Ungabakhohlwa Abahlala Lapho Okugcinwa Khona Asebeluphele
1. Kungani kuqakathekile ukuthi sitshumayeze labo abahlala lapho okugcinwa khona asebeluphele?
1 Abantu abanengi asebeluphele bahlutshwa yikukhula. (UmTshu. 12:1-7) Abanye babo bahlala ezindaweni lapho okugcinwa khona asebeluphele, yikho kunzima ukuthi sibathole ngesikhathi sitshumayela endlini ngendlu. Kunzima futhi ukutshumayeza asebeluphele abagcinwa yizihlobo zabo kumbe abantwababo. Lanxa sebehlutshwa yikukhohlwa masinyane kumbe bengasenelisi ukuhamba, kungenzakala ukuthi bafundiswe ngoJehova futhi bamthande kungelandaba ukuthi bahlala ngaphi. Kuyini esingakwenza ukuze sibatshele “ngethemba elibusisiweyo”?—Tit. 2:13.
2. Kuyini esingakwenza ukuze sithole amakheli alapho okugcinwa khona asebeluphele?
2 Singakwenza Njani Lokhu?: Amakheli ezindawo lapho okugcinwa khona asebeluphele singawathola ebhukwini lezinombolo zocingo (directory). Nxa ungavula ibhuku lelo dinga ibizo lendawo lapho okugcinwa khona asebeluphele. Umbonisi wenkonzo kumele ahlele ukuthi kube labamemezeli abafaneleyo abazafika kulezo zindawo. Nxa lingahlela futhi lithembele kuJehova kuzakuba lula ukuthi liqalise ukufunda leqembu labantu abahlala kuleyo ndawo.—Zaga. 21:5; 1 Joh. 5:14, 15.
3, 4. (a) Kumele sikhulume lobani ukuze sithole imvumo yokuqalisa isifundo leqembu lasebeluphele? (b) Singahlela njani indlela esizafunda ngayo?
3 Ukuthi lizasiqalisa njani isifundo kuzakuya ngokuthi indawo yakhona inkulu okungakanani. Nxa indawo yakhona inkulu futhi kuhlala abantu abanengi, kungcono ukuthi licele kumabhalani ukukhuluma lomphathi wendawo. Nxa indawo yakhona incane futhi ilabantu abalutshwana abahlala kuyo, kungcono ukuthi lihlele ukubona umnikazi wendawo.
4 Kumele lichasise ukuthi lihamba lixoxa labantu abathanda ukufunda iBhayibhili. Buzani ukuthi bakhona yini endaweni leyo abangafuna ukufunda okwesikhathi esingaba yimizuzu engu-30 ngeviki. Lingasebenzisa amabhuku atshiyeneyo kodwa abanengi sebenanzelele ukuthi asebeluphele bathanda ibhuku elithi Ibhuku Lami Lezindaba ZeBhayibhili kumbe elithi The Greatest Man Who Ever Lived. Kungaba kuhle ukuthi litshengise umphathi amabhuku lawo. Nxa ekhona othanda ukufunda, lingahlela lomphathi isikhathi kanye lekamelo lapho elingafundela khona. Ungabi lenhloni zokutsho ukuthi unguFakazi kaJehova. Xoxa lomphathi ngokuthi inhloso yenu kayisiyo yokungenisa isonto kodwa ngeyokuxoxa ngeBhayibhili.
5. Kuyini elingakwenza ukuze isifundo sibe ngesikhuthazayo futhi sikhwabitheke?
5 Indlela Yokufunda: Ukuthi isifundo lizasiqhuba njani kuzakuya ngesimo sendawo, yikho kumele lizimisele ukuhambelana lezimo. Oqhuba isifundo kumele ahambe lamabhuku enelayo azawasebenzisa abesewathatha isifundo singaphela. Kuhle futhi ukuhamba lamabhuku alamabala amakhulu ukwenzela labo abangasaboni kuhle. Nxa kusenza lingabala izindima beselibuza imibuzo bona besebephendula. Nxa bekhona abenelisa ukubala lingabacela ukuthi babale izindima kumbe amavesi. Ngesikhathi lifunda bancomeni ngezimpendulo zabo futhi libe lomusa. Ngezinye izikhathi lingacela kumphathi ukuthi libukele amavidiyo enhlanganiso azabakhuthaza futhi abancedise bazwisise izindaba ezithile eziseBhayibhilini. Nxa kusenza lingavula ngomthandazo futhi liphethe ngawo. Abanye abamemezeli baqalisa ngokuhlabela labo izingoma zoMbuso bengakafundi.
6. Lingamphendula njani olombuzo?
6 Kuyini elingakwenza nxa omunye wabo elombuzo ngendaba ethile? Kumele linanzelele indlela elimphendula ngayo. (Kol. 4:6) Nxa kusenza lingahle lixoxe laye ngombhalo owuphendula kuhle umbuzo wakhe. Kodwa nxa kungenzi, lingacela ukumphendula ngemva kwesifundo selilodwa.
7. Kumele lenzeni nxa omunye elombuzo otshengisa ukuthi ufisa ukwazi okunengi ngendaba ethile?
7 Kwezinye izikhathi omunye angabuza umbuzo otshengisa ukuthi ufisa ukwazi okunengi ngendaba ethile. Omunye udadewethu uthi ubaphendula esithi: “Ngumbuzo omuhle lowo. Kodwa njengoba kungumbuzo wakho lowo, ngicela ukukuphendula singaqeda ukufunda.” Kuhle futhi ukuhlela ukufunda lomunye wabo eyedwa ngesikhathi esitshiyene lesabanye.
8. Kumele zibikwe njani izimpindela lezifundo ezenziwa leqembu kanye lalezo ezenziwa labantu abatshiyeneyo?
8 Kuhle ukuthi kuhlale kuhamba oFakazi abayibo abaqalisa isifundo lesi. Labanye abamemezeli abancedisayo labo bangasibika isikhathi leso. Kumele ukuthi ngaso sonke isikhathi ummemezeli okhokhela ezingxoxweni lezo angafunda leqembu abike impindela kuthi ekupheleni kwenyanga abesebika isifundo esisodwa. Izifundo zeBhayibhili eziqaliswe labantu abatshiyeneyo abenelisa ukufunda lokuzwisisa lazo lingazibala ngendlela ejayelekileyo.
9, 10. Yiziphi izimpawu eziqakathekileyo okumele labo abatshumayeza asebeluphele babe lazo? Chasisa.
9 Yenzani Isifundo Siqhubekele Phambili: Bekani ilanga kanye lesikhathi elizafunda ngaso maviki wonke. Asebeluphele abahlala kuleyo ndawo kanye lalabo ababanakekelayo bazabe bekhangelele ukuthi isifundo senu sihlale siqalisa ngesikhathi futhi siphele ngesikhathi. (Mat. 5:37) Ngakho kumele lizimisele ukugcina izithembiso zenu njalo lihleleke. Abanye abazalwane bathi kungcono ukuthi abamemezeli ababili abafaneleyo basebenze ndawonye nxa beqhuba isifundo leqembu lelo. (UmTshu. 4:9, 10) Kungadingakala abamemezeli abanengi nxa indawo okugcinwa khona asebeluphele inkulu.
10 Kuqakathekile ukuthi likhathalele umuntu munye ngamunye kulabo abahlala kuleyo ndawo. (Flp. 2:4) Nxa lisiyafunda labo okokuqala, zinikeni isikhathi sokwazi umuntu wonke ohlala lapho. Zamani ukubamba izibongo zabo njalo libabize ngazo ngesikhathi esilandelayo. Asebeluphele bayakuthanda kakhulu ukubizwa ngezibongo zabo. Lingabekezela futhi libe lomusa, wonke umuntu uzakhululeka njalo azizwe eqakathekile.
11. Abafunda lasebeluphele bangatshengisa njani ukuthi bayabahlonipha abasebenza kuleyo ndawo kanye lezihlobo zabalupheleyo?
11 Kuqakathekile ukuthi sihloniphe njalo sibe lomusa kulabo abasebenza kuleyo ndawo kanye lasezihlotsheni zalabo abagcinwa lapho. Nxa selihlelile ukuthi lizafunda njani, kuhle ukuthi lingantshintshi isikhathi kanye lendlela elizafunda ngayo lingaqalanga laxoxa lomphathi wendawo. Ngemva kwesikhathi esithile buzani umphathi wendawo ukuthi kuyabanceda yini asebeluphele lokho abakufundayo. Zinikeni isikhathi sokwazana lezihlobo zabalupheleyo abahlala lapho nxa zivakatshile ngesikhathi lifunda. Zichasiseleni ukuthi kungani lixoxa lasebeluphele ngeBhayibhili. Zitsheleni lokuthi liyazithanda kakhulu izihlobo zabo ezilupheleyo. Cela izihlobo lezi ukuthi lazo zilalele lokho eliyabe lixoxa ngakho.
12, 13. Yiziphi izibonelo ezikhona ezitshengisa impumela yokutshumayela lapho okugcinwa khona asebeluphele?
12 Impumela: Ababonisi abahambelayo kanye labanye emabandleni babike ngempumela emihle kakhulu yokutshumayeza asebekhulile. Kwenye indawo kwaba labantu abangu-20 ngesikhathi kuqhutshwa isifundo seBhayibhili okokuqala. Lokhu kwenza ukuthi kuqaliswe izifundo labantu abayisithupha abatshiyeneyo. Omunye wabo wacina esebhaphathiziwe. Ikanti kwenye indawo okwakufundwa khona leqembu omunye ugogo owayeleminyaka engu-85 waqalisa ukungena imihlangano yebandla njalo wacina esebhaphathiziwe. Kwathi izinhlelo zintshintshwa kwenye indawo eyayigcina asebeluphele, isifundo esasiqhutshwa ngoFakazi sakhitshwa, kwasekubangela ukuthi asebekhulile abahlala lapho batshinge kumphathi wendawo. Ekucineni isifundo saphinda saqaliswa njalo iqembu lelo laselilabantu abangaba ngu-25 kusiya ku-30.
13 Uthando esilutshengisa asebeluphele luthokozisa umphakathi wonke. Ngokwesibonelo lokhu kungenza abasebenza ezindaweni lezo balalele nxa kuqhutshwa isifundo lasebeluphele. Lokho esikwenzela labo asebekhulile kwenza abanye abantu emphakathini labo bafune ukufunda. (1 Phet. 2:12) Ngesikhathi omunye umphathi etshelwa ngohlelo lolu, wathi: “Kungani kulithathe isikhathi eside ukuthi lize lifike lapha? Lifuna ukuqalisa nini?” Omunye umphathi wabhala wathi: “Lokhu elikwenzayo ngingakhuthaza loba yiphi indawo egcina asebekhulile ukuthi ikwamukele. OFakazi bakaJehova bafundisa asebeluphele ngoba lokhu kuyingxenye yomsebenzi wabo wokutshumayela.” Eyinye indawo lapho okugcinwa khona asebeluphele eseHawaii yanika oFakazi isicoco sokuzinikela ukufundisa asebekhulile njalo abahlala lapho bathi oFakazi “bayisibusiso esikhulu” endaweni leyo.
14. Kungani kumele sizame ukutshumayeza abantu abagcinwa ezindaweni zabalupheleyo?
14 UJehova unxusa asebeluphele ukuthi bamdumise. (Hubo. 148:12, 13) Isimemo lesi sigoqela lalabo abahlala ezindaweni okugcinwa khona asebeluphele. Zikhona yini izindawo ezigcina asebeluphele ensimini yenu? Sizenelisa ukubatshumayeza kuhle asebeluphele nxa singabambisana labadala bebandla kanye labaphathi bezindawo ezigcina asebeluphele. Siyabe silingisela uJehova nxa sikhumbula asebeluphele.—Hubo. 71:9, 18.