Ngobani Abenza Intando kaJehova Lamuhla?

1. Sizaqalisa nini ukuhlola ibhukwana elithi Ngobani Abenza Intando kaJehova Lamuhla? njalo kungani kuzasinceda ukulihlola?

¹ Kusukela ngeviki lika-October 28, ibhukwana elithi Ngobani Abenza Intando kaJehova Lamuhla? lizafundwa eSifundweni seBhayibhili seBandla. Ibhukwana leli elitsha, elethulwa emhlanganweni wesigaba othi “Safeguard Your Heart!” lenzelwe ukuthi liqondise abafundi beBhayibhili enhlanganisweni kaJehova. Ukuhlola ibhukwana leli akusoze kungezelele ukuqakathekisa kwethu ukuba phakathi kwenhlanganiso kaJehova kuphela kodwa kuzasinceda lokuthi sibelazi kakhulu ibhukwana leli eliqakathekileyo elokusebenzisa ensimini.​—Hubo. 48:13.

2. Lizafundwa njani ibhukwana leli ebandleni?

² Indlela Elizafundwa Ngayo: Okhokhela isifundo kumele ahlele isikhathi sakhe ngendlela yokuthi izifundo zonke zihlolwe ngesikhathi esilinganayo. Uzakwethula isifundo ngasinye kwezingu-28 ngokubala umbuzo oyisihloko, abesecela obala izindima ukuthi abale indima eyisingeniso. Okulandelayo yikuthi okhokhelayo uzabuza izilaleli umbuzo awulungiselele isingeniso. Ngemva kwalokho, ingxenye ngayinye eqalisa ngomutsho obhalwe ngamabala amnyama aqatha kumele ibalwe njalo kuxoxwe ngayo iyodwa. Ngemva kokuba ingxenye le isibaliwe, okhokhela isifundo uzacela izilaleli zitsho ukuthi indima iphendula njani umbuzo oyisihlokwana sesifundo. Ibhukwana leli lilemizekeliso eminengi okungakhulunywa ngayo. Imibhalo eyisiqokoqela kumele ibalwe nxa isikhathi sivuma. Okhokhelayo uzabuza imibuzo yokuphindela emuva engaphansi kwalelo khasi engakayi esifundweni esilandelayo. Nxa kulebhokisi elithi “Thola Okunengi,” uzatsho ukuthi obala izigaba abale amabhokisi, abasecela izilaleli zitsho ukuthi umfundi weBhayibhili angancedakala njani ngokulandela icebiso elikulelo bhokisi. Ekupheleni kwesifundo, okhokhelayo angasebenzisa izihloko zesifundo njengemibuzo yokuphindela emuva nxa isikhathi sivuma. Khumbula ukuthi indlela le yokufunda ibhukwana leli akutsho ukuthi ngaso sonke isikhathi yiyo okumele isetshenziswe nxa sifunda labantu iBhayibhili ekutshumayeleni.

3. Singancedakala njani ngokugcweleyo ngokufunda ibhukwana leli?

³ Lungiselela kuhle ungakabuyi emhlanganweni ukuze uncedakale ngokugcweleyo. Yenza umzamo wokuthi uphendule. Ngesikhathi kuxoxwa ngebhukwana leli, cabanga ngokuthi okufundwayo kungabanceda njani esifunda labo iBhayibhili. Sengathi ukuhlola kwethu ibhukwana leli elitsha kungasenza sincede abanye ukuthi babe lathi ekwenzeni intando kaNkulunkulu ukuze labo babe lethemba lokuphila okungapheliyo.​—1 Joha. 2:17.