“Umuntu Ophanayo Uzabusiswa”

KUSUKELA endulo kuze kube lamuhla izinceku zikaNkulunkulu bezilokhu zikuqakathekisa ukunikela. Ngokwesibonelo ama-Israyeli ayenikela ngemihlatshelo yezinyamazana ikanti amaKhristu abelokhu esenza “umhlatshelo wokubonga.” Kodwa-ke ikhona eminye imihlatshelo ethokozisa uNkulunkulu esingayinikela lamuhla. (Heb. 13:15, 16) Ukunikela ngemihlatshelo le kuzakwenza sithokoze njalo sithole izibusiso. Ake sixoxe ngezinye izibonelo eziseBhayibhilini.

Isibonelo sokuqala ngesikaHana owayeyinceku kaNkulunkulu ethembekileyo. Owesifazane lo wayefuna sibili ukuba lomntwana kodwa kwakusala ngoba wayeyinyumba. Ngakho wathandaza kuJehova, wathembisa ukuthi nxa angathola indodana uzayinikela kuye “okwezinsuku zonke zokuphila kwayo.” (1 Sam. 1:10, 11) Ngokuya kwesikhathi uHana wakhulelwa njalo wabeletha indodana wayetha ibizo elithi Samuyeli. Ngemva kokuba eseyikhuphe ebeleni uHana wayithatha indodana yakhe wayisa ethabanikeli njengokuthembisa kwakhe. UJehova wambusisa uHana ngalokhu akwenzayo. Wathola abanye abantwana abahlanu njalo izibulo lakhe uSamuyeli laba ngumphrofethi futhi ngemva kwesikhathi laloba amabhuku athile aseBhayibhilini.—1 Sam. 2:21.

Lathi lamuhla silesibusiso sokuzinikela ukuze sisebenzele uMdali wethu okwempilo yethu yonke. UJesu wathembisa ukuthi uJehova uzasinika umvuzo ngakho konke esikwenzayo ukuze sisekele ukukhonza kweqiniso.—Mak. 10:28-30

Omunye owaba yisibonelo esihle endabeni yokunikela nguDokhasi. Owesifazane lo waphila ngesikhathi sabaphostoli njalo wayesaziwa ngokuhlala “esenza okuhle esiza abaswelayo.” Kodwa okudanisayo yikuthi uDokhasi “wagula wafa” futhi lokhu kwabazwisa ubuhlungu abanye ebandleni. Abafundi bathi besizwa ukuthi uPhethro wayesemzini oseduze bamncenga ukuthi afike kubo ngokuphangisa. Lakanye waya kuleyondawo futhi wafika wamvusa owesifazane lo owayesefile. Kumele ukuthi abantu bathokoza kakhulu njalo kwakungokokuqala ukuthi umphostoli avuse umuntu ofileyo. (ImiSeb. 9:36-41) UNkulunkulu kazange akukhohlwe okuhle okwakusenziwa nguDokhasi. (Heb. 6:10) Indaba yakhe yalotshwa eLizwini lakhe ukuze lathi sithole isibonelo esihle esingasilingisela.

Umphostoli uPhawuli laye waba yisibonelo esihle endabeni yokuphana. Wayelendaba labanye futhi ezinika isikhathi sokubanceda. Ngokwesibonelo wabhalela abaseKhorinte wathi: “Ngizathokozela kakhulu ukuchitha konke engilakho ngenxa yenu.” (2 Khor. 12:15) UPhawuli wakubona sibili ukuthi ukuzinikela ukuze uncede abanye kwenza usuthiseke njalo kwenza uJehova akubusise.—ImiSeb. 20:24, 35.

Izibonelo esesixoxe ngazo zitshengisa ukuthi uJehova uyathokoza kakhulu nxa sisebenzisa isikhathi kanye lamandla ethu ukuze sincede abanye njalo sisekele imisebenzi eyenziwa enhlanganisweni. Kodwa zikhona yini ezinye izindlela esinganikela ngazo? Ye zikhona. Singanikela ngemali loba ngempahla esilayo. Ukunikela ngalindlela kunceda ukuthi umsebenzi wokutshumayela owenziwa emhlabeni wonke uqhubekele phambili. Ngokwesibonelo iminikelo le isetshenziswa ukuncedisa abanali lezinye izisebenzi ezisenkonzweni yesikhathi sonke. Isetshenziswa lokubhadala izindleko zokuhumutsha amabhuku ethu, ukurekhoda amavidiyo, ukuncedisa abehlelwe ngumonakalo kanye lokwakhiwa kwamaWolu oMbuso. Ngakho nxa singazimisela ukunikela sizabona ukuthi aliqiniso sibili amazwi la athi: “Umuntu ophanayo uzabusiswa.” Okuhle kakhulu yikuthi ukunikela esikwenzayo kudumisa uJehova.—Zaga. 3:9; 22:9.

Izindlela Abanye Abanikela Ngazo Ukuze Basekele Umsebenzi Womhlaba Wonke

Abanengi kulezinsuku ‘babeka eceleni imali ethile’ ukuze babe lemali abangayiphosela ebhokisini eliseWolu elibhalwe ukuthi, “Umsebenzi Womhlaba Wonke.” (1 Khor. 16:2) Inyanga ngayinye amabandla athumela imali le ewofisini yaboFakazi bakaJehova eselizweni lawo. Kanti njalo ungenelisa ukuthumela iminikelo yakho usebenzisa inhlanganiso esemthethweni esetshenziswa ngoFakazi bakaJehova elizweni lakini. Ukuze uthole ukuthi yiphi inhlanganiso esemthethweni esetshenziswa elizweni lakini, vula kuwebhusayithi yethu i-www.jw.org kumbe ufonele egatsheni. Nansi iminikelo ongayithumela ngokuqondileyo egatsheni:

IMINIKELO

Ingenziwa ngokufaka imali ebhanga, ngokusebenzisa amakhadi ebhanga kumbe ukuthumeza ngefoni. Kwamanye amagatsha lokhu ungakwenza usebenzisa i-jw.org kumbe usebenzise enye iwebhusayithi ekhethwe yinhlanganiso.
Unganikela ngemali, impahla eligugu (jewelry) kumbe enye nje impahla. Ungabhala lencwadi etshoyo ukuthi leyomali kumbe impahla yisipho osinika inhlanganiso.

UMNIKELO OLESIVUMELWANO ESITHILE

Unganikela ngemali ongenelisa ukuthi uphinde uyithathe nxa ungabe usufuna ukuyisebenzisa.
Kumele kube lencwadi echaza ukuthi kulesivumelwano osenze lenhlanganiso.

EZINYE IZINDLELA ZOKUNIKELA

Ngaphandle kokunikela ngemali loba impahla, zikhona ezinye izindlela onganikela ngazo ukuze uphathise emsebenzini woMbuso owenziwa emhlabeni wonke. Lanxa ingaba khona indlela yokunikela ongathanda ukuyisebenzisa, kungaba kuhle ukuthi uqale uthintane lewofisi yegatsha ukuze uzwe okunengi ngayo. Imithetho kanye lalokho okudingwa ngabemithelo kuyatshiyana ilizwe ngalinye. Ngakho kuqakathekile ukuthi ubuzisise kwababona ngemithelo kanye labalolwazi ngemithetho ukuze bakuncede ukuthi ukhethe indlela eqondileyo. Nanzi ezinye izindlela ongazisebenzisa.

I-Insurance: Le yindlela yokunikela ngokubhalisa ukuthi inhlanganiso ibe yindlalifa emalini yakho kungaba yipentsheni loba ezinye izimali owazongayo.

Ukusebenzisa i-akhawunti yebhanga: Yikunika inhlanganiso i-akhawunti yakho loba izincwadi zakho zebhanga loba ukubhala ukuthi inhlanganiso iphiwe leyomali oyigcine ebhanga nxa wena usufile.

Ama-Shares lama-Bonds: Yikunikela ngama-shares lama-bonds ongabe ulawo kumbe ukubhalisa ukuthi inhlanganiso iphiwe lezozinto nxa wena usufile.

Izakhiwo loba Umhlabathi: Ukunikela ngezinto ezingathengiseka kungaba yizindlu, izitanda loba amapulazi. Nxa kuyindawo ohlala kuyo ungatsho ukuthi uzaqhubeka uhlala kuyo kodwa nxa ungafa ungathanda ukuthi ithathwe yinhlanganiso.

Amawili lama-Trust: Ungabhala iwili etshoyo ukuthi impahla loba imali yakho ufuna ithathwe yinhlanganiso. Kumele kube yisivumelwano esisemthethweni. Indlela le ingenza ukuthi wehliselwe imithelo ebhadalwayo.

Umuntu ofisa ukusebenzisa izindlela lezi kumele ahlale phansi ahlele kuhle lokho afuna ukukwenza. Kwenziwe ibhukwana elithi Charitable Planning to Benefit Kingdom Service Worldwide ukuze lisize labo abangabe belesifiso sokunikela ngezindlela lezi. Ibhukwana leli litholakala ngesiNgisi langeSpanish futhi limumethe ulwazi olunengi mayelana lezindlela umuntu anganikela ngazo esaphila loba lokho angafuna ukuthi kwenziwe ngempahla yakhe nxa esefile. Mhlawumbe imilayezo esebhukwaneni leli ayisebenzi esimeni sakho ngenxa yemithetho yemithelo kumbe eminye imithetho eselizweni lakini. Ngokusebenzisa izindlela lezi zokunikela abanengi basekela imisebenzi eyenziwa enhlanganisweni yethu emhlabeni wonke egoqela lokunceda abazalwane abaphakathi kobunzima. Ibhukwana leli ungenelisa ukulicela kumabhalane webandla okulo nxa likhona elizweni lakini.

Ukuze uzwe okunengi ngodaba lolu vula iwebhusayithi yethu i-jw.org ukhangele isihloko esithi, “Nikela Ukuze Usekele Umsebenzi Wethu Owenziwa Emhlabeni Wonke” ekucineni kwepheji ngayinye kumbe uthintane lewofisi yaboFakazi bakaJehova.