Khetha Ngokuhlakanipha Usesemutsha

1. Kuyini okuthokozisayo okwenziwa ngabasakhulayo abanengi abangamaKhristu?

SIPHILA esikhathini esiqakathekileyo. Indlela izigidi zabantu ezivela emazweni wonke ezibuya ngayo ekukhonzeni kweqiniso ayikaze ibonakale loba nini. (Isam. 7:9, 10) Abasakhulayo abanengi bahlangana lokunengi okuthokozisayo emsebenzini wokunceda abantu ukuthi bazwisise iqiniso eliseBhayibhilini, elenza abantu bathole ukuphila. (Isam. 22:17) Abanye abasakhulayo bafundisa abantu iBhayibhili bebanceda ukuthi baphile ngendlela engcono kakhulu. Kanti njalo abanye bakhuthele ekutshumayeleni izindaba ezinhle ngezindimi zamanye amazwe. (Hubo. 110:3; Isaya. 52:7) Ungangezelela njani okwenzayo emsebenzini lo othokozisayo owenziwa ngabantu bakaJehova?

2. Isibonelo sikaThimothi sitshengisa njani ukuthi uJehova ukhululekile ukunika abasakhulayo imisebenzi ethile? (Khangela umfanekiso osekuqaliseni.)

² Njengoba usakhula, ukukhetha kwakho kungakwenza ucine ususenza imisebenzi emihle enkonzweni kaNkulunkulu. Ngokwesibonelo kusegcekeni ukuthi uThimothi, eListra wakhetha ngokuhlakanipha futhi lokhu kwamenza waba ngumnali ngesikhathi eseleminyaka engaba ngu-20. (ImiSeb. 16:1-3) Kukhanya ngemva kwezinyanga ezithile umphostoli uPhawuli etshiye ibandla elitsha ngenxa yabaphikisi abalesihluku eThesalonika, wathuma osakhulayo uThimothi ukuthi abuyele eThesalonika ukuze ayeqinisa abazalwane. (ImiSeb. 17:5-15; 1 Thes. 3:1, 2, 6) Ubona angani wezwa njani uThimothi lapho ephiwa umsebenzi lo?

ISINQUMO ESIQAKATHEKE KULAZO ZONKE

3. Yisiphi isinqumo esiqakatheke kulazo zonke empilweni, njalo kumele usenze nini?

³ Kulezinqumo eziqakathekileyo okumele uzenze nxa usakhula. Kodwa kulesinye esiqakatheke kulazo zonke, isinqumo sokukhonza uJehova. Kumele usenze nini? UJehova uthi: “Khumbula umdali wakho ngezinsuku zobutsha bakho.” (UmTshu. 12:1) Ukukhonza uJehova ngenhliziyo yonke yiyo yodwa indlela ‘ongamkhumbula’ ngayo. (Dute. 10:12) Ukukhetha ukukhonza uJehova ngenhliziyo yonke kuqakatheke kulakho konke ongakwenza empilweni. Kuzakwenza ube lekusasa elihle.​—Hubo. 71:5.

4. Yiziphi ezinye izinqumo ezizathinta indlela okhonza ngayo uJehova?

⁴ Kodwa kulezinye futhi izinqumo okumele uzenze empilweni. Ngokwesibonelo ungabe uzibuza ukuthi uzatshada yini, uzatshada lobani lokuthi uzakwenza msebenzi bani. Lezi yizinqumo eziqakathekileyo, kodwa uyabe uhlakaniphile nxa ungaqala ngokukhetha ukukhonza uJehova ngokugcweleyo. (Dute. 30:19, 20) Ngenxa yani? Ngenxa yokuthi izinqumo lezi ziyangenelana. Umtshado lomsebenzi kungayintshintsha indlela okhonza ngayo uNkulunkulu. (Qathanisa loLukha 14:16-20) Kanti njalo lesifiso sakho sokukhonza uNkulunkulu siyawuntshintsha umbono wakho ngomsebenzi kanye lomtshado. Yikho khetha okuqakatheke kulakho konke kuqala.​—Flp. 1:10, NW.

UZAKWENZANI NGEZINSUKU ZOBUTSHA BAKHO?

5, 6. Landisa isibonelo esitshengisa ukuthi ukwenza izinqumo ezinhle kuletha intokozo ekucineni.

⁵ Nxa usukhethe ukukhonza uNkulunkulu ungacabangisisa ngokuthi ukhangelele ukuthi wenzeni njalo ungakhetha lokuthi uzamkhonza njani. Omunye umfowethu ovela eJapan wabhala wathi: “Ngathi ngileminyaka engu-14, ngisekutshumayeleni lomunye umdala webandla, wasenanzelela ukuthi angikukholisi ukutshumayela. Wakhuluma lami kuhle wathi: ‘Yuichiro buyela ngekhaya. Ufike uhlale phansi ucabangisise ngalokho uJehova akwenzele khona.’ Ngabuyela ngayacabangisisa. Ngangilokhu ngikhuleka njalo ngicabanga okwamalanga athile. Umbono wami wacina untshintshile. Akuthathanga sikhathi ukuthi ngizwe sengikukholisa ukukhonza uJehova. Ngangikuthanda kakhulu ukubala ngabanali njalo ngaqalisa ukucabanga ngokuthi ngingamkhonza njani uNkulunkulu ngokugcweleyo.”

⁶ UYuichiro uqhubeka esithi: “Ngaqalisa ukucabanga ngezinqumo ezazizakwenza ukuthi ngiyekhonza uJehova emazweni aphetsheya. Ngokwesibonelo ngakhetha ukufundela isiLungu. Ngathi ngiqeda isikolo ngakhetha umsebenzi wokufundisa isiLungu okwamahola amalutshwana ngeviki ukuze ngiphayone. Ngathi sengileminyaka engu-20 ngaqalisa ukufundela isiMongolia njalo ngathola ithuba lokuvakatshela iqembu labamemezeli besiMongolia. Ngemva kweminyaka emibili ngo-2007 ngavakatshela eMongolia. Ngathi ngisekutshumayeleni lamaphayona athile ngananzelela ukuthi abantu abanengi babefuna ukufunda iqiniso, ngaba lesifiso sokuthi ngihle ngiyehlala khona ngincedise. Ngabuyela eJapan ngayalungiselela ukwenza njalo. Bengilokhu ngiphayona eMongolia kusukela ngo-April 2008. Impilo inzima elizweni leli. Kodwa abantu bayazilalela izindaba ezinhle njalo ngiyenelisa ukubanceda ukuthi basondele kuJehova. Ngicabanga ukuthi ngakhetha indlela yokuphila engcono kulazo zonke.”

7. Yiziphi izinqumo okumele sizenzele zona, njalo isibonelo sikaMosi sisinceda ngani?

⁷ Wonke umuntu onguFakazi kaJehova kumele azikhethele ukuthi uzaphila njani. (Josh. 24:15) Asisoze sikutshele ukuthi tshada kumbe ungatshadi, ukuthi utshade lobani lokuthi ukhethe wuphi umsebenzi. Uzakhetha umsebenzi ongathathi isikhathi eside ukuwufundela yini? Abanengi benu maKhristu asakhulayo lihlala emakhaya kodwa abanye basemadolobheni anothileyo. Emhlabeni wonke ubuntu benu butshiyene kakhulu, iziphiwo zenu, eselikubonile empilweni, elikuthandayo kanye lokholo lwenu. Mhlawumbe indlela elitshiyene ngayo ifanana lendlela abasakhulayo ababengamaHebheru ababetshiyene ngayo loMosi esesemncane eGibhithe yasendulo. Wayengasweli lutho esikhosini kodwa amanye amaHebheru ayeyizigqili. (Eks. 1:13, 14; ImiSeb. 7:21, 22) Njengawe, babephila esikhathini lapho okwakumele benze izinqumo eziqakathekileyo. (Eks. 19:4-6) Munye ngamunye wabo kwakumele akhethe ukuthi uzakwenzani ngokuphila kwakhe. UMosi wakhetha kuhle.​—Bala uHebheru 11:24-27.

8. Yiluphi uncedo olukhona kulabo osekumele benze izinqumo ezithile empilweni?

⁸ UJehova uyakuncedisa ukuthi ukhethe kuhle njengoba usakhula. Ukunika izimiso ongazisebenzisa nxa usenza izinqumo kusiya ngokuthi impilo yakho injani. (Hubo. 32:8) Kanti njalo abazali bakho abangamaKhristu kanye labadala bebandla bangakunceda ukuthi ubone ukuthi ungazisebenzisa njani izimiso lezi. (Zaga. 1:8, 9) Asikhangele izimiso zeBhayibhili ezintathu ezingakunceda ukuthi wenze izinqumo ngokukhalipha, ukuze ikusasa lakho libe lihle.

IZIMISO ZEBHAYIBHILI EZINTATHU EZINGAKUNCEDA

9. (a) Kungani sisithi uJehova usinika inkululeko yokuzikhethela? (b) Kuyini esizakuthola ‘ngokufuna kuqala uMbuso?’

⁹ Funani kuqala uMbuso kaNkulunkulu lokulunga kwakhe. (Bala uMathewu 6:19-21, 24-26, 31-34.) UJehova usinika isithunzi ngokusivumela ukuthi sizikhethele. Kasitsheli ukuthi nxa sisesebatsha kumele sisebenzise isikhathi esinganani ekutshumayeleni ngoMbuso. Kodwa uJesu wasinika isimiso sokufuna uMbuso kuqala esingasinceda. Indlela esisisebenzisa ngayo izatshengisa ukuthi siyamthanda uNkulunkulu, siyabathanda omakhelwane bethu, lokuthi siyaliqakathekisa ithemba lokuphila okungapheliyo. Njengoba ucabanga ngokutshada kanye lomsebenzi, hlola ukuthi izinqumo zakho azisoze zikutshiye ukhathazekile yini ngokuthi uzaphila ngani, lokuthi zizatshengisa yini ukuthi uyawuqakathekisa uMbuso kaNkulunkulu lokulunga kwakhe.

10. Kuyini okwenza uJesu wathokoza njalo yiziphi izinqumo ezizakwenza ujabule?

¹⁰ Thokoziswa yikuncedisa abanye. (Bala imiSebenzi 20:20, 21, 24, 35.) Ngomusa uJesu wasifundisa isimiso lesi esiqakathekileyo ekuphileni. Wayehlala ethokoza ngenxa yokuthi wayesenza intando kaYise kulokuthi enze eyakhe. Kwakumthokozisa ukubona abantu abamnene belalela izindaba ezinhle. (Luk. 10:21; Joh. 4:34) Mhlawumbe lawe usuke wathokoziswa yikunceda abanye. Nxa ungenza izinqumo eziqakathekileyo usebenzisa izimiso uJesu asifundisa zona uzathokoza kakhulu njalo uzajabulisa uJehova.​—Zaga. 27:11.

11. Kungani uBharukhi wayengasawukholisi umsebenzi wakhe, njalo yisiphi iseluleko asinikwa nguJehova?

¹¹ Intokozo yethu enkulu siyithola ngokusebenzela uJehova. (Zaga. 16:20) Kukhanya uBharukhi, umabhalani kaJeremiya wayesekukhohlwa lokhu. Kulesikhathi lapho ayengasakukholisi ukusebenzela uJehova. UJehova wamtshela wathi: ‘Uzazifunela izinto ezinkulu na? Ungazidingi, ngoba ngizaletha umonakalo ebantwini bonke, kodwa wena loba kungaphi oya khona ngizakwenza uphephe lokuphila kwakho.’ (Jer. 45:3, 5) Ucabanga ukuthi kuyini okwakungathokozisa uBharukhi, ukuzifunela izinto ezinkulu kumbe ukuphepha eyinceku kaNkulunkulu ethembekileyo ngesikhathi iJerusalema libhidlizwa?​—Jak. 1:12.

12. Yisiphi isinqumo esenza ukuthi uRamiro athokoze?

¹² Omunye umfowethu owathokoziswa yikunceda abanye nguRamiro. Uthi: “Ngakithi singabayanga njalo sihlala esabelweni esisezintabeni zase-Andes. Ngesikhathi umnewethu esithi uzabhadalela ukuze ngiyefunda eyunivesithi kwakukhanya kuyinto enkulu sibili. Kodwa ngangisanda kuba nguFakazi kaJehova obhaphathiziweyo njalo elinye iphayona laselingicele ukuthi ngizophayona lalo kwelinye idolobho elincane. Ngaya khonale ngafika ngafundela ukugela njalo ngavula eyami indawo yokugela ukuze ngiziphilise. Njengoba sasifundisa abantu iMibhalo, abanengi babelalela kuhle kakhulu. Ngemva kwesikhathi ngangena lebandla elalisanda kuvulwa elalisebenzisa ulimi lwakuleyondawo njalo kululimi lwami lomdabuko. Khathesi sengileminyaka elitshumi ngitshumayela okwesikhathi esigcweleyo. Akula omunye umsebenzi onganginika intokozo engiyithola ngokunceda abanye ukuthi bafunde izindaba ezinhle ngolimi lomdabuko wabo.”

13. Kungani kukuhle ukukhonza uJehova usesemutsha?

¹³ Thokoziswa yikukhonza uJehova usesemutsha. (Bala umTshumayeli 12:1.) Akumelanga ucabange ukuthi kumele uqale uthole umsebenzi omuhle, ubususebenzela uJehova nxa usuwutholile. Nxa usesemutsha yiso kanye isikhathi esihle sokukhonza uJehova ngokugcweleyo. Abasakhulayo abanengi abalamilandu yokunakekela izimuli njalo balempilakahle lamandla okwenza imisebenzi enzima. Ufuna ukumenzelani uJehova usesemutsha. Engxenye ulesifiso sokuphayona. Kumbe ufuna ukuyancedisa ebandleni elikhuluma olunye ulimi. Kumbe ubona kulezinye izindlela ongancedisa ngazo ebandleni okulo. Loba yikuphi ofuna ukukwenza ekukhonzeni uNkulunkulu kuzamele uthole indlela yokuziphilisa. Uzakhetha ukwenzani njalo kuzakuthatha isikhathi esinganani ukukufundela?

SEBENZISA IZIMISO ZEBHAYIBHILI UKUZE UKHETHE NGOKUHLAKANIPHA

14. Kuyini okumele umuntu akuqaphele nxa ecabanga ngekusasa?

¹⁴ Izimiso zeBhayibhili ezintathu esikhulume ngazo zingakunceda ukuthi ukhethe kuhle umsebenzi. Akuthandabuzwa ukuthi amatitshala akho kulokuthile akwaziyo mayelana lemisebenzi endaweni yakini. Engxenye endaweni yakini kulamawofisi kahulumende alolwazi ngokuthi kungaphi lapho okufuneka khona abantu abanjengawe. Amacebo abo angabe elusizo sibili, kodwa kumele uqaphele. Abantu abangamthandiyo uJehova bangacina bekwenza ukuthi uthande izinto ezisemhlabeni. (1 Joh. 2:15-17) Inhliziyo yakho ingakuqila lula nxa ungakhangwa yizinto ezisemhlabeni.​—Bala iZaga 14:15; Jer. 17:9.

15, 16. Ngobani abangakunceda nxa ufuna ukukhetha umsebenzi?

¹⁵ Nxa usucabangisise kuhle ngomsebenzi ongawuthola, kumele uthole iseluleko esihle. (Zaga. 1:5) Ngobani abangakuncedisa ukuthi usebenzise izimiso zeBhayibhili ekukhetheni kuhle umsebenzi? Lalela abantu abathanda uJehova, abakuthandayo njalo abakuzwisisayo ukuthi wena ungumuntu onjani. Bangakunceda ukuthi uhlolisise okungabalula kuwe kanye lalokho okufunayo. Engxenye abakutshoyo kuzakunceda ukuthi ukhethe kuhle lokho ofuna ukukwenza. Ulesibusiso esikhulu nxa kuyikuthi abazali bakho bathanda uJehova. Kanti njalo abadala ebandleni lakini bangakunceda ngoba bangamadoda azazi kuhle izimiso eziseMibhalweni. Zinike isikhathi sokukhuluma lamaphayona lababonisi abahambelayo. Ubabuze ukuthi kungani bakhetha inkonzo yesikhathi esigcweleyo? Baqalisa njani ukuphayona njalo baziphilisa njani? Kuyini okubathokozisayo ngenkonzo yabo?​—Zaga. 15:22.

¹⁶ Abantu abakwazi kuhle bangakunceda ngeseluleko esihle ngoba bayabe bekuzwisisa. Ngokwesibonelo engxenye ufuna ukutshiya isikolo uqalise ukuphayona ngenxa yokuthi ulivila lokufunda. Umuntu okuthandayo angakubona ukuthi uhloseni njalo akuncede unanzelele ukuthi isikolo singakunceda ukuthi ungabi ngumuntu okhalala masinya. Ukungakhalali masinya kuqakathekile nxa ufuna ukukhonza uJehova ngokugcweleyo.​—Hubo. 141:5; Zaga. 6:6-10.

17. Yiziphi izinqumo okumele siziqaphele?

¹⁷ Wonke umuntu okhonza uJehova uzahlangana lezilingo, okutsho izinto ezizabe zimhuga ukuthi atshiye uJehova. (1 Khor. 15:33; Kol. 2:8) Imisebenzi iyatshiyana, eminye yenza kube nzima ukukhonza ukwedlula eminye. Kungabe kulabanye obaziyo yini ‘asebebhidlize ukukholwa kwabo’ ngenxa yokukhetha imisebenzi ethile? (1 Tim. 1:19) Uyabe uhlakaniphile sibili nxa usenza izinqumo ezingeke ziphambanise ubuhlobo bakho loNkulunkulu.​—Zaga. 22:3.

THOKOZA NGOKUBA NGUMKHRISTU USESEMUTSHA

18, 19. Kumele wenzeni nxa usizwa ungelasifiso sokusebenzela uJehova?

¹⁸ Nxa usulesifiso sokusebenzela uJehova enhliziyweni yakho, sebenzisa ithuba olalo lokwenza okunengi ekukhonzeni uNkulunkulu usesemutsha. Khathesi yisikhathi sokuthi wenze izinqumo ezizakwenza ukholise ukusebenzela uJehova.​—Hubo. 148:12, 13.

¹⁹ Kodwa-ke kumele wenzeni nxa ungelasifiso sokusebenzela uJehova khathesi? Qhubeka uqinisa ukholo lwakho. UPhawuli eselandise ngalokho akwenzayo ukuze akhethe impilo eletha isibusiso sikaNkulunkulu, wabhala wathi: “Uma kokunye licabanga ngokwahlukileyo, lalokho uNkulunkulu uzakwenza kucace kini. Kuphela nje kasiqhubekeni ngalokho esesikuzuzile.” (Flp. 3:15, 16) Qhubeka ucabangisisa ngezeluleko zikaNkulunkulu ezinhle kanye lothando lwakhe. Akula omunye umuntu ongakunceda ukuthi ukhethe ngokuhlakanipha usesemutsha ngaphandle kukaJehova.