IMPILO YAMAKHRISTU
Ukusebenza Ndawonye Ensimini Elezindimi Ezitshiyeneyo
Abantu bajayele ukulalela umlayezo woMbuso nxa bewuzwa ngolimi lwabo. Mhlawumbe lokhu yikho okwenza uJehova wahlela ukuthi ngePhentekhosti lika-33 C.E. “abaJuda ababemesaba uNkulunkulu bevela kuyo yonke imibuso yomhlaba” bazwe izindaba ezinhle ‘ngolimi lwabo’ lanxa babengabe bekhuluma isiGrikhi kumbe isiHebheru. (ImiS 2:5, 8) Lamuhla amabandla akhuluma izindimi ezitshiyeneyo angabe etshumayela endaweni efananayo. Abamemezeli abasemabandleni anjalo bangasebenza njani ndawonye ukuze batshumayeze umuntu wonke kodwa bengatshumayeli insimu efanayo kokuphela abaninimuzi baze badinwe ngabo?
Cebisanani (Zag 15:22): Ababonisi benkonzo kumele bahlangane ndawonye ukuze babonisane ukuthi amabandla wonke angatshumayela njani ngendlela ehlelekileyo. Amanye amabandla akhuluma ezinye izindimi angathi lingangeni ezinye izindlu ezisensimini yabo. Kodwa nxa bengenelisi ukutshumayela insimu yonke ngenxa yokuthi inkulu bangathi litshumayele indawo yonke beselibatshela nxa kulomuntu okhuluma ulimi lwabo ofuna ukufunda. (od-ZU 93 ¶37) Kumbe kwesinye isikhathi bangacela ukuthi libancedise ukudinga abantu abakhuluma ulimi lwabo futhi libathumezele amakheli abantu elibatholileyo. (km-ZU 7/12 5, ibhokisi) Hlala ukhumbula ukuthi kwezinye izindlu bakhuluma izindimi ezitshiyeneyo. Nxa lilungiselela ukutshumayela insimu kumele libe leqiniso ukuthi elikubhalileyo mayelana lomninimuzi akucini kuwele ezandleni ezingayisizo.
Bambisanani (Efe 4:16): Landelani iziqondiso ezivela kumbonisi wenkonzo. Ufundisa umuntu okhuluma ulimi olungayisilo olusetshenziswa ebandleni lenu yini? Nxa kunjalo umuntu lowo uzathuthuka masinya nxa ungamnika omunye osebandleni loba iqembu elikhuluma ulimi lwakhe.
Lungiselela (Zag 15:28; 16:1): Nxa usekutshumayeleni ungathola umuntu okhuluma olunye ulimi zama ngamandla wonke ukuthi umtshele izindaba ezinhle. Ungadinga ukuthi yiziphi izindimi ezikhulunywa endaweni yakini njalo udawunilode amaBhayibhili atshiyeneyo lamavidiyo efonini. Ungasebenzisa i-JW Language app ukuze ufunde indlela ababingelelana ngayo ngalolo limi.