Ibhokisi Lemibuzo

◼ Kumele ukungena kommemezeli ongakabhaphathizwa imihlangano lokutshumayela kwakhe kutshengiseni ukuze afanele ukubhaphathizwa?

Ukubhaphathizwa yisinqumo esiqakatheke ukwedlula zonke umuntu angazenza. Ngakho-ke, umuntu engakafaneli ukuthi abhaphathizwe, kumele abe esezwisisa ngokwezinga elithile ukuthi yiziphi izinto uNkulunkulu afuna azenze. Okunye yikuthi kumele abe esetshengisile ukuthi uzimisele ukuphila ngezimiso zikaNkulunkulu.

AmaKhristu alaywa ukuthi angekeli ukuhlangana ndawonye, ngakho ummemezeli ongakabhaphathizwa kumele abesetshengisa ukuthi ukhuthele ekungeneni imihlangano yebandla. (Heb. 10:24, 25) Uyabe ehlanganyela ngokuphendula emihlanganweni. Kungenzeka lokuthi abe ebhalisile eSikolo seNkonzo samaKhristu, lanxa lokhu kungadingeki ukuze abhaphathizwe.

Okunye yikuthi njengoba amaKhristu ephiwe umlayo wokutshumayela izindaba ezinhle lokwenza abafundi, kumele ummemezeli ongakabhaphathizwa ahlanganyele zikhathi zonke ekutshumayeleni. (Mat. 24:14; 28:19, 20) Kumele abe eselezinyanga ezingaki engummemezeli ukuze enelise ukubhaphathizwa? Okulengqondo yikuthi kumele anikwe isikhathi eseneleyo ukuze atshengise ukuthi uzimisele sibili ukuthi atshumayele ngentshiseko inyanga ngayinye. (Hubo. 78:37) Kodwa kakudingeki ukuthi kuhlale isikhathi eside kusukela ngesikhathi eqalisa ukutshumayela kuze kube yisikhathi esefanela ukubhaphathizwa, mhlawumbe kungaba yizinyanga ezilutshwana. Kumele abe ebika amahora amangaki enkonzo yasensimini? Akula mithetho efakiweyo. Abadala kumele bacabange ngezimo zommemezeli ngamunye ezingafanani lezabanye futhi balinganisele kulokho abakukhangelele kuye.​—Luka 21:1-4.

Abadala (loba izinceku ezikhonzayo nxa kusemabandleni alabadala abalutshwana) abazahlangana lozabhaphathizwa kumele bakhumbule ukuthi umuntu ngamunye kafanani lomunye, njalo kumele basebenzise ukwahlulela okuhle ekuthini benze isinqumo sokuthi ufanele yini ukuthi abhaphathizwe loba hatshi. Kumele babe leqiniso lokuthi ulesifiso seqiniso sokuba nguFakazi kaJehova lesokutshengisa ukuthi uyabonga ngesibusiso sokuhlanganyela lenhlanganiso kaJehova kanye lesokuhlanganyela ekutshumayeleni. Abadala bayazwisisa ukuthi kakabi ngumKhristu okhulileyo ngokomoya kumbe kakabi lobungcitshi obufanana labamemezeli ababhaphathiziweyo asebelolwazi olunengi. Nxa kuyikuthi abadala bambona engafaneli ukuthi abhaphathizwe, kumele ngomusa bamtshele izizathu ezitholakala eMibhalweni zokuthi kungani benze isinqumo leso futhi kumele bamncede ukuthi athole uncedo ngokomoya.