Kungani uNkulunkulu Evumela Ukuthi Abangelamandla Bahlukuluzwe Ngabalamandla?

IBhayibhili lisilandisela ezinye izindaba ezibuhlungu kakhulu zabantu ababehlutshwa ngabalamandla. Indaba kaNabothi iyakucacisa lokhu. U-Ahabi owayeyinkosi yako-Israyeli ngekhulu letshumi B.C.E., wavuma ukuthi umkakhe, uJezebeli akhe icebo lokuthi uNabothi lamadodana akhe babulawe ukwenzela ukuthi athathe isivini sabo. (1 AmaKhosi 21:1-16; 2 AmaKhosi 9:26) UNkulunkulu wavumelani ukuthi u-Ahabi awasebenzise kubi kangaka amandla?

Ake sihlole isizatho esisodwa esiqakathekileyo: UNkulunkulu ngeke aqambe amanga. (KuThithusi 1:⁠2) Lokhu kungenelana njani lokuhlukuluzwa kwabangelamandla? Angithi kusukela ekuqaliseni uNkulunkulu wayehle wabaxwayisa abantu ukuthi ukumhlamukela kwakuzaba lompumela omunyu, ukufa. Kusukela abantu bahlamuka esivandeni sase-Edeni bebelokhu besifa njengoba uNkulunkulu wayetshilo. Kanti njalo umuntu owafa kuqala wayehlukuluzwe ngumuntu olamandla kulaye. Kwakungu-Abela owabulawa ngumfowabo uKhayini.​—UGenesisi 2:16, 17; 4:8.

ILizwi likaNkulunkulu likufinqa kanje obekusenzakala embalini yabantu: “Umuntu ubuse umuntu kwaba yikulimala kwakhe.” (UmTshumayeli 8:9, NW) Lokhu kwenzakele yini? UJehova waxwayisa isizwe sako-Israyeli, abantu bakhe, ukuthi amakhosi abo ayezabathwalisa amagabha avuzayo bacine sebekhala kuye. (1 USamuyeli 8:11-18) INkosi ehlakaniphileyo uSolomoni layo yahlukuluza abantu ngokubabhadalisa imithelo eyayibakhama. (1 AmaKhosi 11:43; 12:3, 4) Ingasaphathwa eyamakhosi ayefana lo-Ahabi ayebusa ngesihluku esibi kakhulu. Aluba uNkulunkulu wakuvimbela ukusetshenziswa kubi kwamandla konke lokhu, kwakungeke yini kukhanye angani lokho ayekutshilo kwakungamanga?

Kumele sikhumbule lokuthi uSathane wathi abantu bakhonza uNkulunkulu kuphela nxa kulokuthile abakutholayo. (UJobe 1:9, 10; 2:4) Aluba uNkulunkulu ubevikela zonke izinceku zakhe kuzo zonke izindlela zokubusa, bekungasoze kukhanye angani uSathane uqinisile yini? Kanti njalo aluba uNkulunkulu ubevimbela ukuthi kungabi lomuntu ohlukuluzwayo bekuzakhanya angani ulamanga amakhulu. Kungaselamuntu ohlukuluzwayo, inengi labantu belizazitshela ukuthi alikudingi ukubuswa nguNkulunkulu. Kodwa iLizwi likaNkulunkulu lithi kakwenzeki lokhu, ngoba umuntu kala ngitsho amandla okuzibusa. (UJeremiya 10:23) Ukufika koMbuso kaNkulunkulu yikho kuphela okuzaqeda bonke ububi ebantwini.

Kodwa lokhu kutsho yini ukuthi uNkulunkulu kenzi lutho ngokuhlukuluzwa? Hatshi. Khangela izinto ezimbili azenzayo: Okwakuqala usitshela okunengi mayelana lokubusa ngesihluku. Ngokwesibonelo, iLizwi lakhe liveza konke okuphathelane lecebo elenziwa nguJezebeli ukuze kubulawe uNabothi. IBhayibhili liphinda lisivezele lokuthi imisebenzi le emibi ivela kumbusi omubi ofuna ukuzifihla ukuthi ungubani. (UJohane 14:30; 2 KwabaseKhorinte 11:14) IBhayibhili liyamveza ukuthi nguSathane uDeveli. UNkulunkulu usinceda ukuthi singenzi okubi ngokusenza sikwazi ukuthi ububi lokuhlukuluzwa kubangelwa ngubani. Ngokwenza njalo uyasivikela ukuthi sibe lekusasa elingapheliyo.

Okwesibili uNkulunkulu usinika ithemba elenza siqiniseke ukuthi ukuhlukuluzwa kuzaphela. Ukuveza kwakhe ububi buka-Ahabi loJezebeli, ukubahlulela lokubajezisa, kugoqela labanye ababenjengabo, kusiqinisekisa ukuthi uzagcwalisa izithembiso zakhe zokujezisa abenza okubi. (IHubo 52:1-5) UNkulunkulu usithembisa lokuthi sekuseduze ukuthi alungise umonakalo obangelwa yibubi obenza abamthandayo bahlupheke.a Sekuseduze ukuthi indoda ethembekileyo uNabothi kanye lamadodana ayo bahlale emhlabeni ongelabubi olipharadayisi kuze kube nini lanini.​—IHubo 37:34.