ILizwi likaNkulunkulu Lilosizo Ekufundiseni

1. Yisiphi isihloko somhlangano wesiqinti somnyaka wenkonzo ka-2014, njalo yiwuphi umbuzo ozaphendulwa emhlanganweni lowo?

¹ “Umfundisi omkhulu,” uJehova, ungumfundisi wethu omuhle futhi obedlula bonke abafundisi emhlabeni wonke. (Isa. 30:20, 21, NW) Kodwa uJehova usifundisa njani? Usinike ibhuku elihle ukwedlula wonke amanye amabhuku, lelibhuku liLizwi lakhe iBhayibhili. Imfundiso kaNkulunkulu ingasinceda njani ngokomzimba, ngokwengqondo, ngokomzwelo lasekukhonzeni? Impendulo yombuzo lo kuzaxoxwa ngayo kuhlelo lomhlangano wethu wesiqinti womnyaka wenkonzo ka-2014. Isihloko sohlelo sithi: “ILizwi likaNkulunkulu Lilosizo Ekufundiseni,” futhi sitholakala ku-2 Thimothi 3:16.

2. Imicijo eqakathekileyo izakhanyiswa yizimpendulo zemibuzo yiphi?

² Dinga Imicijo le Eqakathekileyo: Imicijo eqakathekileyo yomhlangano izakhanyiswa yizimpendulo zemibuzo elandelayo:

• Imfundiso kaNkulunkulu isinceda ngani ezimpilweni zethu? (Isa. 48:17, 18)

• Nxa sifuna ukuntshintsha indlela esiphila ngayo ukuze sikhonze uJehova okwesikhathi esigcweleyo, kumele siqiniseke ngani? (Mal. 3:10)

• Kuyini okumele sikwenze nxa sihlangana ‘lezimfundiso ezingaziwayo’? (Heb. 13:9)

• Singakulingisela njani ‘ukufundisa’ kukaJesu? (Mat. 7:28, 29)

• Kungani kumele abafundisayo ebandleni bazifundise bona? (Roma. 2:21)

• ILizwi likaNkulunkulu lisiza ngani? (2 Tim. 3:16)

• ‘Ukunyikinywa’ kwezizwe kubathinta njani abantu? (Hag. 2:6, 7)

• Yikuphi ukuqiniseka uJehova alakho ngathi? (Efe. 5:1)

• Kungani kumele sisebenze nzima ukuze sihlale sisemfundisweni kaJehova? (Luka. 13:24)

3. Kungani kuqakathekile ukuthi sibekhona njalo silalelisise emhlanganweni lo?

³ Ekuqaliseni kwesahluko 3 sika-2 Thimothi, uPhawuli wachasisa ngezikhathi ezinzima ezitshengisa ukuthi sisezinsukwini zokucina engakabhali amazwi asesihlokweni saloluhlelo. Wabhala wathi: “Abantu ababi labakhohlisi bazakonakala ngokudlulisayo, bekhohlisa labo bekhohliswa.” (2 Tim. 3:13) Ukuze singakhohliswa, kuqakathekile-ke ukuthi silalele njalo siyisebenzise imfundiso kaNkulunkulu! Ngakho, kasizimiseleni ukubakhona njalo silalelisise emhlanganweni lo.