ISAHLUKO 8
Ukutshumayela Izindaba Ezinhle
UJEHOVA wasipha iNdodana yakhe uJesu Khristu ukuze ibe yisibonelo esingasilingisela. (1 Phet. 2:21) Loba ngubani oba ngumlandeli kaJesu kumele atshumayele izindaba ezinhle zoMbuso kaNkulunkulu. UJesu wakhuluma amazwi atshengisa ukuthi umsebenzi lo wenza umuntu ajabule. Wathi: “Wozani kimi lina lonke elikhatheleyo lelisindwayo, ngizaliphumuza. Thwalani ijogwe lami lifunde kimi ngoba ngimnene futhi ngithobekile enhliziyweni. Lingenza njalo lizathola ukuphumula.” (Mat. 11:28, 29) Bonke abakhetha ukuba ngabalandeli bakaJesu bayavuma ukuthi okwatshiwo nguJesu kuliqiniso sibili.
2 UJesu wayengumtshumayeli wezindaba ezinhle omkhulu kulabo bonke njalo wanxusa abanye ukuthi bamlandele. (Mat. 9:9; Joh. 1:43) Wabafundisa ukutshumayela wasebathuma ukuthi bayekwenza umsebenzi lo. (Mat. 10:1–11:1; 20:28; Luk. 4:43) Ngokuya kwesikhathi waphinda wathuma abanye abangu-70 ukuthi bayetshumayela izindaba ezinhle zoMbuso kaNkulunkulu. (Luk. 10:1, 8-11) Ngesikhathi ebathuma wabatshela wathi: “Loba ngubani olilalelayo uyangilalela lami, futhi loba ngubani ongelandaba lani kalandaba lami. Kanti njalo loba ngubani ongelandaba lami kalandaba laLowo ongithumileyo.” (Luk. 10:16) Ngokutsho amazwi la, uJesu watshengisa ukuthi umsebenzi lo uqakatheke kakhulu. Phela babezakuba ngabameli bakaJesu loNkulunkulu oPhezukonke. Lalamuhla kukhangelelwe okufananayo kulabo abakhetha ukuba ngabalandeli bakaJesu. (Luk. 18:22; 2 Khor. 2:17) Balomlandu wokutshumayela izindaba ezinhle lokwenza abafundi.—Mat. 24:14; 28:19, 20.
3 Ukukhetha kwethu ukulandela uJesu kutshengisa ukuthi ‘sesimazi’ uJehova leNdodana yakhe uJesu Khristu. (Joh. 17:3) Sesizazi izindlela zikaJehova. Kanti njalo uJehova usincedisile ukuthi siguqule indlela esicabanga ngayo, lokuthi sigqoke ubuntu obutsha futhi siphile ngendlela evumelana lentando yakhe. (Rom. 12:1, 2; Efe. 4:22-24; Kol. 3:9, 10) Ukuthanda uJehova kwasenza sazinikela kuye sabhabhathizwa njalo lokhu kwatshengisa ukuthi sesingabatshumayeli bezindaba ezinhle zoMbuso.
4 Kodwa kumele sikhumbule ukuthi ukuze sikhonze uNkulunkulu kufanele sibe lezandla ezihlanzekileyo lenhliziyo ezimsulwa. (Hubo. 24:3, 4; Isaya. 52:11; 2 Khor. 6:14–7:1) Ukuba lokholo kuJesu kwenze saba lemizwangedwa ehlambulukileyo. (Heb. 10:19-23, 35, 36; Isam. 7:9, 10, 14) Umphostoli uPhawuli wakhuthaza amaKhristu ukuthi adumise uNkulunkulu kukho konke akwenzayo ukuze angakhubi abanye. Umphostoli uPhetro laye watshengisa ukuthi kuqakathekile ukuthi siziphathe kuhle ukuze sincede abanye bafunde iqiniso. (1 Khor. 10:31, 33; 1 Phet. 3:1) Kuyini ongakwenza ukuze uncede othile ukuthi abe ngumtshumayeli wezindaba ezinhle?
ABAMEMEZELI ABATSHA
5 Uqalisa nje ukufunda lomuntu iBhayibhili, kumele umkhuthaze ukuthi axoxele abanye lokho akufundayo. Angatshela izihlobo, abangane, lalabo asebenza labo kumbe abanye nje ahlangana labo. Kuqakathekile ukuthi sikwenze lokhu ukuze sincede esifunda labo ukuthi balingisele uJesu ngokutshumayela izindaba ezinhle. (Mat. 9:9; Luk. 6:40) Nxa bangaqhubeka bethuthuka njalo bexoxela abanye lokho abakufundayo, bazakuba lesifiso sokutshumayela lebandla.
OKUKHANGELELWE KULABO ABAFUNA UKUBA NGABAMEMEZELI
6 Ungakaqalisi ukutshumayela lomuntu ofunda laye iBhayibhili, kufanele ube leqiniso lokuthi uyakwenza lokho okukhangelelwe kubamemezeli. Phela nxa esetshumayela lebandla, abantu emphakathini bayabe sebembona njengoFakazi kaJehova. Yikho kumele kukhanye ukuthi usephila ngendlela efunwa nguJehova lokuthi usengaba ngummemezeli ongabhabhathizwanga.
7 Njengoba kunguwe ofunda laye iBhayibhili, kungenzakala ukuthi usumazi ngcono. Ungabe usukubonile ukuthi uyakusebenzisa sibili lokho akufundayo. Kodwa kulezinto abadala abangafuna ukuzazi ngaye, yikho bazahlela ukuxoxa lani lobabili.
8 Umhleli wequla labadala uzahlela ukuthi abadala ababili (omunye wabo kumele abe lilunga lekhomithi yenkonzo) baxoxe lani lobabili. Emabandleni alabadala abalutshwane, ingxoxo le ingenziwa ngumdala lenceku ekhonzayo efaneleyo. Abazalwane laba kumele bakwenze masinyane lokhu futhi ngesikhathi kuxoxwa kufanele bazame ukwenza wonke umuntu akhululeke. Bangatshelwa ngelanga lomhlangano webandla, bangahle bakwenze ngemva nje kwemihlangano nxa kuvuma. Kumele babeleqiniso lokuthi lowo ofuna ukuba ngummemezeli:
(1) Uyakholwa ukuthi iBhayibhili liLizwi likaNkulunkulu.—2 Tim. 3:16.
(2) Uyazazi njalo uyazikholwa imfundiso eziseMibhalweni okokuthi nxa angabuzwa imibuzo uyenelisa ukuphendula esebenzisa iBhayibhili hatshi lokho akucabangayo kumbe okufundiswa emasontweni.—Mat. 7:21-23; 2 Tim. 2:15.
(3) Uyawulandela umthetho oseBhayibhilini wokuhlangana labantu bakaJehova emihlanganweni yebandla nxa esenelisa ukwenza njalo.—Hubo. 122:1; Heb. 10:24, 25.
(4) Uyakwazi okutshiwo liBhayibhili ngokuya emacansini lomuntu angatshadanga laye, isithembo, lobutabane njalo uvumelana lalokho elikutshoyo. Nxa kulomuntu athandana laye futhi behlala bonke kumele batshade ngokusemthethweni.—Mat. 19:9; 1 Khor. 6:9, 10; 1 Tim. 3:2, 12; Heb. 13:4.
(5) Uyawulandela umthetho oseBhayibhilini omayelana lokudakwa njalo kasebenzisi kubi izidakamizwa. Kanti njalo kasebenzisi imithi edakayo, kungaba ngeyesintu kumbe etholakala kwabezempilakahle ngaphandle nxa etshelwe ngudokotela.—2 Khor. 7:1; Efe. 5:18; 1 Phet. 4:3, 4.
(6) Uyakunanzelela ukuthi kumele akhethe kuhle abangane.—1 Khor. 15:33.
(7) Usevalelisile kuloba yiphi isonto ayeyingena kudala futhi wabachasisela ukuthi kaseyikuba lilunga layo lokuthi kasoze ahlanganyele kuloba yini abayenzayo.—2 Khor. 6:14-18; Isam. 18:4.
(8) Kangeni kwezombusazwe.—Joh. 6:15; 15:19; Jak. 1:27.
(9) Uyakukholwa okutshiwo ku-Isaya 2:4 futhi uyakusebenzisa empilweni yakhe.
(10) Usezimisele ukuba nguFakazi kaJehova.—Hubo. 110:3.
9 Nxa kulokunye abadala abangelaqiniso lakho ngalowo ofuna ukuba ngummemezeli, kumele basebenzise iMibhalo efakiweyo ukuxoxisana laye. Kuqakathekile ukuthi lowo ofuna ukuba ngummemezeli azwisise ukuthi nxa efuna ukutshumayela laboFakazi bakaJehova, kumele aphile ngendlela evumelana lalokho okutshiwo liBhayibhili. Azakutsho kuzanceda abadala babone ukuthi uyakwazi yini lokho okukhangelelwe kuye lokuthi usekulungele yini ukutshumayela lebandla.
10 Abadala kumele bahle bamazise masinyane ukuthi uyafanela yini ukuba ngummemezeli. Bangakwenza lokhu ngemva nje kwengxoxo leyo. Nxa efanele ukuba ngummemezeli, bangamtshela ukuthi usengatshumayela lebandla. (Rom. 15:7) Kumele bamkhuthaze ukuthi ahle aqalise ukutshumayela abeseletha umbiko wakhe ekupheleni kwenyanga lokuthi ngemva kokubika okokuqala uzakwenzelwa ikhadi elibhalwe ibizo lakhe beseligcinwa emafayilini ebandla. Isizatho sokubhala phansi okumayelana lommemezeli ngamunye yikuthi ukwenza njalo kunceda inhlanganiso ibone intuthuko eyenziwa ngoFakazi bakaJehova emhlabeni wonke lokuthi ingancedisa njani ngamunye wethu ekukhonzeni. Abadala kumele bakhumbuze lowo osanda kuba ngummemezeli ukuthi ulwazi abalalo ngaye luzasetshenziswa ngendlela evumelana le-Global Data Protection Policy of Jehovah’s Witnesses etholakala ku-jw.org.
11 Singajayelana lommemezeli omutsha futhi sitshengise ukuthi silendaba laye sizamkhuthaza kakhulu. Uzazimisela ukubika nyanga zonke lokuthi aqhubeke ethuthuka ekukhonzeni uJehova.—Flp. 2:4; Heb. 13:2.
12 Nxa abadala bebone kufanele ukuthi ummemezeli omutsha aqalise ukutshumayela, kumele bamnike elakhe ibhuku elithi, Sihlelelwe Ukwenza Intando KaJehova. Ngemva kokuletha umbiko wakhe wokuqala, abadala bazakwazisa ibandla ukuthi usengummemezeli ongabhabhathizwanga.
UKUNCEDISA ABANTWANA
13 Abantwana labo bangaba ngabamemezeli bezindaba ezinhle. Khumbula ukuthi uJesu wabemukela abantwana futhi wababusisa. (Mat. 19:13-15; 21:15, 16) Lanxa abazali kuyibo abalomthwalo wokufundisa abantwababo, labanye ebandleni bangabakhuthaza abantwana abalesifiso sokutshumayela izindaba ezinhle zoMbuso. Nxa ungumzali kumele ube yisibonelo esihle kubantwabakho endabeni yokutshumayela. Ukwenza njalo kuzabanceda ukuthi bawukhuthalele umsebenzi lo. Kodwa singamncedisa njani umntwana oziphethe kuhle futhi olesifiso sokutshela abanye lokho akukholwayo?
14 Kumele umzali abonane lomdala okuKhomithi Yenkonzo Yebandla amtshele ngesifiso somntanakhe sokuba ngummemezeli. Umhleli wequla labadala uzahlela ukuthi abadala ababili (omunye wabo kumele abe lilunga lekhomithi yenkonzo) bazoxoxa lomntwana labazali bakhe abangoFakazi (loba umzali oyedwa) kumbe omunye umuntu omgcinileyo. Nxa umntwana ezwisisa imfundiso eziseBhayibhilini njalo kucaca ukuthi uyakufuna sibili ukuba ngummemezeli, uyabe etshengisa ukuthi uyathuthuka. Ngemva kokuxoxisana laye besebenzisa imicijo ephezulu, abadala sebengatsho ukuthi uyafanela yini ukuba ngummemezeli ongabhabhathizwanga. (Luk. 6:45; Rom. 10:10) Engxoxweni yabo kufanele baxoxe ngemicijo ehambelana lomntwana kuphela batshiye okuqondane labantu abadala.
15 Ekuxoxeni kwabo kumele bamncome umntwana ngokuhle akwenzayo besebemkhuthaza ukuthi aqhubeke ethuthuka ukuze abhabhathizwe. Abazali labo kumele banconywe ngenxa yomsebenzi wabo omuhle abawenzayo ekufundiseni umntanabo. Kufanele abadala babakhuthaze lokuthi babale “Umlayezo Oya Kubazali” otholakala emakhasini 179-181 ukuze baqhubeke bencedisa umntanabo.
UKUZINIKELA LOKUBHABHATHIZWA
16 Njengoba usumazi uJehova njalo utshengisa ukuthi uyamthanda ngokuphila ngezimiso zakhe langokutshumayela, kuqakathekile ukuthi uqinise ubungane bakho laye. Ungakwenza njani lokhu? Ngokuzinikela kuye ubusubhabhathizwa.—Mat. 28:19, 20.
17 Ukuzinikela kuNkulunkulu kutsho ukukhuleka kuye umthembisa ukuthi usuzakwenza intando yakhe lokuthi usuzaphila ngezimiso zakhe. Kutsho ukuzimisela ukukhonza yena yedwa kuze kube nini lanini. (Dute. 5:9) Lesi yisinqumo okumele uzenzele sona, akulamuntu ongakwenzela.
18 Kodwa ukuzinikela kuNkulunkulu akwenelanga. Kufanele utshengise ukuthi usuzinikele kuye ngokubhabhathizwa emanzini njengoJesu. (1 Phet. 2:21; 3:21) Kuyini okumele ukwenze nxa usufisa ukubhabhathizwa? Kufanele utshele umhleli wequla labadala ngesifiso sakho. Yena uzahlela ukuthi kube labadala abazaxoxa lawe ukuze babone ukuthi usufanele yini ukubhabhathizwa. Ukuze uthole okunengi khangela, “Umlayezo Oya Kummemezeli Ongakabhabhathizwa” otholakala emakhasini 182-184 kanye lengxenye ethi, “Imibuzo Yalabo Abafuna Ukubhabhathizwa” etholakala emakhasini 185-207.
UKUBIKA
19 Ukuzwa imibiko etshengisa ukuthuthuka komsebenzi wokutshumayela kuyabakhuthaza kakhulu abantu bakaJehova. Selokhu uJesu watshela abalandeli bakhe ukuthi izindaba ezinhle zizatshunyayelwa emhlabeni wonke, amaKhristu eqiniso abelokhu ekuthanda ukuzwa ukuthi umsebenzi lo uqhutshwa njani.—Mat. 28:19, 20; Mak. 13:10; ImiSeb. 1:8.
20 Abalandeli bakaJesu bokuqala babekuthanda ukuzwa imibiko emayelana lomsebenzi wokutshumayela. (Mak. 6:30) Ibhuku lemiSebenzi lisitshela ukuthi kwagcotshwa abafundi ababengaba ngu-120 ngesikhathi kuthululwa umoya ongcwele ngePhentekhosti ka-33 C.E. Kungakayi ngaphi inani leli lakhwela laya ku-3 000 laseliphinda liqansa lisiya ku-5 000. Ibhuku lelo liphinda lithi “uJehova waqhubeka esengezelela kubo abantu ababesindiswa” futhi “ixuku elikhulu labaphristi laba ngamakholwa.” (ImiSeb. 1:15; 2:5-11, 41, 47; 4:4; 6:7) Kumele ukuthi kwabaqinisa kakhulu abafundi ukuzwa imibiko enjalo. Kwabakhuthaza lokuthi baqhubekele phambili ngomsebenzi wokutshumayela ababewenza lanxa babehlukuluzwa ngabakhokheli benkolo yesiJuda.
21 UPhawuli wabhalela abaseKholose ngabo-60 kusiya ku-61 C.E., ebatshela ukuthi izindaba ezinhle ‘zaziqhubeka zithela izithelo futhi zisabalala emhlabeni wonke,’ lokuthi ‘zasezitshunyayelwe kukho konke okudaliweyo okungaphansi kwezulu.’ (Kol. 1:5, 6, 23) AmaKhristu akuqala ayelilalela iLizwi likaNkulunkulu njalo umoya ongcwele wawanceda ukuthi enelise ukutshumayela izindaba ezinhle. Akuthandabuzwa ukuthi ukuzwa imibiko yalokho okwakusenzakala kwawakhuthaza kakhulu amaKhristu la.
Ukukhuthalele yini ukutshumayela ukuphela kungakafiki?
22 Lalamuhla inhlanganiso kaJehova izama ngamandla wonke ukugcina imibiko ephathelane lokugcwaliseka kukaMathewu 24:14 othi: “Lezizindaba ezinhle zoMbuso zizatshunyayelwa emhlabeni wonke ukuze kube lobufakazi ezizweni zonke, besekufika ukuphela.” Njengoba sizinikele kuNkulunkulu, silomsebenzi oqakatheke kakhulu okumele siwenze masinyane. Kufanele sikhuthalele ukutshumayela ukuphela kungakafiki. UJehova uzakwenza ukuthi umsebenzi lo uphumelele njalo uzasibusisa nxa singabambisana laye.—Hez. 3:18-21.
OKUMELE SIKUBIKE
23 Kuyini okumele sikubike? Iphetshana elithi Umbiko Wenkonzo Yasensimini (S-4) liyatshengisa ukuthi kuyini okumele sikubike. Ake sixoxe ngokusephetshaneni leli.
24 Engxenyeni ethi, “Okuhanjisiweyo (Okuprintiweyo Lokuthunyezwe Ngezempucuko),” sibhala inani lalokho esikunike abantu abangayisibo oFakazi. Engxenyeni ethi, “Amavidiyo Abukeliswe Abantu” sibhala ukuthi kukangaki esibukelise khona abantu amavidiyo ethu.
25 Engxenyeni ethi, “Izimpindela” kumele sibhale ukuthi sibuyele kangaki emuntwini ongasoFakazi ukuze siqhubeke ngokufunda laye iBhayibhili. Yikho nxa singaphinda sixoxe ngeBhayibhili lomuntu esike samtshumayeza, loba simfonele, simbhalele incwadi, simthumele umlayezo loba i-email, kumbe simtshiyele okuthile okudindwe yinhlanganiso siyabe siphindele. Kanti njalo ungaqhuba isifundo seBhayibhili lomuntu kumele ubale impindela. Umzali angabika impindela eyodwa ngeviki nxa benze ukukhonza kwemuli ngaleyoviki futhi kulomntwana ongabhabhathizwanga.
26 Lanxaummemezeli engafunda lomuntu maviki wonke, ekupheleni kwenyanga kumele abike isifundo esisodwa. Kufanele abike inani lezifundo ezitshiyeneyo aziqhube ngaleyonyanga. Izifundo esingazibika yilezo esiziqhuba labantu abangayisibo oFakazi. Kanti njalo ummemezeli angabika isifundo nxa efunda lomuntu osanda kubhabhathizwa kodwa engakaqedi ibhuku elithi Ungathokoza Kuze Kube Nini Lanini! kumbe nxa ecelwe lilunga lekhomithi yenkonzo ukuthi afunde lomfowethu kumbe udadewethu ongasafezi inkonzo.
27 Kuqakathekile ukuthi sibike “Amahora” aqondileyo esiwenza ekutshumayeleni. Lesi yisikhathi esisiqeda sitshumayela obala, endlini ngendlu, siphindela, siqhuba izifundo zeBhayibhili kumbe nxa sitshumayela loba ngaphi lapho okuvele khona ithuba. Nxa abamemezeli behamba ndawonye kufanele babike isikhathi abasiqede betshumayela kodwa ngoyedwa kuphela ozabika impindela kumbe izifundo eziqondane laye. Abazali bobabili bangabika ihora elilodwa kuphela ngeviki nxa benze uKukhonza Kwemuli labantwababo. Abazalwane bangabala isikhathi abasiqede benikela inkulumo kazulu wonke futhi nxa kulotolikayo laye angabika. Zikhona sibili izinto eziqakathekileyo kodwa esingeke sibike isikhathi sazo, njengokulungiselela ukuya ekutshumayeleni, ukungena umhlangano wenkonzo kumbe ukwenza eminye imisebenzi.
28 Ummemezeli ngamunye kufanele asebenzise umzwangedwa wakhe oqeqetshwe liBhayibhili nxa ekhetha ukuthi uzasibala njani isikhathi asiqede ekutshumayeleni. Abanye abamemezeli batshumayela endaweni ezilabantu abanengi ikanti abanye basendaweni ezilabantu abalutshwane futhi kuyabe kumele bahambe umango omude. Izindawo esitshumayela kuzo ziyatshiyana futhi lendlela abamemezeli ababona ngayo inkonzo yabo iyatshiyana. IQula Elibusayo kalitshayi imithetho endabeni yokubala isikhathi sokutshumayela njalo kakho okhethwe ukuthi ahlulele abanye endabeni le.—Mat. 6:1; 7:1; 1 Tim. 1:5.
29 Nxa sibika isikhathi sokutshumayela kumele sibhale amahora agcweleyo. Kodwa kulelungiselelo elenzelwe labo abangenelisiyo ukutshumayela okwesikhathi eside ngenxa yokuguga lalabo abangenelisiyo ukuphuma endlini ngenxa yokugula kumbe ukukhubazeka. Ummemezeli okulesosimo angabika imizuzu engu-15 loba edlula lapho ngenyanga ngoba uyabe elokhu esayifeza inkonzo yakhe. Ilungiselelo leli lingasebenza lakulabo abangabe begula kakhulu kumbe belimele okwesikhathi esithile. Kodwa lenzelwe labo abalezimo ezingavumiyo kuphela njalo ikhomithi yenkonzo yiyo ehlolayo ibone ukuthi ummemezeli angavunyelwa yini ukuthi asebenzise uhlelo lolu.
IKHADI LOMMEMEZELI
30 Umbiko olethwa ngummemezeli ngamunye ubhalwa ekhadini lakhe elibizwa ngokuthi li-Khadi Lommemezeli. Amakhadi abamemezeli agcinwa emafayilini ebandla. Kuqakathekile ukuthi utshele abadala nxa usuthuthela kwelinye ibandla ukuze unobhala webandla osuka kulo abe leqiniso lokuthi amakhadi akho ayathunyelwa ebandleni oya kulo. Lokhu kuzanceda abadala bebandla osukulo ukuthi bakwazi ngcono lokuthi benelise ukukuncedisa ukuze uqhubeke uqinile ekukhonzeni. Kodwa nxa kuyikuthi uzavakatsha okwenyanga ezintathu kumbe ezingedluli lapho, ungaqhubeka uthumela umbiko wakho ebandleni lakho.
KUNGANI KUMELE SIBIKE?
31 Uyake ukhohlwe yini ukuhambisa umbiko wakho? Sonke siyake sikhunjuzwe ngezinye izikhathi. Kodwa nxa singazwisisa ukuthi kungani kuqakathekile ukubika, sizakhumbula ukuhambisa imibiko yethu ngesikhathi.
32 Kodwa abanye bayazibuza: “Kungani kumele ngibike yena uJehova ebona konke engikwenzayo enkonzweni yakhe?” Liqiniso sibili ukuthi uJehova uyakubona konke esikwenzayo njalo uyabona lokuthi sikwenza ngenhliziyo yonke yini loba hatshi. Kodwa khumbula ukuthi uJehova wenza ukuthi kubhalwe phansi insuku uNowa azihlala emkhunjini leminyaka ama-Israyeli ayihlala enkangala. Wabhala lenani labantu ababethembekile kuye lalabo ababengathembekanga. Waphinda wabhala lendlela ilizwe laseKhenani elanqotshwa ngayo kanye lokuthi abahluleli bako-Israyeli babenqoba njani. Kunengi sibili uNkulunkulu akubhalayo mayelana lezinceku zakhe futhi konke wakugcina ukuze sibone ukuqakatheka kokugcina imibiko eqondileyo.
33 Indaba eziseBhayibhilini zitshengisa ukuthi abantu bakaJehova babekuqakathekisa kakhulu ukugcina imibiko eqondileyo. Ezinye indaba ezikulo bezingeke zicace aluba akuzange kubhalwe amanani ezinto ezithile. Cabanga ngezibonelo ezilandelayo: UGenesisi 46:27; U-Eksodusi 12:37; ABahluleli 7:7; 2 AmaKhosi 19:35; 2 ImiLando 14:9-13; UJohane 6:10; 21:11; ImiSebenzi 2:41; 19:19.
34 Lanxa singabiki yonke into esiyenza ekukhonzeni uJehova, ukubika kwethu kuluncedo kakhulu enhlanganisweni yakhe. Ngelinye ilanga abafundi bakaJesu bevelatshumayela bafika “bamlandisela zonke izinto ababezenzile lababezifundise abantu.” (Mak. 6:30) Ukubika kwenza kube lula ukuthi inhlanganiso inanzelele lapho okumele sithuthukise khona emsebenzini wokutshumayela. Ngokwesibonelo singabe sisenza kuhle kwezinye indawo kodwa imibiko ibisitshengisa ukuthi inani labamemezeli alisakhweli. Nxa kungaba njalo ababonisi bayakhangela imbangela yalokho besebezama ngamandla wonke ukuncedisa lokukhuthaza abamemezeli abathile kumbe ibandla lonke ukuthi lithuthuke.
35 Ukubika kunceda lokuthi inhlanganiso ibone lapho okudingakala khona abamemezeli abanengi. Ngokwesibonelo iyakhangela ukuthi kungaphi lapho okulabantu abafuna ukufunda iBhayibhili lalapho okungatheli khona kakhulu. Kuyayinceda lokubona ukuthi yiwaphi amabhuku afunekayo ukuze kufundiswe abantu iqiniso lokuthi ihlale ikulungele ukuthumela amabhuku eneleyo ezindaweni ezitshiyeneyo.
36 Kuyasikhuthaza kakhulu ukuzwa imibiko evela emhlabeni wonke yalokho okwenziwa ngabafowethu labodadewethu emsebenzini wokutshumayela. Kuyasinceda sibone ukuthi inhlanganiso kaJehova ikhula kangakanani. Ukuzwa imibiko emihle yalokho okwenziwa ngabafowethu kuyasiqinisa futhi kusenza sikhuthale emsebenzini wokutshumayela. (ImiSeb. 15:3) Singazimisela ukuhambisa imibiko yethu ngesikhathi, siyabe sitshengisa ukuthi silendaba labafowethu labodadewethu emhlabeni wonke lokuthi sihambisana lendlela uJehova ahlele ngayo izinto.—Luk. 16:10; Heb. 13:17.
UKUHLELA OFUNA UKUKWENZA EKUKHONZENI
37 Akumelanga siziqathanise labanye emsebenzini wokutshumayela ngoba izimo zethu ziyatshiyana. (Gal. 5:26; 6:4) Kodwa okungasinceda kakhulu yikuhlela lokho esifuna ukukwenza ekukhonzeni besesizihlola ukuthi siyathuthuka yini. Ukwenza lokho esiyabe sikuhlelile kuzasenza sithokoze kakhulu.
38 Akuthandabuzwa ukuthi uJehova uyawusekela umsebenzi wokuqoqa labo azabavikela “ekuhluphekeni okukhulu.” Kulesisikhathi esiphila kuso siyakubona ukugcwaliseka kwesiphrofetho sika-Isaya esithi: “Ingcosana yakho izakuba yinkulungwane, abancinyane bazakuba yisizwe esilamandla. Mina nginguJehova; ngesikhathi esifaneleyo lokhu ngizakwenza ngokuphangisa.” (Isam. 7:9, 14; Isaya. 60:22) Kuyisibusiso sibili ukuncedisa emsebenzini wokutshumayela kulezinsuku zokucina.—Mat. 24:14.