Anglican wathi, “Kwenzakalani kithi nxa singafa?” Umfundisi wamphendula wathi, “Akulamuntu okwaziyo sibili. Sizabona ngakho.”

Kodwa kumele siphonguthi “sizabona ngakho” yini? Kambe umuntu angafa sekuphelile yini?