ISIHLOKO ESISEKUQALISENI | UMUNTU ANGAFA SEKUPHELILE YINI?
Imizamo Yabantu Yokulwisana Lokufa
EMPEROR QIN SHI HUANG
EXPLORER PONCE DE LEÓN
Ukufa yisitha esesabekayo. Abantu bazama zonke izindlela ukuze balwe lakho. Kungaba nzima ukuthi sizwisise nxa sekuthethe umuntu esimthandayo. Kumbe nxa umuntu esesemutsha angazitshela ukuthi akusoze kuke kumfice. Lokhu kungaba yikuzikhohlisa sibili.
OFaro basendulo bazama ukulwisana lokufa ukwedlula abantu bonke. Okwempilo yabo yonke babencedisana lezinkulungwane zezisebenzi zabo bezama ukunqoba ukufa. Amangcwaba ababewakha okuthiwa ngama-pyramids atshengisa ukuthi babezama ukunqoba ukufa kodwa besehluleka.
Ababusi belizwe laseChina labo benza imizamo yokunqoba ukufa, lanxa bona babesebenzisa elinye iqhinga, elokudinga imithi engenza ukuthi bangafi. Umbusi u-Qin Shi Huang watshela izisebenzi zakhe ezilungisa imithi ukuthi zilungise umuthi owawuzakwenza ukuthi izizalwane zakhe zingafi. Kodwa imithi yabo eminengi yayihlanganiswa le-mercury ebulalayo. Kumele ukuthi umbusi lo wabulawa ngomunye wakhona.
Ngo-1513 C.E., kwabikwa ukuthi umhloli wamazwe waseSpain okuthiwa nguJuan Ponce de León wadabula ulwandle lwaseCaribbean edinga umuthi wokungagugi. Ekuhambeni kwakhe wavumbulula idolobho lase-U.S.A. okuthiwa yiFlorida kodwa wasesifa ngemva kweminyaka emilutshwana ngesikhathi esilwa labantu abadabuka e-America. Lakhathesi akulamuthi wokungagugi owatholakalayo.
Bonke abantu laba, oFaro, ababusi kanye labahloli bamazwe babefuna ukunqoba ukufa. Kodwa ngubani ongabeyisa athi babezamani vele, lanxa indlela ababefuna ukukunqoba ngayo singavumelani layo? Wonke umuntu enhliziyweni yakhe uyakufuna ukuphila.
UKUFA KUNGANQOTSHWA YINI?
Kungani silwisana lokufa? Impendulo siyithola eBhayibhilini. Likhuluma ngoJehova uNkulunkulu,a uMdali wethu, lithi: “Yonke into uyenze yabanhle ngesikhathi sayo. Wamupha umuntu iphakade enhliziyweni yakhe.” (UmTshumayeli 3:11) Sifuna ukuhlala sikholisa emhlabeni omuhle kuze kube nini lanini hatshi okweminyaka engaba ngu-80 kuphela. (Hubo 90:10) Leso yisifiso esisezinhliziyweni zethu.
Kungani uNkulunkulu wafaka “iphakade” ezinhliziyweni zethu? Kambe wayefuna ukuthi sikhathazeke? Lokho ayisikho ayekufuna. Usithembisa ukuthi ukufa kuzanqotshwa. IBhayibhili likukhuluma kanengi ukuthi ukufa kuzasuswa kanye lokuthi uNkulunkulu usithembisa ukuthi kuzakuba lokuphila okungapheliyo.—Khangela ibhokisi elithi, “Ukunqoba Ukufa.”
UJesu Khristu wakukhuluma ngokucacileyo ukuthi: ‘Manje-ke yilokhu ukuphila okungapheliyo: ukuthi bakwazi wena, onguwe wedwa uNkulunkulu weqiniso loJesu Khristu omthumileyo.’ (UJohane 17:3) Yikho-ke, ukufa kunganqotshwa sibili. Kodwa uJesu uyasiqinisekisa ukuthi uNkulunkulu nguye kuphela ongakunqoba.
a IBhayibhili lithi ibizo likaNkulunkulu nguJehova.