Bonga Ukuthi uJehova Ukulinda Ngothando

1, 2. Ukusilinda kukaJehova kwehlukene njani lokwenziwa ngamakhamera?

EMAZWENI amanengi sekusetshenziswa kakhulu amakhamera akhangela ukuthi izimota zihamba kuhle yini njalo athatha lemifanekiso yezingozi ezenzakalayo. Imifanekiso le ethethwe ngamakhamera yagcinwa inganceda amapholisa ukuze abophe umtshayeli otshaye umuntu wabaleka. Yikho-ke ukuba lamakhamera la afakwe yonke indawo kwenza ukuthi kube lula kakhulu ukubamba abantu ababalekayo nxa bedale umonakalo.

² Kodwa ukusetshenziswa kakhulu kwamakhamera la kungasikhumbuza uBaba wethu olothando uJehova. IBhayibhili liyakutsho ukuthi amehlo akhe “asezindaweni zonke.” (Zaga. 15:3) Lanxa kunjalo, lokhu sekusitsho yini ukuthi uhlala edingisisa ukuthi senzani? Kambe uNkulunkulu usilinda ukuze abone nje ukuthi imithetho yakhe siyayilandela yini abesesijezisa nxa singayilandeli? (Jer. 16:17; Heb. 4:​13) Hatshi! UJehova usilinda ngenxa yokuthi uyasithanda sonke njalo ulendaba lenhlalakahle yethu.​—1 Phet. 3:12.

3. Yiziphi izinto ezinhlanu esizazikhangela ezitshengisa ukuthi uNkulunkulu usinakekela ngothando?

³ Kuyini okuzasinceda ukuthi sizwisise ukuthi uNkulunkulu usilinda ngenxa yokuthi uyasithanda? Ake sibone ukuthi usilinda njani. Usilinda (1) ngokusixwayisa nxa sesisiba lezifiso loba imicabango emibi, (2) ngokusilaya nxa sesihamba endleleni engayisiyo, (3) ngokusiqondisa esebenzisa izimiso ezitholakala eLizwini lakhe, (4) ngokusincedisa nxa sisehlelwa yizilingo ezitshiyeneyo, (5) langokusibusisa nxa ebona okuhle kithi.

UNKULUNKULU OSILINDILEYO UYASIXWAYISA

4. UJehova wayehloseni lapho exwayisa uKhayini ngokuthi isono ‘sasicwathile emnyango’?

⁴ Okokuqala, ake sibone ukuthi uNkulunkulu usixwayisa njani nxa sesisiba lemicabango emibi. (1 ImiLan. 28:9) Ukuze sizwisise ukuthi uNkulunkulu usilinda njani ngothando, ake sibone ukuthi wathini kuKhayini ‘owazonda kakhulu’ lapho engemukelwa. (Bala uGenesisi 4:3-7.) UJehova wakhuthaza uKhayini ukuthi ‘enze okulungileyo.’ Nxa wayengeke enze njalo, uJehova wamxwayisa ngokuthi isono sasizabe “sicwathile emnyango.” UNkulunkulu wamtshela wathi: “Kumele usahlule.” Wayefuna ukuthi uKhayini alalele isixwayiso esasizakwenza ukuthi ‘amukelwe.’ Ukwamukelwa nguNkulunkulu kwakuzakwenza ukuthi ahlale elobuhlobo obuhle laye.

5. UJehova usixwayisa njani nxa singaba lemicabango eyingozi?

⁵ Lamuhla thina usixwayisa njani? Amehlo kaJehova ayabona ekujuleni kwezinhliziyo zethu; asingeke simfihlele imicabango yethu kanye lezifiso zethu. UBaba wethu osithandayo ufuna sihambe endleleni yokulunga; kodwa kasibambi ngamandla ukuthi sintshintshe indlela esihamba ngayo. Usebenzisa iLizwi lakhe, iBhayibhili, ukuze asixwayise nxa sesiphambuka endleleni eyiyo. Ukwenza njani lokhu? Nxa sizibalela iBhayibhili nsuku zonke sijayele ukuthola iMibhalo esinceda ukuthi sinqobe izifiso ezimbi kanye lemicabango eyingozi kithi. Kanti njalo emabhukwini ethu obuKhristu singathola kucaciswa okuthile okukade kusihlupha besesitshengiswa lokuthi singalwisana njani lalokho. Kanti-ke emihlanganweni yethu yebandla sonke sithola izeluleko ezifika ngesikhathi esiyiso!

6, 7. (a) Kuyini okutshengisa ukuthi uJehova uyakuthanda wena ngokwakho? (b) Ungenzani ukuze uJehova akukhathalele ngothando?

⁶ Zonke izixwayiso ezinjengalezi zisitshengisa ngendlela ecacileyo ukuthi uJehova ulinda munye ngamunye wethu. Kuliqiniso ukuthi sekungamakhulu eminyaka kwabhalwa iBhayibhili, njalo amabhuku esiwalungiselwa yinhlanganiso kaJehova abhalelwa izigidi zabantu. Kanti njalo izeluleko esizithola emihlanganweni ziyabe zenzelwe ukuthi zincede ibandla lonke. Lanxa kunjalo, uJehova ukutshela ukuthi ubale iLizwi lakhe ukuze ulungisise imicabango yakho. Yikho-ke lokhu kutshengisa ukuthi uJehova uyakuthanda sibili.

⁷ Into yokuqala okumele siyenze ukuze sincedwe yizixwayiso zikaNkulunkulu, yikunanzelela ukuthi uyasikhathalela sibili. Nxa sesenze njalo, kumele silandele okutshiwo liLizwi lakhe futhi sizame ngamandla ukususa yonke imicabango engamthokozisiyo. (Bala u-Isaya 55:6, 7.) Nxa singalalela izixwayiso esiziphiwayo asisoze senze izinto ezizasizwisa ubuhlungu. Kodwa ake sithi sesikwenzile okubi akade sikucabanga. Nxa sesikwenzile, uBaba wethu olothando usinceda njani?

UBABA WETHU OLOTHANDO UYASIQONDISA

8, 9. Iseluleko esisinikwa nguJehova esebenzisa izinceku zakhe sitshengisa njani ukuthi uyasithanda kakhulu? Nika isibonelo.

⁸ Ukuthi uJehova ulendaba lathi sibili sikubona nxa siqondiswa. (Bala uHebheru 12:5, 6.) Kuliqiniso ukuthi akumnandi ukulaywa loba ukunikwa iseluleko. (Heb. 12:11) Kodwa cabanga ngokuthi lowo ozakunika iseluleko uyabe ecabangisise ngani. Kumele akwazi lokho esiyabe sikwenza okungaphambanisa ubuhlobo bethu loJehova uNkulunkulu. Kumele abe lendaba lokuthi sizizwa njani, futhi azimisele ukunikela ngesikhathi kanye lomzamo odingekayo ukuze asitshengise esebenzisa iBhayibhili ukuthi singakulungisisa njani esiyabe sikuphambanisile, ukuze sithokozise uNkulunkulu. Lokhu kutshengisa ukuthi uJehova onguye osinika iseluleko esinjalo uyasithanda kakhulu.

⁹ Ake sibone ukuthi abantu abasinika iseluleko bangakutshengisa njani ukuthi bayasikhathalela njengoNkulunkulu. Engakafundi iqiniso, omunye umfowethu wayehlala ebukela iphonogirafi kodwa wawunqoba umkhuba lo. Lanxa kunjalo, wayelokhu etshiswa yisifiso sokuyibukela. Lapho ethenga umakhalekhukhwini omutsha isifiso sakhe esibi salumatha. (Jak. 1:14, 15) Wasebenzisa umakhalekhukhwini lo ukuze abukele iphonogirafi kumawebhusayithi aku-Internet. Ngelinye ilanga bathi betshumayela besebenzisa ucingo wanika umdala ifoni yakhe ukuze akhangele amakheli athile. Umdala wathi esayisebenzisa, kwathutsha amawebhusayithi ayesolisa. Lokhu kwaba yisibusiso kumfowethu owayesesiwa ekukhonzeni. Wathola iseluleko ngesikhathi esiyiso, njalo ukuqondiswa kwamnceda wacina esezinqobile izifiso lezo ezimbi. Siyambonga kakhulu uBaba wethu osezulwini olothando obona izono zethu ezicatshileyo abesesiqondisa singakayi khatshana.

UKUSEBENZISA IZIMISO ZEBHAYIBHILI KUYASINCEDA

10, 11. (a) Ungenzani ukuze uNkulunkulu akukhokhele? (b) Enye imuli yakubona njani ukuthi kuyanceda sibili ukuvuma ukukhokhelwa nguJehova?

¹⁰ Umhubi wahlabelela uJehova wathi: “Uyangikhokhela ngokweluleka kwakho.” (Hubo. 73:24) Zonke izikhathi nxa sifuna uJehova asikhokhele, ‘singamvuma’ ngokubala iLizwi lakhe besesibona ukuthi umbono wakhe uthini. Ukusebenzisa izimiso zeBhayibhili kuyasinceda ekukhonzeni kwethu njalo kwezinye izikhathi kuphinde kusincede lokuthi sinakekele izidingo zethu zansuku zonke.​—Zaga. 3:6.

¹¹ Isibonelo esingasitshengisa ukuthi uJehova ubakhokhela njani abanye ngesomlimi owayeloja esigabeni seMasbate esisezintabeni elizweni lasePhilippines. Yena lomkakhe babengamaphayona esikhathi sonke ngapha besondla imuli enkulu. Ngelinye ilanga baphelelwa lapho umnikazi wendawo esebatshele ukuthi sekumele basuke. Kwasekutheni? Babeqanjelwe amanga ngokuthi benze ubuqili obuthile. Lanxa umfowethu lo wayekhathazekile ngokuthi imuli yakhe izayithola ngaphi enye indawo yokuhlala, wathi: “UJehova uzasinakekela. Uhlala esinika esikuswelayo, loba sekutheni.” Umfowethu lo wayengalahlekanga ngokuba lethemba. Ngemva kwamalanga athile, imuli le yathokoza lapho itshelwa ukuthi akusamelanga isuke. Kuyini okwasekwenzakele? Umnikazi wendawo lo wayebone ukuthi lanxa imuli le yaboFakazi iqanjelwe amanga, yaqhubeka ilenhlonipho njalo ilokuthula ngenxa yokuthi yayikhokhelwa yizimiso zeBhayibhili. Ukuziphatha kwabo kwamthokozisa kakhulu umnikazi wendawo okokuthi wabavumela ukuthi bahlale njalo wabanika enye indawo yokuthi balime. (Bala u-1 Phetro 2:12.) Kuyacaca-ke ukuthi uJehova usikhokhela esebenzisa iLizwi lakhe ukuze asincede ukuthi silwisane lezinhlupho zethu.

UMNGANE OSINCEDISA UKUTHI SIQINISELE NXA SILINGWA

12, 13. Yiziphi izinto ezingenza ukuthi abanye bazibuze ukuthi uNkulunkulu uyakubona yini ukuthi bathwele nzima?

¹² Kodwa kwezinye izikhathi isilingo siba khona okwesikhathi eside. Singabe sihlutshwa ngumkhuhlane othile, ngabemuli yethu abayabe belokhu bephikisana lathi kumbe sihlala sihlukuluzwa. Kanti njalo ubuntu bethu bungabe bungahambelani lobomuntu othile ebandleni okungenza sihluphane kakhulu kwezinye izikhathi.

¹³ Ngokwesibonelo, omunye angakhuluma amazwi akuhlabayo, ubusubona angani kalandaba lemizwa yakho. Ungahle uthi, ‘Lokhu akumelanga kwenzakale enhlanganisweni kaNkulunkulu!’ Kodwa umfowethu lo okhulume amazwi ahlabayo angathola izibusiso zomsebenzi wenkonzo ebandleni njalo kukhanye angani abantu bonke bambona esenza kuhle. Ungazibuza ukuthi, ‘Kungenzakala njani lokhu? Kanti uJehova kaboni yini? Wekelelani ukulungisa izinto?’​—Hubo. 13:1, 2; Hab. 1:2, 3.

14. Kuyini okunye okungenza uNkulunkulu angangeneli ukuze alungisise okuthile okuyabe kusikhathaza?

¹⁴ UJehova engabe elezizathu ezinhle ezenza ukuthi angangeneli. Ngokwesibonelo, ungabona angani umuntu okuphambanisileyo nguye okumele asolwe, kodwa uNkulunkulu yena engakuboni njalo. Mhlawumbe angabe ebona kunguwe ophambanise kakhulu kodwa wena ungakunanzeleli. Mhlawumbe amazwi la ayebuhlungu kwakuyiseluleko esifaneleyo okwakumele ucabangisise ngaso. Endabeni yempilo yakhe, uMfowethu uKarl Klein owayelilunga leQula eLibusayo wakhuluma ngelanga lapho uMfowethu uJ. F. Rutherford amkhuza khona engambhodi. Ngemva kwesikhathi uMfowethu uRutherford ebobotheka wabingelela uMfowethu uKlein esithi, “Sabona, Karl!” Kodwa ngenxa yokuthi uMfowethu uKlein wayelokhu esizwa ubuhlungu ngokukhuzwa kwakhe waphonguvuma engunguna nje. UMfowethu uRutherford ebona ukuthi uMfowethu uKlein ungani umzondele wamxwayisa mayelana lokuthi angacini esewela emjibileni kaDeveli. Ngokuya kwesikhathi uMfowethu uKlein wabhala ukuthi: “Nxa singabe silokhu sibambele umfowethu isikhwili, ikakhulu ngenxa yokuthi uyabe ekhulume okuthile alelungelo lokukutsho, siyabe sizifaka engozini yokubanjwa ngumjibila kaDeveli.”a

15. Kuyini okuzakunceda ukuthi ubekezele nxa usamelele ukuthi uJehova akuncedise ukuthi ulwisane lesilingo sakho?

¹⁵ Loba kunjalo, singacina siphelelwa yisineke nxa isilingo sikhanya angani kasisapheli. Kuyini esingakwenza? Ake sithi utshayela imota emgwaqweni ophithizelayo, ubusucina sumile ngenxa yezimota ezinengi eziphambi kwakho. Awukwazi ukuthi uzakuma okwesikhathi esinganani. Nxa lokhu kungakucaphula ubusuzama ukudinga omunye umgwaqo, mhlawumbe ungalahleka. Ungacina usuphuzile lapho oyakhona, ubusuzisola usucabanga ukuthi ubuzafika masinyane ngabe ubekezele. Lokhu kutshengisa ukuthi nxa ungabambelela kulokho okuseLizwini likaNkulunkulu uzafika lapho oya khona ngesikhathi.

16. Kuyini okunye okungenza ukuthi uJehova angangeneli ezilingweni zethu?

¹⁶ Kwezinye izikhathi uJehova kangeneli ezilingweni zethu ngenxa yokuthi ufuna sifunde okuthile okuqakathekileyo. (Bala u-1 Phetro 5:6-10.) UNkulunkulu kayisuye obangela izilingo. (Jak. 1:13) Obangela izinhlupho ezinengi ‘yisitha sethu uSathane.’ Kodwa uNkulunkulu angavumela uhlupho oluthile ukuze asincede ukuthi sikhule ekukhonzeni. Uyabe ekhangele nxa sihlupheka njalo uba leqiniso lokuthi lokhu kuzaqhubeka “okwesikhatshana” ngoba ‘uyasikhathalela.’ Wena uyakubona yini ukuthi uJehova uyakulinda ngothando nxa usekulingweni njalo uyakuthemba yini ukuthi uzakunika indlela yokuphunyuka?​—2 Khor. 4:7-9.

YENZA IZINTO EZIZAKWENZA UNKULUNKULU AKWAMUKELE

17. UJehova uhlola abantu abanjani, njalo ngani?

¹⁷ Umcijo wokucina yikuthi uNkulunkulu uyabe elesizathu esihle nxa ehlola ukuphila kwethu. Esebenzisa umboni okuthiwa nguHanani, watshela iNkosi u-Asa ukuthi: “Amehlo kaJehova athungatha umhlaba wonke ukuze aqinise labo abanhliziyo zabo zizimisele kuye.” (2 ImiLan. 16:9) Lanxa uNkulunkulu wabona ukuthi u-Asa wayengamkhonzi ngenhliziyo epheleleyo, wena ‘uzakuqinisa’ nxa ungaqhubeka usenza okuhle.

18. Nxa ubona angani akulamuntu obona okuhle okwenzayo kuyini okumele ukukhumbule ngoJehova? (Khangela umfanekiso osekuqaliseni.)

¹⁸ UNkulunkulu ufuna ‘sidinge okuhle,’ ‘sithande okuhle’ njalo ‘senze okulungileyo’ ukuze ‘abe lomusa’ kithi. (Amos. 5:14, 15; 1 Phet. 3:11, 12) UJehova uyababona abalungileyo njalo uyababusisa. (Hubo. 34:15) Ngokwesibonelo cabanga ngoShifira loPhuwa, abesifazana ababili ababebelethisa ababengamaHebheru. Lapho abako-Israyeli begqilazwa eGibhithe, abesifazana laba besaba uNkulunkulu ukwedlula uFaro owayebanike umlayo wokuthi babulale bonke abantwana bamaHebheru abangabafana besanda kuzalwa nje. Kusegcekeni ukuthi umzwangedwa wabo omuhle wenza ukuthi bangababulali abantwana labo. Ngemva kwesikhathi, uShifira loPhuwa baphiwa ezabo izimuli. (Eks. 1:15-17, 20, 21) Amehlo kaJehova azibona izenzo zabo ezinhle ngoba athungatha yonke indawo. Kwezinye izikhathi singabona angani akulamuntu okubonayo okuhle esikwenzayo. Kodwa uJehova uyabe ekhangele. Uyakunanzelela konke okuhle esiyabe sikwenzile, njalo uzasinika umvuzo.​—Mat. 6:4, 6; 1 Tim. 5:25; Heb. 6:10.

19. Omunye udadewethu wakubona njani ukuthi uJehova uyazinanzelela izenzo ezinhle?

¹⁹ Omunye udadewethu ohlala e-Austria wakubona ukuthi amehlo kaNkulunkulu ayekunanzelela ukuthi usebenza gadalala. Njengoba wayedabuka eHungary waphiwa ikheli lomuntu owayekhuluma ulimi lwaseHungary ukuthi ayembona. Wahle wayamdinga kodwa wathola kungelamuntu. Wayelokhu ebuyela kanenginengi. Kwezinye izikhathi wayesizwa angani kulomuntu endlini, kodwa lowomuntu engaphumi. Wayetshiya amabhuku, izincwadi ayembhalela zona, inombolo yakhe yocingo, lokunye okunengi. Ngemva komnyaka lezinyanga eziyisithupha elokhu esiya khonale, umnyango wacina uvuleka! Udadewethu lo wabingelelwa ngowesifazana owayelomusa wathi: “Ngena. Ngangikubala konke owawukutshiya, bengivele ngikumelele.” Umama lo wayengaphansi kohlelo lokwelatshwa okuthiwa yi-chemotherapy njalo wayengenelisi ukuvuka ayebona abantu. Bahle baqalisa ukufunda bonke iBhayibhili. Siyakubona-ke ukuthi uNkulunkulu wambusisa udadewethu lo ngokusebenza kwakhe gadalala!

20. Uzizwa njani ngokuthi uNkulunkulu ukulinda ngothando?

²⁰ UJehova uyakubona konke okwenzayo njalo kasoze ekele ukukunika umvuzo. Nxa ungakubona ukuthi amehlo kaNkulunkulu akukhangele, ungaboni angani ukhangelwe yikhamera edinga amacala. Kodwa sondela eduze kukaNkulunkulu olendaba lawe njalo okuthanda kakhulu!