Ukuhlanganiswa Kwamasonto—UNkulunkulu Uyakuvuma Yini?

ABASEKELA ukuthi amasonto ahlanganiswe abakuvumi lokhu. U-Eboo Patel owasungula inhlanganiso okuthiwa yi-Interfaith Youth Core wathi: “Ngubani ongangitshengisa isonto engelandaba lokuba lesihawu . . . , engelandaba lokulondolozwa kwemvelo . . . , futhi engelamusa ebantwini.”

Kuliqiniso ukuthi amaBhuda, amaKatolika, amaHindu, amaMuslim, lamasonto ahlamuka kumaRoma kanye lamanye amanengi ayake ahlangane ukuze alwisane lobuyanga, imikhankaso yokulwela amalungelo abantu, ukuvimbela ukusetshenziswa kwezikhali eziyingozi kanye lokwenza imizamo yokulondoloza imvelo. Kanti njalo amanye amasonto atshiyeneyo ayahlangana ukuze axoxe ngokuthi kungenziwani ukuze abantu bazwanane. Lokhu akwenza ngemibuthano ethile lapho okuyabe kulayithwe khona amakhandlela, imicimbi, ukuhlabela, imithandazo kanye lokunye okunjalo.

Ukuhlanganiswa kwamasonto yikho yini okungenza amasonto amanyane? UNkulunkulu angabe efuna yini ukwenza izinto zibe ngcono emhlabeni ngokuhlanganisa amasonto?

UBUNZIMA OBUBA KHONA ENDABENI YOKUMANYANA

Enye inhlanganiso enkulu kulazo zonke yokuhlanganiswa kwamasonto iyaziqhenya ngokuthi ilamalunga avela emasontweni atshiyeneyo angu-200 njalo itholakala emazweni angu-76. Ithi injongo yayo “ngeyokuthuthukisa ukuhlanganiswa kwamasonto okuzahlala kukhona nsuku zonke.” Lanxa kunjalo, lokhu bakuhlabela ngomlomo, ukukwenza kunzima. Ngokwesibonelo, abasunguli bayo bathi isivumelwano sabo kwakumele sibhalwe ngonanzelelo ukuze bangacaphuli amasonto amanengi ayesayine isivumelwano leso. Ngenxa yani? Okunye yikuthi kwakulokungavumelani mayelana lokuthi kumele kukhulunywe ngoNkulunkulu yini kuleso sivumelwano. Yikho-ke akuzange kufakwe loba yini eyayiphathelane loNkulunkulu.

Pho-ke njengoba uNkulunkulu kungakhulunywa ngaye, kunceda ngani ukuba lokholo? Phela kuyabe kungasela mehluko lezinye izinhlanganiso ezinceda abantu ezikhona. Kuyakhanya ukuthi kungani abasekela ukuhlanganiswa kwamasonto besithi bona kababoni ngezenkolo kodwa “bayinhlanganiso ethuthukisa ukumanyana ebantwini.”

KWANELE YINI UKUTHUTHUKISA IZENZO EZINHLE?

Umkhokheli wesonto yesiBhuda uDalai Lama njalo engumsekeli omkhulu wokuhlanganiswa kwamasonto wathi: “Wonke amasonto amakhulu alemfundiso efananayo: ukuba lothando, isihawu kanye lokuthethelela.” Waqhubeka wathi: “Into eqakathekileyo yikuthi lokhu kumele kube yingxenye yokuphila kwansuku zonke.”

Kuliqiniso ukuthi izimpawu ezigoqela uthando, isihawu kanye lokuthethelela ziqakatheke kakhulu. Yikho uJesu wathi: “Kuzo zonke izinto yenzani kwabanye lokho elifuna bakwenze kini.” (UMathewu 7:​12) Kodwa ukukholwa kweqiniso yikuthuthukisa izenzo ezinhle kuphela yini?

UPhawuli ekhuluma ngabantu ababephila ngesikhathi sakhe ababezithi bakhonza uNkulunkulu wathi: “Ngoba ngingafakaza ngabo ukuthi batshisekela uNkulunkulu, kodwa ukutshiseka kwabo akugxilanga ekwazini.” Uhlupho lwalungaphi? UPhawuli wathi: “Njengoba ukulunga okuvela kuNkulunkulu bengakwazanga bafuna ukumisa okwabo.” (KwabaseRoma 10:​2, 3) Yikho-ke ukukholwa kwabo lokutshiseka kwakuphelela emoyeni ngenxa yokuthi babengelalwazi oluqondileyo mayelana lentando kaNkulunkulu.​—⁠UMathewu 7:​21-⁠23.

IBHAYIBHILI LITHINI NGOKUHLANGANISWA KWAMASONTO?

UJesu wathi: “Babusisiwe abalamulayo.” (UMathewu 5:⁠9) Izenzo zikaJesu zazihambelana lalokho ayekutshumayela ngoba wayekhuthaza abantu ukuthi bangabi lodlakela njalo efundisa ababevela ezinkolweni ezitshiyeneyo ukuthi babe lokuthula. (UMathewu 26:​52) Labo abakwamukelayo lokhu bafunda ukuthandana, okuyikho okwenza abantu bamanyane. (KwabaseKholose 3:​14) Kodwa yikho yini uJesu ayekulandile ukuthi kube lokumanyana emasontweni atshiyeneyo ukuze abantu bahlalisane ngokuthula? UJesu wake wahlangana lamanye amasonto yini?

Abakhokheli bamasonto ababengabaFarisi labaSadusi bamphikisa kalukhuni uJesu, baze bafuna lokumbulala. UJesu wenzani ngalokhu? Watshela abalandeli bakhe wathi: “Bayekeleni; ngabakhokheli abaphumputhekayo.” (UMathewu 15:​14) UJesu kazange akukhuthaze ukuhlanganiswa kwamasonto.

Ngemva kwesikhathi ibandla lobuKhristu labunjwa edolobheni laseKhorinte eGirisi, lapho okwakugcwele amasonto atshiyeneyo. Kwakumele enzeni amaKhristu ayehlala emphakathini lo? Umphostoli uPhawuli wakubeka kwacaca ukuthi kwakungamelanga azihlanganise lamasonto la lapho ebhala ukuthi: “Ngoba ukulunga lokubi kulokuhambelana bani na? Loba yibudlelwano bani obungabakhona phakathi kokukhanya lobumnyama na? Yikuzwana bani okukhona phakathi kukaKhristu loBheliyali [uSathane] na?” Wasesithi: “Ngakho phumani kubo lehlukane labo.”​—⁠2 KwabaseKhorinte 6:​14, 15, 17.

Sokucaca-ke ukuthi iBhayibhili alivumelani lakho ukuhlanganiswa kwamasonto. Kodwa ungazibuza ukuthi, ‘Kungenziwani ukuze kube lokumanyana kweqiniso?’

UKUBA LOKUMANYANA KWEQINISO

Umtshina obhoda umhlaba owenziwe ngobunono obukhulu okuthiwa yi-International Space Station wenziwa ngamazwe angu-15 ayesebenza emanyene. Ubona angani umsebenzi lo wawuzaphumelela yini aluba amazwe wonke la ayengavumelananga ngepulani okwakumele ayisebenzise?

Lokhu kufanana lalokho okufuna ukwenziwa ngabasekela ukuhlanganiswa kwamasonto namuhla. Lanxa behlala betshumayela ngokubambana kanye lenhlonipho, abavumelani ukuthi yiphi ipulani okumele isetshenziswe ukuze lokhu kuphumelele. Ngenxa yalokho kulemibono etshiyeneyo ezindabeni eziphathelane lokuziphatha kanye lezimfundiso zamasonto.

IBhayibhili lilezimiso zikaNkulunkulu ezifanana lepulani. Yikho-ke singasebenzisa izimiso lezi ezimpilweni zethu. Bonke abasebenzisa izimiso eziseBhayibhilini sebetshiye ubandlululo olukhona phakathi kwemihlobo lasezinkolweni njalo sebefunde ukusebenza ndawonye ngokuthula lokumanyana. Ekhuluma ngalokhu uNkulunkulu wathi: ‘Ngizahlambulula izindebe zezizwe, ukuze zonke zikhuleke ebizweni likaJehova zimkhonze zimanyene.’ Ukumanyana lokhu kwenziwa ‘yikuhlanjululwa kwezindebe’ okutsho indlela yokukhonza eyamukelwa nguNkulunkulu.​—⁠UZefaniya 3:⁠9; U-Isaya 2:​2-4.

OFakazi bakaJehova bayakunxusa ukuthi uvakatshele eWolu loMbuso eliseduze lalapho ohlala khona ukuze uzezibonela ngawakho ukumanyana lokuthula okumangalisayo okukhona phakathi kwabo.​—⁠IHubo 133:⁠1.