Ukufundisa Sisebenzisa Ibhukwana Elithi Izindaba Ezinhle
1. Libhalwe njani ibhukwana elithi Izindaba Ezinhle?
1 Inkonzo Yethu YoMbuso ka-July yathi ibhukwana elithi Izindaba Ezinhle Ezivela KuNkulunkulu! lithuluzi elihle esingalisebenzisa nxa sifundisa abanye. Imibhalo ekulo ayicatshunwanga ukuze esifunda labo bazifundele kulo kanye iBhayibhili. Amanye amabhuku ethu abhalwe ngendlela yokuthi umuntu uyenelisa ukuzithaphela ulwazi eyedwa, kodwa leli lona lenziwe ngendlela yokuthi kube lothile omfundisayo. Yikho nxa silihambisa kumele sizame ukutshengisa umninimuzi indlela isifundo esiqhutshwa ngayo ukuze abone ukuthi kumnandi kangakanani ukufunda izindaba ezinhle eziseBhayibhilini.—Mat. 13:44.
2. Singalisebenzisa njani ibhukwana elithi Izindaba Ezinhle nxa siqala ukuxoxa lomuntu?
2 Nxa Uqala Ukuxoxa Lomuntu: Ungakhetha ukuthi: “Abantu abanengi bakhathazekile ngokuthi ikusasa liphetheni. Ubona angani izimo zizake zintshintshe yini? [Melela impendulo.] IBhayibhili lisitshela izindaba ezinhle ezisinika ithemba. Nansi eminye imibuzo ephendulwa liBhayibhili.” Nika umninimuzi ibhukwana ubusumcela ukuthi akhethe umbuzo owodwa kwengemuva. Xoxani ngendima yokuqala yesifundo ayabe esikhethile. Okunye ongakwenza yikubuza umbuzo osesifundweni oyabe uzikhethele sona ubusumtshengisa ukuthi angazithola njani izimpendulo zeBhayibhili esebenzisa ibhukwana leli. Abanye abamemezeli bakhetha ukusebenzisa ividiyo ehambelana lesifundo abayabe bexoxa ngaso nxa ikhona ku-jw.org.
3. Chasisa ukuthi singasiqhuba njani isifundo sisebenzisa ibhukwana elithi Izindaba Ezinhle.
3 Ungasiqhuba Njani Isifundo? (1) Bala umbuzo ongaphansi kwesihloko ukuze umninimuzi abone umcijo oqakathekileyo elizaxoxa ngawo. (2) Bala indima engaphansi. (3) Bala imibhalo ebhalwe ukuthi “Bala,” ube usumbuza imibuzo ezamnceda abone ukuthi imibhalo iwuphendula njani umbuzo okhokhela indima leyo. (4) Nxa kulezindima ezinengi ngaphansi kombuzo lowo landela okubhalwe ku-2 lo 3 phezulu. Nxa kulevidiyo ehambelana lombuzo elixoxa ngawo ungayidlalela umninimuzi nxa ungakaze umtshengise yona. (5) Okokucina, phinda ubuze umninimuzi umbuzo ongaphansi kwesihloko ukuze ubone ukuthi uzwisisile yini.
4. Kuyini okuzasinceda ukuthi silisebenzise kuhle ithuluzi leli?
4 Lijayele ithuluzi leli eliqakathekileyo. Lisebenzise loba nini lapho othola khona ithuba. Ngesikhathi ulungiselela zama ukucabanga ngomuntu oyafunda laye lendlela engcono kakhulu yokubonisana laye usebenzisa imibhalo esesifundweni eliyaxoxa ngaso. (Zaga. 15:28; ImiSeb. 17:2, 3) Akuthandabuzwa ukuthi nxa uthuthuka njalo usiba lobuciko uzaqalisa ukulithanda kakhulu ithuluzi leli njalo ulisebenzise ekufundiseni.