Izindlela Zokutshumayela Izindaba Ezinhle

UJESU watshiyela abalandeli bakhe isibonelo esihle kakhulu ngoba wayekhuthele ekutshumayeleni. Wayelanda abantu emizini yabo laloba ngaphi lapho ababetholakala khona ukuze abatshumayeze. (Mat. 9:35; 13:36; Luk. 8:1) Ngezinye izikhathi wayefundisa izinkulungwane zabantu, abafundi bakhe bebodwa kumbe axoxe lomuntu oyedwa nje kuphela. (Mak. 4:10-13; 6:35-44; Joh. 3:2-21) Wayesebenzisa wonke amathuba ayewathola ukuze akhuthaze abanye njalo abenze babe lethemba. (Luk. 4:16-19) Lanxa wayengabe ediniwe, wayengayekeli ukutshumayela. (Mak. 6:30-34; Joh. 4:4-34) Akuthandabuzwa ukuthi ukubala izindaba eziseBhayibhilini ezimayelana loJesu kwenza sifune ukumlingisela njengabaphostoli.—Mat. 4:19, 20; Luk. 5:27, 28; Joh. 1:43-45.

² Ake sixoxe ngezinye izindlela zokutshumayela amaKhristu azisebenzisayo ekwenzeni umsebenzi owaqaliswa nguJesu Khristu eminyakeni engaba ngu-2 000 eyadlulayo.

UKUTSHUMAYELA ENDLINI NGENDLU

³ OFakazi bakaJehova bayakuqakathekisa ukutshumayela izindaba ezinhle zoMbuso endlini ngendlu. Ukutshumayela ngalindlela ehlelekileyo sesikwenze okwesikhathi eside okokuthi sesisaziwa ngakho. Kuqondile sibili ukutshumayela ngalindlela ngoba kwenza sithole abantu abanengi. (Mat. 11:19; 24:14) Kusinika lethuba lokutshengisa ukuthi siyamthanda uJehova kanye labomakhelwane bethu.—Mat. 22:34-40.

⁴ Ukutshumayela endlini ngendlu akuqaliswanga khathesi ngoFakazi bakaJehova. Umphostoli uPhawuli laye wayehamba etshumayela endlini ngendlu. Wabhalela abadala bebandla le-Efesu ebatshela ngomsebenzi wokutshumayela ayewenza, wathi: “Ngelanga lokuqala ngibeka olwami esabelweni sase-Asiya. . . . Kangizange ngithikaze ukulitshela loba yini eyayingalinceda, . . . lokulifundisa obala lasendlini ngendlu.” Ngokwenza njalo, watshengisa ukuthi uzimisele ‘ukufakaza ngokugcweleyo kumaJuda lakumaGrikhi ukuthi kumele baphendukele kuNkulunkulu njalo babe lokholo eNkosini yethu uJesu.’ (ImiSeb. 20:18, 20, 21) Ngalesosikhathi ababusi beRoma babekhuthaza abantu ukuthi bakhonze izithombe, yikho abanengi ‘babezinikele ekwesabeni onkulunkulu.’ Kwakuqakathekile ukuthi badinge “uNkulunkulu owenza umhlaba lakho konke okukuwo” njalo ‘owayememezela kubo bonke abantu ezindaweni zonke ukuthi kumele baphenduke.’—ImiSeb. 17:22-31.

⁵ Lalamuhla kuqakathekile kakhulu ukuthi sitshumayeze abantu ngoba ukuphela komumo lo wezinto sekuseduze. Kumele sizimisele sibili ukubamba ziqine emsebenzini lo. Ukutshumayela endlini ngendlu yindlela engcono kakhulu esingayisebenzisa ukudinga abantu abalambele iqiniso. Indlela le ilokhu isebenza lalamuhla njengasesikhathini sikaJesu lesabaphostoli.—Mak. 13:10.

⁶ Wenza okusemandleni akho yini ukuthi utshumayele endlini ngendlu? Nxa kunjalo woba leqiniso lokuthi uJehova uyathokoza ngokwenzayo. (Hez. 9:11; ImiSeb. 20:35) Kodwa kungenzakala ukuthi ukuthola kunzima ukutshumayela endlini ngendlu. Mhlawumbe umzimba awuvumi kumbe utshumayela endaweni elabantu abangafuniyo ukulalela. Engxenye umsebenzi wokutshumayela awuvunyelwa lapho ohlala khona kumbe ulenhloni futhi ukuthola kunzima ukuqalisa ingxoxo labantu ongabaziyo. Konke lokhu kungakwenza utshaywe luvalo nxa sekumele uyetshumayela endlini ngendlu. Kodwa ungalahli ithemba. (Eks. 4:10-12) Banengi abafowethu labodadewethu abasesimeni esinjengesakho.

⁷ UJesu watshela abalandeli bakhe wathi: “Khumbulani, ngizabe ngilani kuze kube yisiphetho somumo lo wezinto.” (Mat. 28:20) Amazwi la ayasikhuthaza ukuthi siqinisele emsebenzini wokwenza abafundi. Lathi sizizwa njengomphostoli uPhawuli owathi: “Ngilamandla okwenza zonke izinto ngenxa yalowo ongipha amandla.” (Flp. 4:13) Ngakho zimisele ukulandela konke okuhlelwa libandla mayelana lokutshumayela endlini ngendlu. Ukusebenza labanye ekutshumayeleni kuzakunceda kakhulu futhi kukukhuthaze. Khuleka kuJehova umcele akuncedise ukuthi unqobe loba yikuphi ukwesaba ongabe ulakho lokuthi ukhuthale emsebenzini wokutshumayela izindaba ezinhle.—1 Joh. 5:14.

⁸ Nxa ungaqhubeka utshumayeza abantu, uzakuba lethuba lokubatshela ‘ngethemba olalo.’ (1 Phet. 3:15) Lokhu kuzakwenza ubone umehluko okhona phakathi kwabantu abalethemba labangelalo. (Isaya. 65:13, 14) Kanti njalo uzathokoza ngoba uyabe ulalela umlayo kaJesu othi “ukukhanya kwenu kakukhanye” njalo uzakuba lesibusiso sokuncedisa abanye ukuthi bamazi uJehova lokuthi bafunde iqiniso elizabenza bathole ukuphila okungapheliyo.—Mat. 5:16; Joh. 17:3; 1 Tim. 4:16.

⁹ Ibandla ngalinye lihlela ukuthi litshumayele endlini ngendlu phakathi kweviki langempelaviki. Amanye amabandla ahlela ukutshumayela ntambama nxa abantu bengatholakali ezindlini zabo ekuseni loba emini. Abanye bangabe bekhululekile ukuxoxa ngezikhathi zantambama kulasekuseni.

UKUDINGA ABAFANELEYO

¹⁰ UJesu wathuma abalandeli bakhe ukuthi ‘bayedinga’ abantu abafaneleyo. (Mat. 10:11) Kazange atshumayele endlini ngendlu kuphela kodwa wayetshumayela loba nini lapho okwakuvela khona ithuba. (Luk. 8:1; Joh. 4:7-15) Abaphostoli labo babetshumayela ezindaweni ezitshiyeneyo lapho okwakutholakala khona abantu.—ImiSeb. 17:17; 28:16, 23, 30, 31.

¹¹ Lathi lamuhla sifisa ukutshela abantu bonke izindaba ezinhle zoMbuso. Ukuze senelise ukwenza njalo, kumele sikhuthale njengoJesu labaphostoli bakhe futhi sihambisane lesikhathi kanye lokutshintsha kwezimo zabantu esibatshumayezayo. (1 Khor. 7:31) Abanye abamemezeli batshumayela ezindaweni zamabhizimusi futhi kuba lempumela emihle kakhulu. Kwezinye indawo abamemezeli batshumayela emigwaqweni, emaphakhi, ezindaweni zokupaka izimota laloba ngaphi lapho abantu abatholakala khona. Kwamanye njalo amabandla kutshunyayelwa langezinqola loba amatafula okukhangisa amabhuku. Kwezinye izikhathi igatsha lingahlela ukuthi kutshunyayelwe ngezinqola emadolobheni aphithizelayo kusetshenziswa abamemezeli abavela emabandleni atshiyeneyo. Lokhu kunceda ukuthi lalabo esingajayelanga ukubathola ezindlini bazwe izindaba ezinhle.

¹² Nxa singahlangana lomuntu ofisa ukuzwa okunengi okuseBhayibhilini singamnika okuthile okokubala. Okunye esingakwenza yikumnika inombolo zethu zefoni besesihlela ukumvakatshela ukuze sixoxe laye okunengi. Singaphinda simtshengise iwebhusayithi yethu i-jw.org kumbe simlayele lapho okungenelwa khona imihlangano yethu. Ungangezelela inkonzo yakho ngokutshumayela ngalindlela uzayikholisa kakhulu.

¹³ Akwenelanga ukutshela abantu izindaba ezinhle kanye nje kuphela. Kumele siphindele kanengi kubo ukuze sibancede bafunde iqiniso elizakwenza bathole ukuphila okungapheliyo lokuthi bathuthuke babe ngamaKhristu alokholo oluqinileyo.

UKUPHINDELA

¹⁴ UJesu watshela abalandeli bakhe wathi: “Lizakuba ngofakazi bami . . . kuze kuyefika emaphethelweni omhlaba.” (ImiSeb. 1:8) Waphinda wathi: “Ngakho-ke hambani liyekwenza abantu bezizwe zonke babe ngabafundi, . . . libafundise ukulandela izinto zonke engililaye zona.” (Mat. 28:19, 20) Ukuphindela kwenza siwuthande umsebenzi wokutshumayela esiwuphathiswe nguJehova. Abantu oke waxoxa labo bangathokoza kakhulu nxa ungaphindela kubo. Ukuqhubeka uxoxa labo okunengi okuseBhayibhilini kungenza bakholwe kuNkulunkulu njalo bakubone ukuqakatheka kokuvuma ukuthi abakhokhele. (Mat. 5:3) Nxa ungalungiselela kuhle njalo uphindele ngezikhathi abantu abakhululeke ngazo, uzakwenelisa ukuqalisa isifundo seBhayibhili. Khumbula ukuthi inhloso okumele ube layo nxa uphindela yikuqalisa izifundo. Kasihlanyeli sitshiye kunjalo kodwa siyabuyela siyethelela.—1 Khor. 3:6.

¹⁵ Abanye bakubona kunzima ukuphindela. Mhlawumbe okwenza kube njalo yikuthi bathanda ukuxoxa lomuntu okwesikhathi esifitshane kuphela. Kubathwalisa nzima ukuphindela emuntwini ukuze baxoxe laye okunengi. Yikho nxa unjalo lawe, lungiselela kuhle ukuze ube lesibindi njalo uzame lokusebenzisa amacebo esiwathola emhlanganweni waphakathi kweviki. Okunye ongakwenza yikucela ukuhamba lommemezeli oselesikhathi eside etshumayela.

UKUQHUBA IZIFUNDO ZEBHAYIBHILI

¹⁶ Ngesikhathi uFiliphu ekhuluma lendoda engumTopiya eyayibala iLizwi likaNkulunkulu futhi isikholwa lokho okwakukholwa ngamaJuda, wayibuza wathi: “Uyakuzwisisa sibili okubalayo?” Indoda le yaphendula yathi: “Kambe ngingakuzwisisa njani kungelamuntu ongifundisayo?” ImiSebenzi isahluko 8 isitshela ukuthi uFiliphu wayitshumayeza eqalisela eMbhalweni eyayiwubala ‘waseyitshela izindaba ezinhle ngoJesu.’ (ImiSeb. 8:26-36) IBhayibhili alisitsheli ukuthi uFiliphu waxoxa okwesikhathi esinganani lendoda le, kodwa esikwaziyo yikuthi wayichasisela kuhle iMibhalo okokuthi yacina isiba likholwa yacela lokubhabhathizwa, yahle yaba ngumlandeli kaJesu Khristu.

¹⁷ Abantu abanengi lamuhla abakujayelanga ukubala iBhayibhili yikho kumele siphindele kanengi kubo ukuze sifunde labo. Kungathatha amaviki, izinyanga kumbe iminyaka ukuthi babe lokholo oluqinileyo njalo babhabhathizwe. Kodwa nxa ungabekezela njalo utshengise ukuthi uyabathanda obafundisayo, uzathokoza kakhulu njengoba uJesu watsho ukuthi “ukupha kuyathokozisa kakhulu ukwedlula ukwamukela.”—ImiSeb. 20:35.

¹⁸ Kuqakathekile ukuthi uqhube isifundo seBhayibhili usebenzisa amabhuku asetshenziswa ukufunda labantu. Nxa ungalandela lokho esikufunda emhlanganweni waphakathi kweviki njalo ulingisele isibonelo sabamemezeli abafundisa kuhle, uzakwenelisa ukuqhuba izifundo ezithuthukayo lokunceda abanye ukuthi babe ngabalandeli bakaJesu Khristu.

¹⁹ Nxa kukuthwalisa nzima ukuqalisa isifundo seBhayibhili kumbe ukufundisa othile, cela umdala webandla loba ummemezeli ofundisa kuhle ukuthi akuncedise. Okunye okungakunceda ngamacebo kanye lezinkulumo ezitholakala ku-Gwalo Lomhlangano Wempilo Lenkonzo YamaKhristu. Thembela kuJehova njalo uqhubeke umcela ukuthi akusize. (1 Joh. 3:22) Zama ukudinga abanye abantu ongafunda labo iBhayibhili lanxa ungabe ubika isifundo osiqhuba lemuli yakho. Ukuqhuba izifundo zeBhayibhili kuzakwenza uyikholise kakhulu inkonzo yakho.

UKUNCEDA ABAFUNA UKWAZI IQINISO UKUTHI BABUYE ENHLANGANISWENI KAJEHOVA

²⁰ Nxa singanceda abantu ukuthi bamazi uNkulunkulu lokuthi babe ngabalandeli bakaJesu Khristu, bazakuba yingxenye yebandla lobuKhristu. Abantu esifunda labo iBhayibhili bazathuthuka masinyane nxa bengazwisisa indlela inhlanganiso kaJehova ehlelwe ngayo besebehambisana layo. Ngakho kuqakathekile ukuthi sibatshele ngenhlanganiso yethu. Singasebenzisa ibhukwana elithi, Ngobani Abenza Intando KaJehova Lamuhla? kanye lamavidiyo enzelwe lokho. Okunye okungabanceda kukusahluko 4 sebhuku leli olibalayo.

²¹ Uqalisa nje ukufunda lomuntu iBhayibhili kumele uhle umchasisele ukuthi uJehova ulenhlanganiso ayisebenzisayo ukuze aqondise umsebenzi wokutshumayela owenziwa emhlabeni wonke. Mtshele ngokuqakatheka kwamabhuku esiwaphiwa yinhlanganiso ubusumchasisela lokuthi kulabazalwane abazinikeleyo ukwenza ukuthi amabhuku la atholakale. Mnxuse ukuthi azongena lawe imihlangano yebandla eWolu yoMbuso njalo umchasisele ukuthi yenziwa njani. Mncedise lokuthi ajayelane labanye oFakazi emihlanganweni yebandla, eyeziqinti leyezabelo. Ukuba khona kwakhe emihlanganweni le kuzamenza abone uthando olukhona phakathi kwabantu bakaJehova olutshengisa ukuthi bangamaKhristu eqiniso. (Joh. 13:35) Ukuqhubeka ezwisisa indlela inhlanganiso ehlelwe ngayo kuzamenza asondele kakhulu kuJehova.

UKUSEBENZISA AMABHUKU ASEKELWE EBHAYIBHILINI

²² AmaKhristu akuqala ayesebenza nzima ukuze iLizwi likaNkulunkulu litholakale lula. Ayekopa iMibhalo ayibhale endaweni ezitshiyeneyo ukuze enelise ukuzibalela lokuyisebenzisa ebandleni. Ayeyiqakathekisa kakhulu iMibhalo le futhi ekhuthaza labanye ukuthi bayibale. (Kol. 4:16; 2 Tim. 2:15; 3:14-17; 4:13; 1 Phet. 1:1) Lamuhla oFakazi bakaJehova basebenzisa ezempucuko ukuze baphrinte amaBhayibhili adlula 200 miliyoni kanye lokunye okunengi. Ngokwesibonelo baphrinta amaphetshana, amabhuku, omagazini lamabhukwana ngezindimi ezinengi ezitshiyeneyo.

²³ Nxa ufundisa abanye izindaba ezinhle, kuqakathekile ukuthi usebenzise amabhuku esiwaphiwa yinhlanganiso kaJehova asinceda ukuthi sizwisise iBhayibhili. Ukubala amabhuku la kanye lokucabangisisa ngendlela akunceda ngayo kuzakwenza uzimisele ukuwasebenzisa ekufundiseni abanye.—Heb. 13:15, 16.

²⁴ Abantu abanengi lamuhla sebethanda ukubala izinto ezitholakala ku-inthanethi. Yikho iwebhusayithi yethu i-jw.org iyasinceda ukuthi senelise ukuhambisa izindaba ezinhle ebantwini abanengi. Emhlabeni wonke abantu bayenelisa ukungena kuwebhusayithi le besebenzisa amakhompiyutha ukuze babale kumbe balalele okunengi okuphuma eBhayibhilini ngezindimi zabo. Lalabo abangakuthandiyo ukuxoxa lathi kumbe labo abangalitholiyo ithuba lokuxoxa laboFakazi bayenelisa ukufunda okunengi bebodwa besebenzisa iwebhusayithi yethu.

²⁵ Kuqakathekile ukuthi sitshele abantu ngewebhusayithi yethu loba nini esithola khona ithuba. Nxa umuntu engasibuza umbuzo othile ngalokho esikukholwayo, singahle singene kuwebhusayithi ngefoni loba i-tablet besesimtshengisa impendulo yombuzo wakhe. Kanti njalo nxa singathola umuntu okhuluma olunye ulimi okugoqela lolimi lwezandla, singamlayela kuwebhusayithi yethu ukuze athole angakubala ngolimi lwakhe. Abanye abamemezeli bajayele ukuqalisa ingxoxo zeBhayibhili besebenzisa amavidiyo atholakala ku-jw.org.

UKUTSHUMAYELA LOBA NINI LAPHO OKUVELA KHONA ITHUBA

²⁶ UJesu watshela abalandeli bakhe wathi: “Lina liyikukhanya komhlaba. . . . Ukukhanya kwenu kakukhanye ebantwini ukuze babone imisebenzi yenu emihle, besebekhazimulisa uYihlo osezulwini.” (Mat. 5:14-16) Abalandeli laba bakutshengisa sibili ukuthi balalela uNkulunkulu ngokulingisela uJesu owathi: “Mina ngiyikukhanya komhlaba.” UJesu watshiyela amaKhristu isibonelo esihle ngokuba ‘yikukhanya kwempilo’ okwakuzanceda bonke abamlandelayo.—Joh. 8:12.

²⁷ Umphostoli uPhawuli laye watshiya isibonelo esihle esingasilandela. (1 Khor. 4:16; 11:1) Ngesikhathi ese-Athene wayetshumayeza abantu nsukuzonke emakethe. (ImiSeb. 17:17) AmaKhristu aseFiliphi asilandela isibonelo sakhe esihle, uPhawuli waze wawabhalela esithi ‘ayekhazimula njengezibane emhlabeni phakathi kwesizukulwane esonakeleyo lesixhwalileyo.’ (Flp. 2:15) Lathi lamuhla singenza ukuthi iqiniso likhanye ngendlela esiziphatha ngayo langokutshela abantu izindaba ezinhle loba nini lapho okuvela khona ithuba. Kuliqiniso sibili ukuthi ukuziphatha kwethu kukodwa nje kungenza abanye babone ukuthi sitshiyene labantu bomhlaba lo. Yikho ukubatshela izindaba ezinhle kuzabenza bazwisise ukuthi kungani siziphatha ngaleyondlela.

²⁸ Abamemezeli abanengi batshumayela izindaba ezinhle kulabo abasebenza labo, abafunda labo esikolo, kumbe kulabo abahlangana labo nxa besenza imisebenzi etshiyeneyo. Abanye esingabatshumayeza yilabo esingabe sigade labo imota zomphakathi. Nxa sixoxa labantu kumele sihlale sikulungele ukungenisa ingxoxo yeBhayibhili. Kasizimiseleni ukusebenzisa loba yiliphi ithuba elivelayo ukuthi sitshumayeze abantu.

²⁹ Kumele sikhumbule ukuthi ukutshumayela ngalindlela kuletha udumo kuMdali wethu uJehova lasebizweni lakhe futhi kwenza sikukhuthalele ukutshela abanye izindaba ezinhle. Okuhle yikuthi sizabanceda lokuthi bamazi uJehova njalo bamkhonze, besebesiba lokholo lakuJesu Khristu oluzabenza babe lethemba lokuphila phakade. UJehova uyathokoza kakhulu nxa singenza njalo ngoba ukubona kuyinkonzo engcwele.—Heb. 12:28; Isam. 7:9, 10.

INDAWO ESITSHUMAYELA KUYO

³⁰ UJehova ufuna izindaba ezinhle zoMbuso zitshunyayelwe emhlabeni wonke, emadolobheni lasemaphandleni. Ngenxa yalesosizatho, iwofisi yegatsha iba leqiniso lokuthi amabandla kanye labamemezeli abasendaweni ezingelamabandla bayathola indawo abangatshumayela kuyo. (1 Khor. 14:40) Langesikhathi samaKhristu okuqala, uNkulunkulu wayehlele ukuthi abantu babe lendawo abatshumayela kuzo. (2 Khor. 10:13; Gal. 2:9) Njengoba umsebenzi wokutshumayela ngoMbuso ulokhu usanda kulezinsuku zokucina, kuqakathekile ukuthi siwenze ngendlela ehlelekileyo ukuze siphumelele.

³¹ Umbonisi wenkonzo nguye olomsebenzi wokukhangela insimu etshunyayelwa libandla. Inceku ekhonzayo ingaphiwa umsebenzi wokunika abamemezeli indawo abangatshumayela kuyo. Insimu inganikwa iqembu kumbe ummemezeli oyedwa. Nxa insimu yebandla incane, ababonisi bamaqembu yibo abaphiwa insimu ezatshunyayelwa ngabamemezeli abasemaqenjini abo. Kodwa nxa inkulu, ummemezeli angazicelela eyakhe insimu angatshumayela kuyo.

³² Ummemezeli oleyakhe insimu angenelisa ukuyatshumayela kuyo lanxa kungelanhlelo zokutshumayela ezenziwe libandla kumbe nxa kubenzima ukuthi aphume labanye. Ngokwesibonelo, abanye abamemezeli bacela insimu eseduze lalapho abasebenzela khona ukuze benelise ukutshumayela ngesikhathi sekhefu loba nxa sebetshayisile. Abanye njalo bacela insimu eseduze lalapho abahlala khona besebetshumayela kuyo ngezikhathi zantambama. Ukuba lensimu eseduzane laye kungamnceda kakhulu ummemezeli ukuthi asisebenzise kuhle isikhathi alaso sokutshumayela. Kuyavunyelwa ukuthi ummemezeli ayetshumayela ensimini yakhe nxa angaphuma labanye ngemva komhlangano wokuya ekutshumayeleni. Nxa lawe ufuna ukuba leyakho indawo ongatshumayela kuyo ungakhuluma lomzalwane onika abamemezeli insimu.

³³ Kungelani lokuthi insimu icelwe ngumbonisi weqembu kumbe ngummemezeli, lowo oyicelileyo kumele azame ukutshumayela kuzo zonke izindlu ezikuleyondawo. Kodwa indlela zokutshumayela ezizasetshenziswa kumele zivumelane lemithetho ekhona kuleyondawo. Umbonisi weqembu kumbe ummemezeli ophiwe insimu kumele abe leqiniso lokuthi isetshenzwa yonke kungakedluli inyanga ezine. Nxa lowo oyicelileyo eseqedile ukuyisebenza, kufanele atshele umzalwane obona ngensimu. Kodwa nxa efisa ukuqhubeka ngayo angaphinda ayicele njalo kulowomzalwane.

³⁴ Nxa bonke ebandleni bebambisana endabeni le, insimu yebandla izasetshenzwa kuhle okumangalisayo. Kumele sinanzelele ukuthi asiphindaphindi izindlu ngendlela engahlelekanga ngoba ukwenza njalo kungacaphula abantu abahlala kuleyondawo. Singahlala sikukhumbula lokhu, siyabe sitshengisa ukuthi silendaba labafowethu kanye lalabo esibatshumayezayo.

UKUTSHUMAYEZA ABANTU ABAKHULUMA INDIMI EZITSHIYENEYO

³⁵ UJehova ufuna abantu bonke bafunde ngaye langeNdodana yakhe kanye loMbuso wakhe. (Isam. 14:6, 7) Yikho sifisa ukuncedisa abantu abakhuluma indimi ezitshiyeneyo ukuthi babize ibizo likaJehova ukuze basindiswe lokuthi bagqoke ubuntu obutsha obuzakwenza kukhanye ukuthi bangamaKhristu. (Rom. 10:12, 13; Kol. 3:10, 11) Kodwa yiziphi inhlupho ezingabakhona nxa sitshumayela ezindaweni ezilabantu abakhuluma izindimi ezitshiyeneyo? Kuyini okungenziwa ukuze sisize abanye ukuthi bazwe izindaba ezinhle zoMbuso ngolimi abaluzwisisayo?—Rom. 10:14.

³⁶ Ibandla ngalinye liphiwa indawo elizatshumayela kuyo kusiya ngolimi olusetshenziswa yilelobandla. Kodwa nxa endaweni eyodwa kulamabandla asebenzisa indimi ezitshiyeneyo, wonke angatshumayela endaweni efananayo. Ezimeni ezinjalo, kuhle ukuthi abamemezeli batshumayeze ikakhulu abantu abakhuluma ulimi olusetshenziswa libandla labo. Lokhu kufanele kulandelwe langezikhathi zomkhankaso. Kodwa nxa abamemezeli betshumayela obala kumbe bethole ithuba lokutshumayeza umuntu othile, bakhululekile ukumnika ibhuku elibhalwe ngaloba yiluphi ulimi alukhulumayo.

³⁷ Amanye amabandla ayehluleka ukuyatshumayela kwezinye ingxenye ezikhatshana zensimu yawo. Yikho ababonisi benkonzo bamabandla akuleyondawo kufanele bahlanganise amakhanda ukuze babone ukuthi yiphi indlela engcono abangasebenza ngayo insimu yabo. Lokhu kuzanceda ukuthi wonke umuntu athole ithuba lokuzwa izindaba ezinhle zoMbuso lokuthi abamemezeli bangaphindaphindi indawo efananayo.—Zaga. 15:22.

³⁸ Kumele senzeni nxa singathola umuntu okhuluma olunye ulimi? Akufanelanga simtshiye sizitshela ukuthi abamemezeli abakhuluma ulimi lwakhe bazamtshumayeza. Abanye abamemezeli sebafundela indlela elula yokutshumayela ngolunye ulimi olutholakala endaweni abatshumayela kuyo. Okunye esingakwenza yikumtshengisa ukuthi angayisebenzisa njani i-jw.org ukuze abale loba adawunilode amabhuku ethu kumbe simthembise ukumphathela amabhuku abhalwe ngolimi lwakhe.

³⁹ Nxa umuntu okhuluma olunye ulimi etshengisa ukuthi ulesifiso sokufunda okunengi, kumele sizame ukudinga ummemezeli olwaziyo lololimi ukuze amncedise. Singamtshela lokuthi imihlangano yebandla eqhutshwa ngolimi lwakhe ingenelwa ngaphi. Nxa efuna kube lomuntu omvakatshelayo ukuze afunde iBhayibhili, singamtshengisa ukuthi angafaka njani isicelo ku-jw.org. Iwofisi yegatsha izadinga umuntu oseduze ongafunda laye ngolimi lwakhe.

⁴⁰ Kumele siqhubeke simvakatshela lowomuntu kuze kutholakale ummemezeli ozafunda laye ngolimi lwakhe. Kwezinye izikhathi igatsha liyabhalela abadala libazise nxa kungasatholakalanga ummemezeli okhuluma ulimi lwakhe. Kungaba njalo kuyabe kumele siqhubeke sisiyambona ukuze simncedise ukuthi afunde okunengi. Nxa sisenelisa, singafunda laye iBhayibhili sisebenzisa ibhuku elikhona ngolimi lwakhe. Ukubona imifanekiso lokubala amavesi kungamnceda ukuthi azwisise okuthile akufundayo. Mhlawumbe singacela omunye emulini yakhe owazi indimi zombili ukuthi amtolikele.

⁴¹ Ukuze simncedise ukuthi abesenhlanganisweni kaNkulunkulu, kumele simnxuse emihlanganweni yebandla lanxa engasoze azwisise konke okukhulunywayo. Nxa kubalwa amavesi kufanele simncedise ukuthi avule eBhayibhilini lakhe nxa likhona ngolimi aluzwisisayo. Ukuhlangana labanye ebandleni kuzamkhuthaza kakhulu futhi kumncede ukuthi aqhubeke ethuthuka ekukhonzeni.

⁴² Iqenjana: Leli lihlekana labamemezeli abakhuluma olunye ulimi kodwa kungelamdala kumbe inceku ekhonzayo engaqhuba imihlangano maviki wonke. Nanku okukhangelwa ligatsha ukuze ibandla livunyelwe ukubumba iqenjana elisebenzisa olunye ulimi:

1. (1) Nxa kulabantu abanengana kuleyonsimu abakhuluma lololimi.

2. (2) Nxa kulehlekana labamemezeli abalwaziyo lololimi kumbe abalesifiso sokulufunda.

3. (3) Nxa iqula labadala lizimisele ukuncedisa leloqenjana ukwenza inhlelo zokutshumayela.

Nxa abadala belesifiso sokubumba iqenjana elikhuluma olunye ulimi, kumele bakhulume lombonisi wesiqinti. Kungenzakala ukuthi kulamanye amabandla awaziyo afuna ukutshumayeza abantu abakhuluma lololimi, yikho angancedisana labo ukuze kubonakale ukuthi kukuliphi ibandla okungabunjwa khona leloqenjana. Nxa sekusaziwa ukuthi lizavulwa kuliphi ibandla, abadala bazabhalela igatsha incwadi becela imvumo yokukhangela leloqenjana.

⁴³ Iqembu: Igatsha lingavuma ukuthi ibandla likhangele iqembu elithile nxa:

1. (1) Kulabantu abanengi ensimini abalesifiso sokufunda iBhayibhili njalo kukhanya ukuthi iqembu lelo lingakhula ngokuhamba kwesikhathi.

2. (2) Kulehlekana labamemezeli abalwaziyo lololimi kumbe abalufundelayo.

3. (3) Kulomdala kumbe inceku ekhonzayo engakhokhela leloqembu futhi iqhube umhlangano webandla othile kumbe ingxenye yawo ngalololimi.

Nxa kukhona konke lokhu okuqanjwe phezulu, abadala sebengabhalela igatsha belitshela okunengi okuphathelane leqembu lelo lokuthi yibo abazabe belikhangele. Umdala okhokhela iqembu leli ubizwa ngokuthi “ngumbonisi weqembu” kodwa inceku ekhonzayo yona ibizwa ngokuthi “yinceku yeqembu.”

⁴⁴ Nxa igatsha lingavuma ukuthi iqembu lelo libunjwe, abadala abalikhangeleyo bazahlela ukuthi yiziphi izingxenye zemihlangano ezingenziwa liqembu lelo lilodwa lokuthi izakwenziwa kangaki ngenyanga leyomihlangano. Kanti njalo kungahlelwa lokuthi iqembu lelo liphume lodwa ekutshumayeleni. Bonke abaseqenjini kumele balandele okutshiwo liqula labadala bebandla abangaphansi kwalo. Abadala bona kumele basebenzise ukuhlakanipha nxa bencedisa abamemezeli abaseqenjini lelo. Nxa umbonisi wesiqinti engasebenza leqembu ngesikhathi evakatshele ibandla, kumele abhalele igatsha esitsho ukuthi liyathuthuka yini lokuthi kuyini okufunekayo. Ngokuhamba kwesikhathi iqembu leli lingakhula libe libandla. UJehova uzathokoza kakhulu nxa wonke umuntu angazimisela ukulandela okutshiwo yinhlanganiso yakhe.—1 Khor. 1:10; 3:5, 6.

UKUTSHUMAYELA LABANYE

⁴⁵ AmaKhristu azinikeleyo alomlandu wokutshela abanye izindaba ezinhle. Zinengi indlela zokukwenza lokhu sisodwa, kodwa kuhle ukuthi siphume labanye. (Luk. 10:1) Yikho kulohlelo lokuthi abamemezeli bahlangane ndawonye phakathi kweviki langempelaviki ukuze bayetshumayela. Izikhathi zekhefu zinika abamemezeli ithuba lokuthi baphume ekutshumayeleni ngoba abanengi bayabe bengayanga emisebenzini. Ikhomithi Yenkonzo Yebandla kufanele ihlele ukuthi kuzahlanganwa ngaphi, sikhathi bani lokuthi kuzabe kutshunyayelwa yini ngezikhathi zantambama.

⁴⁶ Ukutshumayela labanye kuyasinceda ukuthi sazane ngcono lokuthi ‘sikhuthazane.’ (Rom. 1:12) Labo abasanda kuba ngabamemezeli bangasebenza lalabo asebelesikhathi eside betshumayela ukuze bafunde okunengi. Kwezinye indawo abamemezeli bangahamba bebabili kumbe bebanengi ukuze bavikeleke. Lanxa ungabe uhlele ukuphuma wedwa ekutshumayeleni, ukungena umhlangano wenkonzo kungakunceda futhi kukhuthaze labanye. Ukwazi ukuthi kulabanye abatshumayela eduzane kuzakwenza ube lesibindi. Amaphayona kanye labanye ebandleni akumelanga babone angani kumele bawungene nsuku zonke umhlangano wenkonzo ohlelwe libandla. Kodwa lokhu akutsho ukuthi bahle bayekele ukuyingena imihlangano le.

⁴⁷ Sengathi sonke singazimisela ukulandela indlela uJesu labaphostoli bakhe ababesenza ngayo. Nxa singenza njalo, uJehova uzayibusisa yonke imizamo esiyenzayo emsebenzini oqakathekileyo wokutshumayela izindaba ezinhle zoMbuso.—Luk. 9:57-62.